“Kuo U Tuku Hamou Faʻifaʻitakiʻanga”

“Naʻe totonu ke mou faiako, koeʻuhi ko hoʻomou fuoloa.”​—HEPELU 5:​12.

1. Ko e hā nai ʻoku fakatupunga totonu ai ʻe he ngaahi lea ʻo e Hepelu 5:12 ha Kalisitiane ke ne kiʻi ongoʻi hohaʻá?

 ʻI HOʻO lau ʻa e ngaahi lea fakamānavaʻi ʻo ʻetau konga tohi kaveingá, ʻoku ʻi ai haʻo kiʻi ongoʻi hohaʻa fekauʻaki mo koe? Kapau ʻoku pehē, ʻoku ʻikai ko koe pē. ʻI he tuʻunga ko e kau muimui ʻo Kalaisí, ʻoku tau ʻilo kuo pau ke tau hoko ko e kau faiako. (Mātiu 28:​19, 20) ʻOku tau ʻilo ko e ngaahi taimi ʻa ia ʻoku tau moʻui aí ʻokú ne ʻai ke fakavavevave ʻetau faiakó ʻi he pōtoʻi lahi taha te tau malavá. Pea ʻoku tau ʻilo ko ʻetau faiakó ʻe lava ke ne toe ʻai ha faikehekehe ko e mate-pē-moʻui ki he faʻahinga ko ia ʻoku tau akoʻí! (1 Timote 4:16) Ko ia ai, ʻi he ʻuhinga totonú, ʻe lava ke tau ʻeke hifo kiate kitautolu: ‘‘Ko e faiako moʻoni au ʻoku totonu ke u hoko ki aí? ʻE malava fēfē ke u laka ki muʻa?’

2, 3. (a) Naʻe anga-fēfē hono fakamatalaʻi ʻe ha faiako ʻe taha ʻa e makatuʻunga ʻo e faiako leleí? (e) Ko e hā ʻa e sīpinga naʻe fokotuʻu mai ʻe Sīsū maʻatautolu ʻi he fekauʻaki mo e faiakó?

² ʻOku ʻikai fiemaʻu ke hanga ʻe he ngaahi hohaʻa peheé ʻo ʻai ke tau loto-siʻi. Kapau te tau fakakaukau pē ki he faiakó ko ha meʻa ʻoku fiemaʻu ki ai ha ngaahi pōtoʻi fakafounga ʻe niʻihi, te tau ongoʻi lōmekina nai ʻi he ʻamanaki ke fai ha ngaahi laka ki muʻá. Ko ia, ko e makatuʻunga ki he faiako leleí, ʻoku ʻikai ko e foungá ka ko ha meʻa ia ʻoku toe mahuʻinga ange. Fakatokangaʻi ange ʻa e meʻa naʻe tohi ʻe ha faiako taukei ʻe taha ʻi ha tohi fekauʻaki mo e tuʻunga-leá: “Ko e faiako leleí ʻoku ʻikai fakatuʻunga ia ʻi he ngaahi foungá pe ngaahi sīpingá, ngaahi palaní pe ngaahi ngāue pau ki aí. . . . ʻOku fakatefito ʻa e faiakó ia ʻi he ʻofá.” Ko hono moʻoní, ko ʻene fakakaukaú naʻe fekauʻaki ia mo ha faiako fakaemāmani. Kae kehe, ʻoku toe kaunga tonu ange ʻene poiní ki he faiako ʻoku tau fai ʻi he tuʻunga ko e kau Kalisitiané. Anga-fēfē?

³ Ko hotau Faʻifaʻitakiʻanga ko ha faiakó ʻoku ʻikai ko ha toe taha kehe ka ko Sīsū Kalaisi, ʻa ia naʻá ne tala ki hono kau muimuí: “Kuo u tuku hamou faʻifaʻitakiʻanga.” (Sione 13:15) Naʻá ne lave ki heʻene faʻifaʻitakiʻanga ʻi hono fakahāhā ʻa e anga-fakatōkilaló, ka ko e sīpinga naʻe fokotuʻu ʻe Sīsū maʻatautolú ʻoku kau moʻoni ki ai ʻa ʻene ngāue mahuʻinga taha ʻi he tuʻunga ko ha tangata ʻi he māmaní​—ʻa ia ko hono akoʻi ki he kakaí ʻa e ongoongo lelei ʻo e Puleʻanga ʻo e ʻOtuá. (Luke 4:43) ʻI he vakai atu ki aí, kapau naʻe tuku atu ke ke filiʻi ha foʻi lea ʻe taha ke ne fakamatalaʻi ʻa e ngāue fakafaifekau ʻa Sīsuú, ngalingali te ke fili ʻa e foʻi lea ko e “ʻofa,” ