Toʻutupu ʻOku Nau ʻOfa ʻi he Moʻoní

“ʻE FAKAMAʻA ʻe ha talavou hono hala ʻi he ha?” ko e fehuʻi ia ʻa ha tokotaha-tohi-saame Hepelū laka hake ʻi he laui afeʻi taʻu kuohilí. (Sāme 119:9) ʻOku kei hoko eni ko ha fehuʻi totonu ʻi he ʻahó ni koeʻuhi ʻoku fehangahangai ʻa e kau talavoú mo e ngaahi palopalema lahi ʻi he māmaní. Kuo fakaeʻa ʻe he tōʻonga fakaʻaluʻalu fakaefehokotaki fakasinó ʻa e kau talavou tokolahi ki he ʻeitisí, ko e vaeua nai ʻo e faʻahinga ʻoku maʻu ʻe he mahaki fakalilifu ko ení ʻoku nau ʻi he vahaʻa ʻo e taʻu 15 mo e 24. ʻOku toe fakatupunga ʻe he ngāuehalaʻaki ʻa e faitoʻo kona tapú ʻa e ngaahi palopalema lahi, ʻo fakatupunga ai ʻa e ngaahi mate mutukia. Ko e ngaahi fasi ololaló; ngaahi faiva fakamālohi mo taʻetāú, ngaahi faiva he TV, mo e ngaahi vitioó; mo e fakatātā fakalielia ʻi he ʻInitanetí ʻokú ne fakahoko ha tākiekina fakatupu ʻauha ki he kau talavoú. Ko ia ai, ko e fehuʻi ʻoku ʻeke ʻe he tokotaha-tohi-sāmé ʻoku tokanga fakamātoato ki ai ʻa e ngaahi mātuʻa tokolahi pea mo e toʻutupu ʻi he ʻaho ní.

Ki heʻene fehuʻí tonu, naʻe tokonaki mai ki ai ʻe he tokotaha-tohi-saame tatau ʻa e tali ko ení: “Heʻene tauhi ia ke hoa mo hoʻo folofola.” Ko e moʻoni, ko e Folofola ʻa e ʻOtuá, ʻa e Tohitapú, ʻoku ʻi ai ʻa e tataki lelei ki he kau talavoú, pea ʻi he muimui ki aí, ʻoku lavameʻa ai ʻa e toʻutupu tokolahi ʻi he moʻuí. (Sāme 119:105) Tau sivisiviʻi angé ʻa e ngaahi faʻifaʻitakiʻanga ʻe niʻihi, ʻa e toʻutupu ʻoku nau ʻofa kia Sihova pea ʻoku nau feinga ke mālohi fakalaumālie ai pē ʻi ha māmani tuli ki he mālié mo e meʻa fakamatelié.

ʻOku Nau Houngaʻia ʻi he Tataki Fakaemātuʻá

Ko Jacob Emmanuel ko ha faifekau tāimuʻa taimi-kakato ia ʻi he ngaahi taʻu lahi ki muʻa ke ne ngāue ʻi he ʻōfisi vaʻa ʻo e Kau Fakamoʻoni ʻa Sihová ʻi Mekisikoú. ʻOkú ne manatuʻi fakataha mo e loto-houngaʻia ʻa e founga ʻo e tupulekina ʻa ʻene ʻofa ki he ngāue ʻa e ʻOtuá: “Ko ʻeku ongo mātuʻá ʻa e tākiekina tefitó, neongo ia kuo toe hoko ʻo tokoni lahi mo e fanga tokoua fakalaumālie taukei naʻá ku fakatupulekina ha kaumeʻa mo kinautolú. Naʻa nau ueʻi au ke u ʻofa ʻi he ngāue fakamalangá. Naʻa nau tataki fakaalaala au ʻi he hala totonú; naʻe ʻikai ʻaupito te u ongoʻi naʻa nau tenge au.”

