Talanoa ki he Moʻuí

Fakapapauʻi ke Tauhi Ai Pē Hoku Tokotaha-Fakatupú

FAKAMATALA FAI ʻE CONSTANCE BENANTI

Naʻe vave kotoa ʻene hokó! ʻI he foʻi ʻaho pē ʻe ono, naʻe mofi lahi ʻaupito ai ʻa homa ʻofefine māhina ʻe 22 ko Camille ʻo ne mate. Naʻe ʻikai ke u kei faʻa lava ʻo matuʻuekina ʻa hoku mamahí. Naʻá ku loto foki mo au ke u mate. Ko e hā naʻe fakaʻatā ai ʻe he ʻOtuá ha meʻa peheé? Naʻá ku puputuʻu.

KO ʻEKU ongo mātuʻá naʻá na hiki mai mei Castellammare del Golfo, ko ha kolo ʻi Sisilī, ʻĪtali. Naʻá na hiki mai ki he loto-kolo Niu ʻIoké, ʻa ia naʻe fāʻeleʻi ai au ʻi Tīsema 8, 1908. Ko homau fāmilí, ʻa ia ko ʻeku tangataʻeikí mo ʻeku fineʻeikí mo ʻena fānau ʻe toko valu, toko nima tangata mo e toko tolu fefine. a

ʻI he 1927, naʻe kamata ai ke maʻu ʻe heʻeku tangataʻeikí, Santo Catanzaro, ʻa e ngaahi fakataha ʻa ha kiʻi kulupu ʻo e Kau Ako Tohi Tapu, ko hono ui ia ʻi he taimi ko iá ʻa e Kau Fakamoʻoni ʻa Sihová. Ko Giovanni De Cecca, ko ha tokoua ʻĪtali ʻa ia naʻe ngāue ʻi he ʻuluʻi ʻapitanga ʻi Brooklyn, Niu ʻIoké, (ui ko e Pēteli) naʻá ne fai ʻa e ngaahi fakatahá ʻi he feituʻu naʻa mau nofo aí, ʻa e kolo ofi mai ko New Jersey. ʻI he ʻalu ʻa e taimí, naʻe kamata malanga ai ʻa e tangataʻeikí peá ne kau ʻi he ngāue fakafaifekau taimi kakató, ʻo hokohoko atu ai pē ʻi he ngāue ko iá ʻo aʻu ki heʻene mate ʻi he 1953.

ʻI he taimi naʻe kei siʻi ai ʻa e fineʻeikí, naʻá ne fie hoko ko ha tāupoʻou, ka naʻe ʻikai ke fakaʻatā ia  ʻe heʻene ongo mātuʻá. ʻI he ʻuluaki taimí, naʻe fakalotoʻi au ʻe he fineʻeikí ke ʻoua te u kau mo e tangataʻeikí ʻi he ako Tohi Tapú. Kae kehe, naʻe vave ke u fakatokangaʻi ha ngaahi liliu ʻi he tangataʻeikí. Naʻá ne hoko ʻo anga-mokomoko mo anga-malū ange, pea naʻe ʻi ai ʻa e melino lahi ange ʻi he fāmilí. Naʻá ku saiʻia ai.

ʻI he taimi ko iá, naʻá ku fetaulaki ai mo Charles, ko ha tangata ʻi hoku toʻú ʻa ia naʻe fāʻeleʻi ʻi Brooklyn. Ko hono fāmilí, hangē pē ko hoku fāmilí, naʻa nau omi mei Sisilī. Naʻe ʻikai fuoloa naʻá ma fakamaʻu, pea ʻi he foki mai ʻa e tangataʻeikí mei he fakataha-lahi ʻa e Kau Fakamoʻoni ʻa Sihová ʻi he 1931 ʻi Columbus, Ohio, naʻá ma mali ai. ʻI he teʻeki ke lava ha taʻú, naʻe fāʻeleʻi ai ʻa homa ʻofefine ko Camille. ʻI heʻene maté, naʻe ʻikai lava ke fakafiemālieʻi hoku loto-mamahí. ʻI he ʻaho ʻe taha, naʻe pehē tangi mai ai ʻe Charles kiate au: “Ko Camille ko ha ʻofefine pē mo ia ʻoʻoku ʻo hangē ko ia kiate koé. Fēfē ke hoko atu ʻeta moʻuí ʻo ta fefakafiemālieʻaki?”

