ʻOhake ʻo e Fānaú ʻi ha Fonua Muli—Ko e Ngaahi Polé mo e Ngaahi Palé

ʻOKU hiki ʻa e laui miliona ʻo e kakaí ʻi he ʻamanaki atu ke fai ha kamata foʻou ʻi ha fonua foʻou. ʻOku nofo ʻi ʻIulope he taimí ni ha kau nofo hili atu ki ai laka hake he 20 milioná, ko e ʻIunaite Seteté ʻoku nofo-ʻapi ai ʻa e kakai laka hake ʻi he 26 milioná ʻa ia naʻe fanauʻi ʻi muli, lolotonga ia ʻoku laka hake ʻi he peseti ʻe 21 ʻo e tokolahi fakakātoa ʻo ʻAositelēliá naʻe fanauʻi ia ʻi tuʻa-puleʻanga. ʻOku faʻa hoko, ko e ngaahi fāmili nofo hili atu ko ení kuo pau ke nau fāinga mo ha lea foʻou pea kuo pau ke nau fengaʻunuʻaki ki ha anga fakafonua foʻou.

ʻI he taimi lahi, ʻoku vave hono ako ʻe he fānaú ʻa e lea ʻo honau fonua foʻoú pea kamata ke nau fakakaukau ʻi he lea foʻoú. Ki heʻenau ngaahi mātuʻá ʻe kiʻi fuoloa ange nai. ʻI he tupu hake ʻa e fānaú ʻi ha fonua ʻoku muli ia ki heʻenau mātuʻá, ko e faingataʻa ʻo e leá te ne fakatupunga nai ha motuhiaʻanga ʻo e fetuʻutakí ʻa ia ʻe faingataʻa ke fakaleleiʻi.

ʻOku ʻikai ngata pē ʻi hono uesia ʻe he lea foʻoú ʻa e founga fakakaukau ʻa e fānaú ka ko e anga fakafonua ʻa e fonua foʻoú te ne toe tākiekina foki ʻa e anga ʻo ʻenau ongoʻí. ʻE ʻilo nai ʻe he ngaahi mātuʻá ʻoku faingataʻa ke mahinoʻi ʻa e feangainga ʻenau fānaú. Ko ia ai, ko e ngaahi mātuʻa nofo hili atu ko ia ʻoku nau feinga ke ʻohake ʻenau fānaú ʻi he “akonekina ʻaki ʻa e tautea mo e valoki ʻa e ʻEiki,” ʻoku nau fehangahangai mo e ngaahi pole anga-kehe.​—Efeso 6:4.

Pole ʻo e Aʻu ki he ʻAtamaí mo e Lotó Fakatouʻosi

ʻOku maʻu ʻe he ngaahi mātuʻa Kalisitiané ʻa e holi mo e fatongia ke akoʻi ki heʻenau fānaú ʻa e “lea maa” ʻo e moʻoni faka-Tohitapú. (Sefanaia 3:​9, PM) Neongo ia, kapau ʻoku maʻu pē ʻe he fānaú ia ha ʻilo fakangatangata ki he lea ʻenau mātuʻá pea kapau ʻoku taʻemalava ʻa e ngaahi mātuʻá ke fai ha fakamatala ola lelei ʻi he lea ko ia kuo hoko ʻo alāanga mo ʻenau fānaú, ʻe lava fēfē ʻe he ngaahi mātuʻá ʻo fakahūhū ʻa e lao ʻa Sihová ki he loto ʻo ʻenau fānaú? (Teutalonome 6:7) ʻE mahinoʻi nai ʻe he fānaú ʻa e ngaahi lea ʻoku leaʻaki ʻe heʻenau mātuʻá, ka ʻo kapau ko e meʻa ʻoku leaʻakí ʻoku ʻikai aʻu ia ki he lotó, ʻe hoko nai ʻa e fānaú ko e kau sola ki honau ʻapí tonu.