Ko David, ʻa ia kuó ne ʻosi fakamoleki ʻa e ngaahi taʻu lahi ʻi he ngāue fakafaifekau taimi-kakató, ʻokú ne manatuʻi ʻa e anga ʻo e maongo kiate ia ʻa e kamata ngāue ʻa ʻene ongo mātuʻá ko ha ongo tāimuʻa makehe ʻi he taimi naʻá ne kei siʻi ai mo hono tokouá. ʻI he mate ʻa ʻene tamaí, naʻe hokohoko atu pē ʻa ʻene faʻeé ʻi he ngāue tāimuʻa makehé. Naʻá ne tokangaʻi kinaua ʻo tānaki atu ki hono malangaʻi ʻa e ongoongo leleí. “Naʻe ʻikai ʻaupito te na tenge au ke u tāimuʻa,” ko e lau ia ʻa David, “ka naʻa mau fiefia lahi ʻi he ngāue tāimuʻa ʻi he tuʻunga ko ha fāmilí ʻo ueʻi ai au ʻe he feohí mo e ʻātakaí ke u fai ʻa e meʻa tatau.” ʻI he fekauʻaki mo e mahuʻinga ʻo e tataki lelei mo e tokanga ʻa e ongo mātuʻá, ʻoku pehē ʻe David: “ʻI he pō kotoa, ʻoku lau mai ai ʻe heʻema faʻeé kia kimaua ʻa e ngaahi talanoa mei he tohi From Paradise Lost to Paradise Regained. a Ko e founga ʻo ʻene fakamatalaʻi mai ia kia kimauá naʻe tokoniʻi ai kimaua ke ma manako ʻi hono maʻu ʻa e meʻakai fakalaumālié.”

Houngaʻia ʻi he Ngaahi Fakatahá

ʻOku ʻiloʻi ʻe he toʻutupu ʻe niʻihi ʻoku faingataʻa ke houngaʻia ʻi he ngaahi fakataha faka-Kalisitiané. ʻOku nau ʻi aí koeʻuhi ko hono ʻave kinautolu ʻe heʻenau ongo mātuʻá. Kae kehe, kapau ʻoku nau hokohoko atu ʻenau maʻu fakatahá, te nau hoko nai ai ʻi ha taimi ʻo manako ʻi he ngaahi fakatahá. Fakakaukau angé  kia Alfredo, ʻa ia naʻá ne kamata ngāue taimi-kakato ʻi heʻene taʻu 11. ʻOkú ne fakahaaʻi ʻi he taimi nai naʻá ne taʻu nima aí, naʻá ne feinga ai ke fakaʻehiʻehi mei he ʻalu ki he ngaahi fakatahá koeʻuhi naʻe ʻai ai ia ke ne fiemohea ka naʻe ʻikai fakaʻatā ia ʻe heʻene ongo mātuʻá ke ne mohe lolotonga ʻa e ngaahi fakatahá. ʻOkú ne manatu: “ʻI heʻeku tupu hake ʻo taʻumotuʻa angé, naʻe māmālie ʻa ʻeku hoko ʻo mahuʻingaʻia ange ʻi he ngaahi fakatahá, tautefito ʻi he hili ʻeku ako ke lautohi mo tohí koeʻuhi ʻi he taimi ko iá naʻá ku kamata ai ke tali ʻi he ngaahi lea pē ʻaʻaku.”

