Fakatupu ʻo e Fanga Manú ʻOku Fakahīkihikiʻi Ai ʻa Sihova

KO E tuʻunga fisifisimuʻa ʻo Sihová ʻoku hā mahino ia ʻi he puleʻanga ʻo e fanga manú. ʻOku tokangaʻi lelei ʻe he ʻOtuá ʻa e fanga manú, ʻo tatau pē mo ʻene fai ʻa e ngaahi tokonaki maʻá e faʻahinga ʻo e tangatá. (Sāme 145:16) Ko ha fehālaaki ē ke fakaangaʻi ʻa e Tokotaha-Fakatupu ʻo e fanga manú pea mo kitautolú! Neongo naʻe faitotonu ʻa e tangata ko Siopé, naʻá ne fakahaaʻi “naa ne fakatonuhiaʻi ia eia kae ikai koe Otua.” Ko ia naʻe ʻi ai ʻa e ngaahi lēsoni ke ako ʻe Siope!​—Siope 32:​2, PM; Sop 33:​8-​12; 34:5.

Ko e ngaahi fakatātā ʻoku maʻu mei he fakatupu ʻo e fanga manú naʻe fakahaaʻi ai kia Siope ko e faʻahinga ʻo e tangatá ʻoku ʻikai te nau ʻi ha tuʻunga ke fehuʻia ʻa e ngaahi founga ʻa e ʻOtuá. He māʻalaʻala moʻoni ē ko ia ʻi heʻetau fakakaukau atu ki he ngaahi lea ʻa Sihova ki heʻene sevāniti ko Siopé!

ʻIkai Te Nau Fiemaʻu ha Tokoni ʻa e Tangatá

Naʻe ʻikai lava ke tali ʻe Siope ʻa e ngaahi fehuʻi ʻa e ʻOtuá ʻo fekauʻaki mo e moʻui ʻa e fanga manú. (Siope 38:​39-​41) ʻOku hā mahino, kuo tokonaki ʻa Sihova ʻo ʻikai kau ai ha tokoni ʻa e tangatá ki he laioné mo e lēvení. Neongo ʻoku puna takai holo ʻa e fanga lēvení ʻi he kumi meʻakaí, ʻoku nau maʻu moʻoni ʻenau meʻakaí mei he ʻOtuá.​—Luke 12:24.

Ne ʻikai ha tali ʻa Siope ʻi he fehuʻi kiate ia ʻa e ʻOtuá ʻo fekauʻaki mo e fanga manu kaivaó. (Siope 39:​1-8) ʻOku ʻikai ha tangata ʻe lava ke ne maluʻi  ʻa e fanga kosi ʻo e moʻungá mo e fanga hainité, pe tia fefiné. He ko ē, ʻoku faingataʻa naʻa mo e hoko ʻo ofi ki he fanga kosi ʻo e moʻungá! (Sāme 104:18) Ko e poto fakanatula ʻoku foaki ʻe he ʻOtuá ʻoku nofo mavahe ai ha hainite ʻiate ia pē ʻi he vaotaá ʻi he teu ke ne fāʻelé. ʻOkú ne fai ʻa e tokanga totonu ki hono ʻuhikí, ka ʻi he taimi ʻoku nau “maʻu malohi” aí, ʻoku nau “ʻalu atu, ʻo ʻikai foki mai.” ʻOku nau tokangaʻi leva ʻa kinautolu.

ʻOku lele tauʻatāina holo ʻa e sepelaá, pea ko e tokalelei ʻo e toafá ko e ʻapi ia ki he ʻasi kaivaó. Naʻe ʻikai lava ke ngāueʻaki ʻe Siope ʻa e ʻasi kaivaó ke ne fua ha ngaahi kavenga. ʻOkú ne kumi “ki he meʻa kotoa ʻoku mata,” ʻo kumi ʻi he ngaahi moʻungá ki ha kaikaiʻanga. Ko e manu ko ení ʻe ʻikai te ne fetongi ʻa ʻene tauʻatāiná ki ha meʻakai ʻoku maʻungofua ʻi he ngaahi koló. “Kuo teʻeki ke ne ongoʻi ʻa e leʻo ʻo e tama fakateka,” he ʻoku hola vave ʻa e ʻasi kaivaó kapau ʻoku hū ha tangata ki hono nofoʻangá.