Naʻe hiki ʻa Petelō mo Senitulā mei ʻAmelika Tonga ki ʻAositelēlia, pea naʻá na fehangahangai mo e pole ko ení lolotonga ʻena ʻohake ʻena ongo tamaiki tangata taʻu hongofulu tupu. a ʻOku pehē ʻe Petelō: “ʻI he fai ha talanoa fekauʻaki mo e ngaahi meʻa fakalaumālié, ʻoku felāveʻi ia mo e lotó mo e ngaahi ongó. ʻOku fiemaʻu ke ke fakamatalaʻi ha ngaahi fakakaukau ʻoku loloto ange mo mohu ʻuhinga ange, ko ia ʻoku ʻi ai ʻa e fiemaʻu ki ha ngaahi foʻi lea lahi ange.” ʻOku tānaki mai ʻe Senitulā: “Kapau ʻoku ʻikai maʻu ʻe heʻema fānaú ha mahino fakaʻaufuli ʻo ʻemau lea tuʻufonuá, pea ʻe lava ʻo faingataʻaʻia ai ʻena moʻui fakalaumālié. ʻE mole nai ai ʻena ongo ki he moʻoní, ʻo ʻikai mahinoʻi ʻa e tefitoʻi moʻoni ʻoku tuʻu mei mui ʻi he meʻa ʻokú na akó. Ko ʻena ʻiloʻilo fakalaumālié ʻe tuʻu, pea ko hona vahaʻangatae mo Sihová ʻe lava ke faingataʻaʻia.”

Ko Kanapilasami mo Hēleni naʻá na hiki ki Siamane mei Suli Langikā pea ʻokú na maʻu ha fānau ʻe toko ua he taimí ni. ʻOkú na loto-tatau: “ʻOkú ma fakakaukau ʻoku mātuʻaki mahuʻinga ke lea ʻema fānaú ʻi heʻemau lea tuʻufonuá lolotonga ʻena ako ʻa e lea faka-Siamané. ʻOku mahuʻinga ke na lava ʻo fetuʻutaki mo kimaua fekauʻaki mo ʻena ngaahi ongoʻí, ʻo fai mei he loto ki he loto.”

Ko Mikaele mo Kāmeni, ʻa ia naʻá na hiki mei ʻUlukuei ki ʻAositelēlia, ʻokú na pehē: “Ko e ngaahi mātuʻa ʻi homa tuʻungá kuo pau ke nau ngāue ke toe mālohi ange. Kuo pau ke nau ako ʻa e lea foʻoú ke lelei ʻaupito ke lava ʻo nau mahinoʻi mo fakamatalaʻi ʻa e ngaahi meʻa fakalaumālié ʻi he lea ko iá pe akoʻi ʻenau fānaú ke nau pōtoʻi ʻi he lea ʻa ʻenau mātuʻá.”

Ko ha Fili Fakafāmili

ʻOku mahuʻinga tefito ki he moʻui fakalaumālie ʻa ha faʻahinga fāmili pē ʻoku nofo hili ki ha fonua ʻa e fili pe ko fē ʻa e lea ʻe ngāueʻaki ʻe he fāmilí ke hoko ai ʻo “akonakiʻi e Jihova.” (Aisea 54:​13, PM) Kapau ʻoku ofi mai ha fakatahaʻanga ʻokú ne leaʻaki ʻa e lea tuʻufonua ʻo ha fāmili, ʻe fili nai ʻa e fāmilí ke poupou ki he fakatahaʻanga ko ení. ʻI he tafaʻaki ʻe tahá, te nau fili nai ke maʻu ʻa e fakatahaʻanga ʻoku nau leaʻaki ʻa e lea tefito ʻa e fonua ʻoku nau hiki ki aí. Ko e hā ʻa e ngaahi moʻoniʻi meʻa te ne tākiekina ʻa e fili ko ení?

Ko Temetelio mo Patiola, ʻa ia naʻá na hiki mei Saipalo ki ʻIngilani pea tauhi hake ai ha fānau ʻe toko nima, ʻokú na fakamatala ki he meʻa naʻá ne tākiekina ʻenau filí: “Ko e muʻomuʻá, naʻe ʻalu homau fāmilí ki he fakatahaʻanga ʻoku lea faka-Kalisí. Lolotonga naʻe tokoni lahi eni kia kimaua ongo mātuʻá, naʻe fakamoʻoniʻi ko e fakatuaiʻanga eni ki he fakalakalaka fakalaumālie ʻa ʻema fānaú. Neongo ʻoku nau maʻu ha mahino tefito ki he lea faka-Kalisí, ʻoku nau faingataʻaʻia ʻi he ngaahi poini fakaikiiki angé. Naʻe hoko ʻo hā mahino eni ʻi heʻenau fakalakalaka mātuʻaki māmālie fakalaumālié. ʻI he tuʻunga ko ha fāmilí, naʻa mau hiki ki ha fakatahaʻanga lea faka-Pilitānia, pea ko e ola lelei ki heʻema fānaú naʻe mei hoko pē he taimi ko iá. Kuo fakaivimālohiʻi fakalaumālie kinautolu. Ko e fili ke hikí naʻe ʻikai ko ha fili faingofua, ka ʻi homau tuʻungá, naʻe fakamoʻoniʻi ko ha fili fakapotopoto ia.”

