NAʻE maʻu ʻe ha tangata ha lauʻipepa ʻi he faliki ʻo ha lēlue ʻa ia naʻe ʻalu ki he kolo ko Niu ʻIoké. ‘ʻOku lava ke mate ʻa e laumālie ʻo e tangatá,’ ko e meʻa ia ne hā he lauʻipepá. ʻI heʻene mahuʻingaʻiá, naʻe kamata ke lau ia ʻe he tangatá ʻa ia ko ha faifekau. Naʻá ne ʻohovale koeʻuhí he naʻe ʻikai ʻaupito ke ne fakakikihiʻi ʻe ia ki muʻa ʻa e akonaki ko ia ʻo e taʻefaʻamate ʻa e laumālié. ʻI he taimi ko iá, naʻe ʻikai ke ne ʻiloʻi pe ko hai naʻá ne faʻu ʻa e lauʻipepá. Neongo ia, naʻá ne ongoʻi ko e fakamatalá ʻoku ala lava ke moʻoni ia mo Fakatohitapu pea ʻoku tuha ia ke fai hano ako fakamātoato.

Ko e faifekaú ko George Storrs. Naʻe hoko ʻa e meʻá ni ʻi he 1837, ʻa e taʻu ʻa ia naʻe ʻuluaki hiki ai ʻe Charles Darwin ʻi heʻene tohí ʻa e ngaahi fakakaukau ʻa ia naʻe tupulekina ki mui ai ki heʻene fakamahamahalo ko ia fekauʻaki mo e ʻevalūsioó. Ko e tokolahi taha ʻi he māmaní naʻa nau kei anga fakalotu pē, pea naʻe tui ʻa e tokolahi taha ʻo e kakaí ki he ʻOtuá. Ko e tokolahi naʻa nau lau ʻa e Tohi Tapú pea vakai ki ai ko ha mafai māʻolunga ia.

Naʻe toki ʻiloʻi ki mui ʻe Storrs ko e kiʻi lauʻipepá naʻe faʻu ia ʻe Henry Grew ʻo Philadelphia, Pennsylvania. Naʻe piki maʻu ʻa Grew ki he tefitoʻi moʻoni ʻoku pehē “ko e Tohi Tapú . . . ko ia pē ʻokú ne fakamatalaʻi lelei taha ʻa e Tohi Tapú.” Naʻe ako ʻe Grew mo e faʻahinga naʻa nau tui tataú ʻa e Tohi Tapú fakataha mo e taumuʻa ko e muimui ʻenau moʻuí mo e ngāué ki he akonaki ʻoku ʻomi aí. Naʻe fakaeʻa ʻe heʻenau akó ʻa e ngaahi moʻoni Fakatohitapu fisifisimuʻa ʻe niʻihi.

ʻI hono ueʻi ʻe he meʻa naʻe hiki ʻe Grew, naʻe vakaiʻi fakalelei ai ʻe Storrs ʻa e meʻa ʻoku leaʻaki ʻe he Tohi Tapú ʻo fekauʻaki mo e laumālié pea fetalanoaʻaki mo e niʻihi ʻo hono kaungā faifekaú ʻo fekauʻaki mo e meʻá. Hili ʻa e ako fakamātoato he taʻu ʻe nima, naʻe faifai atu pē ʻo fili ʻa Storrs ke ʻai ke ʻilo ʻe he kakaí ʻa ʻene mataʻikoloa ʻa ia ko e moʻoni Fakatohitapu naʻá ne toki maʻú. ʻUluakí, naʻá ne teuteuʻi ha foʻi malanga ke ne fakahoko he Sāpate ʻe taha ʻi he taʻu 1842. Kae kehe, naʻá ne ongoʻi ʻa e fiemaʻu ko ia ke fai ha toe ngaahi malanga lahi ange ke fakamahino fakalelei ʻa e tuʻunga-leá ni. Faifai atu pē, naʻe aʻu ki he malanga ʻe ono naʻá ne fakahoko ʻo fekauʻaki mo e lava ke mate ʻa e laumālie ʻo e tangatá, ʻa ia naʻá ne pulusi ʻi he Six Sermons. Naʻe fakahoa ʻe Storrs ʻa e ngaahi konga Tohi Tapú ke fakaeʻa ai ʻa e moʻoni fisifisimuʻa kuo tanumia ʻe he ngaahi tokāteline taʻefakalāngilangiʻi-ʻOtua ʻa e Puleʻanga-Haʻa-Kalisitiané.