ʻOku hoko atu ʻa e lave ʻa e ʻOtuá ki he pulu kaivaó. (Siope 39:​9-​12) ʻI he fekauʻaki mo iá, naʻe tohi ʻe he ʻākeolosia Pilitānia ko Austen Layard: “Ko e pulu kaivaó, mei hono toutou fakahaaʻi ʻi he ngaahi fakatātā ʻoku tongí, ʻoku hā ʻoku meimei fakamanavahē tatau pē ia mo taku ko ha manu tulimanu ʻo hangē ko e laioné. ʻOku hā ai ʻa e toutou fetakai mo ia ʻa e tuʻí, pea ʻoku tuli heka hoosi mo lele lalo fakatouʻosi ia ʻe he kau pāteʻi taú.” (Nineveh and Its Remains, 1849, Voliume 2, peesi 326) Kae kehe, ʻoku ʻikai ha tangata poto ia ʻe feinga ke ne fakapiti ʻa e pulu kaivao ʻoku ʻikai lava ke puleʻí.​—Sāme 22:21.

Fakahīkihikiʻi ʻe he Meʻamoʻui Kapakaú ʻa Sihova

ʻOku hoko atu ʻa e ʻOtuá ʻo ʻeke kia Siope fekauʻaki mo e ngaahi meʻamoʻui kapakaú. (Siope 39:​13-​18) ʻOku puna māʻolunga ʻa e sitoaké ʻaki ʻa hono ongo kapakau mālohí. (Selemaia 8:7) Neongo ʻoku kapakapatā ʻe he ʻositalesí ʻa hono ongo kapakaú, ʻoku ʻikai lava ia ke puna. ʻI he ʻikai hangē ko e sitoaké, ʻoku ʻikai tuku ʻe he ʻositalesí ʻa hono fuá ʻi ha pununga ʻoku faʻu ʻi ha fuʻu ʻakau. (Sāme 104:17) ʻOkú ne keli ha luo ʻi he ʻoneʻoné ʻo ne fakatō fua ai. Ka ko e manupuná ni ʻoku ʻikai te ne liʻaki ʻa e ngaahi fuá. ʻI hono ʻufiʻufiʻaki ʻa e ʻoneʻoné, ʻoku tauhi ai ʻa e ngaahi fuá ʻi ha māfana feʻungamālie lolotonga ʻa hono tokangaʻi fakatouʻosi ia ʻe he ʻositalesi tangatá mo e fefiné.

ʻE hā ngali nai ko e ʻositalesí ʻoku “ngalo ʻene poto” ʻi he taimi ʻokú ne ʻiloʻi ai ʻa e fakatuʻutāmakí mei ha manu fekai pea hā ngali ʻokú ne hola. Kae kehe, ʻoku pehē ʻe ha Encyclopedia of Bible Animals: “Ko ha founga eni ʻo ha fakaleluʻi: [ko e fanga ʻositalesí] te nau fakaeʻa kinautolu pea kapakapatā honau kapakaú ke tohoakiʻiʻaki ʻa e tokanga ʻa ha monumanu pe ko ha tokotaha pē ʻoku fakamanamana, pea taki mamaʻo ai kinautolu mei he ngaahi fuá.”

ʻOku anga-fēfē ʻa e hoko ʻa e ʻositalesí ʻo “kakaeʻi ʻa e hōsi mo ia ʻoku heka ai”? ʻOku pehē ʻe he World Book Encyclopedia: “ʻOku ʻikai lava ke puna ʻa e ʻositalesí, ka ʻoku ʻiloa ia ʻi heʻene veʻe vave ʻi he kelekelé. Ko hono ongo vaʻe lōloá ʻokú na ʻaluʻaki ʻa e manga fute ʻe 15 (mita ʻe 4.6) ʻi he vave ʻoku aʻu ki he maile ʻe 40 (kilomita ʻe 64) ʻi he houa.”

 ʻOange ʻe he ʻOtuá ʻa e Mālohi ki he Hōsí

ʻOku hoko atu ʻa e ʻOtuá ʻo ʻeke kia Siope fekauʻaki mo e hōsí. (Siope 39:​19-​25) ʻI he kuonga muʻá, naʻe tau heka hoosi ai ʻa e kau pāteʻi taú, pea naʻe toho ʻe he fanga hōsí ʻa e ngaahi saliote ʻoku heka ai ha fakaʻuli mo ha ongo sōtia nai ʻe toko ua. ʻI he ʻikai kei faʻa tatali ki he taú, ʻoku tangi ai ha hoosi tau mo tuki ʻa e kelekelé ʻaki hono ngaahi topuvaʻé. ʻOku ʻikai ilifia ia pea ʻoku ʻikai tafoki ia koeʻuhi ko ha heletā. ʻI he ongona ʻo e talupité, ʻoku fakafeangai ki ai ʻa e hoosi ki he taú ʻo hangē ʻokú ne pehē “Hahá!” ʻOkú ne tuiaki ki muʻa, ʻo “folofua ʻa e kelekele.” Neongo ia, ʻoku talangofua ʻa e hoosi ki he taú ki he tokotaha ʻoku heka aí.