Naʻá Ma Tali ʻa e Moʻoni ʻo e Tohi Tapú

Naʻe fakamanatu mai ʻe Charles kiate au ʻa e lave ʻa e tangataʻeikí ʻo fekauʻaki mo e ʻamanaki ʻo e toetuʻú ʻi heʻene fai ko ia ʻa e malanga ʻi he putu ʻo Camille. Naʻá ku ʻeke ange: “ʻOkú ke tui moʻoni ki he toetuʻú?”

Naʻá ne tali mai: “ʻIo! Fēfē ke ta fekumi ke ʻilo lahi ange fekauʻaki mo e meʻa ʻoku fakamatalaʻi ʻe he Tohi Tapú?”

Naʻe ʻikai ke u lava ʻo mohe ʻi he pō ko iá. ʻI he ono pongipongí, ki muʻa ke ʻalu ʻa e tangataʻeikí ki he ngāué, naʻá ku ʻalu atu ai kiate ia ʻo tala ange, ʻoku ou fie ako mo Charles ʻa e Tohi Tapú. Naʻá ne fiefia lahi ʻo ne ʻoho mai ʻo ma fāʻofua. Naʻe fanongo mai ʻa e fineʻeikí, ʻa ia naʻá ne kei tokoto, ki heʻema talanoá. Naʻá ne ʻeke mai pe ko e hā ʻa e meʻa naʻe hokó. Naʻá ku pehē ange: “ʻOku ʻikai ha meʻa ia ʻe hoko. Ko au pē mo Charles kuó ma pehē ke ma ako ʻa e Tohi Tapú.”

“ʻOku fiemaʻu ke tau ako kotoa ʻa e Tohi Tapú,” ko ʻene talí mai ia. Ko ia ai, ko kimautolu kātoa, kau ai ʻa hoku fanga tuongaʻané mo hoku fanga tokouá—toko 11 fakakātoa—naʻe kamata ke mau ako fakataha ko ha foʻi fāmili.

Naʻe ʻomai kiate au ʻe he ako Tohi Tapú ʻa e fiemālie, pea faifai pē ʻo kamata ke mafuli ʻa ʻeku puputuʻu fakaeʻatamaí mo e loto-mamahí ki ha ʻamanaki. ʻI ha taʻu ʻe taha mei ai, ʻi he 1935, naʻe kamata ai ke u vahevahe mo Charles ʻa e ngaahi moʻoni ʻo e Tohi Tapú ki he niʻihi kehé. ʻI Fepueli ʻo e 1937, hili ʻa e fanongo ʻi ha malanga ʻi he ʻuluʻi ʻapitanga ʻi Brooklyn ʻa ia naʻe fakamatalaʻi ai ʻa e mahuʻinga Fakatohitapu ʻo e papitaiso ʻi he vaí, naʻá ma papitaiso ai ʻi ha hōtele ofi mai fakataha mo ha tokolahi kehe. Naʻá ku laka ʻi he sitepú ni ʻo ʻikai koeʻuhi pē naʻá ku ʻamanaki atu ke toe sio ki heʻeku tamá ʻi ha ʻaho ka koeʻuhi foki naʻá ku fakaʻamu ke tauhi hotau Tokotaha-Fakatupú, ʻa ia naʻá ku hoko ʻo ʻiloʻi mo ʻofa aí.

