Ko e Anga-Maluú Te Nau Maʻu ʻa e Māmaní

“ʻOku ou fakaʻuta atu ʻe liliu mo toe fakafoʻou ʻa natula. . . . ʻO ʻikai ʻapongipongi, ka ʻi ha kuonga mamaʻo atu, ʻa ia ʻe ʻi ai ha hēvani foʻou mo ha māmani foʻou.”—Jean-Marie Pelt, ko e mataotao Falanisē he ʻātakaí.

ʻI HONO lōmekina ʻe he ngaahi tuʻunga he ʻātakaí mo e ngaahi tuʻunga fakasōsiale ʻi he māmaní, ʻe fiefia ʻa e tokolahi ke nau mātā hano liliu hotau foʻi palanité ko ha palataisi. Ka ko e ʻamanaki ia ko ení ʻoku ʻikai ko ha misi pē ia ʻi onopooni. ʻI he taimi fuoloá, naʻe talaʻofa ai ʻe he Tohi Tapú ʻe toe fakafoki mai ʻa e Palataisí ki he māmaní. Ko e lea ko ia ʻa Sīsū ʻo pehē “[ko e] agamalu: . . . te nau maʻu ae fonua”pe māmaní mo e “ke fai ho Finangalo, hange ko ia ʻi he langi ke pehe foki ʻi māmani,” ʻoku kau ia ʻi he ngaahi konga tohi ʻiloa taha ʻo e Tohi Tapú. (Mātiu 5:​5, PM; Mt 6:10) Kae kehe, ʻi he ʻahó ni, ʻoku ʻikai ke tui ʻa e tokolahi ia ki ha palataisi fakaemāmani ʻe nofoʻi ʻe he anga-maluú. Ki he tokolahi ko ia ʻoku nau taukaveʻi ko e kau Kalisitiane kinautolú, kuo ʻosi mole ʻa e ʻamanaki ia ki ha Palataisí.

Ko e makasini fakauike Falanisē ko e La Vie ʻoku fakamatalaʻi ai ʻa e ʻuhinga kuo mole ai ʻi ha tuʻunga ʻa e tui ki ha palataisí—ʻo tatau ai pē ʻi he māmaní pe ʻi hēvani—ʻi he Siasi Katoliká: “Hili hono tākiekina mālohi ʻa e ngaahi akonaki ʻa e Katoliká ʻikai toe siʻi hifo he ngaahi senituli ʻe 19, kuo pulia atu ʻa e [foʻi fakakaukau ʻo ha] palataisí ia mei he ngaahi taimi fakalaulauloto fakalaumālié, ngaahi malanga he Sāpaté, ngaahi koosi fakateolosiá, mo e ngaahi kalasi fehuʻi mo e talí.” ʻOku pehē ko e foʻi leá tonu ʻoku fakaʻuliʻulilātaiʻi ia ʻe ha “fuʻu kakapu” ʻo e “misiteli mo e puputuʻu.” Ko e kau malanga ia ʻe niʻihi ʻoku nau toka fakakaukauʻi ke fakamamaʻo mei ai koeʻuhí ʻoku “fakahoko mai ʻe ia ʻa e ngaahi fakakaukau fuʻu hulu ʻo kau ki ha fiefia ʻi he māmaní.”

Ka kia Frédéric Lenoir, ko ha mataotao sōsiale ʻi he tafaʻaki ʻo e lotú, ko e ngaahi foʻi fakakaukau ʻo kau ki ha palataisí kuo hoko ia ko e ngaahi “ʻata kuo fokotuʻu maʻu ʻi he fakakaukaú.” ʻI he tuʻunga meimei tatau, ko Jean Delumeau, ko e faihisitōlia mo e faʻu-tohi ʻo e ngaahi tohi kehekehe ʻi he tuʻunga-lea ko ení, ʻokú ne fakakaukau ko hono fakahoko ko ia ʻo e ngaahi talaʻofa ʻa e Tohi Tapú ʻoku tuʻu fakaefakatātā ʻaupito pē ia. ʻOkú ne tohi: “Ki he foʻi fehuʻi, ‘Ko e hā leva ʻoku toe ʻi he Palataisí?’ ʻOku ʻomai ʻe he tui faka-Kalisitiané ʻa e tali ko ení: Mālō mo e toetuʻu ʻa e Fakamoʻuí, ʻe ʻi ai e ʻaho te tau fetakinima kotoa ai ʻo tau aʻusia ʻa e fiefiá.”

ʻOku kei ʻi ai koā haʻane ʻaonga ʻa e pōpoaki ʻo kau ki ha māmani palataisí? Ko e hā moʻoni ʻoku tuku tauhi mai ʻe he kahaʻú maʻa hotau palanité? ʻOku hā nenefu nai ʻa e vakai atu ki he kahaʻú, pe ʻe lava ʻo ʻai ke ʻata lelei? ʻE tali ʻe he kupu hono hokó ʻa e ngaahi fehuʻi ko ení.

 [Maʻuʻanga ʻo e Tā ʻi he peesi 2]

TAKAFÍ: Emma Lee/Life File/Getty Images