ʻI ha fakamatala meimei tatau, naʻe tohi ʻe he ʻākeolosia ko Layard: “Neongo ʻa hono puleʻingofua hangē ha lamí, pea ʻikai fiemaʻu ha toe tataki tuku kehe ʻa e maeá, ʻi he taimi ʻoku fanongo ai ʻa e hoosi ʻAlepeá ki ha kaila tau ʻa e matakalí, pea sio ki he ngalulu ʻa e tao ʻa e tokotaha ʻoku heka aí, ʻoku ulo hangē ha afí hono matá, ʻoku ava lahi ʻa hono avaʻi ihu kulokula mālohí, ʻoku piko ʻi he tuʻunga fakangeingeia ʻa hono kiá, pea ʻoku tuʻu hono hikú mo e fulufulu ʻo e kiá ʻo mofele ʻi he matangí.”​—Discoveries Among the Ruins of Nineveh and Babylon, 1853, peesi 330.

Fakakaukau Atu ki he Hoké mo e ʻĪkalé

Naʻe fakahanga ʻe Sihova ʻa ʻene tokangá ki he faʻahinga pau kehe ʻo e manupuná. (Siope 39:​26-​30) Ko e fanga hoké ‘ʻoku nau fakafolau ʻo folahi honau kapakaú ki he matangí.’ ʻI he lave ki he hoke peregrine ko e manupuna puna vave tahá, ʻoku pehē ʻe he Guinness Book of Records ʻoku “aʻu ia ki he ngaahi lēvolo vave ʻi he lēkōtí ʻi he taimi ʻoku tūʻulu ai mei he māʻolunga lahi lolotonga ʻene ngaahi fakaʻaliʻali ʻi hono feituʻú, pe ʻi he taimi ʻokú ne pō ai he ʻataá ha manupuna ke kaí.” Ko e manupuná ni kuó ne aʻu ki ha vave ko e kilomita ʻe 349 ʻi he houa ʻi he tūʻulu hifo ʻaki ʻa e tikilī ʻengikale ʻe 45!

Kuo puna ʻa e fanga ʻīkalé ʻi he vave ko e kilomita ʻe 130 ʻi he houa. Naʻe fakahoa ʻe Siope ʻa e fononga vave ʻa e moʻuí ki he vave ʻo e kumi ʻa ha ʻīkale ki ha manu ke kaí. (Siope 9:​25, 26) ʻOku ʻomai ʻe he ʻOtuá ʻa e mālohi ke tau hokohoko atu, ʻo hangē ʻoku tau ʻi ha ongo kapakau ʻoku hā ngali taʻehelaʻia ʻo ha ʻīkale he ʻataá. (Aisea 40:31) ʻI heʻene puná, ʻoku ngāueʻaongaʻaki ai ʻe ha ʻīkale ʻa e ngaahi fokotuʻunga ʻea māfana ʻoku mahiki hake. ʻOku puna takatakai ʻa e manupuná ʻi he ʻeá ni, ʻa ia ʻokú ne hiki hake ai ia ke māʻolunga ange. ʻI he maʻu ʻe he ʻīkalé ha māʻolunga paú, ʻokú ne puna ai ki he fokotuʻunga ʻea māfana hokó pea ʻoku lava ke ne nofo ai ʻi ʻolunga ʻi ha laui houa ʻi hano fakamoleki siʻisiʻi pē ʻo e iví.

