Paluki—Ko e Sekelitali Faitōnunga ʻa Selemaiá

ʻOKÚ KE ʻiloʻi ʻa “Paluki foha ʻo Nelaia”? (Selemaia 36:4) Neongo ʻoku lave kiate ia ʻi he vahe pē ʻe fā ʻi he Tohi Tapú, ʻoku ʻilolahia ia ʻe he kau lau Tohi Tapú ko e sekelitali mo e kaungāmeʻa ofi ia ʻo e palōfita ko Selemaiá. Naʻá na hokosia fakataha ʻa e ngaahi taʻu taʻemanonga fakaʻosi ʻe 18 ʻo e puleʻanga ʻo Siutá, ko e fakaʻauha fakamamahi ʻo Selusalema ʻi he 607 K.M. ʻe he kau Pāpiloné pea mo e fakaheeʻi ki ʻIsipite naʻe hoko hili pē iá.

ʻI hono maʻu ʻi he ngaahi taʻu ki muí ni maí ha ongo sila ʻumea a mei he senituli hono fitu K.M. ʻa ia naʻe tohi ai ʻo pehē “Tohi ʻa Berekhyahu [hingoa faka-Hepelū ʻo Palukí], foha ʻo Neriyahu [hingoa faka-Hepelū ʻo Nelaiá], ko e Sikalaipé,” kuo langaʻi ai ʻa e mahuʻingaʻia ʻa e kau mataotaó ʻi he tokotaha ko ʻeni ʻoku ʻasi ʻi he Tohi Tapú. Ko hai ʻa Paluki? Ko e hā hono puipuituʻa fakafāmilí, tuʻunga fakaakó pea mo e lakanga naʻá ne maʻú? Ko e hā ʻoku hā mei heʻene tuʻumaʻu fakataha mo Selemaiá? Ko e hā ʻe lava ke tau ako meiate iá? Tau kumi angé ki ha ngaahi tali ʻaki hano vakaiʻi ʻa e fakamatala Fakatohitapu mo fakahisitōlia ʻoku ala maʻú.

Puipuituʻá mo e Lakangá

ʻOku tui ʻa e kau mataotao tokolahi he ʻahó ni naʻe kau ʻa Paluki ia ki ha fāmili fakaesikalaipe tuʻu-ki-muʻa ʻi Siuta. ʻOku nau ʻomi ʻa e ngaahi ʻuhinga lahi ki heʻenau fakakaukau peheé. Ko e fakatātaá, ʻoku lave ʻa e fakamatala ʻi he Tohi Tapú kia Paluki ʻaki ha hingoa fakalakanga makehe, “ko e sekelitali,” pe “ko e sikalaipé” ʻi he ngaahi liliu ʻe niʻihi. ʻOku toe lave foki ʻa e Tohi Tapú ki hono tokouá, ʻa Selaia, ko ha ʻōfisa māʻolunga ia ʻi he lotoʻā ʻo Tuʻi Setekaiá.—Selemaia 36:32; 51:59.

ʻOku tohi ʻe he ʻākeolosia ko Philip J. King ʻo fekauʻaki mo e kau sikalaipe ʻi he ʻaho ʻo Selemaiá: “Ko e kau sikalaipé, ko e kau mēmipa kinautolu ʻo ha faʻahinga naʻe ʻi ha lakanga māʻolunga, ʻa ia naʻa nau tuʻu-ki-muʻa ʻi Siuta ʻi he lolotonga ʻa e fakaʻosinga ʻo e senituli hono fitú mo e kamataʻanga ʻo e senituli hono ono K.M. . . . Ko e hingoa fakalakangá ni naʻe maʻu ia ʻe he kau ʻōfisa māʻolunga fakatuʻi.”

ʻIkai ko ia pē, ko e fakamatala ʻi he Selemaia vahe 36, ʻa ia te tau lāulea fakaʻāuliliki ki aí, ʻoku ʻomi ai ʻa e fakakaukau ʻo pehē naʻe maʻu ʻe Paluki ʻa e totonu ke talanoa mo e kau faleʻi ʻo e tuʻí pea naʻe fakangofua ia ke ne ngāueʻaki ʻa e loki kapineti ʻo Kemalaiá, ʻa ia ko ha houʻeiki pe ko ha ʻōfisa. ʻOku ʻomi ʻe he mataotao Tohi Tapu ko James Muilenberg ha ʻuhinga ʻe taha ki ai: “Naʻe lava ke hū ʻa Paluki ki he loki kapineti ʻo e sikalaipé koeʻuhí naʻá ne maʻu ʻa e totonu ko iá pea ko ha mēmipa tonu ia ʻo e kau ʻōfisa fakatuʻi ʻa ia naʻa nau fokotuʻutuʻu ha fakatahataha mahuʻinga ke lau ai ki he kakaí ʻa e takainga tohí. Naʻá ne kau ʻi he kau ʻōfisá.”

