Ko e Pōtoʻi he Fanongo ʻi he ʻOfá

“FAKAMĀLŌ ATU ʻi hoʻomou fanongo maí.” Kuo leaʻaki atu ia ki muí ni ʻe ha taha kiate koe? Ko ha lea fakaʻapaʻapa moʻoni ē ko ia! ʻOku fakahoungaʻi ʻe he meimei tokotaha kotoa pē ha tokotaha fanongo lelei. ʻI he fanongo leleí, ʻe lava ke tau fakaivifoʻouʻi ai ʻa e kakai ʻoku nau loto-mamahi pe fakamafasiaʻi kinautolu ʻe he ngaahi palopalemá. Pea ʻikai ʻoku tokoniʻi kitautolu ʻe he hoko ko ha tokotaha fanongo leleí ke tau mahuʻingaʻia ʻi he kakaí? ʻI he fakatahaʻanga Kalisitiané, ko e fanongo ʻi he ʻofá ko ha konga tefito ia ʻo e “fefakaʻaiʻaiʻaki ʻa kitautolu ki he feʻofaʻaki mo e ngaue lelei.”​—Hepelu 10:24.

Kae kehe, ʻoku tokolahi ʻa e kakai ʻoku ʻikai ko e kau fanongo lelei kinautolu. ʻOku nau saiʻia ke fai faleʻi, fakamatala ki heʻenau ngaahi meʻa tonu naʻe hokosia, pe fakahaaʻi ʻenau fakakaukaú kae ʻikai ke fanongo ki he meʻa ʻoku leaʻaki ʻe he niʻihi kehé. Ko e fanongó ko ha pōtoʻi moʻoni ia. ʻE lava fēfē ke tau fanongo ʻi he ʻofá?

Ko ha Kī Mahuʻinga

Ko Sihova ʻa hotau “Faiako Maʻongoʻongá.” (Aisea 30:​20, NW) ʻE lava ke ne akoʻi lahi kitautolu fekauʻaki mo e fanongó. Fakakaukau atu ki he anga hono tokoniʻi ʻe Sihova ʻa e palōfita ko ʻIlaisiaá. ʻI hono fakamanavaheeʻi ʻe he ngaahi fakamanamana ʻa Kuini Sisipelí, naʻe hola ai ʻa ʻIlaisiā ki he toafá peá ne fakahāhā ha fakaʻamu ke ne mate. Naʻe lea mai ai kiate ia ha ʻāngelo ʻa e ʻOtuá. ʻI hono fakamatalaʻi ange ʻe he palōfitá ʻa ʻene ngaahi manavaheé, naʻe fanongo ki ai ʻa Sihova peá ne toki fakahāhā mai leva ʻa Hono fuʻu mālohí. Ko e hā hono olá? ʻI he ʻikai ke kei ilifiá, naʻe toe foki ʻa ʻIlaisiā ki hono vāhenga-ngāué. (1 Tuʻi 19:​2-​15) Ko e hā ʻoku vaheʻi ai ʻe Sihova ʻa e taimi ke fanongo ai ki he ngaahi meʻa ʻoku hohaʻa ki ai ʻa ʻene kau sevānití? Koeʻuhí he ʻokú ne tokanga kiate kinautolu. (1 Pita 5:7) Ko ha kī eni ki he hoko ko ha tokotaha fanongo leleí: Ko e tokanga ki he niʻihi kehé, mo fakahāhā ʻa e hohaʻa moʻoni kiate kinautolu.