ʻOku lave ʻa e Tohi Tapú ʻo fekauʻaki mo e kau muimui pani ʻo Sīsuú kuo foaki kiate kinautolu ʻa e taʻefaʻamaté ko ha pale ia ki heʻenau faitōnungá. (1 Kolinito 15:​50-56) Naʻe fakaʻuhinga ʻa Storrs ʻo pehē kapau ko e taʻefaʻamaté ko ha pale ia ki he faitōnungá, ʻe ʻikai lava ke taʻefaʻamate ʻa e laumālie ia ʻo e kau fulikivanú. ʻI he ʻikai fakamahamahaló, naʻá ne sivisiviʻi ʻa e Tohi Tapú. Naʻá ne vakaiʻi fakalelei ʻa e Mātiu 10:​28, King James Version, ʻa ia ʻoku pehē: “Manavahē kiate ia ʻokú ne lava ke fakaʻauha fakatouʻosi ʻa e laumālié mo e sinó ʻi helí.” Ko ia ko e laumālié ʻoku lava ke fakaʻauha ia. Naʻá ne toe sio foki ki he Isikeli 18:​4, ʻa ia ʻoku pehē: “Ko e laumālie ʻoku faiangahalá, ʻe mate ia.” (KJ) ʻI he taimi  naʻe vakaiʻi fakalelei ai ʻa e Tohi Tapú kātoa, naʻe hā mahino ʻa e moʻoni fisifisimuʻa ko iá. Naʻe tohi ʻe Storrs ʻo pehē: “Kapau ʻoku tonu ʻa ʻeku tui ʻoku lava ke mate ʻa e laumālié, tā ko e ngaahi konga lahi ʻo e Tohi Tapú ʻa ia kuo fakaʻuliʻulilātaiʻi ʻe he tui ko ia ʻo pehē ʻoku taʻefaʻamaté, ʻoku hoko ia ʻo mahino, fakafiefia pea mohu ʻuhinga mo mālohi.”

Kae fēfē ʻa e ngaahi konga Tohi Tapu hangē ko ia ko e Siutasi 7? ʻOku pehē ai: “Ko Sotoma foki mo Komola, mo e ngaahi kolo naʻe tuʻu takai ki ai, ʻa ia naʻa nau tuli ki he feʻauaki, ʻo hange tofu pe ʻa e faʻahinga ko é, ʻo nau afe ki ha faʻahinga kakano kehe, ko ia kuo fokotuʻu kinautolu ko e taipe, honau moʻua he tautea totonu, ko e afi taʻengata.” ʻI hono lau ʻa e konga tohi ko ʻení, ʻe fakaʻosiʻaki nai ʻe ha niʻihi ʻo pehē ko e laumālie ʻo e faʻahinga naʻe tāmateʻi ʻi Sōtoma ko Komolá ʻoku fakamamahiʻi taʻengata ia ʻi he afí. “Tau fakahoa ʻa e ngaahi konga Tohi Tapú,” ko e tohi ia ʻe Storrs. Naʻá ne toʻo hangatonu leva ʻa e 2 Pita 2:​5, 6, ʻa ia ʻoku pehē: “Pea kapau naʻe ʻikai te ne maemaeʻekina ʻa e maama motuʻa, ka ne tauhi . . . ʻa Noa, . . . ʻi heʻene ʻomi ʻa e Lōmaki ki he maama ʻo e kau fakaʻotuamate: mo ne tutu ke efu ʻa e ongo kolo ko Sotoma mo Komola, mo ne fakamāu ke nofo ko e koto lusa, ʻo ne tuku ai ha taipe ki he kau fakaʻotuamate ʻo e ʻamui.” ʻIo, naʻe liliu efuefu ʻa Sōtoma mo Komola, ʻo fakaʻauha taʻengata fakataha mo e faʻahinga naʻa nau nofo aí.

