Hanganaki Fai ki he Ngaahi Meʻa Kuó Ke Akó

“ʻIo, ko e ngaahi meʻa naʻa mou ako, mo maʻu, mo fanongoa, mo mamata, ʻiate au, ko e ngaahi meʻa ko ia ke mou fai; pea ʻe toki ʻiate kimoutolu ʻa e ʻOtua ʻoku aʻana ʻa e nonga.”—FILIPAI 4:9.

1, 2. ʻI hono fakalūkufuá, ʻoku fai ʻe he Tohitapú ha tākiekina ʻi he moʻui ʻa e kakai ʻoku nau lau ko e kau lotu kinautolú? Fakamatalaʻi.

 “KO E Lotú ʻOku Fakautuutu, ka ko e ʻUlungāngá ʻOku Hōloa.” Ko e fakanounouʻi eni ʻe he ʻuluʻi ongoongo ʻi he pepa ko e Emerging Trends ʻa e ngaahi ola ʻo ha savea fakafonua ʻi he ʻIunaite Seteté. ʻOku hā mahino, kuo sio ʻa e fonuá ʻi he fakautuutu ʻo e tokolahi ʻo e kakai ʻoku nau ʻalu ki he lotú mo nau lau ʻoku ʻi ai ha tuʻunga mahuʻinga ʻo e lotú ʻi heʻenau moʻuí. Kae kehe, ʻoku pehē ʻe he līpōtí: “Neongo ʻa e ngaahi fika lalahi ko ení, ʻoku fehuʻia mahino ʻe he kau ʻAmelika tokolahi ʻa e maongo ʻoku fai ʻe he tui fakalotú ki he moʻui fakatāutahá pea mo e sōsaietí fakalūkufua.”

² Ko e tuʻunga ko ení ʻoku ʻikai ke makehe ia ki ha fonua pē taha. ʻI he kotoa ʻo e māmaní, ko e kakai tokolahi ko ia ʻoku nau pehē ʻoku nau tali ʻa e Tohitapú pea ko e kau lotu kinautolú ʻoku ʻikai ke nau fakaʻatā ʻa e ngaahi Konga Tohitapú ke ne fai ha faʻahinga tākiekina moʻoni ʻi heʻenau moʻuí. (2 Timote 3:5) “ʻOku mau kei tokaʻi lahi ʻa e Tohitapú,” ko e lau ia ʻa e taki ʻo ha kulupu fekumi ʻe taha, “ka ʻi he ngaahi tuʻunga ʻo hono fakamoleki moʻoni ha taimi ke lau iá, ako iá mo ngāueʻaki iá​—ko e meʻa pē ia ʻo e kuohilí.”

3. (a) ʻOku anga-fēfē hono ueʻi ʻe he Tohitapú ʻa e faʻahinga ko ia ʻoku nau hoko ko e kau Kalisitiane moʻoní? (e) ʻOku anga-fēfē hono ngāueʻaki ʻe he kau muimui ʻo Kalaisí ʻa e akonaki ʻa Paula ʻoku lēkooti ʻi he Filipai 4:9?

 ³ Kae kehe, fekauʻaki mo e kau Kalisitiane moʻoní, ʻoku kehe ʻa e tuʻungá ia. Ko hono ngāueʻaki ʻa e akonaki mei he Folofola ʻa e ʻOtuá kuó ne fakahoko ʻa e ngaahi liliu ʻi heʻenau fakakaukaú mo ʻenau tōʻongá. Pea ko e angaʻitangata foʻou kuo nau fakahāhaá ʻoku fakatokangaʻi lelei ia ʻe he niʻihi kehé. (Kolose 3:​5-10) Ki he kau muimui ʻo Sīsuú, ko e Tohitapú ʻoku ʻikai ko ha tohi ia ʻoku taʻengāueʻaki ʻo tānakiʻanga efu ʻi ha tukuʻanga tohi. Ko hono kehé, naʻe tala ʻe he ʻapositolo ko Paulá ki he kau Kalisitiane ʻi Filipaí: “Ko e ngaahi meʻa naʻa mou ako, mo maʻu, mo fanongoa, mo mamata, ʻiate au, ko e ngaahi meʻa ko ia ke mou fai; pea ʻe toki ʻiate kimoutolu ʻa e ʻOtua ʻoku aʻana ʻa e nonga.” (Filipai 4:9, fakaʻītali ʻamautolu.) Ko e kau Kalisitiané ʻoku nau fai ʻa e meʻa lahi ange ʻi hono tali pē ʻa e Folofola ʻa e ʻOtuá. ʻOku nau ngāueʻi ʻa e meʻa ʻoku nau akó, ʻo hokohoko ngāueʻaki ʻa e akonaki ʻa e Tohitapú​—ʻi he fāmilí, ʻi he ngāué, ʻi he fakatahaʻangá, pea ʻi he ngaahi ʻēlia kehe kotoa ʻo e moʻuí.