 Hū ki he Ngāue Fakafaifekau Taimi-Kakató

Ko e talanoa ki he niʻihi kehé ʻo fekauʻaki mo e meʻa naʻá ku akó naʻe fakafiefia mo fakafiemālie, tautefito koeʻuhi naʻe tali ʻe he tokolahi ʻi he taimi ko iá ʻa e pōpoaki ʻo e Puleʻangá pea kau ʻi hono fakamafola iá. (Mātiu 9:37) ʻI he 1941, naʻá ku hoko ai mo Charles ko e ongo tāimuʻa, ko hono ui ia ʻe he Kau Fakamoʻoni ʻa Sihová ʻa ʻenau kau faifekau ngāue taimi-kakató. ʻIkai ke fuoloa mei ai, naʻá ma fakatau mai ha taulani, pea naʻe tuku ai ʻe Charles ʻa e fale ngaohiʻanga talausese ʻo homau fāmilí ke tokangaʻi ʻe hoku tuongaʻane ko Frank. Faai atu, naʻá ma fiefia ʻi hono maʻu ha tohi ʻo fakahā mai ai kuo vaheʻi kimaua ko e ongo tāimuʻa makehe. Naʻá ma ʻuluaki ngāue ʻi New Jersey, pea ki mui ai naʻe ʻave kimaua ki he Vahefonua Niu ʻIoké.

ʻI he 1946, lolotonga ʻa e maʻu ha fakataha-lahi ʻi Baltimore, Maryland, naʻe kole mai ai kia kimaua ke ma ō ki ha fakataha naʻe fai mo e kau fakafofonga makehe ʻo e Kau Fakamoʻoni ʻa Sihová. Naʻá ma feʻiloaki ai mo Nathan H. Knorr mo Milton G. Henschel. Naʻá na talanoa mai ʻo fekauʻaki mo e ngāue fakamisinalé pea tautefito ki he ngāue fakamalanga ʻi ʻĪtalí. Naʻá na fakaafeʻi kimaua ke ma fakakaukau ki haʻama kau ki he Akoʻanga Tohi Tapu Taua Leʻo ko Kiliatí.

“Fakakaukau ki ai,” ko hono fakahā mai ia kia kimauá, “peá mo toki fakahā mai ʻa hoʻomo talí.” ʻI heʻema mavahe mei he ʻōfisí, naʻá ku fesiofaki mo Charles, peá ma tafoki ʻo ma toe foki ki loto. Naʻá ma tala ange: “Naʻá ma fakakaukau ki ai. ʻOkú ma mateuteu kimaua ia ki Kiliati.” ʻI he ʻaho ʻe hongofulu mei ai, naʻá ma kau ai ki he kalasi hono fitu ʻo Kiliatí.

Ko e ngaahi māhina naʻe fai ai homa akoʻí naʻe fakangalongataʻa. Ko e meʻa naʻe tautefito ʻene maongo kiate kimauá ko e kātaki mo e ʻofa ʻa e kau faiakó, ʻo teuʻi kimautolu ke mau fehangahangai mo e ngaahi faingataʻa ʻi he ngaahi malaʻe ngāue mulí. Hili ʻa e maʻu tohi fakamoʻoni ako ʻi Siulai 1946, naʻe vaheʻi kimaua ke ma malanga ʻi ha kiʻi taimi ʻi he feituʻu kolo ʻo Niu ʻIoké, ʻa ia naʻe tokolahi ai ʻa e kakai ʻĪtalí. Naʻe hoko mai leva ʻa e ʻaho lahí! ʻI Sune 25, 1947, naʻá ma mavahe ai ki ʻĪtali, ʻa homa vāhenga-ngāue fakamisinalé.

Nofo ki Homa Vāhenga-Ngāué

Naʻá ma folau ʻi ha vaka ʻa ia naʻe ngāueʻaki ki muʻa ki ha ngaahi taumuʻa fakakautau. Hili ʻa e ʻaho ʻe 14 ʻo e folau tahí, naʻa mau tau ai ki he taulanga ʻĪtali ʻo Genoa. Naʻe kei hā ʻi he koló ʻa e ngaahi maumau ʻo e Tau Lahi Hono II, ʻa ia naʻe toki ʻosi atu pē ʻi he taʻu ʻe ua mei ai. Ko e fakatātaá, ko e tauʻanga lēlué, naʻe ʻikai ke ʻi ai ha sioʻata ia ʻi hono ngaahi matapā sioʻatá koeʻuhi ko e ngaahi fakapā pomú. Mei Genoa naʻá ma hoko atu ai ʻi ha lēlue uta koloa ki Mīlani, ʻa ia naʻe tuʻu ai ʻa e ʻōfisi vaʻá mo ha ʻapi misinale.

