Te Ke Tauhi Maʻu Hoʻo Anga-Tonú?

KO E ngaahi foʻi misi ʻe fiha ne mate ʻaneafí? ʻOku ʻikai ha taha te ne ʻiloʻi, pea ʻoku ngalingali ko e kakai tokosiʻi pē ʻoku nau tokanga ki aí​—ʻoku fuʻu tokolahi ʻa e fanga manupuná ia. Kae kehe, ʻoku tokanga ki ai ʻa Sihova. ʻI he lave ki he fanga manupuna hā ngali taʻemahuʻinga ko ení, naʻe tala ʻe Sīsū ki heʻene kau ākongá: “ʻE ʻikai patū ki he kelekele hana[u] taha taʻe meʻa ki ai ʻe hoʻomou Tamai.” Naʻá ne tānaki mai ki ai: “ʻOua te mou manavahe: ʻoku mou mahuʻinga kimoutolu ʻi ha fanga misi tokolahi.”—Mātiu 10:​29, 31.

Ki mui ai, naʻe mahinoʻi lelei ange ʻe he kau ākongá ʻa e lahi ʻo hono fakamahuʻingaʻi kinautolu ʻe Sihová. Ko e taha ʻo kinautolu, ʻa e ʻapositolo ko Sioné, naʻá ne tohi: “Ko eni ia ʻa e meʻa kuo fakaha ai ʻa e ʻofa ʻa e ʻOtua ʻiate kitautolu, ʻa e fekau atu ki mamani ʻe he ʻOtua hono ʻAlo tofu-pe-taha-ne-fakatupu, koeʻuhi ke tau moʻui ʻiate ia.” (1 Sione 4:9) ʻOku ʻikai ngata pē ʻi hono tokonaki mai ʻe Sihova ʻa e huhuʻí ka ʻokú ne toe fakapapauʻi ki he tokotaha kotoa ʻo ʻene kau sevānití: “ʻE ʻikai siʻi te u mahuʻi meiate koe, kaeʻumaʻa haʻaku momoʻi liʻaki koe.”—Hepelu 13:5.

ʻOku hā mahino, ko e ʻofa ʻa Sihova ki hono kakaí ʻoku taʻemauea. Kae kehe, ʻoku malanga hake ai ʻa e fehuʻi, ‘ʻOku tau mātuʻaki piki mālohi kia Sihova ʻo ʻikai ai faifai ange pea te tau liʻaki ia?’

Ngaahi Feinga ʻa Sētane ke Maumauʻi ʻEtau Anga-Tonú

ʻI hono tohoakiʻi ʻe Sihova ʻa e tokanga ʻa Sētané ki he ʻalunga anga-tonu ʻo Siopé, naʻe tali ange ʻe Sētane: “He kuo manavahe a Jobe ki he Otua tae ha totogi?” (Siope 1:​9, PM) Naʻá ne fakahuʻunga ʻoku fakatuʻunga ʻataʻatā pē ʻa e mateaki ʻa e tangatá ki he ʻOtuá ʻi he ‘meʻa ʻe lava ke nau maʻu mei aí.’ Kapau naʻe moʻoni eni, ʻe lava ke fakangaloku ha faʻahinga anga-tonu pē ʻa ha Kalisitiane​—kapau ko e tuʻuakí naʻe fakatauele feʻunga.

ʻI he tuʻunga ʻo Siopé, naʻe ʻuluaki taukaveʻi ʻe Sētane ko e mateaki ʻa Siope ki he ʻOtuá ʻe mole ia kapau ʻe mole meiate ia ʻa ʻene ngaahi koloa mahuʻinga tahá. (Siope 1:​10, 11) ʻI he fakamoʻoniʻi naʻe loi ʻa e lau kovi ko ení, naʻe pehē ʻe Sētane: “ʻE tukuange ʻe ha tangata ʻa e meʻa kotoa pē koeʻuhi ke hokohoko atu ʻene moʻuí.” (Siope 2:​4, Today’s English Version) Lolotonga ʻe moʻoni nai ʻa e taukave ʻa Sētané ʻi he niʻihi, naʻe fakafisi ʻa Siope ia ke fakangaloku ʻa ʻene anga-tonú. ʻOku fakamoʻoniʻi ia ʻe he lēkooti ʻo e hisitōliá. (Siope 27:5; 42:​10-​17) ʻOkú ke maʻu ha mateaki pehē? Pe te ke tuku ʻe koe ke maumauʻi ʻe Sētane ʻa hoʻo anga-tonú? Fakakaukau fekauʻaki mo koe tonu ʻi heʻetau sivisiviʻi ʻa e ngaahi moʻoni ʻe niʻihi ʻoku fekauʻaki mo e Kalisitiane kotoa pē.