ʻOku kei tauhi maʻu pē ʻe he fāmilí ha mahino fekauʻaki mo ʻenau lea tuʻufonuá pea utu ai ha ngaahi pale lahi. ʻOku pehē ʻe heʻena fānaú: “Ko hono maʻu ha ʻilo ki ha lea laka hake he tahá ko ha koloa ia. Neongo ko e lea faka-Pilitāniá ko ʻemau lea ʻuluakí ia, ʻoku mau ʻilo ko ʻemau ʻilo ki he lea faka-Kalisí kuó ne ʻai ai ke malava ha ngaahi vahaʻangatae fakafāmili mālohi mo vāofi, tautefito mo ʻemau ongo kuí. Kuó ne toe ʻai foki ke mau toe kaungāongoʻi lahi ange fekauʻaki mo e kau nofo hilí, pea ʻokú ne ʻomi ai kia kimautolu ha falala pau ʻe lava ke mau ako ha toe lea ʻe taha. Ko ia ʻi he taimi naʻa mau tupu ai ʻo motuʻa angé, naʻe hiki homau fāmilí ke tokoniʻi ha fakatahaʻanga lea faka-ʻAlipēnia.”

Ko Kulisitofā mo Makalita naʻá na toe hiki mo kinaua mei Saipalo ki ʻIngilani, pea naʻá na ʻohake ai ha fānau ʻe toko tolu. Naʻá na fili ke tokoni ki he  fakatahaʻanga lea faka-Kalisí. Ko hona fohá, ʻa Niko, ʻa ia ʻoku ngāue he taimí ni ko e mātuʻa ʻi he fakatahaʻanga lea faka-Kalisí, ʻokú ne manatu: “Naʻe fakalototoʻaʻi kimautolu ke kau ʻi he fakatahaʻanga lea faka-Kalisi naʻe toki fokotuʻú. Naʻe vakai homau fāmilí ki ai ko ha vāhenga-ngāue fakateokalati.”

ʻOku pehē ʻe Makalita: “ʻI he taimi naʻe taʻu fitu ai mo valu ʻa e ongo tamaiki tangatá, naʻá na kau ki he Ako Fakafaifekau Fakateokalatí. ʻI homa tuʻunga ko e ongo mātuʻá, naʻá ma kiʻi hohaʻa fekauʻaki mo e fakangatangata ʻena mahinoʻi ʻa e lea faka-Kalisí. Neongo ia, ko e lēsoni taki taha kuo vaheʻí ʻoku lau ia ko ha ngāue fakafāmili, pea ʻoku mau fakamoleki ʻa e ngaahi houa lahi ʻi hono tokoniʻi kinaua ke teuteu ʻena malangá.”

ʻOku pehē ʻe hona ʻofefine ko Sōana: “ʻOku lava ke u kei manatuʻi ʻa e Tangataʻeikí ʻi heʻene akoʻi kimautolu ki he lea faka-Kalisí ʻaki ʻene tohi ʻa e ʻalafapetí ʻi ha palakipoe ʻi ʻapi, pea naʻe pau ke mau ako fakaʻāuliliki ia. ʻOku fakamoleki ʻe he kakai tokolahi ʻa e laui taʻu ʻi hono ako ha lea, ka ʻi he tokoniʻi kimautolu ʻe he Fineʻeikí mo e Tangataʻeikí, naʻa mau ako ai ʻa e lea faka-Kalisí ʻo ʻikai loko fakamoleki ha taimi lahi.”