Ko Cintia, ko ha taʻahine taʻu 17 ia ʻoku ngāue ko ha tāimuʻa tuʻumaʻu, ʻokú ne fakamatala ki he founga ʻo e fakahoko ʻe he feohi leleí ha ngafa lahi ʻi heʻene fakatupulekina ha ʻofa ki he ngāue ʻa Sihová. ʻOkú ne pehē: “Ko ha vahaʻangatae lelei mo e fanga tokouá mo e maʻu tuʻumaʻu ʻo e ngaahi fakatahá kuó ne taʻofi au mei he ongoʻi ʻa e ʻikai ʻi ai ʻa hoku ngaahi kaumeʻa fakamāmaní pea mo e ngaahi fakafiefia ʻoku manakoa ʻe he toʻutupú, hangē ko ia ko e ʻalu ki he ngaahi naitikalapú. Ko e fanongo ki he ngaahi talí mo e ngaahi meʻa ʻoku hokosiá ʻi he ngaahi fakatahá naʻá ne fakatupu ʻiate au ha holi ke foaki kia Sihova ʻa e meʻa kotoa ʻoku ou maʻú, pea ʻoku ou ongoʻi ko e meʻa lelei taha ʻoku ou maʻú ko hoku tuʻunga finemuí. Ko ia naʻá ku fili ai ke ngāueʻaki ia ʻi heʻene ngāué.”

Kae kehe, ʻokú ne fakahaaʻi: “Naʻe ʻi ai ha taimi, ki muʻa ke u papitaisó, naʻá ku ʻiloʻi ai ʻoku faingofua ke liʻaki ʻa e ngaahi fakatahá, ʻo ngāueʻaki ʻa e homueká pe ko e ngaahi ngāue fakaako kehé ko ha kalofanga. Naʻá ku tō ai mei he ngaahi fakataha lahi, pea naʻe kamata ke uesia fakalaumālie au ʻi he meʻá ni. Naʻá ku kamata ai ke feohi mo ha tamasiʻi naʻe ʻikai te ne ako ʻa e Tohitapú. ʻOku ou fakamālō ʻi he tokoni ʻa Sihová, naʻá ku fakatonutonu taimi tonu ai ʻa e ngaahi meʻá.”

Ko ha Fili Fakafoʻituitui

ʻI he taimi naʻe ʻeke ai kia Pablo, ko ha toʻutupu ʻe taha ʻa ia ʻoku ngāue taimi-kakato kia Sihova, ʻa e meʻa ʻokú ne fakakaukau ko e kī ia ki hono fakatupulekina ha ʻofa ki he moʻoni ʻo e Folofola ʻa e ʻOtuá, ʻokú ne pehē: “ʻOku ou tui ʻoku ʻi ai ʻa e meʻa ʻe ua: ko e ako fakafoʻituitui tuʻumaʻu mo e faivelenga ki he ngāue fakamalangá. ʻOku ou houngaʻia ʻi heʻeku ongo mātuʻá ʻi hono akoʻi kiate au ʻa e moʻoni fekauʻaki mo Sihová, pea ʻoku ou ongoʻi ko e meʻa lelei taha eni naʻe lava ke na ʻomai kiate aú. Kae kehe, ʻoku fiemaʻu ke fakatuipauʻi fakafoʻituitui kiate au ʻa e ʻuhinga ʻoku ou ʻofa ai kia Sihová. ʻI he meʻa ko iá, ʻoku fiemaʻu ke ʻiloʻi ʻa e ‘māukupu mo hono loloto’ ʻo e moʻoni faka-Tohitapú. Ko e founga pē ko ení ʻoku tau hoko ai ʻo ongoʻi ha hoholi ki he Folofola ʻa Sihová, ʻa ia ʻoku langaʻi ai ha ‘afi vela’ ʻi loto ʻia kitautolu ke lea ai ki he niʻihi kehé fekauʻaki mo ia. Ko e faivelenga ko ia ki he ngāue fakamalangá te ne tauhi ke moʻui ʻetau houngaʻia ki he moʻoní.”​—Efeso 3:​18; Selemaia 20:9.

