Ngaahi Fehuʻi mei he Kau Lautohí

Hili ʻa e ʻahiʻahi fakaʻosi ʻi he ngataʻanga ʻo e Tau ʻe Taha Afé, ʻe malava ke toe faiangahala mo mate ʻa e faʻahinga ʻo e tangatá?

ʻOku maʻu ʻi he tohi Fakahaá ʻa e ongo konga Tohi Tapu ʻoku kaunga ki he meʻá ni: “Naʻe li ʻa Mate mo Hetesi ki he Anoafi. Ko eni ia ʻa e Mate Angaua, ko e Anoafi.” (Fakahā 20:14) “Te ne holoholo ʻa e loʻimata kotoa pē mei honau mata; pea ʻe ʻikai toe ai ha mate, pea ʻe ʻikai toe ai ha mamahi, pe ha tangi, pe ha ongosia; kuo mole ʻa e ngaahi meʻa muʻa.”—Fakahā 21:4.

Fakatokangaʻi ʻa e taimi ʻoku kau ki hení. Ko hono lī ʻo “Mate mo Hetesi” ki he ano afí ʻoku hoko ia hili hono fakamāuʻi ʻa e kau hao moʻui atu ʻi ʻĀmaketoné, ko e kau mate ʻe fokotuʻu haké, mo ha faʻahinga pē naʻe fanauʻi hili ʻa ʻĀmaketoné mei he “ngaahi meʻa ʻoku tuʻu ʻi he ngaahi tohi,” pe ko e ngaahi fiemaʻu fakaikiiki ʻa Sihova ki he faʻahinga ʻo e tangatá ʻi he lolotonga ʻa e taʻu ʻe taha afé. (Fakahā 20:​12, 13) ʻOku hiki ʻe he ʻapositolo ko Sioné ha toe vīsone ʻe taha, ʻoku maʻu ʻi he Fakahā vahe 21, ʻa ia ʻe fakahoko lolotonga ʻa e Pule Taʻu ʻe Taha Afe ʻa Kalaisi Sīsuú. Kae kehe, ko e fakahoko kakato ʻo e vīsone ko iá ʻoku ʻi he ngataʻanga ʻo e taʻu ʻe taha afe ʻo e ʻAho Fakamāú. ʻE toki nofo leva ai ʻa Sihova mo e faʻahinga ʻo e tangatá ʻi he ʻuhinga kakato tahá ʻo ʻikai ha toe kau fakalaloa, ʻi hono ʻoange ʻe Sīsū ʻa e Puleʻangá ki heʻene Tamaí. ʻE nofo fakalaumālie ʻa Sihova mo “hono kakai” ʻi ha founga tuʻuloa mo fakahangatonu. “ʻE ʻikai toe ai ha mate” ʻi he ʻuhinga fakaʻaufuli ʻi he taimi ʻe maʻu ai ʻe he faʻahinga ʻo e tangatá ʻa e haohaoa ko e tupu mei hono ngāueʻaki kakato ʻa e ʻaonga ʻo e feilaulau huhuʻi ʻa Kalaisí.​—Fakahā 21:​3, 4.

Ko ia ai, ko e mate ʻoku lave ki ai ʻa e ongo konga Tohi Tapu ʻoku hiki ʻi ʻolungá ko e mate ʻia ʻĀtamá, ʻa ia ʻe kaniseli ʻosi ia ʻe he feilaulau ʻa Kalaisí. (Loma 5:​12-​21) ʻI hono kaniseli ʻa e mate naʻe maʻu tukufakaholo ʻe he faʻahinga ʻo e tangatá mei he ʻuluaki tangatá, ʻe hangē tofu pē ai ʻa e faʻahinga ʻo e tangatá ko ʻĀtama ʻi he taimi naʻe fakatupu aí. Naʻe haohaoa ʻa ʻĀtama, ka naʻe ʻikai ʻuhinga iá ʻe taʻemalava ke ne mate. Naʻe tala ʻe Sihova kia ʻĀtama ke ʻoua te ne kai mei he “ʻAkau ʻo e ʻIlo-ʻo-e-lelei-mo-e-kovi” peá ne pehē: “Ko e ʻaho te ke kai mei ai kuo pau te ke mate.” (Senesi 2:17) Ko e mate ia mei he angahala naʻe fai ʻosi fakakaukauʻi. Hili ʻa e ʻahiʻahi fakaʻosi ʻi he ngataʻanga ʻo e Pule Taʻu ʻe Taha Afé, ʻe kei maʻu ai pē ʻe he tangatá ʻa e tauʻatāina ke filí. (Fakahā 20:​7-​10) Te nau kei malava pē ke fili tauʻatāina pe te nau kei hokohoko atu ʻa e tauhi kia Sihová pe ʻikai. Heʻikai lava ke pehē heʻikai ha tangata ʻe faifai ange pea tafoki mei he ʻOtuá, ʻo hangē ko ia naʻe fai ʻe ʻĀtamá.

Ko e hā ʻe hoko ki ha taha ʻa ia kuó ne fili ke angatuʻu hili ʻa e ʻahiʻahi fakaʻosí ʻi he ʻikai toe ʻi ai ha mate pe Hētesí? ʻI he taimi ko iá, heʻikai toe ʻi ai ʻa e mate ʻia ʻĀtamá. Pea ko Hētesi, ʻa e faʻitoka anga-maheni ʻo e faʻahinga ʻo e tangatá fakataha mo e ʻamanaki ki he toetuʻú, heʻikai ke toe ʻi ai. Kae kehe, ʻe lava ke fakaʻauha ʻosi ʻe Sihova ha angatuʻu pē ʻi he ano afí, ʻo ʻikai ʻoange kiate ia ha ʻamanaki ʻo ha toetuʻu. Ko e mate ko iá ʻe hangē ia ko e mate naʻe hoko kia ʻĀtama mo ʻIví, ʻo ʻikai ko e mate naʻe maʻu tukufakaholo ʻe he tangatá meia ʻĀtamá.

Kae kehe, ʻoku ʻikai ha ʻuhinga ke tau ʻamanekina ai ʻe hoko ha meʻa pehē. Ko e faʻahinga ʻe hao he ʻahiʻahi fakaʻosí te nau kehe meia ʻĀtama ʻi he foʻi ʻuhinga mahuʻinga ʻe taha. Ne ʻosi ʻahiʻahiʻi kakato kinautolu. ʻOku lava ke tau falala ki he fakaʻāuliliki ʻo e ʻahiʻahi fakaʻosí koeʻuhi he ʻoku ʻafioʻi ʻe Sihova ʻa e founga ke sivi fakaʻāuliliki ai ʻa e kakaí. ʻOku lava ke tau fakapapauʻi ko e ʻahiʻahi fakaʻosí te ne fakangata ʻosi ha faʻahinga pē te nau ngāuehalaʻaki ʻenau tauʻatāina ke filí. Ko ia ai, neongo ʻoku malava ki he faʻahinga te nau paasi ʻi he ʻahiʻahi fakaʻosí ke nau angatuʻu ki he ʻOtuá pea fakaʻauha ai kinautolu, ʻoku ʻikai ʻaupito ngalingali ʻe hoko ha meʻa pehē.

[Fakatātā ʻi he peesi 31]

Hili ʻa e ʻahiʻahi fakaʻosí, ʻi he ʻuhinga fē ʻe lava ke fakahoa ai ʻa e faʻahinga ʻo e tangatá kia ʻĀtamá?