Ngaahi Fehuʻi mei he Kau Lautohí

ʻOku totonu ke tau fakaʻosiʻaki mei he Fakahā 20:8 ʻe tokolahi kāfakafa ʻa e kakai ʻe kākaaʻi ʻe Sētane ʻi he ʻahiʻahi fakaʻosí?

ʻOku fakamatalaʻi ʻe he Fakahā 20:8 ʻa e ʻohofi fakaʻosi ʻe Sētane ʻa e kakai ʻoku nofo ʻi he māmaní ʻi he ngataʻanga ʻo e pule taʻu ʻe taha afe ʻa e Puleʻanga Faka-Mīsaiá. ʻI he lau kau kia Sētané, ʻoku pehē ʻe he vēsí: “Te ne ʻalu ke kākāʻi ʻa e ngaahi kakai ʻoku nofo ʻi he tuliki ʻe fa ʻo mamani, ʻa Koki mo Mekoki, ke fakataha kinautolu ki he tau: ko honau toko lahi ʻoku hangē ko e ʻoneʻone ʻo e tahi.”

Neongo ʻa e laka ki muʻa ʻi he ngaahi founga fakasaienisí mo e ngaahi meʻangāué, “ko e ʻoneʻone ʻo e tahi” ʻoku kei taʻeʻiloa pē hono lahí pe fiká. Ko ia ai, ʻe lava ke pehē ko e kupuʻi leá ʻokú ne fakafofongaʻi ha fika taʻeʻiloa mo taʻefakapapauʻi. Ka ʻoku fakahuʻunga ai ha fika lahi fakaʻulia, hulu fau, naʻa mo lahi ʻo taʻeala tui ki ai, pe ko ha fika pē ia ʻoku taʻeʻiloa ka ʻoku lahilahi, pe ʻi ha tuʻunga lahi?

ʻI he Tohitapú, ko e kupuʻi lea “hangē ko e ʻoneʻone ʻo e tahi” ʻoku ngāueʻaki ia ʻi ha ngaahi founga lahi. Ko e fakatātaá, ʻi he Senesi 41:​49, ʻoku tau lau: “Naʻe faʻoaki koane ʻe Siosifa ʻo hange ko e ʻoneʻone ʻo e tahi hono lahi, ʻio naʻe lahi ʻaupito, ko ia naʻe tuku hono fua; he naʻe ʻikai mafua.” ʻI hení ko e fakamamafá ʻoku ʻi he taʻelava ke laú. ʻI he tuʻunga tatau, naʻe pehē ʻe Sihova: “Hange ʻoku ʻikai malau ʻa e hosite ʻo langi, pea ʻoku ʻikai mafua ʻa e ʻoneʻone ʻo e tahi, pehe te u fakalahi ʻa e hako o ʻeku tamaioʻeiki ko Tevita.” ʻI he pau ʻo hangē ko e taʻelava ke lau ʻa e ngaahi fetuʻu ʻi he langí pea mo e ʻoneʻone ʻo e tahí, ʻoku pehē pē ʻa e pau ke fakahoko ʻe Sihova ʻene talaʻofa kia Tēvitá.—Selemaia 33:22.

ʻOku faʻa ʻuhinga ʻa e kupuʻi lea “ko e ʻoneʻone ʻi matatahi” ki he meʻa ʻoku lahilahi mo fakaofo hono tokolahí pe lahí. Ko e kau ʻIsileli ʻi Kilikalí naʻa nau hohaʻa lahi ʻi he fakatahataha ʻa e kau tau Filisitiá ʻi Mikimasí, ʻa ia naʻe “hange ko e ʻoneʻone ʻi matatahi hono lahi.” (1 Samiuela 13:​5, 6; Fakamaau 7:12) Pea “naʻe foaki ʻe he ʻOtua kia Solomone ʻa e poto, mo e faiva lahi ʻaupito, mo e ʻatamai kuo fano, ʻo hange ko e ʻoneʻone ʻoku ʻi he matatahi.” (1 Tuʻi 4:29) Neongo ko e meʻa naʻe leaʻaki ʻi he tuʻunga taki taha ko ení naʻe lahilahi, naʻe kei ʻi ai pē hono fakangatangata.

“Ko e ʻoneʻone ʻo e tahi” ʻe toe lava foki ke ʻuhinga ia ki ha fika taʻeʻiloa, ʻo ʻikai fakahuʻunga ia ai ʻoku lahi fakaʻulia. Naʻe folofola ʻa Sihova kia ʻĒpalahame: “Te u matuʻaki fakatokolahi ho hako ke tatau mo e ngaahi fetuʻu ʻo e langi, pe ko e ʻoneʻone ʻi he matātahi.” (Senesi 22:17) ʻI hono toe fai ʻa e talaʻofa ko ení ki he mokopuna ʻo ʻĒpalahame ko Sēkopé, naʻe ngāueʻaki ai ʻe Sihova ʻa e kupuʻi lea ko e “efu ʻo e fonua,” ʻa ia naʻe toe fakalea ia ʻe Sēkope ko e “ʻoneʻone ʻo e tahi.” (Senesi 28:14; 32:12) Hangē ko ia ne hokó, tuku kehe ʻa Sīsū Kalaisi, ko e tokolahi ʻo e “hako” ʻo ʻĒpalahamé ko e toko 144,000, ʻa ia naʻe ui ʻe Sīsū ko e “fanga sipi toko siʻi.”—Luke 12:32; Kaletia 3:​16, 29; Fakahā 7:4; 14:​1, 3.

Ko e hā ʻoku tau ako mei he ngaahi fakatātā ko ení? Ko e kupuʻi lea “hangē ko e ʻoneʻone ʻo e tahi” ʻoku ʻikai ke ʻuhinga maʻu pē ia ki ha fika taʻefakangatangata, ʻo lahi taʻealatui ki ai; pea ʻoku ʻikai ke ngāueʻaki maʻu pē ia ke fakamatalaʻi ʻaki ha meʻa ʻoku lahi fakaʻulia pe hulu fau hono lahí. ʻOkú ne faʻa fakafofongaʻi ha fika taʻeʻiloa ka ʻoku ʻi ha tuʻunga lahi. Ko ia ai, ʻoku ʻuhinga lelei ke tui ko e fuʻu kakai angatuʻu te nau poupouʻi ʻa Sētane ʻi heʻene ʻohofi fakaʻosi ʻa e kakai ʻa e ʻOtuá, ʻe ʻikai ke ʻi ha tuʻunga kāfakafa, pe lahi fakaʻulia, ka ʻe ʻi ha tuʻunga lahilahi ʻo lahi feʻunga ke nau hoko ko ha fakamanamana. Kae kehe, ko e tokolahí ʻoku kei taʻeʻiloa pē ia he taimí ni.