Ko e tohi Corpus of West Semitic Stamp Seals ʻokú ne ʻomi ha toe ʻuhinga ʻe taha ʻi he felāveʻi mo e lakanga ʻo Palukí: “Koeʻuhi naʻe maʻu ʻa e sila ʻumea ʻa Berekhyahu fakataha mo ha ngaahi sila ʻumea lahi ʻo e kau ʻōfisa māʻolunga kehé, ʻoku ʻuhinga lelei leva ai ke pehē ko Palukí/Berekhyahu naʻá ne maʻu ʻa e lakanga tatau mo ia naʻe maʻu ʻe he kau ʻōfisa kehé.” Ko e fakamatala ko ia ʻoku ala maʻú ʻoku hā ai ko Paluki mo hono tokoua ko Selaiá ko e ongo ʻōfisa māʻolunga ʻa ia naʻá na poupouʻi ʻa e palōfita faitōnunga ko Selemaiá ʻi he ngaahi taʻu mohumeʻa ki muʻa pea hoko ʻa e fakaʻauha ʻo Selusalemá.

Poupouʻi Fakahāhā ʻa Selemaia

Fakatatau ki he fakahokohoko taimí, naʻe ʻuluaki hā ʻa Palukí ʻi he Selemaia vahe 36, ʻi he “fa  taʻu ʻo Sihoiakimi,” pe 625 K.M. nai. ʻI he taimi ko ʻení naʻe ʻosi ngāue ʻa Selemaia ia ko ha palōfita ʻi he taʻu ʻe 23.—Selemaia 25:​1-3; 36:​1, 4. 

ʻI he taimi ko iá naʻe folofola ange ʻa Sihova kia Selemaia: “Toʻo mai ha takainga tohi, pea ke tohi ai ʻa e ngaahi lea kehekehe kuo u leaʻaki ʻiate koe ki ʻIsileli, mo Siuta, pea mo e ngaahi puleʻanga, . . . talu ʻa e taimi ʻo Siosaia, ʻo aʻu ki he ʻaho ni.” ʻOku hoko atu ʻa e fakamatalá: “Pea ui ange ʻe Selemaia ʻa Paluki foha ʻo Nelaia, pea tohi ʻe Paluki . . . ʻi he lau taʻanga mai ʻe Selemaia, ʻa e ngaahi lea kehekehe ʻa Sihova, ʻa ia kuo ne folofolaʻaki kiate ia.”—Selemaia 36:​2-4.

Ko e hā naʻe ui ai ʻa Palukí? Naʻe tala ange ʻe Selemaia kiate ia: “Ko e moʻu tapunia au; ʻoku ʻikai te u lava ke ʻalu ki he fale ʻo Sihova.” (Selemaia 36:5) Ko hono moʻoní, naʻe tapui ʻa Selemaia ia mei he feituʻu temipalé ʻa ia naʻe pau ke lau ai ʻa e pōpoaki ʻa Sihová, ʻo mahalo pē koeʻuhí ko ha ʻita ʻa e kau maʻu mafaí ʻi he ngaahi pōpoaki naʻe lau ki muʻa ʻe Selemaiá. (Selemaia 26:​1-9) ʻOku ʻikai ha veiveiua, ko Palukí ko ha tokotaha lotu loto-moʻoni ia kia Sihova, pea naʻá ne fai “ʻo hange tofu pe ko hono tuʻutuʻuni ʻe Selemaia ko e palofita.”—Selemaia 36:8.

ʻI hono hiki ʻa e ngaahi fakatokanga naʻe ʻomi ʻi he ngaahi taʻu ʻe 23 kuo mahili atú naʻe fiemaʻu ki ai ʻa e taimi, pea mahalo naʻe toe tatali foki ʻa Selemaia ki he taimi totonú. Ka ʻi Nōvema pe Tīsema ʻi he 624 K.M., naʻe loto-toʻa ai ʻa Paluki ʻo lau “mei he tohi ʻa e ngaahi lea ʻa Selemaia ʻi he fale ʻo Sihova, ʻi he loki ʻo Kemalaia . . . kae fanongo ʻa e kakai kotoa.”—Selemaia 36:​8-10.