“ʻOku fakamaʻalaʻala mai ʻe Pita ʻa Siutasi,” ko e fakamatala ia ʻa Storrs. “ʻI hono fakahoa ʻa e ongo tohí ni ʻoku hā mātuʻaki maʻalaʻala ai ʻa e ngaahi meʻa fakamamahi kuo fai ʻe he ʻOtuá ki he kau faiangahalá. . . . Ko e ngaahi fakamaau ko ia naʻe fakahoko ki he māmani motuʻá, ʻa Sōtoma mo Komola, ko ha ekinaki, fakatokanga pe ‘fakatātā’ tuʻuloa mo taʻengata ia ki he kotoa ʻo e tangatá ʻo aʻu ki he ngataʻanga ʻo e māmaní.” Ko ia naʻe lave ʻa Siutasí ia ki he uesia taʻengata ʻo e afi ko ia naʻá ne fakaʻauha ʻa Sōtoma mo Komolá. ʻOku ʻikai ai haʻane liliu ʻe taha ʻa e moʻoni ko ia ko e laumālie ʻo e tangatá ʻoku lava ke mate.

Naʻe ʻikai ke ngāueʻaki pē ʻe Storrs ʻa e ngaahi konga Tohi Tapu ʻa ia naʻá ne poupouʻi ʻa ʻene fakakaukaú kae tukunoaʻi ʻa e ngaahi konga tohi kehé. Naʻá ne vakaiʻi ʻa e potutohi ʻo e konga tohi taki taha pea pehē foki ki he ʻuhinga fakalūkufua ʻo e Tohi Tapú. Kapau naʻe hā ngali fepaki ha veesi mo ha ngaahi konga Tohi Tapu kehe, naʻe sio leva ʻa Storrs ia ki he toenga ʻo e Tohi Tapú ki ha fakamatala totonu.

Naʻe ʻi he haʻohaʻonga ʻo e faʻahinga naʻe feohi mo George Storrs ha kiʻi tangata ʻa ia naʻá ne fokotuʻutuʻu ha kulupu ako Tohi Tapu ʻi Pittsburgh, Pennsylvania. Ko hono hingoá ko Charles Taze Russell. Ko e taha ʻo ʻene ngaahi ʻuluaki kupu fekauʻaki mo e ngaahi kaveinga Fakatohitapú naʻe pulusi ia ʻi he 1876 ʻi he makasini Bible Examiner, ʻa ia naʻe ʻetitaʻi ʻe Storrs. Naʻe fakahā ʻe Russell ʻo pehē naʻe tākiekina ia ʻe he kau ako Tohi Tapu ki muʻa atu. Ki mui ai, ʻi hono tuʻunga ko e ʻētita ʻo e Zion’s Watch Tower, naʻá ne houngaʻia ʻi hono tokoniʻi lahi ia ʻe Storrs, ʻo fakatouʻosi ʻi he tala ngutu mo e meʻa naʻe hiki.

ʻI hono taʻu 18, naʻe fokotuʻu ai ʻe C. T. Russell ha kalasi ako Tohi Tapu pea fokotuʻu ai ha founga ki hono ako ʻa e Tohi Tapú. Ko A. H. Macmillan, ko ha tokotaha ako Tohi Tapu ia naʻe feohi mo Russell, naʻá ne fakamatalaʻi ʻa e founga ko ʻení: “ʻE ʻohake ʻe ha taha ha foʻi fehuʻi. Te nau lāulea leva ki ai. Te nau sio ki he kotoa ʻo e ngaahi konga Tohi Tapu ʻoku felāveʻi mo e poiní pea ʻi heʻenau fiemālie pē ʻi he feongoongoi ʻa e ngaahi konga tohi ko ʻení, te nau toki fakahā leva ʻa ʻenau aofangatukú pea ʻai ʻo lēkooti.”