Ko ha ʻīkale ʻokú ne “ʻai hono pununga ki he [taukakapá]” ʻi he ngaahi māʻolunga ʻoku ʻikai ala aʻu ki ai, ʻo ʻai ai ke ʻatā ʻa hono fāngangá mei he fakatuʻutāmakí. Kuo ʻai ʻe Sihova ke fai eni ʻe he ʻīkalé ʻi he poto fakanatula. Pea ʻi he vīsone ʻoku ʻoange ʻe he ʻOtuá, “ʻoku vakaiʻi ʻe hono mata [ʻo e ʻīkalé] mei he mamaʻo.” Ko e malava vave ke liliu ʻa e sio fakamamaʻu ʻa hono matá ʻoku malava ai ha ʻīkale ke sio maʻu pē ki ha manu ke pō pe ko ha ʻangaʻanga ʻo ha manu lolotonga haʻane tūʻulu lōloa hifo. ʻOku lava ke kai ʻe ha ʻīkale ʻa e ngaahi ʻangaʻanga ʻo e fanga manu kuo maté, ko ia “ko e potu ʻoku ʻi ai ʻa e mate, [ʻoku] ʻi ai leva ia.” Ko e manupuná ni ʻokú ne pō ʻa e fanga kiʻi manu īkí ʻo ʻave ki hono fāngangá.

Akonakiʻi ʻe Sihova ʻa Siope

Ki muʻa ke ʻeke ha toe ngaahi fehuʻi fekauʻaki mo e fanga manú, naʻe akonakiʻi ʻe he ʻOtuá ʻa Siope. Naʻe anga-fēfē ʻa e tali ʻa Siopé? Naʻá ne fakatōkilaloʻi ia ʻo tali loto-lelei ha faleʻi lahi ange.​—Siope 40:​1-​14.

ʻI he tuʻunga ko eni ʻi he lēkooti fakamānavaʻi ʻo e ngaahi hokosia ʻa Siopé,  ʻoku tau ako ai ha lēsoni mātuʻaki mahuʻinga. Ko eni ia: ʻOku ʻikai fakatonuhiaʻi ha tangata ʻi heʻene fakaangaʻi ʻa e Māfimafi-Aoniú. ʻOku totonu ke tau lea pea ngāue ʻi he ngaahi founga ʻoku fakahōifuaʻi ai ʻa ʻetau Tamai fakahēvaní. ʻIkai ngata aí, ko ʻetau tokanga tefitó ʻoku totonu ko hono fakatonuhiaʻi ʻa e huafa māʻoniʻoni ʻo Sihová pea mo hono fakatonuhiaʻi ʻa hono tuʻunga-haú.

Fakalāngilangiʻi ʻe Piʻimoti ʻa e ʻOtuá

ʻI he toe fakahanga ʻa ʻene tokangá ki he meʻa fakatupu ko e fanga manú, naʻe ʻeke ai ʻe he ʻOtuá kia Siope fekauʻaki mo Piʻimoti, ʻa ia ʻoku mahinoʻi lahi ko e hipopotamá. (Siope 40:​15-​24) Ko ha hipo lahi ʻoku mita ʻe 4 ki he 5 ʻa hono lōloá pea ko hono mamafá nai ʻoku aʻu ki he kilokalami ʻe 3,600. Ko Piʻimotí ko “hono ivi [ʻoku ʻi] hono kongaloto”​—ʻa e ngaahi uoua ʻi hono tuʻá. Ko e kili matolu ʻo hono keté ko ha tuʻunga ʻaonga moʻoni ia ʻi hono toho ʻe Piʻimoti veʻe nounou ʻa hono sinó ʻi he makamaká he ngaahi vaitafé. Ko e moʻoni ʻe ʻikai feʻauhi ha tangata mo Piʻimoti, ʻi hono fuʻu sinó, fuʻu ngutú mo e ongo kaungao mālohí.

ʻOku kaka hake ʻa Piʻimoti mei he vaitafé ke kai ʻi he “mohuku.” ʻĀua, ko e lauʻiʻakau lanu mata ʻo ha moʻunga fakakātoa ʻoku hā ngali fiemaʻu ke fafangaʻaki ia! ʻOku ʻalu ʻa e mohuku kilo ʻe 90 ki he 180 ki hono keté ʻi he ʻaho kotoa pē. ʻOku fakalato ʻa ʻene fiekaiá, ʻoku tokoto ʻa Piʻimoti ʻi he lalo lōtosí pe ʻi he malumalu ʻo e ʻulu vavaé. Kapau ʻoku tāfea ʻa e vaitafe ʻoku nofo aí, ʻoku lava ke tauhi ʻe he hipó ʻa hono ʻulú ʻi ʻolunga ʻi he vaí pea kakau ʻo hanga ki ha fuʻu lōvai. ʻI he fetaulaki pea mo e ngutuʻi ʻelefānite mo e ongo fuʻu nifo fakamanavahē ʻo Piʻimotí, heʻikai maʻu ʻe Siope ha loto-toʻa ke tui ha mātaʻu ʻi hono ihú.

