“Ke Ke Poto ʻi Ho Ngaahi ʻAho ʻAmui”

“Ko e konga lahi taha ʻo e faʻahinga ʻo e tangatá kuo nau ngāueʻaki ʻa e ngaahi taʻu ki muʻá ʻo hoko ai ko e fakamamahi honau ikuʻangá.” Ko e lau ia ʻa Jean de La Bruyère, ko ha tokotaha faʻu-ʻēsei Falanisē ʻi he senituli hono 17. Ko e moʻoni, ʻe toumoua nai ha talavou lotolotoua, hokosia ʻa e taʻefiemālie mo e ngaahi fakaʻiseʻisa. ʻI he tafaʻaki ʻe tahá, ʻe kīvoi nai ha talavou loto-fefeka ʻi ha ʻalunga taʻefakapotopoto, ʻo kaihaʻasi ai meiate ia ʻa e fiefiá ʻamui ange ʻi he moʻuí. Ko e hā pē ʻa e foungá, ko e angahala ʻo e ʻikai fai ʻa e meʻa ʻoku totonú pe fai ʻa e meʻa ʻoku halá ʻe lava ai ke iku ia ki he mamahi lahi.

ʻE lava fēfē ke kalofi ha ola pehē? ʻI he fakatokanga fekauʻaki mo e lotolotoua fakatalavoú, ʻoku faleʻi ʻe he Folofola ʻa e ʻOtuá ʻa e kau talavoú: “Manatu ki he ʻAfifio naʻe ngaohi koe lolotonga hoʻo talavou: teʻeki hoko ʻa e ngaahi ʻaho kovi, teʻeki aʻu mai ʻa e ngaahi taʻu, ʻa ia te ke pehe ai, ʻoku ʻikai vovo ha meʻa kiate au.” (Koheleti 12:2 [12:​1, PM]) Kapau ko ha talavou koe, fou ʻi ha ngaahi sitepu pau ke ako ai fekauʻaki mo e “ʻAfifio naʻe ngaohi koe” lolotonga hoʻo kei siʻí.

ʻOku anga-fēfē leva ʻa e tokoni ʻa e Tohitapú ki he kau talavoú ke nau fakaʻehiʻehi mei he taʻefakapotopoto fakatalavoú? ʻOku pehē ai: “Tokanga ki ho faleʻi, pea tali akonaki: koeʻuhi ke ke poto ʻi ho ngaahi ʻaho ʻamui.” (Palovepi 19:20) ʻOku toe fakahaaʻi mahino ʻe he Tohitapú ko e talitekeʻi ʻo e poto fakaʻotuá tupu mei he taʻetokanga pe angatuʻu ʻi he talavoú, pe ʻi ha taʻumotuʻa pē, ʻokú ne ʻomai ʻa e ngaahi nunuʻa kovi. (Palovepi 13:18) ʻI he tafaʻaki ʻe tahá, ko e tokanga ki he ngaahi fakahinohino fakaʻotuá ʻoku iku ia ki he “gaahi aho loloa, moe moui fuoloa, bea moe melino,” ko ha moʻui nonga mo lavameʻa.—Palovepi 3:​2, PM.