Ngaahi Lēsoni mei he Lēkooti ʻo e ʻAloʻi ʻo Sīsuú

ʻOKU mālieʻia ʻa e laui miliona ʻi he ngaahi meʻa naʻe hoko takatakai ʻi he ʻaloʻi ʻo Sīsuú. ʻOku hā eni ʻi he lahi ʻo e ngaahi feituʻu ʻAloʻi ʻoku fakaʻaliʻalí mo e ngaahi tulama ʻo e ʻAloʻí ʻoku fakatātaaʻi takatakai ʻi he māmaní ʻi he taimi Kilisimasí. Neongo ʻene mālié, ko e ngaahi meʻa naʻe hoko takatakai ʻi he ʻaloʻi ʻo Sīsuú naʻe ʻikai lēkooti ia ʻi he Tohitapú ke fakafiefiaʻi ʻaki ʻa e kakaí. ʻI hono kehé, ʻoku hoko ia ko e konga ʻo e Konga Tohitapu kotoa pē naʻe fakamānavaʻi ʻe he ʻOtuá ki he akonakí pea ki hono fakatonutonu ʻa e ngaahi meʻá.​—2 Timote 3:​16.

Kapau naʻe fiemaʻu ʻe he ʻOtuá ʻa e kau Kalisitiané ke nau kātoangaʻi ʻa e ʻaloʻi ʻo Sīsuú, naʻe mei ʻomai leva ʻe he Tohitapú ʻa e taimi tonu pē ko iá. ʻOku pehē? Hili hono fakahaaʻi naʻe ʻaloʻi ʻa Sīsū ʻi ha taimi naʻe ʻi tuʻa ai ʻa e kau tauhi-sipí ʻi he poʻulí ʻo leʻohi ʻenau ngaahi tākangá, naʻe fakaʻosiʻaki ai ʻe he mataotao faka-Tohitapu ʻi he senituli hono 19 ko Albert Barnes: “ʻOku mahino mei heni naʻe ʻaloʻi hotau Fakamoʻuí ki muʻa ʻi he ʻaho ko hono 25 ʻo Tīsemá . . . ʻI he taimi ko ení ʻoku momoko, pea tautefito ʻi he ngaahi feituʻu māʻolunga mo moʻungaʻia ofi ki Pētelihemá. Naʻe fufū ʻe he ʻOtuá ʻa e taimi ʻo e ʻaloʻi ʻo [Sīsuú]. . . . Pea naʻe ʻikai mahuʻinga ke ʻiloʻi ʻa e taimí; kapau naʻe pehē, ne mei fakatolonga mai ʻe he ʻOtuá ʻa hono lēkōtí.”

ʻI hono kehé, ʻoku fakahaaʻi mahino mai kia kitautolu ʻe he kau hiki tohi ʻo e faaʻi Kōsipelí ʻa e ʻaho naʻe pekia ai ʻa Sīsuú. Naʻe hoko ia ʻi he ʻaho ʻo e Pāsová, ʻa ia naʻe fai ʻi hono 14 ʻo e māhina faka-Siu ko Nīsaní, ʻi he faʻahitaʻu failaú. ʻIkai ngata aí, naʻe fekauʻi fakahangatonu ʻe Sīsū ʻa hono kau muimuí ke nau kātoangaʻi ʻa e ʻaho ko iá ko hono fakamanatu ʻo ia. (Luke 22:19) ʻOku ʻikai ʻi he Tohitapú ha fekau ke kātoangaʻi ʻa e ʻaloʻi ʻo Sīsuú, pea ʻi he meʻa ko iá, ha ʻaho fāʻeleʻi ʻo ha toe taha pē.  ʻOku fakamamahí, he ko e ngaahi fakakikihi ʻi he ʻaho ʻo e ʻaloʻi ʻo Sīsuú ʻokú ne ʻai ke puli nai ai ʻa e ngaahi meʻa mahuʻinga ange naʻe hoko ʻi he taimi nai ko iá.