4. Ko e hā ko ha pole ai ia ke fai ki he ngaahi lao ʻa e ʻOtuá?

⁴ Ko e fai ki he ngaahi lao mo e ngaahi tefitoʻi moʻoni ʻa e ʻOtuá ʻoku ʻikai faingofua. ʻOku tau nofo ʻi he māmani ʻoku ʻi he malumalu ʻo e mafai ʻo Sētane ko e Tēvoló, ʻa ia ʻoku ui ʻe he Tohitapú ko e ‘otua o mamaní.’ (2 Kolinito 4:​4, PM; 1 Sione 5:19) Ko ia ai, ʻoku mahuʻinga ke tau tokanga fekauʻaki mo ha faʻahinga meʻa pē te ne fakafaingataʻaʻiaʻi kitautolu mei he tuli ko ia ki ha ʻalunga anga-tonu kia Sihova ko e ʻOtuá. ʻE lava fēfē ke tau hoko ko e kau tauhi anga-tonu?

Piki ki he “Sīpinga ʻo e Ngaahi Lea Fakatupu Moʻui”

5. Ko e hā ʻoku fakahuʻunga ʻe he lea ko ia ʻa Sīsū: ‘Muimui hokohoko iate aú’?

⁵ Ko e taha e tafaʻaki ʻo hono fai ʻa e meʻa kuo tau akó ko e fiemaʻu ke poupouʻi mateaki ʻa e lotu moʻoní, neongo ʻa e fakafepaki mei he kau taʻetuí. Ko e kātakí ʻoku fiemaʻu ki ai ʻa e feinga. “Kabau e muimui ha taha iate au,” ko e lea ia ʻa Sīsuú, “tuku ke ne liaki eia ia, bea too hake ene akau mafajia o muimui [“hokohoko,” NW] iate au.” (Mātiu 16:​24, PM) Naʻe ʻikai ke pehē ʻe Sīsū ia ʻoku totonu ke tau muimui pē kiate ia ʻi ha uike, ʻi ha māhina, pe ʻi ha taʻu. Ka, naʻá ne pehē: ‘Muimui hokohoko iate au.’ ʻOku fakahaaʻi ʻe heʻene ngaahi leá ko hotau tuʻunga ākongá ʻe ʻikai lava ke hoko ko ha kiʻi vahaʻa taimi pē ʻo ʻetau moʻuí pe ko ha anga-līʻoa fakalaka pē ʻoku ʻi heni he ʻahó ni pea mole ʻapongipongi. Ko hono poupouʻi mateaki ʻa e lotu moʻoní ʻoku ʻuhinga iá ke tau kātaki faitōnunga ʻi he ʻalunga kuo tau filí, tatau ai pē pe ko e hā ʻe hokó. ʻE lava fēfē ke tau fai eni?

6. Ko e hā ʻa e sīpinga ʻo e ngaahi lea fakatupu moʻui naʻe ako ʻe he kau Kalisitiane ʻi he ʻuluaki senitulí meia Paulá?

⁶ Naʻe naʻinaʻi ʻa Paula ki hono kaungā ngāue ko Tīmoté: “Piki ki he sīpinga ʻo e ngaahi lea fakatupu moʻui naʻa mou fanongoa meiate aú fakataha mo e tui pea mo e ʻofa ʻoku felāveʻi mo Kalaisi Sīsuú.” (2 Timote 1:​13, NW) Ko e hā naʻe ʻuhinga ki ai ʻa Paulá? Ko e foʻi lea faka-Kalisi ʻoku liliu heni ko e “sīpinga” ʻoku ʻuhinga fakafoʻilea ia ki he tā kohikohi ʻa ha tokotaha tā fakatātā. Neongo ʻoku ʻikai fuʻu fakaikiiki, ko ha tā kohikohi pehē ʻokú ne maʻu ha fōtunga mahino ʻo lava ai ʻe ha tokotaha mamata ʻoku ʻiloʻiló ʻo mahinoʻi ʻa e fakatātaá fakalūkufua. ʻI he tuʻunga meimei tatau, ko e sīpinga ʻo e moʻoni naʻe akoʻi ʻe Paula kia Tīmote mo e niʻihi kehé naʻe ʻikai ke faʻufaʻu ia ke ne ʻomai ha tali hangatonu ki he fehuʻi kotoa pē ʻoku ala faí. Neongo ia, ko e sinoʻi akonaki ko ení ʻokú ne tokonaki mai ha tataki feʻunga​—ha ʻautilaine, hangē ko e fakatātaá​—koeʻuhi ke lava ʻo mahinoʻi ʻe he kau loto-moʻoní ʻa e meʻa ʻoku fiemaʻu ʻe he ʻOtuá meiate kinautolú. Ke fakahōifua ki he ʻOtuá, ko e moʻoni, ʻe fiemaʻu kia kinautolu ke nau hanganaki pikimaʻu ki he sīpinga ʻo e moʻoni ko iá ʻaki hono fai ʻa e meʻa kuo nau akó.