Naʻe tui ʻa e ʻapositolo ko Paulá ʻe lava ke mālohi ʻaupito ʻa e mateaki faka-Kalisitiane moʻoní. Naʻá ne tohi: “ʻOku te tui, ʻe ʻikai lava ʻe he mate, pe ko e moʻui, . . . pe ko ha ngaahi meʻa ʻoku lolotonga ni, pe ko ha ngaahi meʻa ka hoko mai, . . . pe ko ha meʻa ʻe taha ʻi Natula, ʻe ʻikai te ne lava ke motuhi kitautolu mei he ʻofa ʻa e ʻOtua, ʻa ia ʻoku ʻia Kalaisi Sisu ko hotau ʻEiki.” (Loma 8:​38, 39) ʻE lava ke tau maʻu ha tuipau pehē ʻo kapau ʻoku mālohi ʻetau ʻofa kia Sihová. Ko e ʻofa peheé ko ha haʻi ʻikai ala motuhi ia naʻa mo e maté ʻe ʻikai lava ke ne ikunaʻi.

Kapau ʻoku tau maʻu ha vahaʻangatae pehē mo e ʻOtuá, ʻe ʻikai ʻaupito te tau ʻeke, ‘Te u kei tauhi pē  kia Sihova ʻi ha ngaahi taʻu siʻi mei he taimí ni?’ Ko e veiveiua peheé ʻe fakahaaʻi ai ko ʻetau mateaki ki he ʻOtuá ʻoku fakatuʻunga ia ʻi he meʻa nai ʻe hoko kia kitautolu lolotonga ʻa e ʻalunga ʻo ʻetau moʻuí. Ko e anga-tonu moʻoní ʻoku ʻikai uesia ia ʻe he ngaahi tuʻunga ʻi tuʻá. ʻOku fakatuʻunga ia ʻi he faʻahinga tokotaha ʻoku tau ʻi ai ʻi lotó. (2 Kolinito 4:​16-​18) Kapau ʻoku tau ʻofa kia Sihova ʻaki ʻa e kotoa ʻo hotau lotó, ʻe ʻikai ʻaupito te tau ʻai ke ne tō kelekele.​—Mātiu 22:37; 1 Kolinito 13:8.

Kae kehe, kuo pau ke tau manatuʻi, ʻoku hokohoko feinga ʻa Sētane ke maumauʻi ʻetau anga-tonú. Te ne fakataueleʻi nai kitautolu ke tō ki he ngaahi holi ʻa e kakanó, ʻo ʻulutukua ki he tenge mei he toʻumeʻá, pe fakaʻatā ha faʻahinga faingataʻa ke ne ʻai kitautolu ke liʻaki ai ʻa e moʻoní. Ko e māmani ko ia ʻoku mavahe mei he ʻOtuá ko e kaungā hoa tefito ia ʻo Sētane ʻi he ʻoho ko ení, neongo ʻe ʻai nai ʻe heʻetau taʻehaohaoá tonu ke faingofua ange ai ʻa ʻene ngāué. (Loma 7:​19, 20; 1 Sione 2:​16) Ka neongo ia, ʻoku tau maʻu ha ngaahi tuʻunga lelei ange ʻi he faitau ko ení, ko e taha ʻo e ngaahi tuʻunga tuʻu-ki-muʻá ko e moʻoniʻi meʻa ko ia ʻoku ʻikai te tau taʻeʻilo ki he ngaahi fāliunga ʻa Sētané.​—2 Kolinito 2:​11.

Ko e hā ʻa e ngaahi fāliunga ʻa Sētané? Naʻe fakamatalaʻi ia ʻe Paula ʻi heʻene tohi ki he kau ʻEfesoó ko e “ngaahi ngāue kākā,” pe “ngaahi tōʻonga olopoto.” a (Efeso 6:​11, NW; fakamatala ʻi laló) ʻOku fokotuʻu ʻe Sētane ʻa e ngaahi filioʻi kākā ʻi hotau halá koeʻuhi ke maumauʻi ai ʻetau anga-tonú. Ko e meʻa fakafiefiá, ʻe lava ke tau ʻiloʻi ʻa e ngaahi tōʻonga olopoto ko ení, koeʻuhi ko e ngaahi founga ʻa e Tēvoló kuo lēkooti ia maʻatautolu ʻi he Folofola ʻa e ʻOtuá. Ko e ngaahi feinga ʻa Sētane ke fakaʻauha ʻa e anga-tonu ʻa Sīsū mo Siopé ʻoku fakahaaʻi ai ʻa e niʻihi ʻo e ngaahi founga ʻokú ne feinga ke maumauʻi ʻaki ʻetau anga-tonu faka-Kalisitiané.

ʻIkai Lava ke Maumauʻi ʻa e Anga-Tonu ʻa Sīsuú

ʻI he kamata ʻa e ngāue fakafaifekau ʻa Sīsuú, naʻe maʻu ai ʻe Sētane ʻa e loto-mālohi ke ʻahiʻahiʻi ʻa e ʻAlo ʻo e ʻOtuá ʻaki hono fakaafeʻi ia ke ne liliu ʻa e maká ki he mā. He olopoto moʻoni! Ne teʻeki ke kai ʻa Sīsū ʻi he ʻaho ʻe 40, ko ia ai, ʻoku ʻikai ha veiveiua naʻá ne fiekaia ʻaupito. (Luke 4:​2, 3) Naʻe fokotuʻu ange ʻe Sētane ke fakatōliʻa he taimi pē ko iá ʻe Sīsū ʻa ʻene holi fakanatulá, ʻi ha founga naʻe fepaki ia mo e finangalo ʻo Sihová. ʻI he founga tatau he ʻahó ni, ko e fakakaukau ʻa e māmaní ʻoku fakalotolahiʻi ai ʻa hono fakalato ʻa e holí he taimi pē ko iá, ʻo siʻi pe halaʻatā ha fakakaukau ki hono ngaahi nunuʻá. Ko e pōpoakí eni, ‘ʻOku taau ia mo koe he taimí ni,’ pe ko e pehē pē, ‘Fai pē ia ʻe koe!’

Kapau naʻe fakatōliʻa ʻe Sīsū ʻa e ongoʻi vivili ʻo e fiekaiá ʻo ʻikai fakakaukau ki hono ngaahi nunuʻá, ne mei lavameʻa ai ʻa Sētane ʻi hono ʻai ʻa Sīsū ke fakangaloku ʻa ʻene anga-tonú. Naʻe sio fakalaumālie ʻa Sīsū ki he ngaahi meʻá, pea naʻá ne tali mālohi: “Kuo tohi, ʻOku ʻikai moʻui ʻa e tangata ʻi he ma pē.”—Luke 4:4; Mātiu 4:4.

Naʻe liliu leva ai ʻe Sētane ʻene foungá. ʻI hono ngāuehalaʻaki ʻa e ngaahi Konga Tohitapu, ʻa ia naʻe lave ki ai ʻa Sīsuú, naʻe fakaʻaiʻai ʻe he Tēvoló ʻa Sīsū ke ne puna mei he fakafaletoloʻolunga ʻo e temipalé. ‘ʻE fatakinima koe ʻe ha angelo,’ ko e taukave ia ʻa Sētané. Naʻe ʻikai fakataumuʻa ʻa Sīsū ke kounaʻi ha maluʻi fakaemana mei heʻene Tamaí koeʻuhi pē ke tohoaki mai ai kiate ia ʻa e tokangá. “ʻE ʻikai te ke haʻaki ʻahiʻahiʻi ʻa e ʻEiki ko ho ʻOtua,” ko e lea ia ʻa Sīsuú.—Mātiu 4:​5-7; Luke 4:​9-12.