Naʻe tuipau ʻa Russell ko e Tohi Tapú ʻi hono vakaiʻi fakakātoá, kuo pau ke fakaeʻa ai ha pōpoaki ʻa ia ʻoku feongoongoi mo faitatau mo ia tonu pea mo hono Faʻu-Tohí, ʻa e ʻOtuá. ʻI ha taimi pē ʻoku hā ngali faingataʻa ai ke mahinoʻi ha faʻahinga konga pē ʻo e Tohi Tapú, naʻe ongoʻi ai ʻe Russell ʻoku totonu ke fakamahino mo fakamatalaʻi ia ʻe he ngaahi konga kehe ʻi he Tohi Tapú.

Kae kehe, ʻoku ʻikai ko Russell, Storrs pe ko Grew ʻa e ʻuluaki taha kuó ne tuku ki he Tohi Tapú ke ne fakamatalaʻi pē ʻa e Tohi Tapú. Ko e anga ko ʻení naʻe kamata ia ki muʻa fuoloa ʻe he Tokotaha naʻá ne fokotuʻu ʻa e lotu faka-Kalisitiané, ʻa Sīsū Kalaisi. Naʻá ne ngāueʻaki ha ngaahi konga Tohi Tapu ke fakamahinoʻaki ʻa e ʻuhinga totonu ʻo ha konga tohi. Hangē ko ʻení, ʻi he taimi naʻe fakaangaʻi ai ʻe he kau Fālesí ʻa ʻene kau ākongá ʻi heʻenau toli uite ʻi he Sāpaté, naʻe fakahā ai ʻe Sīsū ʻa e founga ʻoku totonu ke ngāueʻaki ai ʻa e lao ʻo e  Sāpaté ʻaki ʻene lave ki he talanoa naʻe hiki ʻi he 1 Samiuela 21:6. Naʻe maheni ʻa e kau taki lotú mo e talanoa ko iá, ʻa ē naʻe kai ai ʻe Tēvita mo ʻene kau tangatá ʻa e mā fonó. Naʻe lave leva ʻa Sīsū ki he konga ʻo e Laó ʻa ia naʻe pehē ai ko e kau taulaʻeiki faka-ʻĒloné pē te nau kai ʻa e mā fonó. (Ekisoto 29:​32, 33; Livitiko 24:9) Neongo ia, naʻe fekau ia kia Tēvita ke ne kai ʻe ia ʻa e mā fonó. Naʻe fakaʻosi ʻe Sīsū ʻa ʻene fakaʻuhinga fakatupu fakalotoʻí ʻaki ʻene toʻo hangatonu mei he tohi Hosea: “Ka ne mou ʻilo hono ʻuhinga ʻo e meʻa ni, Ko e mēsi ʻoku ou tangi ki ai, ʻo ʻikai ko e feilaulau, pehe ne ʻikai te mou fakahalaia ʻa e ʻataʻatā.” (Mātiu 12:​1-8) He faʻifaʻitakiʻanga fakaofo moʻoni ē ʻo hono fakahoa ʻo ha konga Tohi Tapu mo e ngaahi konga tohi kehé ke aʻu ai ki ha mahino totonu!

Naʻe ngāueʻaki ʻe he kau muimui ʻo Sīsuú ʻa e founga tatau ʻo hono ngāueʻaki ʻa e lave ki he ngaahi konga Tohi Tapu kehé ke fakamaʻalaʻala ha konga Tohi Tapu. ʻI he taimi naʻe akoʻi ai ʻe he ʻapositolo ko Paulá ʻa e kakai ʻi Tesalonaiká, naʻá ne “malaga aki ae gaahi tohi kiate kinautolu i he aho sabate e tolu, O fakamatala mo fakamooni, nae tāu mo Kalaisi ke mamahi, mo toe tuu mei he bekia.” (Fakaʻītali ʻamautolu; Ngāue 17:​2, 3, PM) Naʻa mo e ngaahi tohi fakamānavaʻi ʻa Paulá, naʻá ne tuku ai ʻa e Tohi Tapú ke ne fakamatalaʻi pē ʻa e Tohi Tapú. Hangē ko ʻení, ʻi heʻene tohi ki he kau Hepeluú, naʻá ne toʻo hangatonu ai ha ngaahi konga Tohi Tapu lahi ke fakamoʻoniʻiʻaki ko e Laó ko ha ʻata ia ʻo e ngaahi meʻa lelei ka hoko.—Hepelu 10:​1-18.