7. ʻE malava fēfē ki he kau Kalisitiané ke nau piki maʻu ki he sīpinga ʻo e ngaahi lea fakatupu moʻuí?

⁷ ʻI he ʻuluaki senitulí, ko e niʻihi tāutaha hangē ko ʻAiminia, ʻAlekisānita, mo Failitó naʻa nau poupouʻi ʻa e ngaahi fakakaukau naʻe ʻikai feʻungamālie mo e ‘sīpinga ʻo e ngaahi lea fakatupu moʻuí.’ (1 Timote 1:​18-​20; 2 Timote 2:​16, 17) Naʻe malava fēfē ʻe he muʻaki kau Kalisitiané ke kalo mei hono takiheeʻi ʻe he kau tafoki mei he moʻoní? ʻAki hono ako fakalelei ʻa e ngaahi tohi fakamānavaʻí pea ngāueʻaki ia ʻi he moʻuí. Ko e faʻahinga ko ia naʻa nau ʻaʻeva ʻo fakatatau ki he faʻifaʻitakiʻanga naʻe ʻia Paula mo e kau faitōnunga kehé naʻe malava ke nau fakatokangaʻi pea talitekeʻi ha meʻa pē naʻe ʻikai ke hoa mo e sīpinga ʻo e moʻoni kuo akoʻi kinautolu ki aí. (Filipai 3:​17; Hepelu 5:​14) ʻI he ʻikai hoko ʻo  “mahakiʻaki ʻa e ʻeke meʻa taʻefaʻaʻiloa, mo e fakakikihiʻi lea,” naʻa nau hokohoko atu ke laka ki muʻa ʻi honau ʻalunga totonu ʻo e anga-līʻoa fakaʻotuá. (1 Timote 6:​3-6) ʻOku tau fai ʻa e meʻa tatau ʻi he taimi ʻoku tau fai ai ki he ngaahi moʻoni kuo tau akó. He meʻa fakaivimālohi tui moʻoni ke sio ko e laui miliona ʻoku nau tauhi kia Sihova ʻi he māmaní kotoa ʻoku nau tauhi maʻu ha piki mālohi ki he sīpinga ʻo e moʻoni faka-Tohitapu kuo akoʻi kinautolu ki aí.​—1 Tesalonaika 1:​2-5.

Talitekeʻi ʻa e ‘Ngaahi Talanoa Loí’

8. (a) ʻOku anga-fēfē kumi ʻa Sētane ke fakaʻauha ʻetau tuí ʻi he ʻaho ní? (e) Ko e hā ʻa e fakatokanga ʻa Paula ʻoku ʻi he 2 Timote 4:​3, 4?

⁸ ʻOku feinga ʻa Sētane ke maumauʻi ʻetau anga-tonú fakafou ʻi hono tūtuuʻi ʻa e veiveiua fekauʻaki mo e meʻa kuo akoʻi kitautolu ki aí. ʻI he ʻahó ni, hangē ko ia ʻi he ʻuluaki senitulí, ʻoku kumi ʻa e kau tafoki mei he moʻoní mo e niʻihi kehé ke fakaʻauha ʻa e tui ʻa e kau taʻehalaiá. (Kaletia 2:4; 5:​7, 8) ʻI he taimi ʻe niʻihi ʻoku nau ngāueʻaki ʻa e mītiá ke fakamafola ʻa e ngaahi fakamatala kuo mioʻi pe ko e ngaahi loi fakahangatonu fekauʻaki mo e ngaahi founga mo e ngaahi fakaueʻiloto ʻa e kakai ʻa Sihová. Naʻe fakatokanga ʻa Paula ʻe ʻi ai ʻa e niʻihi ʻe fakatafokiʻi mei he moʻoní. “ʻE faifai pea hoko ha kuonga,” ko ʻene tohí ia, “ʻa ia ʻe ʻikai te nau kātaki ai ʻa e tokateline haohaoa [“fakatupu moʻui,” NW]; ka te nau fokotuʻuniu hanau kau akonaki, ʻo fakatatau ki he ngaahi holi ʻanautolu, he veli honau telinga: pea te nau leʻei honau telinga mei he moʻoni, ka nau tafoki ki he ngaahi talatupuʻa [“talanoa loi,” NW].”—2 Timote 4:​3, 4.