ʻE tokoniʻi ʻe he ngaahi fāmili ʻe niʻihi ha fakatahaʻanga lea muli koeʻuhi ʻoku ongoʻi ʻe he ngaahi mātuʻá ko hono fakatupulekina ʻa e “ilo fakalaumalie” pea fakalakalaká, ʻoku fiemaʻu ke akoʻi kinautolu ʻi heʻenau lea tuʻufonuá. (Kolose 1:​9, 10, PM; 1 Timote 4:​13, 15) Pe ʻoku vakai nai ʻa e fāmilí ki heʻenau pōtoʻi ʻi he leá ko ha koloa ia ki hono tokoniʻi ʻa e kau nofo hili kehé ke ako ʻa e moʻoní.

ʻI he tafaʻaki ʻe tahá, ʻe ongoʻi nai ʻe ha fāmili ia ko e lelei pē maʻa kinautolu ke nau ʻalu ki he fakatahaʻanga ko ia ʻoku leaʻaki ai ʻa e lea tefito ʻa e fonua ʻoku nau hiki ki aí. (Filipai 2:4; 1 Timote 3:5) Hili ʻa e lāulea ki he tuʻunga ko iá mo e fāmilí, ko e  ʻulu leva ʻo e fāmilí ʻoku totonu ke ne fai ʻa e filí ʻi he lotu. (Loma 14:4; 1 Kolinito 11:3; Filipai 4:​6, 7) Ko e hā ʻa e ngaahi fokotuʻu te ne tokoniʻi nai ʻa e ngaahi fāmili ko ení?

Ngaahi Fokotuʻu ʻAonga ʻe Niʻihi

ʻOku pehē ʻe Petelō mo Senitulā, ʻa ia naʻe lave ki ai ki muʻá: “ʻOku ʻi ai ʻemau lao ke lea faka-Sipeini pē ʻi ʻapi ke fakapapauʻi ke ʻoua naʻa ngalo ʻemau lea tuʻufonuá. Ko e lao faingataʻa eni ke tauhi, koeʻuhi ʻoku ʻilo ʻe heʻema ongo tamaiki tangatá ʻokú ma ʻiloʻi ʻa e lea faka-Pilitāniá. Ka ʻo kapau naʻe ʻikai ke mau tauhi ʻa e lao ko ení, ʻe vave nai ai ha mole ʻena mahinoʻi ʻa e lea faka-Sipeiní.”

ʻOku faleʻi mai ʻe Mikaele mo Kāmeni, ʻa ia naʻe toe lave ki ai ʻi muʻa angé: “Kapau ʻe tataki ʻe he ngaahi mātuʻá ha ako Tohitapu fakafāmili tuʻumaʻu pea lāulea ʻi he ʻaho taki taha ʻi he potutohi fakaʻahó ʻi he lea tuʻufonuá, pea ʻe ako leva ʻe he fānaú ʻa e meʻa lahi ange ʻi he ngaahi meʻa tefito pē ʻo e lea ko iá​—te nau ako ai ke fakamatalaʻi ʻa e ngaahi meʻa fakalaumālié ʻi he lea ko iá.”

ʻOku toe fokotuʻu mai ʻe Mikaele: “ʻAi ke fakafiefia ʻa e faifakamoʻoní. Ko homau vāhenga-ngāué ʻokú ne kāpui ʻa e konga lahi ʻo ha fuʻu kolo, pea ʻoku fakamoleki ʻa e taimi lahi ʻi he fononga kā ke maʻu ʻa e kakai ʻoku nau lea ʻi heʻemau leá. ʻOku mau ngāueʻaki ʻa e taimí ke fai ha fanga kiʻi vaʻinga faka-Tohitapu mo talanoa fekauʻaki mo e ngaahi meʻa mahuʻingá. ʻOku ou feinga ke palani ʻa e ngaahi fononga faifakamoʻoní koeʻuhi ke mau fai ha ngaahi toe ʻaʻahi lelei ʻe niʻihi. Pea ʻi he ngataʻanga ʻo e ʻahó, kuo kau ai ʻa e fānaú ʻi ha fetalanoaʻaki mohu ʻuhinga ʻo ʻikai toe siʻi hifo he tahá.”