Ko e ngaahi tuʻunga ʻo e nofó ʻi he ʻosi ʻa e taú ʻi ʻĪtalí naʻe fakaʻofa ʻaupito. Naʻe fakahoko ʻa e ngaahi ngāue ke toe langa foʻou, ka naʻe mafolalahia ʻa e masivá. ʻIkai fuoloa naʻá ku maʻu ha palopalema fakaesino mafatukituki. Fakatatau ki he toketā ʻe taha, naʻe ʻi he tuʻunga kovi ʻaupito ʻa hoku mafú ʻo ne fakakaukau ko e meʻa lelei taha kiate aú ke u foki ki he ʻIunaite Seteté. ʻOku ou fiefia ʻi he hala ʻa ʻene fakafuofuá. Hili ʻa e taʻu ʻe 58, ʻoku ou kei ʻi hoku vāhenga-ngāué pē ʻi ʻĪtali.

ʻI ha ngaahi taʻu siʻi pē ʻo ʻema ʻi homa vāhenga-ngāué naʻe loto ai ʻa hoku fanga tuongaʻane ʻi he ʻIunaite Seteté ke ʻomai haʻama kā. Ka naʻe fakafoki pē ʻe Charles ʻa ʻenau ʻofá, ko ha fili naʻá ku fakahoungaʻi. ʻI heʻema ʻiloʻí, naʻe ʻikai ha Fakamoʻoni ia ʻi ʻĪtali naʻe ʻi ai haʻane kā ʻi he taimi ko ení, pea naʻe ongoʻi ʻe Charles naʻe lelei ange pē ke ma tauhi ha tuʻunga ʻo e moʻuí naʻe hoa mo ia ʻa homa fanga tokoua Kalisitiané. Naʻe toki aʻu ki he 1961 naʻá ma maʻu ai ha kiʻi kā.

Ko homau ʻuluaki Fale Fakatahaʻanga ʻi Mīlaní  naʻe ʻi ha lalo fale ia ʻa ia ko e falikí naʻe lau kelekele. Naʻe ʻikai ʻi ai ha fale mālōlō, pea ko e vai pē naʻe ʻi aí ʻa ē naʻe ʻi lalo homau vaʻé ʻi he taimi naʻe ʻuha aí. Naʻe ʻi ai foki mo e fanga kiʻi kumā naʻa nau lele takai holo. Ko ha ongo foʻi ʻuhila ʻe ua naʻe ʻomai ai ʻa e maama ki heʻemau ngaahi fakatahá. Neongo ʻa e ngaahi faingataʻa peheé, naʻe fakalototoʻa ke sio ki he faʻahinga loto-moʻoní ʻoku nau haʻu ki heʻemau ngaahi fakatahá pea faai atu pē ʻo nau kau mo kimautolu ʻi he ngāue fakafaifekaú.

Meʻa Naʻe Hokosia ʻi he Ngāue Fakamisinalé

Naʻá ma tuku ʻi ha tangata ʻa e kiʻi tohi Peace​—Can It Last? ʻI heʻema mavahé, naʻe aʻu hifo ʻa hono uaifí, ʻa Santina, naʻá ne fata mai ʻa e ngaahi kofukofu fakatau. Naʻá ne kiʻi ʻiteʻita, ʻi heʻene pehē ʻoku toko valu ʻene fānau fefine ke tokangaʻí pea naʻe ʻikai toe ʻi ai hano taimi ʻatā. ʻI he taimi naʻá ku toe foki atu ai kia Santina, naʻe ʻikai ke ʻi ai ʻa hono husepānití, pea naʻe fai ʻene niti. Naʻá ne pehē mai: “ʻOku ʻikai ʻi ai haku taimi ia ʻoʻoku ke u fanongo. Pea ko e tahá ʻoku ʻikai ke u poto he lautohí.”

Naʻá ku lotu fakalongolongo kia Sihova peá u kole ange pe ʻe lava ke u totongi ia ke ne niti ha kofu māfana maʻa hoku husepānití. ʻI he ʻosi mei ai ʻa e uike ʻe ua, naʻá ku maʻu ʻa e kofu māfaná, pea naʻe kamata ke u ako tuʻumaʻu ʻa e Tohi Tapú mo Santina ʻi he tokoni ʻa e tohi “The Truth Shall Make You Free.” Naʻe poto ʻa Santina he lautohí, pea neongo ʻa e fakafepaki ʻa hono husepānití, naʻá ne fai ha fakalakalaka peá ne papitaiso. Ko e toko nima ʻi heʻene fānau fefiné naʻa nau hoko ko e Kau Fakamoʻoni, pea kuo tokoniʻi foki ʻe Santina ʻa e tokolahi kehe ke nau tali ʻa e moʻoni ʻo e Tohi Tapú.