9. Ko e hā nai naʻe ʻi he ʻatamai ʻo Paulá ʻi he taimi naʻá ne lave ai ki he ‘ngaahi talanoa loí’?

⁹ ʻI he ʻikai piki ki he sīpinga ʻo e ngaahi lea fakatupu moʻuí, kuo tohoakiʻi ʻa e niʻihi ʻe he “ngaahi talanoa loi.” Ko e hā ʻa e ngaahi talanoa loi ko ení? Mahalo naʻe ʻi he fakakaukau ʻa Paulá ʻa e ngaahi fananga talatupuʻa, hangē ko ia ʻoku ʻi he tohi ʻapokalifa ʻo Tōpití. a Ko e ngaahi talanoa loí naʻe toe kau nai ai ha ngaahi talanoa fakatoʻoaloto mo fakatupu fifili. Pehē foki, ko e niʻihi​—‘ʻo fakatatau ki he ngaahi holi ʻanautolú’​—kuo kākaaʻi fakapoto nai kinautolu ʻe he faʻahinga ko ia ʻoku nau poupouʻi ha vakai fakangofua tavale ki he ngaahi tuʻunga ʻa e ʻOtuá pe faʻahinga naʻa nau fakaangaʻi ʻa e faʻahinga naʻa nau takimuʻa ʻi he fakatahaʻangá. (3 Sione 9, 10; Siutasi 4) Pe ko e hā pē ha maka tūkiaʻanga naʻe kau ai, ʻoku hā mahino naʻe saiʻia ange ʻa e niʻihi ʻi he loí ʻi he ngaahi moʻoni ko ia ʻo e Folofola ʻa e ʻOtuá. Naʻe vave pē ʻenau tuku hono fai ʻa e ngaahi meʻa kuo nau akó, pea naʻe hoko pē eni ko e fakatuʻutāmaki fakalaumālie kia kinautolu.​—2 Pita 3:​15, 16.

10. Ko e hā ʻa e ngaahi talanoa loi ʻe niʻihi ʻi he ʻaho ní, pea naʻe anga-fēfē hono fakamamafaʻi ʻe Sione ha fiemaʻu ke tokanga?

¹⁰ ʻE lava ke tau kalofi ʻa e tafoki ki he ngaahi talanoa loi ʻi he ʻaho ní kapau te tau sivisiviʻi pea filifili fekauʻaki mo e meʻa ʻoku tau fanongo ki ai mo laú. Ko e fakatātaá, ko e mītiá ʻokú ne faʻa poupouʻi ʻa e ʻulungaanga taʻetāú. Ko e kakai tokolahi ʻoku nau fakaʻaiʻai ʻa e tui ʻakinositiká pe mātuʻaki  fakaʻikaiʻi-ʻOtuá. Ko e kau fakaanga fakapotó ʻoku nau lumaʻi ʻa e taukaveʻi ko ia ko e Tohitapú ko e fakamānavaʻi fakaʻotuá. Pea ko e kau tafoki mei he moʻoní ʻi onopōní ʻoku nau hokohoko atu ʻi he feinga ke tūtuuʻi ʻa e ngaahi tenga ʻo e veiveiuá koeʻuhi ke fakavaivaiʻi ʻa e tui ʻa e kau Kalisitiané. Fekauʻaki mo ha faingataʻa tatau naʻe ʻomai ʻe he kau palōfita loi ʻi he ʻuluaki senitulí, naʻe fakatokanga ʻa e ʻapositolo ko Paulá: “Siʻi ʻofaʻanga, ʻoua te mou tui ki he laumalie fulipe, ka mou sivi pe ʻa e ngaahi laumalie, pe ʻoku mei he ʻOtua ia: he ʻoku tokolahi ʻa e kau palofita loi kuo ʻalu atu ki mamani.” (1 Sione 4:1) Ko ia ʻoku fiemaʻu ke tau tokanga.