ʻOatu ʻe Levaiatani ʻa e Fakahīkihiki ki he ʻOtuá

Naʻe hoko atu ʻo fanongo ʻa Siope fekauʻaki mo Levaiatani. (Siope 41:​1-​34) Ko e foʻi lea faka-Hepeluú ʻoku fakahaaʻi ai “ha manu kili petepete”​—ngalingali ko e kalokatailé. ʻE lava ke ʻai ʻe Siope ʻa e Levaiataní ko ha meʻa-vaʻinga ki he fānaú? ʻIkai ʻaupito! Ko e ngaahi fehangahangai mo e meʻamoʻui ko ení kuo toutou fakamoʻoniʻi ai ʻoku fakatuʻutāmaki. Ko e moʻoni, kapau ʻe feinga ha tangata ke ne fakavaivaiʻi ʻa Levaiatani, ʻoku ngalingali ko e fāingá ʻe fuʻu lahi ʻaupito ʻa ia ʻe ʻikai ʻaupito te ne toe fai ia!

ʻI he mahiki hake ʻa e ʻulu ʻo Levaiataní ʻi he vaí ʻi he hopo ʻa e laʻaá, ʻoku ulo ʻa hono ongo matá “hange ko e mafoaʻaeata.” Ko e ʻuno ʻo Levaiataní ʻoku tāpuni maʻu, pea ʻoku nofo ʻi hono kilí ʻa e ngaahi lauʻi peleti huihuia ʻoku faingataʻa ke hū ki ai ʻa e ngaahi foʻi mahafú, ʻo siʻi ange ʻaupito ʻa e lava ke hū ki ai ʻa e ngaahi heletaá mo e taó. Ko e ngaahi ʻuno māsila ʻi he kete ʻo ha kalokatailé ʻoku hangē ia naʻe ʻi ai ha meʻangāue “ʻauʻau” ʻi he veʻe pelepelá. Ko ʻene ʻita ʻi he vaí ʻoku ʻohake ai ha fanga kiʻi pula koa ʻoku hangē ha ngako faitoʻó. Pea koeʻuhi ko hono lahí, teunga taú, mo e ngaahi meʻataú​—ko ha ngutu fakailifia mo ha hiku mālohí—ʻoku ʻikai manavahē ʻa Levaiatani ia ki ha meʻa.

Fai ʻe Siope ha Vete Hia

Naʻe fakahaaʻi ʻe Siope naʻá ne ‘buaki aia nae ikai te ne iloʻi; ae gaahi mea lahi hake fau kiate ia.’ (Siope 42:​1-3, PM) Naʻá ne tali ʻa e fakatonutonu ʻa e ʻOtuá, ʻo fai ha vete hia pea fakatomala. Naʻe valokiʻi ʻa hono ngaahi kaungāmeʻá, ka naʻe faitāpuekina lahi ia.​—Siope 42:​4-​17.

He fakapotopoto ē ke manatuʻi ʻa e hokosia ʻa Siopé! ʻE ʻikai ala lava ke tau tali ʻa e ngaahi fehuʻi kotoa naʻe ʻeke ʻe he ʻOtuá kiate iá. Kae kehe, te tau lava pea ʻoku totonu ke tau fakahaaʻi ʻa e houngaʻia ki he ngaahi fakatupu fakaofo lahi mo kehekehe ʻa ia ʻoku fakahīkihikiʻi ai ʻa Sihová.

[Fakatātā ʻi he peesi 13]

Kosi ʻo e moʻungá

[Fakatātā ʻi he peesi 13]

Lēveni

[Fakatātā ʻi he peesi 13]

Laione fefine

[Fakatātā ʻi he peesi 14]

Sepelā

[Fakatātā ʻi he peesi 14]

ʻOku lue mamaʻo ʻa e ʻositalesí mei hono fuá, ka ʻoku ʻikai te ne liʻaki ia

[Fakatātā ʻi he peesi 14]

Fuaʻi ʻositalesi

[Fakatātā ʻi he peesi 14, 15]

Hoke Peregrine

[Maʻuʻanga]

Hoke: © Joe McDonald/Visuals Unlimited

[Fakatātā ʻi he peesi 15]

Hoosi fefine ʻAlepea

[Fakatātā ʻi he peesi 15]

ʻĪkale lanu koula

[Fakatātā ʻi he peesi 16]

ʻOku mahinoʻi lahi ʻa Piʻimoti ko e hipopotamá

[Fakatātā ʻi he peesi 16]

ʻOku pehē ko Levaiataní ko e kalokataile mālohí ia