ʻI he taimi naʻe fai ai ʻe ha tangata ʻi Polivia ha hala mamafá, naʻá ne houngaʻia ʻi hono maʻu ha tokanga lahi pehē mei ha kaungātui. ʻOku fakamatala ʻa e tangatá: “Naʻá ku ʻi he tuʻunga māʻulalo taha ʻi heʻeku moʻuí ʻi he taimi ko iá. Naʻe mei faingofua ai ʻa ʻeku tukuange ʻa e feinga ke tauhi kia Sihová ka ne taʻeʻoua ha tokoua ʻa ia naʻá ne vaheʻi ʻa e taimi ke fanongo mai ai kiate au. Naʻe ʻikai lahi ha meʻa te ne leaʻaki, ka ʻi he ʻiloʻi naʻá ne tokanga feʻunga ke fanongó naʻe fakaivimālohiʻi moʻoni ai au. Naʻe ʻikai te u fiemaʻu ha fakaleleiʻanga; naʻá ku ʻiloʻi ʻa e meʻa naʻe pau ke u faí. Naʻe fiemaʻu pē ke u ʻiloʻi naʻe tokanga mai ha taha ʻo fekauʻaki mo e anga ʻo ʻeku ongoʻí. Ko ʻene fanongó naʻe fakahaofi ai au mei he fōngia ʻe he siva ʻa e ʻamanakí.”

Ko ha Faʻifaʻitakiʻanga lahi ʻi he pōtoʻi he fanongo ʻi he ʻofá ko Sīsū Kalaisi. Taimi nounou hili ʻa e pekia ʻa Sīsuú, naʻe fononga ai ʻa e toko ua ʻo ʻene kau ākongá mei Selusalema ki ha kolo naʻe kilomita ʻe 11 ʻa hono mamaʻó. ʻOku ʻikai ha veiveiua naʻá na loto-siʻi. Ko ia naʻe kamata luelue ai mo kinaua ʻa Sīsū Kalaisi kuo toetuʻú. Naʻá ne ʻeke ʻa e ngaahi fehuʻi naʻe fakalea fakalelei ke ʻiloʻi ai ʻa e meʻa naʻá na hohaʻa ki aí, pea naʻe tali ange ʻe he ongo ākongá. Naʻá na fakahaaʻi ʻa e ngaahi ʻamanaki naʻá na maʻú pea mo e ʻamanaki-tōnoa mo e puputuʻu naʻá na ongoʻi ʻi he taimi ko ení. Naʻe tokanga ʻa Sīsū kiate kinaua, pea ko ʻene fanongo ʻi he ʻofá naʻe mateuteu ai ʻa e ongo ākongá ke na fanongo. Naʻe toki hoko atu leva ʻa Sīsū ʻo “fakaʻuhinga mei he Tohi tapu katoa ʻa e ngaahi meʻa naʻe kau kiate ia.”​—Luke 24:​13-​27.

Ko e tomuʻa fanongó ko ha founga anga-ʻofa ia  ke ʻai ai ʻa e niʻihi kehé ke nau fanongo mai kiate kitautolu. “Ko ʻeku ongo mātuʻá mo e ongo mātuʻa ʻa hoku malí naʻe kamata ke nau fakafepakiʻi ʻa e founga naʻá ku tauhi hake ʻaki ʻa ʻeku fānaú,” ko e lau ia ʻa ha fefine Polivia. “Naʻá ku fehiʻa ʻi heʻenau fakamatalá, ka naʻá ku ongoʻi taʻepauʻia ʻiate au ʻi hoku tuʻunga ko ha mātuʻa tauhi fānaú. Fakafuofua ki he taimi ko ení, naʻe ʻaʻahi mai ai kiate au ha taha ʻo e Kau Fakamoʻoni ʻa Sihová. Naʻá ne talanoa mai kiate au ʻo fekauʻaki mo e ngaahi talaʻofa ʻa e ʻOtuá. Kae kehe, ko e founga ʻo ʻene ʻeke mai ʻa e anga ʻo ʻeku fakakaukaú naʻe tala mai ai kiate au naʻe loto-lelei ʻa e tokotahá ni ke fanongo. Naʻá ku fakaafeʻi ia ki loto, pea naʻe vave ʻa ʻeku fakamatalaʻi kiate ia ʻa ʻeku palopalemá. Naʻá ne fanongo anga-kātaki. Naʻá ne ʻeke mai pe ko e hā ʻa e meʻa naʻá ku fiemaʻu ki heʻeku fānaú pea mo e anga ʻo e ongoʻi ʻa hoku husepānití ʻo fekauʻaki mo iá. Ko ha meʻa fakafiemālie ia ke feohi mo ha taha ʻa ia naʻá ne loto-lelei ke feinga ke ne mahinoʻi au. ʻI he taimi naʻá ne kamata ai ke fakahaaʻi mai kiate au ʻa e meʻa ʻoku leaʻaki ʻe he Tohi Tapú ʻo fekauʻaki mo e moʻui fakafāmilí, naʻá ku ʻiloʻi ai naʻá ku talanoa ki ha taha ʻa ia naʻe tokanga ʻo fekauʻaki mo hoku tuʻungá.”