11. Ko e hā ʻa e founga ʻe taha ke sivisiviʻi ai pea sio pe ʻoku tau ʻi he tuí?

¹¹ ʻI he fekauʻaki mo e meʻá ni, naʻe tohi ʻe Paula: “Hanganaki sivisiviʻi pe ʻoku mou ʻi he tuí.” (2 Kolinito 13:​5, NW) ʻOku fakaʻaiʻai kitautolu ʻe he ʻapositoló ke tau hanganaki sivisiviʻi kitautolu ke fakapapauʻi pe ʻoku tau piki ki he sino ʻo e ngaahi tui faka-Kalisitiané. Kapau ʻoku hehema hotau telingá ke fanongo ki he kau taʻefiemālié, ʻoku fiemaʻu ke tau ʻanalaiso fakamātoato kitautolu. (Sāme 139:​23, 24) ʻOku tau hehema ke fakasio pē halá ʻi he kakai ʻa Sihová? Kapau ko ia, ko e hā e ʻuhingá? Kuo fakalotomamahiʻi kitautolu ʻe he ngaahi lea pe tōʻonga ʻa ha taha? Kapau ko ia, ʻoku tau tauhi ʻa e ngaahi meʻá ki hono tuʻunga totonú? Ko ha faʻahinga mamahi pē ʻoku tau fehangahangai mo ia ʻi he fokotuʻutuʻu ʻo e ngaahi meʻa ko ení ʻoku fakataimi pē. (2 Kolinito 4:17) Neongo kapau ʻoku tau hokosia ha ʻahiʻahi ʻi he fakatahaʻangá, ko e hā ka tau tuku ai ʻetau tauhi ki he ʻOtuá? Kapau ʻoku tau loto-mamahi ʻi ha faʻahinga meʻa, ʻikai ʻoku lelei lahi ange ke fai ʻa e meʻa ʻoku tau lavá ke fakaleleiʻiʻaki ʻa e meʻa ko iá pea tuku leva ki he toʻukupu ʻo Sihová?​—Sāme 4:4; Palovepi 3:​5, 6; Efeso 4:26.

12. Naʻe anga-fēfē hono fokotuʻu ʻe he kau Pēleá ha faʻifaʻitakiʻanga lelei maʻatautolu?

¹² ʻI he ʻikai ke hoko ʻo fakaangá, tau tauhi maʻu ha vakai fakalaumālie lelei ki he fakamatala ʻoku maʻu fakafou ʻi he ako fakafoʻituituí mo e ngaahi fakataha ʻa e fakatahaʻangá. (1 Kolinito 2:​14, 15) Pea ʻi he ʻikai ke fehuʻia ʻa e Folofola ʻa e ʻOtuá, he meʻa fakapotopoto ange moʻoni ke maʻu ʻa e fakakaukau ko ia ʻa e kau Pēlea ʻi he ʻuluaki senitulí ʻa ia naʻa nau sivisiviʻi lelei ʻa e ngaahi Konga Tohitapú! (Ngāue 17:​10, 11) Ko ia ai, tau ngāue leva ʻo fakatatau ki he meʻa ʻoku tau akó, ʻo talitekeʻi ʻa e ngaahi talanoa loí pea piki ki he moʻoní.

13. ʻE anga-fēfē nai haʻatau fakamafola taʻeʻilo ha ngaahi talanoa loi?

¹³ ʻOku toe ʻi ai mo e faʻahinga talanoa loi ʻe taha ʻoku fiemaʻu ke tau tokanga fekauʻaki mo ia. ʻOku mafola ha ngaahi talanoa fakatoʻoaloto lahi ʻaupito, ko e fou lahi ʻi he ʻĪ-meilí. ʻOku fakapotopoto ke tokanga fekauʻaki mo e ngaahi talanoa peheé, tautefito kapau ʻoku ʻikai ke tau ʻilo ʻa e matavai tefito ʻo e fakamatala ko iá. Neongo kapau ko ha meʻa naʻe hokosia pe talanoa naʻe ʻomai ʻe ha Kalisitiane ʻoku tokaʻi, ko e tokotaha ko iá ʻoku ʻikai nai te ne ʻiloʻi totonu ʻe ia ʻa e ngaahi foʻi moʻoní. Ko e ʻuhinga ia ʻoku mahuʻinga ai ke tokanga fekauʻaki mo hono toe leaʻaki pe fakahoko atu ha ngaahi fakamatala taʻefakapapauʻí. ʻOku pau ʻaupito ʻe ʻikai te tau loto ke toe leaʻaki ha “ngaahi talatupuʻa taʻefakaʻotua,” pe “ngaahi talanoa loi ʻa ia ʻokú ne maumauʻi ʻa e meʻa ʻoku māʻoniʻoní.” (1 Timote 4:7; New International Version) Koeʻuhi ʻoku tau  toe maʻu ʻa e fatongia ke feleaʻaki totonu, te tau fai fakapotopoto ʻaki hono kalofi ha faʻahinga meʻa pē te ne fakatupunga kitautolu ke aʻu ʻo tau fakamafola taʻeʻilo ha ngaahi meʻa taʻemoʻoni.​—Efeso 4:​25.