Ko Jacob Emmanuel, naʻe lave ki ai ki muʻá, ʻokú ne toe manatuʻi ʻa e mahuʻinga ʻo hono fai ha fili fakafoʻituitui ke tauhi kia Sihová. ʻOkú ne pehē naʻe ʻikai ʻaupito vilitaki ange ʻene ongo mātuʻá ke ne papitaiso. “ʻOku ou tui ko e founga lelei tahá eni koeʻuhi ʻoku ou sio ai ki he ngaahi ola lelei. Ko e fakatātaá, ko e toʻutupu ʻe niʻihi naʻá ku feohi lahi mo iá naʻa nau fai ʻa e fili ke nau papitaiso fakataha. Neongo naʻe lelei ia, naʻe lava ke u sio naʻe fai ia ʻe he niʻihi makatuʻunga ʻi he anga ʻo ʻenau ngaahi ongoʻí, pea ʻi he taimi nounou mei ai, naʻe hōloa ʻenau faivelenga ki he ngaahi ngāue ʻo e Puleʻangá. ʻI hoku tuʻungá naʻe ʻikai ke tenge au ʻe heʻeku  ongo mātuʻá ke fai ʻa e fili ki heʻeku fakatapui kia Sihová. Ko ha fili fakafoʻituitui ia.”

Ko e Ngafa ʻo e Fakatahaʻangá

Kuo ako ʻe he toʻutupu ʻe niʻihi ʻa e moʻoni ʻo e Folofola ʻa e ʻOtuá ʻia kinautolu pē, ʻo taʻekau ai ʻa e tokoni ʻa ʻenau ngaahi mātuʻá. Ko ha pole moʻoni ia ʻi he malumalu ʻo e ngaahi tuʻunga faingataʻa ko iá ke ako ai ke fai ʻa e meʻa ʻoku totonú pea ke kīvoi ai.

ʻOku manatu ʻa Noé ki he lahi ʻo e ʻaonga kiate ia ʻa e moʻoní. Mei ha taʻu siʻi ʻaupito, naʻá ne hehema ai ke ʻita mo fakamālohi. ʻI heʻene kamata ke ako Tohitapu ʻi hono taʻu 14, naʻe kamata ke fakalakalaka ai ʻa hono ʻulungāngá, ʻa ia naʻe mātuʻaki ongoʻi houngaʻia ai ʻa ʻene ongo mātuʻá, ʻa ia naʻe ʻikai te na mahuʻingaʻia ʻi he Tohitapú ʻi he taimi ko iá. ʻI he fakalakalaka fakalaumālie ʻa Noé, naʻá ne loto ke ngāueʻaki ke toe kakato ange ʻa ʻene moʻuí ʻi he ngāue ʻa e ʻOtuá. ʻOkú ne ʻi he ngāue fakafaifekau taimi-kakató he taimí ni.

ʻI he tuʻunga meimei tatau, ko Alejandro naʻe kamata ke ne mahuʻingaʻia ʻi he moʻoni faka-Kalisitiané ʻi heʻene mātuʻaki kei siʻí neongo naʻe ʻikai ke mahuʻingaʻia ai ʻene ongo mātuʻá. ʻI hono fakahāhā ʻene houngaʻia ki he moʻoní, ʻokú ne pehē: “Naʻe ʻohake au ʻi ha ʻapi Katolika tukufakaholo. Ka ko ʻeku ngaahi falala ki he fakaʻikaiʻi-ʻOtua faka-Kominiusí naʻe tupulaki ia, koeʻuhi naʻe ʻikai ke tali ʻe he siasí ʻeku ngaahi fehuʻi naʻá ne fakahohaʻasi au mei heʻeku kei taʻu siʻí. Naʻe tokoniʻi au ʻe he kautaha ʻa Sihová ke maʻu ʻa e ʻiloʻi ʻo e ʻOtuá. Naʻá ne fakahaofi moʻoni ʻeku moʻuí koeʻuhi kapau naʻe ʻikai te u ako ʻa e Tohitapú, ngalingali ne u mei hoko ai ʻo kau ʻi he ʻulungaanga taʻetāú, ʻolokahōliká pe ko e ngaahi faitoʻo kona tapú. Ne mei aʻu ai ʻou hoko ko e konga ʻo ha kulupu liukava, fakataha mo e ngaahi nunuʻa fakamamahi.”

