“Toe Fakamatala Mai Angé!”

ʻI NEZLOBNAYA, Lūsia, naʻe ako ai ha kalasi ki he ʻū tohí ʻi he akoʻanga māʻolungá ʻa e ngaahi tohi ʻa e faʻu-tohi Lūsia ko Mikhail Bulgakov. Naʻe ʻi he lotolotonga ʻo e ʻū tohí ha tohi ʻoku fakamatalaʻi ai ʻa Sīsū Kalaisi ʻi ha founga ololalo, lolotonga ia ʻokú ne fakahaaʻi ʻa Sētane ko ha helo ia. Hili ʻa e fetalanoaʻaki ʻa e kalasí, naʻe vaheʻi ai ʻe he faiakó ki he kalasí ha sivi kuo hiki ʻo makatuʻunga ʻi he tohi ko ení. Kae kehe, ko e taha ʻo e kau akó, ko ha Fakamoʻoni ʻa Sihova taʻu 16 ko Andrey, naʻá ne kole anga-fakaʻapaʻapa ange ke fakaʻatā ia mei hono fai ʻa e siví koeʻuhí naʻe ʻikai fakaʻatā ia ʻe hono konisēnisí ke ne ako ʻa e faʻahinga tohi ko ení. ʻI hono kehé, naʻá ne tuʻuaki ange ke ne faʻu ha ʻēsei ʻa ia ʻe fakamatalaʻi ai ʻa e anga ʻo ʻene vakai kia Sīsū Kalaisí. Naʻe loto-lelei ki ai ʻa e faiakó.

ʻI heʻene ʻēseí, naʻe fakamatalaʻi ai ʻe Andrey ʻo pehē neongo ʻokú ne fakaʻapaʻapaʻi ʻa e fakakaukau ʻa e niʻihi kehé, kuó ne ʻilo ko e founga lelei taha ke ako ai fekauʻaki mo Sīsuú ko e lautohi fekauʻaki mo ia ʻi he fakamatala ʻa e faaʻi Kōsipelí. ʻI he fai peheé, “te ke ako ai fekauʻaki mo e moʻui pea mo e ngaahi akonaki ʻa Sīsuú ʻo hangē ko ia ʻoku makatuʻunga ʻi he ngaahi fakamatala ʻa e kau fakamoʻoni sio tonu.” Naʻe tānaki mai ki ai ʻe Andrey: “Ko e toe meʻa ʻe taha ʻoku fai ki ai ʻa e hohaʻá ko e anga hono fakamatalaʻi ʻo Sētané. ʻOku fakamānako nai ki he niʻihi ke lau ha tohi ʻa ia ʻoku helo ai ʻa Sētane ka ʻoku ʻikai pehē ia kiate au.” Naʻá ne fakamatalaʻi ko Sētané ko hono moʻoní ko ha meʻamoʻui laumālie fulikivanu mālohi ia ʻa ia naʻá ne tafoki mei he ʻOtuá, ʻo ne ʻomai ai ʻa e fulikivanú, faingataʻá mo e mamahí ki he fāmili ʻo e faʻahinga ʻo e tangatá. Naʻe fakaʻosiʻaki ʻe Andrey ʻene ʻēseí: “ʻOku ʻikai te u tui ko hono lau ʻa e tohí ni ʻe ʻaonga kiate au. Ko e moʻoni, ʻoku ʻikai haʻaku fakafepaki ki he faʻu-tohí. Ka ʻi he tuʻunga fakafoʻituituí, ʻe sai ange ke u lau ʻa e Tohi Tapú ke ʻilo ai ʻa e moʻoni fakahisitōlia ʻo fekauʻaki mo Sīsū Kalaisí.”

Naʻe fiefia lahi ʻa e faiako ʻa Andrey ʻi he ʻēseí ʻo ne fakaafeʻi ai ia ke ne teuteu ha līpooti fakamatala ngutu ʻo Sīsū Kalaisi. Naʻe tali loto-lelei ia ʻe Andrey. Lolotonga ʻenau kalasi hoko mai ʻi he ʻū tohí, naʻe lau ai ʻe Andrey ʻene fakamatalá ʻi muʻa ʻi he kotoa ʻo e kalasí. Naʻá ne fakamatala ai ki he ʻuhinga ʻo ʻene ongoʻi ko ia ko Sīsū ʻa e moʻungaʻi tangata lahi taha kuo moʻui maí. Naʻá ne lau leva ha vahe fekauʻaki mo e pekia ʻa Sīsuú mei he tohi Tohi Tapu ʻa Mātiú. Koeʻuhi ko e taimi naʻe fakaʻatā ki he fakamatalá naʻe mei ʻosi, naʻe loto ʻa Andrey ke fakaʻosi ia, ka naʻe fakaʻaiʻai ia ʻe hono kaungā kalasí: “Toe fakamatala mai angé! Ko e hā e meʻa hono hoko naʻe hokó?” Ko ia naʻá ne hokohoko atu ai ʻa e lautohi mei he talanoa ʻa Mātiu ʻo fekauʻaki mo e toetuʻu ʻa Sīsuú.

ʻI he ʻosi ʻa e lau ʻa Andrey, naʻe ʻeke ange kiate ia ʻe hono kaungā kalasí ʻa e ngaahi fehuʻi lahi ʻo fekauʻaki mo Sīsū pea mo Sihova. “Naʻá ku lotu kia Sihova ki ha poto, pea naʻá ne tali ʻeku lotú,” ko e lau ia ʻa Andrey. “Naʻá ku malava ke tali kotoa ʻenau ngaahi fehuʻí!” Hili e kalasí, naʻe ʻoange ai ʻe Andrey ki heʻene faiakó ha tatau ʻo e tohi Ko e Moʻungaʻi Tangata Lahi Taha Kuo Moʻui Maí, a ʻa ia naʻá ne tali vēkeveke. Naʻe fakamatala ʻa Andrey: “Naʻá ne ʻomai kiate au ʻa e ngaahi maaka māʻolunga ki heʻeku fakamatalá pea fakahīkihikiʻi au ʻi hono maʻu ʻo ʻikai maaʻi ʻa ʻeku ngaahi tuí. Naʻá ne toe pehē foki naʻá ne loto-tatau mo e niʻihi ʻo ʻeku ngaahi tuí.”

ʻOku fiefia ʻa Andrey ʻi heʻene fili ke muimui ʻi hono konisēnisi kuo akoʻi ʻe he Tohi Tapú ʻaki ʻa e ʻikai ke lau ʻa e fakamatala ʻa ia ʻoku taʻefakaʻapaʻapaʻi ai ʻa Sihova mo hono ʻAló, ʻa Sīsū Kalaisi. Ko ha tuʻu maʻu pehē naʻe ʻikai ngata pē ʻi hono maluʻi ai ia mei he ngaahi fakakaukau taʻefakatohitapú ka naʻe toe fakaava foki ai ha faingamālie fakaofo ke vahevahe atu ai ki he niʻihi kehé ʻa e ngaahi moʻoni Fakatohitapu mātuʻaki mahuʻingá.

[Fakamatala ʻi lalo]