Ngaahi Ola Lelei ʻo e Fai ki he Moʻoní

14. Ko e hā ʻa e ngaahi ʻaonga ʻe iku ki ai mei hono fai ʻa e ngaahi meʻa kuo tau ako mei he Folofola ʻa e ʻOtuá?

¹⁴ Ko e fai ki he meʻa ko ia ʻoku tau ako mei he ako Tohitapu fakafoʻituituí mo e ngaahi fakataha faka-Kalisitiané te ne ʻomi ʻa e ngaahi ʻaonga lahi. Ko e fakatātaá, te tau ʻilo nai ʻoku fakalakalaka ai hotau ngaahi vahaʻangatae mo e faʻahinga ʻoku tau felāveʻi mo ia ʻi he tuí. (Kaletia 6:10) Ko ʻetau hehemá tonu ʻe liliu ʻo lelei ange ʻi he taimi ʻoku tau ngāueʻaki ai ʻa e ngaahi tefitoʻi moʻoni faka-Tohitapú. (Sāme 19:8) ʻIkai ko ia pē, ʻi he fai ki he meʻa ʻoku tau akó, ʻoku tau ‘teungaʻaki ai ʻa e akonaki ʻa e ʻOtuá’ pea ngalingali ʻe tohoaki mai ai ʻa e niʻihi kehé ki he lotu moʻoní.​—Taitusi 2:​6-10, NW.

15. (a) Naʻe anga-fēfē hono maʻu ʻe ha tokotaha kei siʻi ʻa e loto-lahi ke faifakamoʻoni ai ʻi he ʻapiakó? (e)  Ko e hā naʻá ke ako mei he meʻa naʻe hokosia ko ení?

¹⁵ ʻI he haʻohaʻonga ʻo e Kau Fakamoʻoni ʻa Sihová ʻoku ʻi ai ʻa e kau talavou tokolahi ʻoku nau fai ʻa e ngaahi meʻa kuo nau ako fou he ako fakafoʻituitui ʻo e Tohitapú pea mo e ngaahi tohi faka-Kalisitiané pea pehē ki heʻenau ʻi ai maʻu pē ʻi he ngaahi fakataha ʻa e fakatahaʻangá. Ko honau ʻulungaanga leleí ko ha fakamoʻoni mālohi ia ki he kau faiakó mo e kaungāako ʻi he ʻapiakó. (1 Pita 2:12) Tau vakai angé kia Leslie, ko ha kiʻi taʻahine taʻu 13 ʻi he ʻIunaite Seteté. ʻOkú ne pehē naʻe faʻa faingataʻa kiate ia ke lea ki he kaungāakó fekauʻaki mo ʻene tuí, ka ʻi ha ʻaho ʻe taha naʻe mafuli ai ʻa e meʻa ko iá. “Naʻe talanoa ʻa e kalasí fekauʻaki mo e feinga ʻa e kakaí ke nau fakatau atu kia koe ha ngaahi meʻa. Naʻe hiki hake ʻe he kiʻi taʻahine ʻe taha hono nima peá ne lave ki he Kau Fakamoʻoni ʻa Sihová.” ʻI he tuʻunga ko ha Fakamoʻoní, naʻe anga-fēfē tali ʻa Leslie? “Naʻá ku taukapoʻi ʻeku tuí,” ko ʻene laú ia, “ʻa ia ʻoku ou tuipau naʻe ʻohovale ai ʻa e tokotaha kotoa, koeʻuhi naʻá ku faʻa fakalongolongo pē ʻi he ʻapiakó.” Ko e ola ʻo e loto-lahi ʻa Leslie? “Naʻá ku malava ai ke tuku ha polosiua mo ha tuleki ʻi he tokotaha ako ko iá, koeʻuhi naʻe ʻi ai mo ʻene ngaahi fehuʻi kehe,” ko e lau ia ʻa Leslie. He fiefia pau ē ka ko Sihova ʻi he taimi ʻoku maʻu ai ʻe he kau talavou ʻoku nau fai ki he meʻa kuo nau akó ha loto-lahi ke faifakamoʻoni ʻi he ʻapiakó!​—Palovepi 27:11; Hepelu 6:10.