ʻIo, ko e kau ako Tohi Tapu loto-totonu ʻi he senituli hono 19 mo e konga ki muʻa ʻo e senituli hono 20 naʻa nau toe ngāueʻaki pē ʻa e founga faka-Kalisitiane ko ʻení. Ko e anga ko ia ʻo hono fakahoa ʻa e ngaahi konga Tohi Tapú mo e ngaahi konga tohi kehé ʻoku hokohoko atu ia ʻi he makasini Taua Leʻo. (2 Tesalonaika 2:15) ʻOku ngāueʻaki ʻe he Kau Fakamoʻoni ʻa Sihová ʻa e founga tefito ko ʻení ʻi he taimi ʻoku nau sivisiviʻi ai ha konga Tohi Tapu.

ʻI heʻetau lau ʻa e Tohi Tapú, ʻe lava fēfē ke tau faʻifaʻitaki ki he ngaahi faʻifaʻitakiʻanga lelei ʻa Sīsū mo hono kau muimui faitōnungá? ʻUluakí, ʻe lava ke tau vakaiʻi ʻa e potutohi ʻo e konga Tohi Tapu ko ia ʻoku lolotonga fai hono fehuʻiá. ʻE lava fēfē ke tokoniʻi kitautolu ʻe he potutohí ke tau mahinoʻi ʻa e ʻuhingá? Ke fakatātaaʻi, tau sio angé ki he lea ʻa Sīsū ʻoku hiki ʻi he Mātiu 16:28: “Ko au e, ʻoku ou tala atu, ʻOku ai ha niʻihi ʻo kinautolu ʻoku tutuʻu heni, ʻa ia ʻe ʻikai te nau momoʻi lave ki he mate, kae ʻoua ke nau mamata ki he Fanautama ʻa Tangata ʻoku ne haʻele fakapuleʻanga mai.” ʻE pehē nai ʻe ha niʻihi ko e ngaahi lea ko ʻení naʻe ʻikai fakahoko ia koeʻuhí ko e kotoa ʻo e kau ākonga ia ʻa Sīsū naʻe ʻi ai ʻi he taimi naʻá ne leaʻaki ai ʻa e ngaahi lea ko iá ne nau mate kinautolu ki muʻa ke fokotuʻu ʻa e Puleʻanga ʻo e ʻOtuá ʻi hēvaní. ʻOku aʻu ʻo pehē ʻe he Interpreter’s Bible ʻo fekauʻaki mo e vēsí ni: “Ko e kikité naʻe ʻikai fakahoko, pea naʻe fakakaukau ki mui ai ʻa e kau Kalisitiané ʻoku ala lava ke fakamatala ʻo pehē naʻe tuʻu fakaefakatātā ia.”

Kae kehe, ko e potutohi ʻo e veesi ko ʻení, pea pehē foki ki he ngaahi fakamatala tatau naʻe hiki ʻe Maʻake mo Luké, ʻoku tokoniʻi ai kitautolu ke tau mahinoʻi ʻa e ʻuhinga moʻoni ʻo e konga Tohi Tapu ko iá. Ko e hā naʻe lave ki ai ʻa Mātiu ʻi he hili pē ko ia ʻa e ngaahi lea naʻe hiki ʻi ʻolungá? Naʻá ne tohi: “Hili ʻa e ʻaho ʻe ono, naʻe ʻave ʻe Sisu ʻa Pita, mo Semisi, pea mo Sione ko e tehina ʻo Semisi, pea ne ʻohake kinautolu ki ha moʻunga maʻolunga fakaekinautolu. Pea naʻe fakakehe hono anga ʻi honau ʻao.” (Mātiu 17:​1, 2) Fakatouʻosi ʻa Maʻake mo Luke, naʻá na toe fakafehokotaki ʻa e fakamatala ʻa Sīsū fekauʻaki mo e Puleʻangá ki he fakamatala ko ia ʻo e fakakehé. (Maake 9:​1-8, Luke 9:​27-36) Ko e haʻu ʻa Sīsū ʻi he mālohi ʻo e Puleʻangá naʻe fakahāhā ia ʻi heʻene fakakehé, ʻa ʻene hā lāngilangiʻia ʻi he ʻi ai ʻa e kau ʻapositolo ʻe toko tolú. ʻOku fakamoʻoniʻi ʻe Pita ʻa e mahino ko ʻení ʻi heʻene lave fekauʻaki mo e “malohi moe hoko mai a ho tau Eiki ko Jisu Kalaisi” ʻi he fekauʻaki mo ʻene sio tonu ko ia ʻi he fakakehe ʻa Sīsuú.—2 Pita 1:​16-18, PM.