 Ko e founga fakaʻosi naʻe ngāueʻaki ʻe Sētané naʻe hangatonu ange. Naʻá ne feinga ke fai ha aleapau mo Sīsū ʻaki hono tuʻuaki ange kiate ia ʻa e māmaní kotoa mo hono nāunaú ki hano fai ange tuʻo taha pē ʻo e lotú. Naʻe meimei ko e kātoa pē ia ʻo e ngaahi meʻá naʻe fakaʻaliʻali ange ʻe Sētané. Ka ʻe lava fēfē ke fakahoko ʻe Sīsū ha lotu ki he fili tefito ʻo ʻene Tamaí? ʻOku taʻemafakakaukaua ʻe pehē! “Ko e ʻEiki ko ho ʻOtua te ke lotu ki ai, pea ko ia pe toko taha te ke ʻotuaʻaki,” ko e tali ia ʻa Sīsuú.—Mātiu 4:​8-11; Luke 4:​5-8.

Hili e taʻelavameʻa ʻa e feinga ʻe tolu ko iá, naʻe ‘ʻalu ai [ʻa Sētane] meia Sīsū ʻo tali faingamalie.’ (Luke 4:​13, fakaʻītali ʻamautolu.) ʻOku fakahaaʻi ʻi he meʻá ni naʻe fakasio maʻu pē ʻe Sētane ha faingamālie ke ʻahiʻahiʻi ai ʻa e anga-tonu ʻa Sīsuú. Naʻe malanga hake ha taimi faingamālie ʻi he taʻu ʻe ua mo e konga ki mui aí ʻi he kamata teuteuʻi ʻe Sīsū ʻa ʻene kau ākongá ki heʻene pekia ne tuʻunuku maí. Naʻe pehē ʻe he ʻapositolo ko Pitá: “Mole ke mamaʻo, ʻEiki. ʻE ʻikai ʻaupito hoko ha meʻa pehe kiate koe.”—Mātiu 16:​21, 22.

ʻE malava ke hoko ha faleʻi fakataumuʻa lelei pehē kae fehālaakí ʻo ongo fakamānako kia Sīsū, koeʻuhi he naʻe haʻu ia mei he taha ʻo ʻene kau ākongá? Naʻe ʻiloʻi he taimi pē ko iá ʻe Sīsū ko e ngaahi lea ko iá naʻe tapua mei ai ʻa e ngaahi fakakaukau ʻa Sētané, ʻo ʻikai ko Sihova. Naʻe tali mālohi ʻa Kalaisi: “Tuʻu ki mui, Setane: ko hoku tukiaʻanga koe: he ʻoku ʻikai ko e ngahi meʻa fakaeʻotua ʻoku sio ki ai ho loto, ka ko e ngahi meʻa fakaetangata.”—Mātiu 16:23.

Koeʻuhi ko e ʻofa taʻemamotu ʻa Sīsū kia Sihová, naʻe ʻikai malava ai ʻa Sētane ke maumauʻi ʻa ʻene anga-tonú. Ne ʻikai ha meʻa ʻe lava ke tuʻuaki ʻe he Tēvoló, ʻikai ha ʻahiʻahi, neongo ʻene kakahá, naʻe lava ke ne fakavaivaiʻi ʻa e mateaki ʻa Sīsū ki heʻene Tamai fakahēvaní. ʻE lava ke tau maʻu ha fakapapau tatau ʻi he taimi ʻoku ʻai ai ʻe he ngaahi tuʻungá ʻo faingataʻa kia kitautolu ke tauhi ʻetau anga-tonú? Ko e faʻifaʻitakiʻanga ʻa Siopé te ne tokoniʻi kitautolu ke tau mahinoʻi lelei ange ai ʻa e ngaahi pole te tau fehangahangai nai mo iá.

Mateaki ʻi he Fehangahangai mo e Faingataʻá

Hangē ko ia ne ʻiloʻi ʻe Siopé, ʻe lava ke hoko kia kitautolu ha ngaahi faingataʻa ʻi ha taimi pē. Ko ha tangata mali fiefia ia mo e fānau ʻe toko hongofulu pea naʻá ne maʻu ha founga-tuʻumaʻu fakalaumālie lelei. (Siope 1:5) Ka ʻi he taʻeʻiloa kia Siopé, naʻe hoko ʻa ʻene anga-tonu ki he ʻOtuá ko ha ʻīsiu ia ʻi he fakamaauʻanga fakahēvaní, pea naʻe fakapapauʻi ʻe Sētane ke maumauʻi ʻene anga-tonú ʻi ha founga pē te ne malavá.