16. Kuo anga-fēfē maʻu ʻaonga ha finemui Fakamoʻoni ʻe taha mei he Ako Fakafaifekau Fakateokalatí?

¹⁶ Ko e toe faʻifaʻitakiʻanga ʻe taha ko Elizabeth. Kamata ʻi heʻene taʻu fitú mo e kotoa hono taʻu ʻi he ako siʻí, naʻe fakaafeʻi maʻu pē ʻe he kiʻi taʻahine ko ení ʻene kau faiakó ki he Fale Fakatahaʻangá ʻi he taimi kotoa pē naʻe ʻi ai haʻane konga ʻi he Ako Fakafaifekau Fakateokalatí. Kapau naʻe ʻikai malava ha faiako ke maʻu ia, naʻe nofo ʻa Elizabeth he tuku ʻa e akó ʻo fakahāhaaʻi ʻene malangá ki he faiakó. ʻI hono taʻu fakaʻosi ʻi he ako māʻolungá, naʻe tohi ai ʻe Elizabeth ha līpooti peesi ʻe hongofulu fekauʻaki mo e ngaahi ʻaonga ʻo e Ako Fakafaifekau Fakateokalatí peá ne fai mo ha fakahāhā ki ha kulupu ʻo ha kau faiako ʻe toko fā. Naʻe toe fakaafeʻi foki ia ke ne fai ha sīpinga ʻo ha malanga Ako Fakafaifekau Fakateokalati, ʻa ia naʻá ne fili ai ʻa e kaveinga “Ko e Hā ʻOku Fakangofua Ai ʻe he ʻOtuá ʻa e Fulikivanú?” Naʻe maʻu ʻaonga ʻa Elizabeth mei he polokalama ako naʻe fai ʻe he Kau Fakamoʻoni ʻa Sihová ʻi he Ako Fakafaifekau Fakateokalatí. Ko e taha pē ia mei he kau finemui Kalisitiane tokolahi ʻoku nau ʻoatu ʻa e fakahīkihiki kia Sihova ʻaki ʻenau fai ki he ngaahi meʻa kuo nau ako mei heʻene Folofolá.

17, 18. (a) ʻOku ʻomi ʻe he Tohitapú ʻa e akonaki fē fekauʻaki mo e faitotonú? (e) Naʻe anga-fēfē hono ueʻi ha tangata ʻe taha ʻe he tōʻonga faitotonu ʻa e taha ʻo e Kau Fakamoʻoni ʻa Sihová?

¹⁷ ʻOku akonekina ʻe he Tohitapú ʻa e kau  Kalisitiané ke nau tōʻonga faitotonu ʻi he meʻa kotoa pē. (Hepelu 13:​18, NW) Ko e taʻefaitotonú ʻe lava ke ne maumauʻi hotau vahaʻangatae mo e niʻihi kehé, kae mahuʻinga angé, ko hotau vahaʻangatae mo Sihová tonu. (Palovepi 12:22) Ko ʻetau tōʻonga falalaʻangá ʻoku ʻoatu ai ʻa e fakamoʻoni ʻoku tau fai ʻa e ngaahi meʻa kuo tau akó, pea kuo fakatupunga ai ʻa e tokolahi ke nau tokaʻi lahi ange ʻa e Kau Fakamoʻoni ʻa Sihová.

¹⁸ Fakakaukau atu ki he meʻa naʻe hokosia ʻe ha tokotaha sōtia ko Phillip. Naʻá ne tukuhalaʻi ha sieke taʻefakafonu kuo ʻosi fakamoʻoni hingoa pea naʻe ʻikai te ne fakatokangaʻi eni ka ʻi hono toki fakafoki kiate ia ʻi he meilí. Naʻe maʻu ʻa e sieké ʻe he taha ʻo e Kau Fakamoʻoni ʻa Sihová, pea naʻe pehē ʻe ha kiʻi nouti naʻe fakapipiki ki ai ko e ngaahi tui ʻa e tokotaha naʻá ne maʻú naʻá ne ueʻi ia ke ne fakafoki. Naʻe moʻutāfuʻua ʻa Phillip. “Naʻa nau mei toho ʻo ʻosi ʻeku $9,000!” ko ʻene leá ia. Naʻe taʻeʻamanekina kiate ia ʻa hono kaihaʻasi hono tātaá ʻi ha taimi kehe ʻi he fale lotú. ʻOku hā mahino, naʻe ʻave ia ʻe hano maheni pē, ka ko ha sola eni ia kuó ne fakafoki ha sieke naʻe lau afe ʻa hono mahuʻingá! Ko e moʻoni, ko e kau Kalisitiane faitotonú ʻoku nau ʻomi ʻa e fakalāngilangi kia Sihova ko e ʻOtuá.