ʻE lava fēfē ki ha toʻutupu ke ne kīvoi ʻi heʻene fekumi ki he moʻoní pea pipiki ki ai ʻo taʻekau ai ʻa e poupou ʻa ʻene ongo mātuʻá? ʻOku hā mahino, ko e kau mātuʻá mo e niʻihi kehe ʻi he fakatahaʻangá ʻoku nau fakahoko ha ngafa mātuʻaki mahuʻinga. ʻOku manatuʻi ʻe Noé: “Kuo ʻikai ʻaupito te u ongoʻi tuēnoa, he ʻoku mātuʻaki ofi maʻu pē ʻa Sihova kiate au. Pehē foki, kuó u maʻu ʻa e poupou ʻa e fanga tokoua mo e fanga tuofāfine ʻofa tokolahi kuo nau hoko ko ʻeku ngaahi tamai, ngaahi faʻē mo e fanga tokoua fakalaumālie.” ʻOkú ne ngāue he taimí ni ʻi Pēteli pea ngāueʻaki ʻa hono taimí ʻi he ngāue ʻa e ʻOtuá. ʻI he tuʻunga tatau, ʻoku fakamatala ʻa Alejandro: “Ko e meʻa te u houngaʻia maʻu pē aí ko ʻeku maʻu ʻa e tāpuaki ʻo e ʻi ha fakatahaʻanga fakataha mo e kulupu ʻo e kau mātuʻá naʻa nau fakahaaʻi ʻa e mahuʻingaʻia anga-ʻofa ʻiate au ʻi hoku tuʻunga ko ha tokotahá. ʻOku ou houngaʻia tautefito koeʻuhi ʻi heʻeku kamata ako ʻa e Tohitapú, ʻi hoku taʻu 16, ko e taʻemanonga ʻoku anga-maheniʻaki ʻi he toʻutupú naʻá ne toe uesia au. Ko e ngaahi fāmili ʻi he fakatahaʻangá naʻe ʻikai ʻaupito te nau liʻaki au. Naʻe ʻi ai maʻu pē ha taha ke ne talitali lelei au pea kaungāʻinasi mo au ʻo ʻikai ngata pē ʻi hono ʻapí mo e meʻakaí kae pehē foki ʻi hono lotó.” Kuo ʻi he ngāue taimi-kakató ʻa Alejandro he taimí ni ʻo laka hake ʻi he taʻu ʻe 13.

ʻOku fakakaukau ʻa e kakai ʻe niʻihi ko e lotú ia maʻá e kakai taʻumotuʻá pē. Kae kehe, kuo ako ʻa e toʻutupu tokolahi ki he moʻoni faka-Tohitapú ʻi ha taʻu kei siʻi pea kuo nau hoko ʻo ʻofa kia Sihova pea hanganaki faitōnunga kiate ia. ʻOku lava ke ngāueʻaki ki he toʻutupu ko ení ʻa e ngaahi lea ʻa Tēvita ʻoku lēkooti ʻi he Sāme 110:3: “ʻI he ʻaho ʻoku ke fakate tau, ʻe tali ko au ʻe he kakai na; te nau tuʻu mai ʻi he ngaahi teunga tapuha: hange ko e fanauʻi ʻe he pongipongi ʻa e hahau, ʻe pehe ʻa e haʻu kiate koe hoʻo kau talavou.”

Ko ha pole ia ki he kau talavoú ke ako ʻa e moʻoní pea pipiki ki ai. Ko ha meʻa fakafiefia moʻoni ia ke sio ʻoku nofo ʻa e tokolahi ʻo mātuʻaki ofi ki he kautaha ʻa Sihová, maʻu tuʻumaʻu ʻa e ngaahi fakatahá, pea ako tōtōivi ʻa e Tohitapú. ʻI hono fai iá, kuo malava ai ʻa e tokolahi ke fakatupulekina ha ʻofa moʻoni ki he Folofola ʻa e ʻOtuá mo ʻene ngāué!​—Sāme 119:​15, 16.

[Fakamatala ʻi lalo]