Naʻe ʻikai hano taimi, ne mole meia Siope ʻene koloa fakamatelié. (Siope 1:​14-​17) Ka neongo ia, naʻe matuʻuaki ʻe he anga-tonu ʻa Siopé ʻa e ʻahiʻahí koeʻuhi naʻe ʻikai ʻaupito tuʻu ʻene falalá ʻi he paʻangá. ʻI he manatu ki he taimi naʻá ne koloaʻia aí, naʻe pehē ʻe Siope: “ʻIlo ʻe au ʻo kapau naʻa ku tuʻu ʻi he koula ʻeku falala, . . . ʻo kapau naʻa ku fuʻu fiefia ʻi he hulu ʻeku koloa, . . . Ko e kovi mo ia foki . . .  he ko ʻeku fakaʻotuamate ʻa Ela ʻoku ʻafio mei ʻolunga.”—Siope 31:​24, 25, 28.

ʻI he ʻahó ni, ʻe toe malava ke mole ʻa e meimei meʻa kotoa pē ʻoku tau maʻú ʻi ha mōmeniti pē. Ko ha tangata pisinisi ʻa ia ko e taha ʻo e Kau Fakamoʻoni ʻa Sihová naʻe kākaaʻi ia ʻi he fuʻu paʻanga lahi fau, ʻo ne meimei halaʻatā ai mo ha meʻa. ʻOkú ne fakahaaʻi moʻoni: “Naʻe meimei tuʻu e tā hoku mafú. Ko hono moʻoní, ʻoku ou tui ne u mei pehē ka ne taʻeʻoua hoku vahaʻangatae mo e ʻOtuá. Neongo ia, ko e meʻa ko eni ne hokó naʻá ku fakakaukau fakamātoato ai ki he moʻoniʻi meʻa ko ia ko e ngaahi meʻa mahuʻinga fakalaumālié naʻe ʻikai ke muʻomuʻa ia ʻi heʻeku moʻuí. Ko e fiefia ʻi he fakatupu paʻangá naʻe hehema ke ne kāsia ʻa e meʻa kehe kotoa pē.” Ko e tokotaha Fakamoʻoni ko ení kuo talu mei ai mo ʻene holoki ʻa ʻene ngāue fakapisinisí ki ha tuʻunga siʻisiʻi, pea ʻokú ne ngāue tuʻumaʻu ko ha tāimuʻa tokoni, ʻo līʻoa ʻa e houa ʻe 50 pe lahi ange ai ʻi he māhina ʻi he ngāue fakafaifekau faka-Kalisitiané. Kae kehe, ko e ngaahi palopalema kehé, ʻe lava ke aʻu ia ʻo toe fakatupu maumau lahi ange ʻi he mole pē haʻate koloá.

ʻI he teʻeki ke fakakaukau lelei hifo ʻa Siope ki he ongoongo fekauʻaki mo e mole ʻa ʻene koloá naʻá ne toe maʻu ai ha tala kuo mate ʻa ʻene fānau ʻe toko hongofulú. Naʻá ne kei fakamatematē pē: “Fakafetai be ki he huafa o Jihova.” (Siope 1:​18-21, PM) Te tau tauhi maʻu ʻetau anga-tonú kapau ʻe mole fakafokifā meiate kitautolu ha ngaahi mēmipa ʻe niʻihi ʻo hotau fāmilí? Ko Francisco, ko ha ʻovasia Kalisitiane ʻi Sipeini, naʻe mole atu ʻa ʻene ongo tamaiki ʻe toko ua ʻi ha fakatuʻutāmaki fakamamahi ʻi ha pasi. Naʻá ne maʻu ʻa e fakafiemālie ʻi he ʻunuʻunu ʻo ofi ange kia Sihová mo hono fakalahi ʻa ʻene kau ʻi he ngāue fakafaifekau faka-Kalisitiané.