Ongo Mātuʻa Ne Fili ʻe he ʻOtuá

Mei he laui afe ʻo e ngaahi fāmili ʻi ʻIsilelí, ko e faʻahinga mātuʻa fēfē naʻe fili ʻe he ʻOtuá ke na tauhi hake ʻa hono ʻAló? Naʻá Ne vakai ʻoku mahuʻinga ʻa e ngaahi meʻa ko ia hangē ko e tuʻu-ki-muʻá mo e koloaʻiá? ʻIkai. ʻI hono kehé, naʻe fakatokangaʻi ʻe Sihova ʻa e ngaahi tuʻunga fakalaumālie ʻo e ongo mātuʻá. Sivisiviʻi angé ʻa e hiva fakahīkihiki ʻa Melé, hangē ko ia ʻoku lēkooti ʻi he Luke 1:​46-​55, ʻa ia naʻá ne hivaʻi hili hono tala ange kiate ia ʻa e monū ʻo e hoko ko e faʻē ʻa e Mīsaiá. ʻI he lotolotonga ʻo e ngaahi meʻa kehé, naʻá ne pehē: “ʻOku fakahikihikiʻi ʻe hoku loto ʻa e ʻEiki, . . . He kuo ne afeitaulalo mai kia kita meʻavale ko ʻene kaunanga.” Naʻá ne vakai ʻi he anga-fakatōkilalo kiate ia ko e tokotaha “meʻavale,” ko e taʻahine kaunanga ʻa Sihova. Ko e meʻa mahuʻinga angé, ko e ngaahi kupuʻi lea fakaʻofoʻofa ʻo e fakahīkihiki ʻi he hiva ʻa Melé ʻoku fakahaaʻi ai ko ha tokotaha fakalaumālie ia naʻá ne ʻiloʻi lelei ʻa e ngaahi Konga Tohitapú. Neongo ko ha hako angahalaʻia ia ʻo ʻĀtama, ko ia ʻa e fili haohaoa ke hoko ko e faʻē fakaemāmani ʻa e ʻAlo ʻo e ʻOtuá.

Fēfē ʻa e husepāniti ʻo Melé, ʻa ia naʻe hoko ko e tamai ohi ʻa Sīsuú? Ko Siosefá ko ha tangata ia naʻe poto ʻi he tufungá. Koeʻuhi ko ʻene loto-lelei ke ngāue mālohi ʻaki hono nimá, naʻá ne malava ai ke tokonaki ki ha fāmili naʻe aʻu ki ha foha ʻe toko nima pea ʻikai siʻi hifo he ʻofefine ʻe toko ua. (Mātiu 13:​55, 56) Naʻe ʻikai ke koloaʻia ʻa Siosefa. ʻI he hoko ʻa e taimi ke ʻoatu ai ʻe Mele hono ʻuluaki foha naʻe fanauʻí ki he temipale ʻo e ʻOtuá, kuo pau pē naʻe ongoʻi loto-mamahi ʻa Siosefa ʻi he ʻikai lava ke ne tokonaki ha sipi ki he feilaulaú. ʻI hono kehé, naʻe pau ke na ngāueʻaki ʻa e meʻa naʻe fakaʻatā ki he kau masivá. ʻI he fekauʻaki mo e faʻē ʻa ha foha toki fanauʻi foʻou, naʻe pehē ʻe he lao ʻa e ʻOtuá: “Kapau kuo ʻikai te ne lava ke ʻomi ha lami, te ne haʻu mo ia ha ongo kulukulu pe lupe mui, ko e taha ki ha feilaulau-moifua, mo e taha ki ha feilaulau-angahala; pea ʻe fai ha fakalelei maʻana ʻe he taulaʻeiki, pea te ne toki maʻa.”—Livitiko 12:8; Luke 2:​22-24.

ʻOku pehē ʻe he Tohitapú ko Siosefá naʻe “agatonu.” (Mātiu 1:​19, PM) Ko e fakatātaá, naʻe ʻikai te ne mohe mo hono uaifi tāupoʻoú kae ʻoua ke ʻaloʻi ʻa Sīsū. Naʻe taʻofi ʻe he meʻá ni ha faʻahinga taʻemahino pē pe ko hai ʻa e Tamai moʻoni ʻa Sīsuú. Ki ha ongo meʻa toki mali foʻou ke na fakaʻehiʻehi mei he ngaahi vā fekoekoeʻi lolotonga ʻa e nofo ʻi he fale tataú naʻe ʻikai lava ke faingofua ia, ka naʻe fakahaaʻi ai naʻá na fakatou koloaʻaki ʻa e monū ʻi hona fili ke tauhi hake ʻa e ʻAlo ʻo e ʻOtuá.​—Mātiu 1:​24, 25.

ʻI he hangē ko Melé, ko Siosefá ko ha tokotaha fakalaumālie ia. Naʻe tuku ʻene ngāué he taʻu kotoa pē peá ne ʻave ʻa hono fāmilí ʻi ha fononga ʻaho ʻe tolu mei Nasaleti ki Selusalema, ke kau ki he kātoanga fakataʻu ʻo e Pāsová. (Luke 2:​41) Pehē foki, kuo pau pē naʻe akoʻi ʻe Siosefa ʻa Sīsū heʻene kei siʻí ki he tōʻonga fakauike ʻo e kau ki he lotu ʻi he sinakoke he feituʻú, ʻa ia naʻe lau ai mo fakamatalaʻi ʻa e Folofola ʻa e ʻOtuá. (Luke 2:​51; 4:​16) Ko ia ai, ʻoku ʻikai lava ke ʻi ai ha veiveiua naʻe fili ʻe he ʻOtuá ʻa e faʻē mo e tamai ohi fakaemāmani totonu ki hono ʻAló.