Naʻe tala ʻe Maikaia foha ʻo Kemalaiá ki heʻene tamaí mo ha kau houʻeiki ʻe niʻihi ʻa e meʻa ne hokó, pea ne nau fakaafeʻi ai ʻa Paluki ke ne toe lau leʻo lahi ʻa e takainga tohí. ʻOku pehē ʻe he fakamatalá: “Pea ʻi he faifai pea kuo nau fanongo ʻi he ngaahi folofola kehekehe, naʻa nau fehangaʻaki ilifia, pea nau pehe kia Paluki, Kuo pau ke mau fakapa ki he tuʻi ʻa e ngaahi fuʻu folofola ko ia. . . . ʻAlu, ʻo toi, ʻa koe mo Selemaia, pea ke ʻoua naʻa ʻilo ʻe ha taha pe ʻoku mo ʻi fe.”—Selemaia 36:​11-19.

ʻI he fanongo ʻa Tuʻi Sihoiakimi ki he meʻa naʻe hiki ʻe Paluki mei he lea ʻa Selemaiá, naʻá ne ʻita ʻo haehae ʻa e takainga tohí, ʻo lī ia ki he afí pea fekauʻi ʻene kau tangatá ke nau puke ʻa Selemaia mo Paluki. ʻI he fekau ʻa Sihová, naʻe hiki ʻe he ongo tangatá ha toe tatau ʻe taha ʻo e takainga tohí ʻi he lolotonga ʻena toí.—Selemaia 36:​21-32.

ʻOku ʻikai ha toe veiveiua naʻe mahinoʻi ʻe Paluki ʻa e ngaahi fakatuʻutāmaki ʻo ʻene kau ki he vāhenga ngāue ko ʻení. Kuo pau pē naʻá ne ʻiloʻi ʻa e ngaahi fakamanamana naʻe fai kia Selemaia ʻi he ngaahi taʻu ki muʻa atú. ʻOku pau pē naʻá ne toe fanongo fekauʻaki mo e nunuʻa ne hoko kia ʻUlaiá, ʻa ia naʻe fai kikite “ʻi he huafa ʻo Sihova” ka naʻe fakapoongi ʻe Tuʻi Sihoiakimí. Neongo ia, naʻe loto-lelei ʻa Paluki ia ke ngāueʻaki ʻa e poto māʻolunga naʻá ne maʻú mo ʻene ngaahi fetuʻutaki mo e kau ʻōfisa fakapuleʻangá ke poupouʻiʻaki ʻa Selemaia ʻi he vāhenga ngāue ko ʻení.—Selemaia 26:​1-9, 20-24.

ʻOua ʻe Kumi ki he “Ngaahi Meʻa Lalahi”

ʻI he lolotonga hono hiki ʻa e takainga tohi ʻuluakí, naʻe fehangahangai ai ʻa Paluki mo ha vahaʻa taimi fakalotomamahi. Naʻá ne kalanga: “ʻOiaue kita! He kuo hilifaki ʻe Sihova ha mamahi ki hoku loto kuo lavea: ʻoku ou ongosia ʻi he ʻeku tautoʻe, pea ʻoku ʻikai te u maʻu ha nonga.” Ko e hā ʻa e ʻuhinga ʻo e hoko ʻa e mamahí ni?—Selemaia 45:​1-3.

ʻOku ʻikai ʻomi ha tali papau ia. Kae feinga angé ke ke sioloto atu ki he tuʻunga ʻo Palukí. ʻI he lave fekauʻaki mo e ngaahi fakatokanga taʻu ʻe 23 ne fai ki he kakai ʻIsilelí mo e kau Siutá, kuo pau pē naʻe ʻai ai ʻo mātuʻaki maeʻeeʻa ʻa ʻenau tafoki mei he moʻoní mo ʻenau talitekeʻi ʻa Sihová. Kuo pau pē naʻe ʻohovale ʻa Paluki ʻi he fili ko ia ʻa Sihova ke fakaʻauha ʻa Selusalema mo Siuta pea fakaheeʻi taʻu ʻe 70 ʻa e puleʻangá ki Pāpiloné, ʻa ia ko e fakamatala naʻe fakaeʻa ʻe Sihova ʻi he taʻu naʻe hiki ai ʻe Paluki ʻa e ʻuluaki takainga tohí pea naʻe fakakau nai ia ai. (Selemaia 25:​1-11) ʻIkai ngata aí, naʻe ʻi ai ʻa e fakatuʻutāmaki ʻo ha mole ʻa hono lakangá mo ʻene ngāué ʻi heʻene poupouʻi mālohi ʻa Selemaia ʻi he taimi mahuʻinga ko ʻení.