Fēfē kapau ʻoku ʻikai lava ke ke mahinoʻi ʻe koe ha konga Tohi Tapu neongo kuó ke ʻosi vakaiʻi ʻa hono potutohí? ʻE lava ke ke maʻu ʻaonga mei hono fakahoa ia mo e ngaahi konga Tohi Tapu kehé, ʻo manatuʻi ʻa e ʻuhinga fakalūkufua ʻo e Tohi Tapú. Ko ha meʻangāue lelei ʻaupito ki hono fai ʻení ʻe lava ke maʻu ia ʻi he New World Translation  of the Holy Scriptures, ʻa ia ʻoku ala maʻu kakato pe konga pē he taimí ni ʻi he ngaahi lea ʻe 57. Ko e meʻangāué ni ko ha lisi ia ʻo e ngaahi maʻuʻanga fakamatala he tafaʻakí pe maʻuʻanga fakamatala fekolosiʻaki, ʻa ia ʻoku hā ʻi he kōlomu ʻi loto ʻo e peesi taki taha ʻi he lahi taha ʻo hono ngaahi pulusingá. ʻE lava ke ke maʻu ʻa e ngaahi maʻuʻanga fakamatala pehē ʻo laka hake he 125,000 ʻi he New World Translation of the Holy Scriptures—With References, ʻa ia ʻoku ala maʻu ʻi he ngaahi lea lalahi ʻe niʻihi. Ko e “Talateu” ʻo e Tohi Tapu ko iá ʻoku fakamatala ai: “Ko hano fakahoa fakalelei ʻa e ngaahi maʻuʻanga fakamatala he tafaʻakí pea mo hano sivisiviʻi ʻa e ngaahi fakamatala ʻi laló ʻe fakaeʻa ai ʻa e feongoongoi ʻaupito ʻa e ngaahi tohi ʻe 66 ʻo e Tohi Tapú, ʻo fakamoʻoniʻi ai ko e konga kinautolu ʻo e tohi ʻe taha ʻa ia naʻe fakamānavaʻi ʻe he ʻOtuá.”