“Ko ʻOfa . . . ʻoku ʻikai te ne kumi ʻene lelei aʻana,” ko e lau ia ʻa e Tohi Tapú. (1 Kolinito 13:​4, 5) Ko e fanongo leva ʻi he ʻofá ʻoku fakahuʻunga ia ai ke tau tuku ʻetau ngaahi mahuʻingaʻiá tonu ki he tafaʻakí. ʻE fiemaʻu nai ai ke tāmateʻi ʻa e televīsoné, tuku ki lalo ʻa e nusipepá, pe tāmateʻi ʻa e telefoni toʻotoʻó ʻi he taimi ʻoku talanoa mai ai ʻa e niʻihi kehé kiate kitautolu ʻo fekauʻaki mo ha meʻa mafatukitukí. Ko e fanongo ʻi he ʻofá ʻoku ʻuhingá ko e hoko ʻo mahuʻingaʻia lahi ʻi he ngaahi fakakaukau ʻa e tokotaha kehé. ʻOku fiemaʻu ai ke tau fakaʻehiʻehi mei he kamata ke talanoa ʻo fekauʻaki mo kitautolu ʻaki hono leaʻaki ʻa e meʻa hangē ko ení, “ʻOku fakamanatu mai ʻe he meʻa ko iá ʻa e meʻa naʻe hoko kiate au ʻi he kuohilí.” Lolotonga ko ha fetalanoaʻaki pehē ʻoku ala tali ia ʻi ha fetalanoaʻaki anga-fakakaumeʻa, ʻoku fiemaʻu ke tau tuku ki he tafaʻakí ʻa e ngaahi meʻa fakafoʻituituí ʻi he taimi ʻoku lāulea ai ha taha ki ha palopalema mafatukitukí. Ko e mahuʻingaʻia moʻoni ʻi he niʻihi kehé ʻe lava ke toe fakahāhā ia ʻi ha founga ʻe taha.

Fanongo ke Mahinoʻi ʻa e Ngaahi Ongoʻí

Ko e ngaahi kaumeʻa ʻo e tangata ko Siopé naʻa nau fanongo ki heʻene ngaahi leá ʻo ʻikai toe siʻi hifo he hongofulú. Neongo ia, naʻe kalanga ʻa Siope: “Taumaiā ʻoku ou maʻu ha taha ke fanongo kiate au!” (Siope 31:35) Ko e hā hono ʻuhingá? Koeʻuhí naʻe ʻikai ʻoange ʻe heʻenau fanongó ha fakafiemālie. Naʻe ʻikai te nau tokanga kia Siope pe loto ke mahinoʻi ʻa ʻene ngaahi ongoʻí. Naʻe ʻikai moʻoni te nau maʻu ha feongoʻiʻaki ʻi he tuʻunga ko e kau fanongo kaungāongoʻí. Ka ʻoku akonaki mai ʻa e ʻapositolo ko Pitá: “Pea ko ʻeku lea fakaʻosi; ke mou uouanga taha, ke mou tauʻaki kaungāmamahi [pe feongoʻiʻaki], ke mou feʻofaʻaki fakalotu, ke mou manavaʻofa, ke mou angavaivai.” (1 Pita 3:8) ʻE lava fēfē ke tau fakahāhā ʻa e feongoʻiʻakí? Ko e founga ʻe taha ko hono fakahāhā ʻa e tokanga ki he ngaahi ongoʻi ʻa e tokotaha kehé pea feinga ke mahinoʻi ia. Ko hono fai ʻo e ngaahi lea kaungāongoʻi hangē ko ení “kuo pau pē naʻe fakalotomamahi ʻa e meʻa ko iá” pe “kuo pau pē naʻá ke ongoʻi naʻe ʻikai te ke mahinoʻi” ʻa e founga ʻe taha ke fakahāhā ai ʻoku tau tokangá. Ko e toe founga ʻe taha ko hono ʻai ʻa e meʻa ʻoku leaʻaki ʻe he tokotahá ʻi he lea pē ʻatautolú, ʻo fakahāhā ai ʻoku tau mahinoʻi ʻa e meʻa naʻá ne leaʻakí. Ko e fanongo ʻi he ʻofá ʻoku ʻuhinga iá ko e tokanga ʻo ʻikai ki he ngaahi leá pē kae pehē foki ki he ngaahi ongoʻi ʻoku ʻikai fuʻu loko fakahāʻí.