Fekuki mo e Ngaahi Faikehekehe ʻi he Anga Fakafonuá

ʻOku fakalototoʻaʻi ʻe he Folofola ʻa e ʻOtuá ʻa e toʻutupú: “Tama, fanongo ki he akonaki ʻa hoʻo tamai, pea ʻouae hiki mei he ngaahi tala ʻa hoʻo faʻe.” (Palovepi 1:8) Kae kehe, ʻe malanga hake nai ʻa e ngaahi faingataʻa, ʻi he taimi ʻoku tākiekina ai ʻa e tuʻunga akonaki ʻa e tamaí mo e “ngaahi tala” ʻa e faʻeé ʻe ha anga fakafonua ia ʻoku kehe mei he anga fakafonua ʻoku tofanga ai ʻa e fānaú.

Ko e moʻoni, ko e meʻa ia ʻa e ʻuluʻi fāmili taki taha ke ne fakapapauʻi pe ʻe fēfē ʻene pule ki hono fale ʻoʻoná, pea ʻoku totonu ke ʻoua ʻe tākiekina tōtuʻa ia ʻe he ngaahi fāmili kehé. (Kaletia 6:​4, 5) Neongo ia, ko e fetuʻutaki lelei ʻi he vahaʻa ʻo e ongo mātuʻá mo e fānaú ʻe fakaava nai ai ha hala ki hono tali ʻo ha ngaahi anga fakafonua foʻou.

Kae kehe, ko e lahi ʻo e ngaahi anga fakafonua pe  ngaahi tōʻonga ʻoku mafolalahia ʻi he ngaahi fonua langalanga haké, ʻoku fakatuʻutāmaki ia ki he moʻui fakalaumālie ʻa e kau Kalisitiané. Ko e fehokotaki fakasino taʻetāú, mānumanú, pea mo e angatuʻú ʻoku faʻa pouaki ia fakafou ʻi he fasi mo e fakafiefia ʻoku manakoá. (Loma 1:​26-32) Ko e ngaahi mātuʻa Kalisitiané ʻoku ʻikai totonu ke nau tuku honau fatongia ko ia ke mapuleʻi ʻa e fili fasi mo e fakafiefia ʻa ʻenau fānaú koeʻuhi pē ko e faingataʻa ki he ngaahi mātuʻá ke mahinoʻi ʻa e leá. Kuo pau ke nau fokotuʻu ha ngaahi tuʻutuʻuni fefeka. Kae kehe, ʻe ʻomai nai ʻe he meʻá ni ha pole.

ʻOku pehē ʻe Kāmeni: “ʻOku ʻikai ke ma faʻa mahinoʻi ʻa e lea ʻo e fasi ʻoku fanongo ki ai ʻema fānaú. Ko e fasí ʻe ngali ongo sai pē, ka ʻo kapau ʻoku heliaki ʻa e ʻuhinga ʻo e leá pe ʻo kapau ʻoku ʻi ai ha lea fākatuʻa ʻoku taʻetaau, ʻe ʻikai ke ma ʻilo ia.” Kuo anga-fēfē ʻena fekuki mo e tuʻunga ko ení? ʻOku pehē ʻe Mikaele: “ʻOkú ma fakamoleki ha taimi lahi ʻi hono akoʻi ʻema fānaú fekauʻaki mo e fakatuʻutāmaki ʻo e fasi taʻetāú, pea ʻokú ma feinga ke tokoniʻi kinautolu ke nau fili ʻa e fasi ko ia ʻe fakahōifua kia Sihová.” ʻIo, ko e faʻa vakavakaí mo e fakaʻuhingá ʻoku fiemaʻu ia ke fekuki ai mo e ngaahi faikehekehe ʻi he anga fakafonuá.​—Teutalonome 11:​18, 19; Filipai 4:5.

Utu ʻo e Ngaahi Palé

Ko hono ʻohake ʻo e fānaú ʻi ha fonua muli ʻoku fiemaʻu ki ai ʻa e taimi mo e feinga lahi. ʻOku ʻikai toe fehuʻia ʻa e meʻa ia ko iá. Ka ko e ongo mātuʻá mo e fānaú fakatouʻosi ʻe lava ke nau utu ha toe ngaahi pale mei heʻenau feingá.

Ko ʻAsema mo hono uaifí, ko Sala, naʻá na hiki mei Toake ki Siamane, ʻa ia naʻá na tauhi hake ai ha fānau ʻe toko tolu. Ko hona foha lahí ʻoku ngāue he taimí ni ʻi he ʻōfisi vaʻa ʻo e Kau Fakamoʻoni ʻa Sihová ʻi Selters, Siamane. ʻOku pehē ʻe ʻAsema: “Ko e ʻaonga lahi ki he fānaú ʻa e malava ko ia ke nau fakatupulekina ʻa e ngaahi ʻulungaanga ʻoku hoko ko e fakaivimālohi ki he ongo anga fakafonuá fakatouʻosi.”