Pe ko e hā ʻa e tuʻungá, naʻe kau mai ʻa Sihova ke tokoniʻi ʻa Paluki ke ne manatuʻi ʻa e fakamaau naʻe teu ke hokó. “ʻOku ou holoki ʻa e  meʻa naʻa ku langa hake ʻe au, pea ʻoku ou taʻaki ʻe au ʻa e meʻa naʻa ku hunuki; pea ko ʻeku meʻa ia ʻoku fai ʻi mamani katoa,” ko e folofola ia ʻa Sihová. Naʻá ne akonaki leva kia Paluki: “Pea ʻoku ke kumi koā maʻau ha ngaahi meʻa lalahi? ʻOua ʻe kumi.”—Selemaia 45:​4, 5. 

Naʻe ʻikai ke fakahaaʻi mahino ʻe Sihova ia pe ko e hā ʻa e ‘ngaahi meʻa lalahí,’ pe ko e sio tuʻunga siokita, fieongoongoa pe lakalakaimonū fakamatelie, ka kuo pau pē naʻe ʻosi ʻiloʻi ia ʻe Paluki. Naʻe akonakiʻi ia ʻe Sihova ke ne sio totonu pea manatuʻi ʻa e meʻa ka hoko he kahaʻú: “Ko au eni ʻoku ou ʻomi ha kovi ki he kakano, hono kotoa . . . ka te u ʻatu kiate koe hoʻo moʻui moʻao vete, ʻi he potu kotoa pe te ke ʻalu ki ai.” Ko e koloa mahuʻinga taha ʻa Palukí, ʻa ʻene moʻuí, ʻe fakatolonga ia ʻi ha faʻahinga feituʻu pē te ne ʻalu ki ai.—Selemaia 45:5.

ʻI he hili ʻa e ngaahi meʻa naʻe fakamatala ki ai ʻi he Selemaia vahe 36 mo e 45 ʻa ia naʻe hoko ʻi he 625 ki he 624 K.M., ʻoku ʻikai ke toe lave ʻa e Tohi Tapú ia kia Paluki ʻo toki aʻu mai ki he ngaahi māhina ki muʻa pea fakaʻauha ʻa Selusalema mo Siuta ʻe he kau Pāpiloné ʻi he 607 K.M. Ko e hā leva e meʻa naʻe hoko aí?

Toe Tokoniʻi ʻe Paluki ʻa Selemaia

Lolotonga hono ʻākoloʻi ʻa Selusalema ʻe he kau Pāpiloné, ʻoku toe hā ai ʻa Paluki ʻi he fakamatala he Tohi Tapú. Naʻe “moʻu tapunia” ʻa Selemaia “ʻi he lotoʻa ʻo e kaate” ʻi he taimi naʻe tala ange ai ʻe Sihova ke ne fakatau ʻa e konga kelekele ʻi ʻAnatoti ʻo e foha e tokoua ʻo ʻene tamaí ke hoko ia ko ha fakaʻilonga ʻe ʻi ai ha toe fakafoki. Naʻe ui ʻa Paluki ke tokoni ʻi he ngaahi meʻa fakalaó.—Selemaia 32:​1, 2, 6, 7.

Naʻe fakamatala ʻa Selemaia: “Naʻa ku tohi ʻa e meʻa ʻi he tohi, pea u silaʻi ke maʻu, pea u kumi ha kau fakamoʻoni, pea naʻa ku fua kiate ia ʻa e paʻanga ʻi he meʻafua. Pea naʻa ku toʻo ʻa e tohi fakatau—ʻa ia naʻe silaʻi, . . . pea mo ia naʻe ava—pea u ʻatu ʻa e tohi fakatau kia Paluki.” Naʻá ne fekauʻi leva ʻa Paluki ke ne silaʻi ʻa e ongo tohi fakataú ʻi ha ipu ʻumea ke malu ai. ʻOku tui ʻa e kau mataotao ʻe niʻihi ʻo pehē ʻi he taimi naʻe pehē ai ʻe Selemaia naʻá ne “tohi” ʻa e tohi fakataú, ʻe lava ke pehē naʻá ne tala ngutu ia ki he sikalaipe poto ko Palukí, ʻa ia naʻá ne toki fai ʻe ia ʻa hono hikí.—Selemaia 32:​10-14; 36:​4, 17, 18; 45:1.