ʻI Maʻasi ʻo e 1951, naʻe ʻave ai kimaua fakataha mo e ongo misinale kehe—ko Ruth Cannon b mo Loyce Callahan, ʻa ia naʻá ne mali ki mui mo Bill Wengert—ki Brescia, ʻa ia naʻe ʻikai ha Kau Fakamoʻoni ia ʻi ai. Naʻa mau maʻu ha ʻapātimeni kuo ʻosi fakanaunau, ka ʻi he ʻosi mei ai ʻa e māhina ʻe ua, naʻe kole mai ʻe he pule falé ke mau hiki ʻi loto ʻi he houa ʻe 24. Koeʻuhi naʻe ʻikai toe ʻi ai ha Kau Fakamoʻoni ʻi he feituʻú, naʻe ʻikai ai toe ʻi ai haʻamau fili ka ko ʻemau hiki ki ha hōtele, ʻa ia naʻa mau nofo ai ʻo meimei māhina ʻe ua.

Ko ʻemau meʻakaí naʻe ngata pē ʻi he kofí, mo ha fanga kiʻi meʻakai maʻamaʻa, siisi mo e fuaʻiʻakau. Neongo ʻa e ngaahi faingataʻá, naʻe tāpuakiʻi lahi kimautolu. Faai atu pē, naʻa mau maʻu ha kiʻi ʻapātimeni siʻisiʻi, pea ʻi he Fakamanatu ʻo e pekia ʻa Kalaisí ʻi he 1952, ko e toko 35 naʻe ʻi ai ʻi he kiʻi loki siʻisiʻi ko ia naʻa mau ngāueʻaki ko ha Fale Fakatahaʻangá.

Fekuki mo e Ngaahi Pole

Lolotonga ʻa e taimi ko iá, naʻe kei maʻu pē ʻe he haʻa faifekaú ʻa e mafai lahi ki he kakaí. Ko e fakatātaá, lolotonga ʻa ʻemau malanga ʻi Brescia, naʻe fakaʻaiʻai ʻe he pātelé ha tamaiki tangata ke nau tolomakaʻi kimautolu. Kae kehe, ʻi he faai atu ʻa e taimí, naʻe kamata ai ke mau ako Tohi Tapu mo e toko 16, pea ʻi ha kiʻi taimi nounou, naʻa nau hoko ko e Kau Fakamoʻoni. Pea ko hai naʻe ʻi he lotolotonga ʻo e faʻahinga ko ení? Ko e taha he tamaiki tangata naʻa nau fakamanamanaʻi ke tolomakaʻi kimautolú! ʻOkú ne ngāue he taimí ni ko ha mātuʻa ʻi he taha ʻo e ngaahi fakatahaʻanga ʻi Brescia. ʻI he 1955 ʻi heʻema mavahe mei Brescia, ko e toko 40 ʻo e kau malanga ʻo e Puleʻangá naʻe kau ʻi he ngāue fakamalangá.

ʻI he hili iá, naʻá ma ngāue he taʻu ʻe tolu ʻi Leghorn (Livorno), ʻa ia ko e tokolahi taha ʻo e Kau Fakamoʻoni aí ko e kakai fefine. Naʻe ʻuhinga ení ko kimautolu ngaahi tuofāfiné naʻe pau ke mau tokangaʻi ʻa e ngaahi fatongia ʻi he fakatahaʻangá ʻa ia ʻoku faʻa vaheʻi ki he ngaahi tokouá. Naʻá ma hiki mei ai ki Genoa, ʻa ia naʻá ma kamata mei ai ʻi he taʻu ʻe 11 ki muʻá. ʻI he taimi ko ení, naʻe ʻi ai ha fakatahaʻanga. Ko e Fale Fakatahaʻangá naʻe ʻi he fungavaka ʻuluaki ia ʻi he fale naʻe ʻi ai homa ʻapātimení.

