Ngaahi Fehuʻi mei he Kau Lautohí

Ko e hā ʻa e tataki ʻoku tokonaki mai ʻe he ngaahi Konga Tohitapú fekauʻaki mo e akoʻi ʻo e fānaú ʻi he taimi ko e taha ai ʻi he ongo mātuʻá ko e taha ʻo e Kau Fakamoʻoni ʻa Sihová pea ko e hoa ʻe tahá ʻoku ʻikai?

Ko e tefitoʻi moʻoni Fakatohitapu tefito ʻe ua ʻoku tokonaki mai ai ʻa e tataki fekauʻaki mo hono akoʻi ʻa e fānaú ki ha mātuʻa tauhi fānau Fakamoʻoni ʻoku ʻi ai hono hoa ʻikai ko ha Fakamoʻoní. Ko e taha: “ʻOku totonu pe ke fai ki he pule ʻa e ʻOtua ʻi he pule ʻa e tangata.” (Ngāue 5:29) Ko hono uá: “Ko e husepaniti ko e ʻulu ʻo e uaifi, ʻo hange foki ko Kalaisi ko e ʻulu ʻo e Siasi.” (Efeso 5:23) Ko e meʻa hono uá ʻoku toe ngāueʻaki ia ʻo ʻikai ki he ngaahi uaifi pē ʻoku ʻi ai honau ngaahi husepāniti Fakamoʻoní kae toe pehē foki ki he faʻahinga ʻoku ʻi ai honau ngaahi hoa ʻikai ko e Fakamoʻoní. (1 Pita 3:1) ʻE lava fēfē ke ʻai ʻe ha mātuʻa Fakamoʻoni ke mafamafatatau ʻa e ongo tefitoʻi moʻoni ko ení ʻi hono akoʻi ʻa ʻene fānaú?

Kapau ko e husepānití ko e taha ia ʻo e Kau Fakamoʻoni ʻa Sihová, ʻokú ne maʻu ʻa e fatongia ki hono fai fakatouʻosi ʻa e ngaahi tokonaki fakalaumālie mo e fakamatelie ki hono fāmilí. (1 Timote 5:8) Neongo ʻe fakamoleki nai ʻe ha faʻē taʻetui ʻa e taimi lahi ange mo ʻena fānaú, ko e tamai Fakamoʻoní ʻoku totonu ke ne akoʻi ʻa ʻene fānaú ʻaki hono fai ha akoʻi fakalaumālie ʻi ʻapi pea ʻi hono ʻave kinautolu ki he ngaahi fakataha faka-Kalisitiané, ʻa ia te nau maʻu ʻaonga ai mei he fakahinohino fakaeʻulungāngá mo e feohi leleí.

Fēfē kapau ʻoku vilitaki ʻa hono uaifi taʻetuí ki hono ʻave ʻena fānaú ki hono feituʻu faiʻanga lotú pe akoʻi kia kinautolu ʻa ʻene ngaahi tuí? ʻE ʻoange nai ʻe he lao ʻo e fonuá kiate ia ʻa e totonu ke ne fai pehē. Pe ʻoku fakataueleʻi ʻa e fānaú ki ha ngaahi tōʻonga lotu ʻi he ngaahi feituʻu peheé ʻe fakatuʻunga lahi ia ʻi he tuʻunga ʻo e akonaki fakalaumālie ʻa e tamaí. ʻI he tupu hake ʻa e fānaú ʻo motuʻa angé, ko e akoʻi Fakatohitapu ʻe heʻenau tamaí ʻoku totonu ke ne tokoniʻi kinautolu ke nau muimui ʻi he moʻoni ʻo e Folofola ʻa e ʻOtuá. He fiefia ē ka ko e husepāniti tuí kapau ʻe fili ʻa ʻene fānaú ke nau tuʻu maʻá e moʻoní!

Kapau ko e faʻeé ko e taha ia ʻo e Kau Fakamoʻoni ʻa Sihová, kuo pau ke ne tokaʻi ʻa e tefitoʻi moʻoni ki he tuʻunga-ʻulú lolotonga ia ʻene tokanga fekauʻaki mo e lelei taʻengata ʻa ʻene fānaú. (1 Kolinito 11:3) ʻI he ngaahi tuʻunga lahi, ʻe ʻikai fakafepaki ʻa hono hoa taʻetuí kapau ʻe akoʻi fakaeʻulungaanga mo fakalaumālie ʻe hono uaifi Fakamoʻoní ʻa ʻena fānaú, pea ko e tokoni ki hono fakahoko iá ʻoku ala maʻu ia ʻi he ngaahi fakataha ʻa e kakai ʻa Sihová. ʻE lava ke tokoniʻi ʻe he faʻeé ʻa hono husepāniti taʻetuí ke ne sio ki he ngaahi ʻaonga ʻo e ako fakatupu langa hake ʻoku maʻu ʻe heʻena fānaú fakafou ʻi he kautaha ʻa Sihová. ʻE lava ke ne fakamamafaʻi ʻi he tuʻunga fakapotopoto ʻa e ʻaonga ʻo hono fakahūhū ʻa e ngaahi tefitoʻi moʻoni fakaeʻulungaanga faka-Tohitapú ki heʻena fānaú, ʻi heʻenau fehangahangai mo ha māmani ʻoku hoholo ololalo ange fakaeʻulungāngá.

