ʻOku Nau Vahevahe ʻa e Ongoongo Leleí ki he Tulí

“ʻOKU nau ʻoatu kiate koe ʻa e tuʻunga fakalaumālie!” Ko e anga ia hono fakamatalaʻi ki muí ni mai ʻe ha talēkita ʻo ha ʻapi maʻá e tangataʻifonua lalahi ʻi Navalcarnero, Madrid, Sipeini, ʻa e ʻaʻahi ʻo e Kau Fakamoʻoni ʻa Sihová ki hono senitaá. Ko e hā naʻá ne ueʻi ia ke ne lea peheé?

Ko e tokolahi ʻo e kau nofo ʻi he senitā Rosas del Camino ko e kau tuli. Kae kehe, koeʻuhi kuo fai ʻe he Kau Fakamoʻoní ʻa e feinga ke ako ʻa e Lea Fakaʻilongá ʻi he lea faka-Sipeiní, ʻoku lava ai ke nau fetuʻutaki mo e kau nofo ko ení. Naʻe fakahīkihikiʻi ʻe he talēkitá ʻa e Kau Fakamoʻoní ʻi heʻenau foaki taʻetotongi atu honau taimí ke akoʻi ʻa e ngaahi meʻa fakalaumālié ki he faʻahinga ʻoku nau fiemaʻu iá. Naʻá ne mamata ʻi he uesia lelei naʻe hoko ki he kau nofo aí ʻi hono akoʻi ʻa e ongoongo lelei ʻo e Puleʻangá. Pea naʻe toe fakamahuʻingaʻi lahi foki ʻe he kau nofo aí​—tautautefito ki he faʻahinga ʻoku ʻikai te nau malava ʻo fanongo pe sio leleí​—ʻa e ngaahi ʻaʻahi ʻo e Kau Fakamoʻoní.

Ko Eulogio, ko e taha ʻo e kau nofo aí ʻa ia ʻoku kui mo tuli, ʻokú ne ako Tohi Tapu he taimí ni mo e Kau Fakamoʻoni ʻa Sihová. ʻI he ʻaho ʻe taha lolotonga e lele ʻa e akó, naʻe fakaofiofi atu ai ha tangata taʻumotuʻa ʻo ne foaki ki he Fakamoʻoní ha foʻi maau ʻa ia naʻe faʻu ʻe he kau nofo aí ko ha fakahaaʻi ʻo ʻenau houngaʻiá. Naʻe fakakaveinga ʻa e foʻi māú “Ke Hoko ko ha Fakamoʻoni.” ʻI ha konga ʻo ia, ʻoku pehē ai: “ʻOku nau moʻui ʻi ha moʻui fiemālie, mo akonekina lelei, pea ʻoku nau maʻu meia Sihova ʻa e poto fakafiefia. ʻOku nau toutou ʻaʻahi ki he ngaahi falé koeʻuhi ʻoku nau falala kia Sihova.”

Ko e falala tonu ko eni kia Sihová kuo taki atu ai ʻa e Kau Fakamoʻoni tokolahi takatakai he māmaní ke nau ako ʻa e lea fakaʻilongá mo e kakai tuli ʻi honau fonuá. ʻI he founga ko ení ʻoku nau vahevahe atu ai ki he faʻahinga peheé ʻa e pōpoaki fakalototoʻa ʻo e ʻamanaki ʻa ia ʻoku maʻu ʻi he Tohi Tapú.