ʻI heʻema tūʻuta pē ʻi Genoa, naʻá ku kamata ha ako mo ha fefine ʻa ia ko hono husepānití ko ha tokotaha fuhu ki muʻa pea ko e pule ia ʻo ha fale fakamālohisino fuhu. Naʻe fai ʻe he fefiné ni ʻa e fakalakalaka fakalaumālie pea naʻe ʻikai fuoloa naʻá ne hoko ko hotau tuofefine Kalisitiane. Kae kehe, naʻe fakafepaki ʻa hono husepānití pea naʻá ne fai pehē ʻo fuoloa. Ka naʻe kamata ke ne ʻalu fakataha mo hono uaifí ki he ngaahi fakatahá. ʻI he ʻikai te ne hū ki he holó, naʻá ne tangutu pē ʻi tuʻa ʻo fanongo ai. Ki mui ai, ʻi he hili ʻema mavahe mei Genoa, naʻá ma ʻilo ai naʻá ne kole ki ha ako Tohi Tapu. ʻI he faai atu ʻa e taimí, naʻá ne papitaiso  pea hoko ko ha ʻovasia Kalisitiane anga-ʻofa. Naʻá ne faitōnunga ai pē ʻo aʻu ki heʻene maté.

Naʻá ku toe ako foki ʻa e Tohi Tapú mo ha fefine ʻa ia naʻe fakamaʻu mo ha polisi. ʻI he kamatá, naʻe hā mai mei he polisí ha mahuʻingaʻia, ka ʻi he hili ʻa e malí, naʻe maliu ʻa ʻene tōʻongá. Naʻá ne fakafepakiʻi ʻa e fefiné, pea naʻe ʻikai te ne toe ako. ʻI he toe hoko atu ki mui ʻene ako Tohi Tapú, naʻe fakamanamanaʻi ia ʻe hono husepānití ʻo ne pehē kapau te ne toe maʻu mai ʻokú ma ako, te ne fanaʻi lōua kimaua. Kae kehe, naʻá ne fai ha fakalakalaka fakalaumālie peá ne hoko ko ha Fakamoʻoni papitaiso. Ko e moʻoni, naʻe ʻikai te ne fanaʻi kimaua. Ko hono moʻoní, ʻi ha ngaahi taʻu ki mui ai ʻi heʻeku maʻu ha ʻasemipilī ʻi Genoa, naʻe haʻu ai ha taha kiate au mei hoku tuʻá ʻo ne fakapuliki mai ʻaki hono nimá ʻa hoku matá, peá ne ʻeke mai ke u mateʻi angé pe ko hai ia. Naʻe ʻikai malava ke u mapukepuke ʻa hoku loʻimatá ʻi heʻeku sio ki he husepāniti ʻo e fefine ko ení. Hili ʻene fāʻofua maí, naʻá ne tala mai kiate au kuó ne fakaʻilongaʻi ʻene fakatapui kia Sihová ʻaki ʻene papitaiso ʻi he ʻaho pē ko iá!

Mei he 1964 ki he 1972, naʻá ku maʻu ai ʻa e monū ʻo e ʻalu fakataha mo Charles ʻi heʻene ʻaʻahi ki he ngaahi fakatahaʻangá ke fakaivimālohiʻi fakalaumālie kinautolú. Naʻá ma ngāue ʻi he meimei kātoa ʻo e feituʻu tokelau ʻo ʻĪtalí—ʻi Piedmont, Lombardy mo Liguria. Naʻe toe hoko atu leva ʻema ngāue tāimuʻá ʻo ofi ki Florence pea ki mui ai ʻi Vercelli. ʻI he 1977, ko e fakatahaʻanga pē ʻe taha naʻe ʻi Vercelli, ka ʻi heʻema mavahe mai ʻi he 1999, naʻe ʻi ai ʻa e fakatahaʻanga ʻe tolu. ʻI he taʻu ko iá, naʻe hoko ai hoku taʻu 91, pea naʻe fakalotolahiʻi ai kimaua ke ma hiki ki he ʻapi misinale ʻi Lomá, ko ha kiʻi fale fakaʻofoʻofa ʻi ha feituʻu naʻe nonga ange.