Ko Lōpetí a ko ha faifekau taukei taimi-kakato ia ʻa e Kau Fakamoʻoni ʻa Sihová. ʻOkú ne fakamatala: “ʻI he taimi ʻe taha naʻá ku hoko ai ʻo loto-siʻi ʻi heʻeku ngāue fakafaifekaú. Ko ia ai, naʻá ku kole ke u  talanoa mo e ʻovasia fefonongaʻakí. Naʻá ne fanongo moʻoni pea naʻá ne feinga ke mahinoʻi ʻa ʻeku ngaahi ongoʻí. Naʻe aʻu ʻo hā ngali naʻá ne mahinoʻi ʻa ʻeku ilifia telia naʻá ne hanga ʻo fakaangaʻi ʻa ʻeku fakakaukaú. Naʻe fakapapauʻi mai ʻe he tokouá ko ʻeku ngaahi ongoʻí naʻe ala mahinoʻi, he ko iá tonu naʻá ne hokosia ʻa e ngaahi ongoʻi meimei tatau. Naʻe tokoniʻi moʻoni au ʻe he meʻá ni ke u hokohoko atu.”

ʻE lava ke tau fanongo ʻo ʻikai loto-tatau mo e meʻa naʻe leaʻakí? ʻE lava ke tau pehē ki ha taha ʻoku tau houngaʻia ʻi heʻene tala mai ʻa e anga ʻo ʻene ngaahi ongoʻí? ʻIo. Fēfē kapau ʻoku fuhu ha kiʻi foha ʻi he ʻapiakó pe ʻoku haʻu ha ʻofefine taʻu hongofulu tupu ki ʻapi ʻo pehē mai ʻokú ne ʻofa ʻi ha taha? ʻIkai ʻoku lelei ange ki ha mātuʻa ke ne fanongo pea feinga ke mahinoʻi ʻa e meʻa ʻoku ʻi he ʻatamai ʻo e toʻutupú ki muʻa ke fakamatalaʻi ʻa e tōʻonga ʻoku totonú mo taʻetotonú?