Ko ʻAtonio mo Lutonatio naʻá na hiki mei ʻEngikola ki Siamane pea ʻokú na tauhi hake ai ha fānau ʻe toko hiva. ʻOku lea ʻa e fāmilí ʻi he lea faka-Lingala, Falanisē, mo e faka-Siamane. ʻOku pehē ʻe ʻAtonio: “Ko e malava ko ia ke lea ʻi he ngaahi lea kehekehé ʻoku tokoni ia ki homau fāmilí ke faifakamoʻoni ki he kakai mei he ngaahi fonua lahi. ʻOku ʻomi ʻe he meʻá ni kia kimautolu ʻa e fiefia lahi moʻoni.”

ʻOku ongoʻi ʻe ha ongo tamaiki ʻa ha ongo meʻa Siapani ʻa ia naʻá na hiki ki ʻIngilani ko e ʻaonga lahi ia kia kinaua ke ʻilo fakatouʻosi ki he lea faka-Siapaní mo e faka-Pilitāniá. ʻOku pehē ʻe he ongo tamaikí: “Ko hono ʻilo ko ia ha ongo lea ʻe uá naʻe tokoniʻi ai kimaua ke maʻu ha ngāue. Kuó ma maʻu ʻaonga lahi mei he ngaahi fakataha-lahi lea faka-Pilitāniá. ʻI he taimi tatau, ʻokú ma maʻu ʻa e monū ʻo e ngāue ʻi he fakatahaʻanga lea faka-Siapaní, ʻa ia ʻoku ʻi ai ʻa e fiemaʻu lahi ai.”

Te Ke Malava ʻo Lavameʻa

Ko hono ʻohake ʻo e fānaú lolotonga ʻa e nofo ʻi he haʻohaʻonga ʻo e kakai ʻoku ʻikai ke nau ʻinasi ʻi heʻete ngaahi tuʻunga fakafonuá ko ha pole ia kuo pau ke fehangahangai mo e kau sevāniti ʻa e ʻOtuá talu mei he taimi ʻo e Tohitapú. Naʻe lavameʻa ʻa e ongo mātuʻa ʻa Mōsesé, neongo naʻe ʻohake ia ʻi ʻIsipite. (Ekisoto 2:​9, 10) Ko e tokolahi ʻo e kau Siu naʻe fakaheeʻi ki Pāpiloné naʻa nau ʻohake ha fānau naʻa nau loto-lelei ke foki ki Selusalema ke toe fokotuʻu ʻa e lotu moʻoní.​—Esela 2:​1, 2, 64-70.

ʻOku pehē pē ʻi he ʻahó ni, ko e ngaahi mātuʻa Kalisitiané ʻe lava ke nau lavameʻa. Kuo nau maʻu nai ʻa e pale ko e fanongo ki heʻenau fānaú ʻoku nau leaʻaki hangē ko ia naʻe fanongo ki ai ha ongo meʻa ʻe taha mei heʻena fānaú: “Ko e fāmili vāofi kimautolu koeʻuhi ko e tokanga anga-ʻofa ʻa e Tangataʻeikí mo e Fineʻeikí, ʻa ia kuo mau faʻa maʻu ha fetuʻutaki lelei. ʻOku mau fiefia ke hoko ko e konga ʻo ha fāmili ʻi māmani lahi ʻoku nau tauhi kia Sihova.”

[Fakamatala ʻi lalo]

[Fakatātā ʻi he peesi 24]

Ko e lea pē ʻi hoʻo lea tuʻufonuá ʻi ʻapí ʻokú ne ʻoatu ai ki hoʻo fānaú ha ʻilo tefito ki he lea ko iá

[Fakatātā ʻi he peesi 24]

ʻOku fakatolonga ʻe ha lea anga-maheni ʻa e haʻi ʻi he vā ʻo e fanga kuí mo e fanga makapuná

[Fakatātā ʻi he peesi 25]

Ko e ako ʻa e Tohitapú mo hoʻo fānaú ʻoku fakatupulekina ai ʻenau ‘ʻilo fakalaumalié’