Ko ha Toe Meʻa Fakamamahi

ʻI Maʻasi ʻo e 2002, naʻe puke fakafokifā ai ʻa Charles, ʻa ia naʻá ne faʻa moʻui lelei maʻu pē. Naʻe hōloa ai pē ʻa ʻene moʻuí ʻo aʻu ki heʻene mate ʻi Mē 11, 2002. Ko e taʻu ē ʻe 71 ʻo ʻema tangi fakataha lolotonga ʻa e ngaahi taimi fakamamahí pea fiefia fakataha ʻi heʻema maʻu ʻa e ngaahi tāpuakí. Ko ʻene maté ko ha mole lahi mo fakamamahi ia kiate au.

ʻOku ou faʻa sioloto atu kia Charles ʻi hono suti ʻotu-fakamaʻu-uá pea mo hono tatā ʻo e 1930 tupú. ʻOku ou fakakaukauloto atu ki heʻene malimalí pe hangē ʻoku ou fanongo ki heʻene fanga kiʻi tōʻonga katá. ʻI he tokoni ʻa Sihová pea mālō mo e ʻofa ʻa e siʻi ngaahi tokoua mo e ngaahi tuofāfine Kalisitiane tokolahi, kuo malava ai ke u kātaki ʻi he vahaʻa taimi fakamamahi ko ení. ʻOku ou tatali vēkeveke atu ki he taimi ʻa ia te u toe sio ai kia Charles.

Hokohoko Atu ʻEku Ngāué

Ko e tauhi ki hoku Tokotaha-Fakatupú kuo hoko ia ko e meʻa lelei taha ʻi heʻeku moʻuí. ʻI he faai mai ʻa e ngaahi taʻú, ‘kuó u ʻahiʻahiʻi mo ʻiloʻi ʻoku lelei ʻa Sihova.’ (Sāme 34:​8, NW) Kuó u ongoʻi ʻa ʻene ʻofá pea aʻusia ʻa ʻene tokangá. Neongo ʻa e mole ʻa ʻeku pēpeé, kuo ʻomai kiate au ʻe Sihova ʻa e ngaahi foha mo e ngaahi ʻofefine fakalaumālie tokolahi—ʻi ʻĪtali kātoa—ʻa ia kuo nau ʻomai ʻa e fiefia ki hoku lotó pea ki hoʻoná.

Ko e talanoa ki he niʻihi kehé ʻo kau ki hoku Tokotaha-Fakatupú ʻa e meʻa kuó u saiʻia taha maʻu pē ke u faí. Ko e ʻuhinga ia ʻoku hokohoko atu ai ʻeku malanga mo fai ʻa e ngaahi ako Tohi Tapú. ʻI he taimi ʻe niʻihi ʻoku ou loto-mamahi ʻi he ʻikai malava ke u fai ha meʻa lahi ange koeʻuhi ko ʻeku moʻuí. Ka ʻoku ou ʻiloʻi ʻoku ʻafioʻi ʻe Sihova ʻa hoku ngataʻangá pea ʻokú ne ʻofa ʻiate au mo fakahoungaʻi ʻa e meʻa ʻoku malava ke u faí. (Maake 12:42) ʻOku ou feinga ke u ʻai ko ʻeku meʻa ʻa e lea ʻo e Sāme 146:2: “Te u fakafetaʻi kia Sihova lolotonga ʻeku moʻui: te u ta haape ki hoku ʻOtua lolotonga ʻeku ʻi ai.” c

[Fakamatala ʻi lalo]

[Fakatātā ʻi he peesi 13]

Camille

[Fakatātā ʻi he peesi 14]

ʻI homa ʻaho malí, 1931

[Fakatātā ʻi he peesi 14]

ʻI he ʻikai ke muʻaki mahuʻingaʻia ʻa e fineʻeikí, naʻá ne loto ke mau ako kātoa ʻa e Tohi Tapú

[Fakatātā ʻi he peesi 15]

Fakataha mo Tokoua Knorr ʻi he maʻu tohi fakamoʻoni ako ʻi Kiliatí, 1946

[Fakatātā ʻi he peesi 17]

Fakataha mo Charles ki muʻa siʻi peá ne mālōloó