“Ko e tuʻutuʻuni ʻi he loto ʻo e tangata ko e vai tuʻu fufū,” ko e lau ia ʻa e Palovepi 20:​5, “ka ko e tama ʻiloʻilo te ne lava ke fusi [pe tohoakiʻi] hake.” Kapau ʻoku ʻikai hehema ha tokotaha poto mo taukei ke fai ha faleʻi ʻi he ʻikai ke fiemaʻú, ʻe pau ai ke tau tohoakiʻi mai ia ke maʻu ʻene faleʻí. ʻOku meimei tatau ʻa e tuʻungá ʻi he taimi ʻoku tau fanongo ai ʻi he ʻofá. ʻOku fiemaʻu ʻa e ʻiloʻiló ke tohoakiʻi mai ʻaki ʻa e fakakaukau ʻa ha tokotaha. ʻOku tokoni ʻa hono ʻeke ʻo e ngaahi fehuʻí, ka kuo pau ke tau tokanga ke ʻoua ʻe fieʻilo ʻetau ngaahi fehuʻí ki he ngaahi meʻa fakaeiá. ʻE ʻaonga nai ke fokotuʻu ange ke kamata talanoa ʻa e tokotahá ki he ngaahi meʻa ʻokú ne ongoʻi ʻoku fiemālie ke lave ki aí. Ko e fakatātaá, ko ha uaifi ʻoku loto ke talanoa fekauʻaki mo e ngaahi palopalema ʻi heʻene nofo malí ʻe faingofua ange kiate ia ke kamata ʻene talanoá ʻo fekauʻaki mo e anga ʻene fetaulaki mo hono husepānití peá na malí. Ko ha tokotaha kuo hoko ʻo ʻikai longomoʻui ʻi he ngāue fakafaifekau faka-Kalisitiané te ne ʻiloʻi nai ʻoku faingofua ange ke kamata, ʻaki hono fakamatalaʻi ʻa e founga naʻá ne ako ai ʻa e moʻoní.

Fanongo Fakataha mo e ʻOfá​—Ko ha Pole

Ko e fanongo ʻi he taimi ʻoku loto-mamahi ai ha taha ʻiate kitautolú ʻe lava ke hoko ia ko ha pole, he ko ʻetau hehema fakanatulá ia ke maluʻi kitautolu. ʻE lava fēfē ke tau fakaleleiʻi ʻa e polé? “Ko e tali malū ʻoku lolou ai ʻa e houhau,” ko e lau ia ʻa e Palovepi 15:1. Ko hono fakaafeʻi anga-ʻofa ʻa e tokotahá ke talanoa pea toki fanongo anga-kātaki ki ai ʻi heʻene fakamatalaʻi ʻa ʻene mamahí ko e founga ia ʻe taha ʻo e tali ʻi he anga-maluú.

Ko e fakakikihi loto-ʻitá ʻoku faʻa hoko ia ʻi ha ongo meʻa ʻe toko ua ʻokú na toutou leaʻaki pē ʻa e meʻa naʻá na ʻosi leaʻakí. ʻOku ongoʻi ʻe he tokotaha taki taha ʻoku ʻikai ke fanongo ʻa e tokotaha ia ʻe tahá. He lelei ē ʻe hokó kapau ʻe kiʻi tuʻu ha taha ʻo kinaua pea fanongo moʻoni! Ko e moʻoni, ʻoku mahuʻinga ke ngāueʻaki ʻa e mapuleʻi-kitá pea fakahaaʻi kita ʻi ha founga fakapotopoto mo anga-ʻofa. ʻOku tala mai ʻe he Tohi Tapú: “Ko ia ʻoku fakamaʻumaʻu hono loungutu ko e poto ia.”​—Palovepi 10:19.

Ko e malava ke fanongo ʻi he ʻofá ʻoku ʻikai ke hoko fakanatula mai ia. Kae kehe, ko ha pōtoʻi ia ʻe lava ke ako fakafou ʻi he feinga mo e akonekina. Ko ha poto moʻoni ia ʻoku taau ke maʻu. Ko e fanongo moʻoni ʻi he taimi ʻoku lea ai ʻa e niʻihi kehé ko ha fakahāhā ia ʻo ʻetau ʻofá. ʻOku toe tokoni ia ki heʻetau fiefiá. He fakapotopoto moʻoni ē ke fakatupulekina leva ʻa e pōtoʻi he fanongo ʻi he ʻofá!

[Fakamatala ʻi lalo]

[Fakatātā ʻi he peesi 11]

ʻI he fanongó, kuo pau ke tau tuku ki tafaʻaki ʻa ʻetau ngaahi mahuʻingaʻiá

[Fakatātā ʻi he peesi 12]

Ko e fanongo ʻi he taimi ʻoku loto-mamahi ai ha tahá ʻe lava ke hoko ia ko ha pole