 Naʻa mo e hili ʻa e mole fakaʻohovale ʻa ʻene fānaú, naʻe ʻikai ʻaupito ʻosi ʻa e ʻahiʻahi fakamamahi ʻo Siopé. Naʻe taaʻi ia ʻe Sētane ʻaki ha mahaki palakū mo langa fakaʻulia. ʻI he mōmeniti ko iá, ne maʻu ai ʻe Siope ha faleʻi kovi mei hono uaifí. “Tafuli muʻa mei he ʻOtua, pea mate!” ko ʻene fakaʻaiʻai ia kiate iá. Naʻe tukunoaʻi ʻe Siope ʻa ʻene faleʻí, pea naʻe ʻikai ‘to ha meʻa hala mei hono ngutú.’ (Siope 2:​9, 10) Ko ʻene anga-tonú naʻe fakatuʻunga ia, ʻo ʻikai ʻi he poupou ʻa hono fāmilí, ka ʻi hono vahaʻangatae fakafoʻituitui mo Sihová.

Ko Flora, ʻa ia ko hono husepānití mo hono foha lahi tahá naʻá na liʻaki ʻa e ʻalunga faka-Kalisitiané ʻo laka hake he taʻu ʻe hongofulu kuohilí, ʻokú ne mahinoʻi ʻa e ngaahi ongoʻi kuo pau naʻe maʻu ʻe Siopé. “ʻI he mole fakafokifā meiate koe ʻa e poupou ʻa ho fāmilí, ʻe lava ke hoko ia ko e meʻa fakamamahi,” ko ʻene fakamatalá ia. “Ka naʻá ku ʻiloʻi ʻe ʻikai te u maʻu ʻa e fiefiá ʻi tuʻa mei he kautaha ʻa Sihová. Ko ia ai, naʻá ku tuʻu mālohi ʻo fakamuʻomuʻa ʻa Sihova lolotonga ia ʻa ʻeku feinga ke hokohoko atu ʻeku hoko ko ha uaifi mo e faʻē leleí. Naʻá ku lotu tuʻumaʻu, pea naʻe fakaivimālohiʻi au ʻe Sihova. Ko ha tokotaha fiefia au, koeʻuhi neongo ʻa e fakafepaki ʻosi fakapapauʻi ʻa hoku husepānití, kuó u ako ke falala kakato kia Sihova.”

Ko e founga hono hoko ʻa Sētane ke maumauʻi ai ʻa e anga-tonu ʻa Siopé naʻe fekauʻaki ia mo e toko tolu ʻi hono ngaahi kaungāmeʻá. (Siope 2:​11-​13) He meʻa fakamamahi moʻoni ia kuo pau ne hoko ʻi heʻenau kamata ke fakaangaʻi iá. Kapau naʻá ne tui ki heʻenau ngaahi fakakikihí, ne mei mole ai ʻene falala kia Sihova ko e ʻOtuá. Ko ʻenau akonaki fakalotosiʻí ne mei lava ke mole ai hono lotó pea maumauʻi ai ʻa ʻene anga-tonú, pea ne mei lavameʻa ai ʻa e faʻufaʻu ʻa Sētané.

ʻI hono kehé, naʻe fakamatematē pē ʻa Siope: “Teu mate be ka e ikai teu tukuage eku agatonu meiate au.” (Siope 27:​5, PM) Naʻe ʻikai te ne pehē, ‘ʻE ʻikai te u tuku ʻa e kau tangata ko kimoutolú ke mou toʻo ʻa ʻeku anga-tonú!’ Naʻe ʻiloʻi ʻe Siope ko ʻene anga-tonú naʻe fakatuʻunga ia ʻiate ia pea mo ʻene ʻofa kia Sihová.

Ko ha Founga Kākā Motuʻa ke Pōʻaki ha Taha Tauheleʻi Foʻou

ʻOku kei ngāueʻaki pē ʻe Sētane ʻa e akonaki takihalaʻí pe ko e ngaahi lea taʻefakakaukau ko ia mei he ngaahi kaungāmeʻá mo e kaungātuí. Ko e fakalotosiʻi mei he loto fakatahaʻangá ʻe lava ke ne fakavaivaiʻi faingofua ange ʻa ʻetau falalá ʻi he fakatanga ko ia mei tuʻá. Ko ha tokotaha mātuʻa Kalisitiane ʻa ia naʻá ne kau longomoʻui ki muʻa ʻi he taú naʻá ne fakafehoanaki ʻa e meʻa ko iá mo e mamahi naʻá ne fuesia koeʻuhi ko e ngaahi lea mo e tōʻonga taʻefakakaukau ʻa e niʻihi ʻo hono kaungā Kalisitiané. Fekauʻaki mo e lea taʻefakakaukaú, naʻá ne pehē: “Ko e meʻa faingataʻa taha ia kuo faifai ange peá u hokosiá.”