Hokohoko Atu ke Fai ʻa e Meʻa Kuó Ke Akó

19, 20. ʻE anga-fēfē haʻatau maʻu ʻaonga mei he ngāue ʻo fakatatau ki he ngaahi meʻa faka-Tohitapu ʻoku tau akó?

¹⁹ Ko e faʻahinga ko ia ʻoku nau fai ki he meʻa kuo nau ako mei he Folofola ʻa e ʻOtuá ʻoku nau utu ʻa e ngaahi ʻaonga lahi. Naʻe tohi ʻe he ākonga ko Sēmisí: “Ka ko ia ʻoku ne fakasio hifo ki he lao haohaoa, ʻa e lao tauʻataina, ʻo ne taʻutū ai, kaeʻūmaʻā ʻoku ʻikai te ne hoko ko ha taha fanongo kae ngalo, ka ko ha taha fai ngaue, ʻe monuʻia ʻa e toko taha ko ia ʻi heʻene fai.” (Semisi 1:25) ʻIo, kapau ʻoku tau ngāue ʻo fakatatau ki he ngaahi meʻa faka-Tohitapu ʻoku tau akó, te tau maʻu ai ʻa e fiefia moʻoní pea te tau malava lelei ange ai ke fekuki mo e ngaahi tenge ʻo e moʻuí. Hiliō he meʻa kotoa, te tau maʻu ai ʻa e tāpuaki ʻa Sihová mo e ʻamanaki ko ia ʻo e moʻui taʻengatá!​—Palovepi 10:22; 1 Timote 6:6.

²⁰ Ko ia ai, hokohoko atu hoʻo tokanga ki hono ako ʻo e Folofola ʻa e ʻOtuá. Fakatahataha maʻu pē mo e kau lotu ʻa Sihová, pea tokanga ki he fakamatala ʻoku fakahoko mai ʻi he ngaahi fakataha faka-Kalisitiané. Ngāueʻaki ʻa e meʻa kuó ke akó, ʻo hanganaki fai ki ai, pea ʻe ‘toki ʻiate kimoutolu ʻa e ʻOtua ʻoku aʻana ʻa e nongá.’​—Filipai 4:9.

[Fakamatala ʻi lalo]

ʻOkú Ke Manatuʻi?

• Ko e hā ‘ʻa e sīpinga ʻo e ngaahi lea fakatupu moʻuí,’ pea ʻe lava fēfē ke tau hanganaki piki ki ai?

• Ko e hā ʻa e “ngaahi talanoa loi” ʻoku fiemaʻu ke tau talitekeʻí?

• Ko e hā ʻa e ngaahi ʻaonga ʻoku hoko mai ki he faʻahinga ko ia ʻoku nau fai ki he ngaahi meʻa ʻoku nau ako mei he Folofola ʻa e ʻOtuá?

[Fehuʻi ki he Ako]

[Fakatātā ʻi he peesi 17]

Naʻe malava fēfē ʻe he muʻaki kau Kalisitiané ke kalo mei hono takiheeʻi ʻe he kau tafoki mei he moʻoní?

[Fakatātā ʻi he peesi 18]

Ko e ngaahi tenga ʻo e veiveiuá ʻe lava ke tūtuuʻi ia ʻe he mītiá, fakafou he ʻInitanetí, pea ʻi he kau tafoki mei he moʻoní ʻi onopōní

[Fakatātā ʻi he peesi 19]

ʻOku taʻefakapotopoto ke fakamafola ha ngaahi līpooti ʻoku teʻeki fakapapauʻi

[Fakatātā ʻi he peesi 20]

ʻI he ngāueʻangá, ʻi he ʻapiakó, pe ʻi ha feituʻu kehe, ʻoku ngāueʻaki ʻe he Kau Fakamoʻoní ʻa e meʻa ʻoku nau lau ʻi he Folofola ʻa e ʻOtuá