Tau sio angé ki he founga ʻe lava ke tokoniʻi ai kitautolu ʻe hono ngāueʻaki ʻa e ngaahi maʻuʻanga fakamatala fekolosiʻakí ke tau mahinoʻi ha konga Tohi Tapu. Ko e fakatātaá, fakakaukau atu angé ki he hisitōlia ʻo ʻEpalame, pe ʻĒpalahamé. Fakakaukau angé ki he fehuʻi ko ʻení: Ko hai naʻe takimuʻa ʻi he taimi naʻe fononga ai ʻa ʻEpalame mo hono fāmilí ki ʻUá? ʻOku pehē ʻe he Senesi 11:31: “Pea ʻave ʻe Tela ʻa hono foha ko Epalame, mo hono mokopuna ko Lote, . . . mo Selai ko hono ʻofefine [ʻi he fonó] . . . ; pea naʻa nau ʻalu fakataha mei Ua ʻo e kau Kalitia ko ʻenau fononga ki he fonua ko Kenani; pea nau aʻu ki [Hālani] ʻo nofo ai.” ʻI hono lau pē ʻa e konga tohi ko ʻení, ʻe fakaʻosiʻaki nai ʻe ha taha ʻo pehē ko e tamai ʻa ʻEpalamé, ʻa Tela, ko ia naʻe takimuʻá. Kae kehe, ʻi he New World Translation, ʻoku tau maʻu ai ʻa e ngaahi maʻuʻanga fakamatala fekolosiʻaki ʻe 11 ʻi he veesi ko ʻení. Ko e maʻuʻanga fakamatala fakaʻosí ʻoku ʻave ai kitautolu ki he Ngāue 7:​2, ʻa ia ʻoku tau lau ai ʻa e ekinaki ʻa Sitīveni ki he kau Siu ʻi he taimi ʻo e kau ʻapositoló: “Nae ha mai ae Otua lagilagi ki he e tau tamai ko Ebalahame, i he ene kei i Mesobotemia, kae teeki nofo ia i [Hālani], O ne behe kiate ia, Alu i ho fonua, mei ho kaiga, bea ke alu ki he fonua teu fakaha kiate koe.” (Fakaʻītali ʻamautolu; Ngāue 7:​2, 3, PM) Naʻe fetoʻoaki nai ʻeni ʻe Sitīveni mo e mavahe ko ia ʻa ʻEpalame mei Hālaní? ʻOku hā mahino ʻene ʻikai peheé, he ko e konga ʻeni ia ʻo e Folofola fakamānavaʻi ʻa e ʻOtuá.—Senesi 12:​1-3.

Ko ia ai, ko e hā ʻoku pehē ai ʻe he Senesi 11:31 naʻe “ʻave ʻe Tela ʻa hono foha ko Epalame” pea mo e niʻihi kehe ʻo hono fāmilí pea nau ō ki ʻUá? Naʻe kei hoko pē ʻa Tela ia ko e ʻulu fakapēteliaké. Naʻá ne loto-tatau ke ʻalu fakataha mo ʻEpalame, pea ko e meʻa ia ʻoku pehē ai ko ia naʻá ne ʻave ʻa e fāmilí ki Hālaní. ʻI hono fakahoa mo fakafehokotaki ʻa e ongo konga Tohi Tapu ko ʻení, ʻoku lava ke tau mahinoʻi ai ʻa e meʻa tofu pē ko ia naʻe hokó. Naʻe fakalotoʻi anga-fakaʻapaʻapa ʻe ʻEpalame ʻa ʻene tamaí ke nau ō ki ʻUa ʻo fakatatau ki he fekau ʻa e ʻOtuá.

ʻI he taimi ʻoku tau lau ai ʻa e Tohi Tapú, ʻoku totonu ke tau fakakaukau ki he potutohí pea mo e ʻuhinga fakalūkufua ʻo e Tohi Tapú. ʻOku naʻinaʻi mai ki he kau Kalisitiané: “Oku ikai koe laumalie o mamani kuo tau maʻu, ka koe laumalie oku mei he Otua; koeuhi ke tau ilo ae gaahi mea kuo foaki [maʻataʻatā] be kiate kitautolu e he Otua. Ae gaahi mea koia oku mau lea ki ai, kae ikai i he gaahi lea oku ako mai e he boto oe tagata, ka koia oku ako aki e he Laumalie Maonioni; o fakamatala ae mea fakalaumalie aki ae mea fakalaumalie.” (1 Kolinito 2:​11-13, PM) Ko e moʻoni, kuo pau ke tau kōlenga kia Sihova ki ha tokoni ke tau mahinoʻi ai ʻa ʻene Folofolá pea feinga ke “fakamatala ae mea fakalaumalie aki ae mea fakalaumalie” ʻaki hono vakaiʻi ʻa e potutohi ʻo e konga Tohi Tapu ʻoku fehuʻiá pea kumi ki he ngaahi konga Tohi Tapu ʻoku felāveʻi mo iá. ʻOfa ke tau hokohoko atu ʻa e kumi ki he ngaahi mataʻikoloa ngingila ʻo e moʻoní ʻo fakafou ʻi hono ako ʻa e Folofola ʻa e ʻOtuá.