Naʻe muimui ʻa Paluki mo Selemaia ʻi he  ngaahi founga-ngāue fakalao ʻo e taimi ko iá. Ko e founga ʻe taha ko e tohi fakatau ʻe uá. ʻOku fakamatala ʻa e tohi Corpus of West Semitic Stamp Seals: “Ko e ʻuluaki tohi fakataú naʻe ui ia ko e ‘tohi kuo silaʻi,’ koeʻuhí naʻe takai ia pea silaʻi ʻaki ʻa e sila ʻumea ʻe taha pe ua; naʻe ʻi loto ai ʻa e muʻaki tatau ʻo e aleapaú. . . . Ko hono uá, ko e ‘tohi kuo ava’ ko ha hiki-tatau ia ʻo e tatau ko ia naʻe silaʻi mo paú, pea naʻe fakataumuʻa ia ki hono lau ʻe ha taha pē. Ko ia ai, naʻe ʻi ai ʻa e ongo tohi naʻe hiki ʻi he ongo lauʻi pepailo kehekehe, ʻa ia ko ha muʻaki tatau mo ha tohi kuo hiki-tatau.” Ko e ngaahi meʻa kuo maʻu fakaʻākeolosiá ʻoku fakamoʻoniʻi ai ʻa e anga ʻo hono tauhi ʻa e ngaahi pepá ʻi ha ipu ʻumeá.

Naʻe faai atu pē pea kapa ʻe he kau Pāpiloné ʻa Selusalema, tutu ia, pea fakaheeʻi kotoa ʻa e faʻahinga aí, tuku kehe pē ha kakai masiva tokosiʻi. Naʻe fakanofo kōvana ʻe Nepukanesa ʻa Ketalaia. Naʻe fakapoongi ia ʻi he māhina ʻe ua ki mui ai. Ko e kau Siu naʻe toé, naʻa nau tuʻu fehangahangai ki he faleʻi fakamānavaʻi naʻe fai ʻe Selemaiá ʻo nau palani ai kinautolu ke nau hiki ki ʻIsipite, pea ʻi he potutohi ko ʻení naʻe toe fai ai ʻa e lave kia Palukí.—Selemaia 39:​2, 8; 40:5; 41:​1, 2; 42:​13-17.

Naʻe tala ange ʻe he kau taki Siú kia Selemaia: “Ko e loi hoʻo lea kuo fai: naʻe ʻikai fekau koe ʻe Sihova ko hotau ʻOtua ke ke tala, ʻOua te mou ʻalu ki Isipite ke nofo ai: ka ko Paluki foha ʻo Nelaia ʻoku ne oʻi koe ke fai ha kovi kiate kimautolu, koeʻuhi ke tukuange kimautolu ki he nima ʻo e kau Kalitia, koeʻuhi ke nau tamateʻi kimautolu, pe ʻave popula ki Papilone.” (Selemaia 43:​2, 3) ʻOku fakaeʻa mahino ʻe he tukuakiʻi ko ʻení ʻa e tui ʻa e kau taki Siú ʻo pehē naʻe tākiekina lahi ʻe Paluki ʻa Selemaia. Naʻa nau tui peheé koeʻuhi ko e lakanga ʻo Palukí pe ko ʻene kaungāmeʻa fuoloa mo Selemaiá, ʻo pehē naʻá ne fai ai ʻe ia ʻa e meʻa ʻo laka ia ʻi hono tuʻunga ko e sikalaipe pē ʻa e palōfitá? Mahalo pē, kae tatau ai pē pe ko e hā ʻa e fakakaukau ʻa e kau taki Siú, naʻe haʻu ʻa e pōpoakí ia meia Sihova.