Ko ha Tāpuaki Maʻongoʻonga ki he Kau Tauhi-Sipi Māʻulaló

Neongo ʻa e faingataʻa ki hono uaifí, ʻa ia naʻe māhina ʻe hiva he taimi ko ení, naʻe fononga ʻa Siosefa ki he kolo ʻo ʻene ngaahi tamaí ke lēsisita, ʻo fakatatau ki he tuʻutuʻuni ʻa Sisá. ʻI he aʻu ʻa e ongo meʻá ki Pētelihemá, naʻe ʻikai lava ke na maʻu ha nofoʻanga ʻi he kolo tokolahí ni. Naʻe ʻai ai kinaua ʻe he ngaahi tuʻungá ke na ngāueʻaki ha  fale tauhi manu, ʻa ia naʻe ʻaloʻi ai ʻa Sīsū ʻo fakatokoto ʻi ha ʻaiʻanga kai ʻo e manú. Ke ʻai ke mālohi ʻena tuí, naʻe ʻoange ai ʻe Sihova ki he ongo mātuʻa anga-fakatōkilaló ni ʻa e fakapapau ko e ʻaloʻi ko ení ko e finangalo moʻoni ia ʻo e ʻOtuá. Naʻá ne fekauʻi mai ha fakafofonga ko ha kau tangata taʻumotuʻa tuʻu-ki-muʻa mei Pētelihema ke fakapapauʻi ia ki he ongo meʻá? ʻIkai. ʻI hono kehé, naʻe fakahaaʻi ʻe Sihova ko e ʻOtuá ʻa e meʻá ki ha kau tauhi-sipi ngāue mālohi ʻa ia naʻa nau fakamoleki ʻa e taimi poʻulí ʻi tuʻa ʻi hono leʻohi ʻenau ngaahi tākangá.

Naʻe hā ha ʻāngelo ʻa e ʻOtuá kia kinautolu ʻo tala ange ke nau ō ki Pētelihema, ʻa ia te nau ʻiloʻi ai ʻa e Mīsaia kuo toki fanauʻí ʻoku “tokoto ia i he aiaga-kai oe manu.” Naʻe ʻohovale ʻa e kau tangata māʻulaló ni pe mā ʻi he fanongo ko e Mīsaia naʻe toki fanauʻí naʻe ʻi ha fale tauhi manu? ʻIkai ʻaupito! ʻI he ʻikai ha toe tatalí, naʻa nau liʻaki ʻa ʻenau tākangá pea nau ʻalu ki Pētelihema. ʻI heʻenau ʻiloʻi ʻa Sīsuú, naʻa nau fakamatala kia Siosefa mo Mele ʻa e meʻa naʻe tala ange ʻe he ʻāngelo ʻa e ʻOtuá. Ko e meʻá ni, ʻoku ʻikai ha veiveiua, naʻá ne ʻai ke mālohi ʻa e tui ʻa e ongo meʻá ʻi he hoko ʻa e meʻa kotoa ʻi he founga naʻe fakataumuʻa ki ai ʻe he ʻOtuá. Ko e “kau tauhi sibi,” ʻi heʻenau tafaʻakí, naʻa nau “liu mai . . . o fakamalo mo fakafetai ki he Otua, koeuhi koe gaahi mea kotoabe kuo nau fanogo mo mamata ai.” (Luke 2:​8-20, PM) ʻIo, ʻi hono fakahaaʻi ʻa e ngaahi meʻá ki he kau tauhi-sipi manavahē-ʻOtuá, naʻe fai ai ʻe Sihova ʻa e fili totonú.

Mei he meʻa ʻi ʻolungá, ʻoku tau ako ai ʻa e faʻahinga kakai ʻoku fiemaʻu ke tau hoko ki aí ke maʻu ai ʻa e hōifua ʻa Sihová. ʻOku ʻikai fiemaʻu ke tau kumi ki he tuʻu-ki-muʻá pe koloaʻiá. Ka, ʻi he hangē ko Siosefa, Mele mo e kau tauhi-sipí, ʻoku fiemaʻu ke tau talangofua ki he ʻOtuá pea fakamoʻoniʻi ʻetau ʻofa kiate iá ʻaki hono fakamuʻomuʻa ʻa e ngaahi meʻa fakalaumālié ʻi he ngaahi meʻa fakamatelié. Ko e moʻoni, ʻoku ʻi ai ʻa e ngaahi lēsoni lelei ke ako ʻi he fakalaulauloto ki he lēkooti ʻo e ngaahi meʻa naʻe hoko ʻi he taimi nai ʻo e ʻaloʻi ʻo Sīsuú.

[Fakatātā ʻi he peesi 7]

Ko e hā ʻoku fakahaaʻi ʻi hono foaki ʻe Mele ʻa e ongo foʻi lupe ʻe uá?

[Fakatātā ʻi he peesi 7]

Naʻe fili ʻa e ʻOtuá ke fakahaaʻi ʻa e ʻaloʻi ʻo Sīsuú ki ha kau tauhi-sipi māʻulalo tokosiʻi