Mei ha toe tafaʻaki ʻe taha, ʻe lava ke tau hoko ʻo hohaʻa lahi ʻi he ngaahi taʻehaohaoa ʻa e kaungātuí ʻo tuku ai ʻetau lea ki he faʻahinga ʻe niʻihi pe aʻu nai ai ʻo kamata liʻaki ʻa e ngaahi fakataha faka-Kalisitiané. ʻE hā ngali ko e ʻīsiu mahuʻinga tahá ke fakafiemālieʻi ʻetau ongoʻi mamahí. Ko e meʻa fakamamahi moʻoni ē ke maʻu ha sio nounou pehē pea fakaʻatā ʻetau koloa mahuʻinga tahá​—ʻa hotau vahaʻangatae mo Sihová—ke fakavaivaiʻi ʻe he meʻa ʻoku fai pe leaʻaki ʻe he niʻihi kehé. Kapau te tau fakaʻatā ia ke hoko, ʻe tauheleʻi ai kitautolu ʻe he taha ʻo e ngaahi kākā motuʻa ʻa Sētané.

Ko e moʻoni, ʻoku tau kumi ki ha ngaahi tuʻunga māʻolunga ʻi he fakatahaʻanga Kalisitiané. Ka ʻo kapau ʻoku tau ʻamanekina ha fuʻu meʻa lahi mei hotau kaungālotú, ʻa ia ʻoku nau kei taʻehaohaoá, ʻe pau ai ke tau hoko ʻo loto-mamahi. ʻI hono kehé, ʻoku fakakaukau lelei ʻa Sihova ʻi he meʻa ʻokú ne fiemaʻu mei heʻene kau sevānití. Kapau te tau faʻifaʻitaki ki heʻene faʻifaʻitakiʻangá, te tau mateuteu ai ke kātakiʻi ʻenau ngaahi taʻehaohaoá. (Efeso 4:​2, 32) Naʻe ʻomai ʻe he ʻapositolo ko Paulá ʻa e faleʻi ko ení: “ʻIta pe, kae ʻoua ʻe angahala ai: ʻoua ʻe tuku ke to ʻa e laʻa ʻoku mou kei mamahi; kaeʻumaʻā, ʻoua naʻa tuku ha ava ki he Tevolo.”—Efeso 4:​26, 27.

Hangē ko ia ʻoku fakahaaʻi mahino ʻe he Tohitapú, ʻoku ngāueʻaki ʻe Sētane ha ngaahi filioʻi kākā kehekehe koeʻuhi ke ʻiloʻi ai​—kapau te ne malava—ʻa e founga ke maumauʻi ai ʻa e anga-tonu ʻa ha Kalisitiane. Ko e niʻihi ʻo ʻene ngaahi founga kākaá ʻoku fakamānako ia ki he kakano kuo hingá, ko e niʻihi ko ha tupuʻanga ia ʻo e mamahi. Mei he lāulea ki muʻá, ʻoku lava ke ke sio ai ki he ʻuhinga ʻoku ʻikai totonu ke maʻu fakaʻohovaleʻi ai koé. ʻI he tuʻumaʻu ʻi ho lotó ʻa hoʻo ʻofa ki he ʻOtuá, fakapapauʻi ke fakamoʻoniʻi ko e tokotaha loi ʻa e Tēvoló pea ʻai ʻa e loto ʻo Sihová ke fiefia. (Palovepi 27:11; Sione 8:​44) Manatuʻi, ko e anga-tonu faka-Kalisitiane moʻoní kuo pau ke ʻoua ʻaupito ʻe fakangaloku ia, tatau ai pē pe ko e hā ʻa e ngaahi ʻahiʻahi ʻe hoko mai kia kitautolú.

[Fakamatala ʻi lalo]