Neongo ʻa e ngaahi fakatokanga fakaʻotuá, naʻe mavahe ʻa e kau Siu ia naʻe toé pea nau ʻave mo “Selemaia ko e palofita, mo Paluki foha ʻo Nelaia.” Naʻe tohi ʻe Selemaia: “Pea nau aʻu ki Isipite—he naʻe ʻikai te nau fakaongo ki he leʻo ʻo Sihova—pea nau fai atu, ʻo aʻu ki Tapanesi,” ko ha kolo naʻe ʻi he fakahahake ʻo e ngutu vaitafe ʻo Nailá, ʻi he kauʻāfonua ʻo Sainaí. ʻI he taimi ko iá, ʻoku puli leva ʻa Paluki ia ʻo ʻikai toe fai ha lave ki ai ʻi he Tohi Tapú.—Selemaia 43:​5-7.

Ko e Hā ʻE Lava Ke Tau Ako Meia Palukí?

ʻOku lahi ʻa e ngaahi lēsoni mahuʻinga ʻe lava ke tau ako meia Palukí. Ko e lēsoni fisifisimuʻa ʻe taha ko ʻene loto-lelei ko ia ke ngāueʻaki ʻa ʻene ngaahi pōtoʻi māʻolungá mo ʻene ngaahi fetuʻutakí ʻi he ngāue ʻa Sihová, ʻo tatau ai pē pe ko e hā ʻa e ngaahi nunuʻá. Ko e tokolahi ʻo e kau Fakamoʻoni ʻa Sihova he ʻaho ní, ʻa e tangata mo e fafine, ʻoku nau fakahāhā ʻa e laumālie tatau, ʻi heʻenau foaki atu ʻenau ngaahi pōtoʻí ʻi he ngāue ʻi Pētelí, ngāue langá mo e ngaahi meʻa peheé. ʻE lava fēfē ke ke fakahāhā ʻa e laumālie tatau mo ia naʻe fai ʻe Palukí?

ʻI he taimi naʻe fakamanatu ai kia Paluki ko e lolotonga ʻo e ngaahi ʻaho fakaʻosi ʻo Siutá, naʻe ʻikai ha toe taimi ia ki he “ngaahi meʻa lalahi” fakafoʻituituí, ne hā mahino ʻa ʻene tali talangofua ki aí, koeʻuhí naʻe fakahaofi ʻa ʻene moʻuí. ʻOku fakapotopoto ke tau ngāueʻaki ʻa e akonaki ko ʻení ʻe kitautolu tonu, he ʻoku tau moʻui foki mo kitautolu ʻi he ngaahi ʻaho fakaʻosi ʻo ha kuonga. Ko e talaʻofa ʻa Sihová ʻoku tatau pē ia kiate kitautolu, ʻe fakahaofi ʻetau moʻuí. ʻE lava ke tau tali ki he ngaahi fakamanatu peheé ʻo hangē ko ia naʻe fai ʻe Palukí?

ʻOku toe ʻi ai ha lēsoni ʻaonga te tau ako mei he talanoa ko ʻení. Ko Selemaia mo e tama naʻá ne tokouaʻakí, naʻe tokoniʻi kinaua ʻe Paluki ke na fou ʻi he ngaahi founga fakalao ʻa ia naʻe fiemaʻu pau ki heʻena alea fakapisinisí, neongo naʻe kāinga ʻa e ongo tangatá. ʻOku hoko ʻeni ko ha sīpinga Fakatohitapu ki he kau Kalisitiane ʻoku nau fai ʻa e ngaahi alea fakapisinisi mo honau ngaahi tokoua mo e tuofāfine fakalaumālié. ʻOku Fakatohitapu, ʻaonga mo anga-ʻofa ke muimui ʻi he faʻifaʻitakiʻanga ko ʻeni ʻo hono ʻai ʻo hiki tohinima ʻa e ngaahi aleapau fakapisinisí.

Neongo ʻoku siʻi pē ʻa e hā ʻa Paluki ʻi he Tohi Tapú, ʻoku tuha ke tokanga ki ai ʻa e kau Kalisitiane kotoa he ʻaho ní. Te ke faʻifaʻitaki ki he faʻifaʻitakiʻanga lelei ʻa e sekelitali faitōnunga ko ʻeni ʻa Selemaiá?

[Fakamatala ʻi lalo]

[Fakatātā ʻi he peesi 16]

Sila ʻumea ʻa Palukí

[Maʻuʻanga]

Sila ʻumea: Courtesy of Israel Museum, Jerusalem