Kae kehe, ʻe vilitaki nai ʻa e husepāniti taʻetuí ke muimui ʻene fānaú ʻi heʻene lotú, ʻo ʻave kinautolu ki hono feituʻu faiʻanga lotú pea ʻoange ha ako fakalotu kia kinautolu fakatatau ki heʻene tuí. Pe ʻe fakafepaki nai ha husepāniti ki he lotu kotoa pē pea vilitaki ke ʻoua naʻa maʻu ʻe heʻene fānaú ha ako fakalotu. ʻI he tuʻunga ko e ʻulu ʻo e fāmilí, ko e tokotaha ia ʻoku fakafatongia tefito ki hono fai ʻa e filí. a

Lolotonga ʻa e tokaʻi ʻa e tuʻunga-ʻulu ʻo hono husepānití, ʻi he tuʻunga ko ha Kalisitiane fakatapuí, ʻe manatuʻi ʻe he uaifi tuí ʻa e fakakaukau ʻa e ongo ʻapositolo ko Pita mo Sioné, ʻa ia naʻá na pehē: “ʻE  ʻikai te ma faʻa tuku ʻema lea ki he ngaahi meʻa naʻa ma sio ki ai mo fanongoa.” (Ngāue 4:​19, 20) ʻI he fai ko e tokanga ki he lelei fakalaumālie ʻa e fānaú, ʻe maʻu ʻe ha faʻē Fakamoʻoni ʻa e ngaahi faingamālie ke ʻoatu ai ha tataki fakaeʻulungaanga kia kinautolu. ʻOkú ne maʻu ha fatongia ʻi he ʻao ʻo Sihová ke akoʻi ʻa e niʻihi kehé fekauʻaki mo e meʻa ʻokú ne ʻiloʻi ʻoku moʻoní, pea ʻoku ʻikai totonu ke taʻefakakau ki ai ʻa ʻene fānaú. (Palovepi 1:8; Mātiu 28:​19, 20) ʻE lava fēfē ke feangainga ha faʻē Fakamoʻoni mo e palopalemá?

Hangē ko e meʻa fekauʻaki mo e tui ki he ʻOtuá. ʻE ʻikai nai malava ʻa e uaifi Fakamoʻoní ke fai ha ako Tohitapu ʻi ha founga pau mo ʻene fānaú koeʻuhi ko e ngaahi fakataputapui ʻa hono husepānití. ʻE totonu ai kiate ia ʻi he ʻuhinga ko ení ke fakaʻehiʻehi ai mei hono tala ki heʻene fānaú ha meʻa pē fekauʻaki mo Sihova? ʻIkai. ʻE tapua fakanatula atu mei heʻene leá mo ʻene ngāué ʻa ʻene tui ki he Tokotaha-Fakatupú. ʻOku ʻikai ha veiveiua ʻe fai ʻe heʻene fānaú ha ngaahi fehuʻi fekauʻaki mo e meʻa ko iá. ʻOku totonu ke ne ongoʻi tauʻatāina ke ngāueʻi ʻa ʻene tauʻatāina fakalotú ʻaki hono fakahāhā ʻa ʻene tui ki he Tokotaha-Fakatupú, ʻo fakakau ki ai ʻene fānaú. Neongo kapau ʻe ʻikai nai lava ke ne fai ha ako Tohitapu mo ʻene fānaú pe ʻave tuʻumaʻu kinautolu ki he ngaahi fakatahá, ʻe lava ke ne ʻoange kia kinautolu ʻa e ʻilo fekauʻaki mo Sihova ko e ʻOtuá.​—Teutalonome 6:7.

Fekauʻaki mo e vahaʻangatae ʻi he vahaʻa ʻo ha Fakamoʻoni mo hono hoa taʻetuí, naʻe tohi ʻa e ʻapositolo ko Paulá: “Oku fakatabuʻi ae tagata taetui e hono unoho, bea fakatabuʻi ae fefine taetui e hono unoho: ka ne ikai behe, e taemaa hoo mou fānau: ka ko eni oku nau maa [“māʻoniʻoni,” NW].” (1 Kolinito 7:​14, PM) ʻOku vakai ʻa Sihova ki he vahaʻangatae fakaemalí ʻoku māʻoniʻoni koeʻuhi ko e hoa tuí, pea ʻoku fai ʻa e vakai ki he fānaú ʻoku nau māʻoniʻoni ʻi he ʻafio mai ʻa Sihová. Ko e uaifi Fakamoʻoní ʻoku totonu ke ne fai ʻene lelei tahá ke tokoniʻi ʻene fānaú ke nau mahinoʻi ʻa e moʻoní, ʻo tuku ʻa e ola fakaʻosí ki he toʻukupu ʻo Sihová.

ʻI he tupu hake ʻa e fānaú ʻo taʻumotuʻa angé, ʻe pau ai ke nau fili pe ko e hā ʻa e tafaʻaki te nau tuʻu ki aí ʻo fakatuʻunga mei he fakamatala kuo nau maʻu mei heʻenau ongo mātuʻá. Te nau fili nai ke ngāue ʻo fakatatau ki he ngaahi lea ʻa Sīsuú: “Ko ia ʻoku lahi ʻene ʻofa ki heʻene tamai, pe ko ʻene faʻē, ʻi heʻene ʻofa kiate au, ʻoku ʻikai tāu ia mo au.” (Mātiu 10:37) ʻOku toe fekau kia kinautolu: “ʻA e fanau, mou talangofua ʻi he ʻEiki ki hoʻomou matuʻa.” (Efeso 6:1) Kuo fili ʻa e toʻutupu tokolahi ke ‘talangofua ki he pule ʻa e ʻOtuá’ kae ʻikai ki ha mātuʻa ʻikai ko ha Fakamoʻoni, neongo hono fuesia ʻa e faingataʻa mei he mātuʻa ko iá. He fakafiemālie moʻoni ē ko ia ki he mātuʻa Fakamoʻoní ke sio ki he fili ʻa e fānaú ke tauhi kia Sihova neongo ʻa e fakafepakí!

[Fakamatala ʻi lalo]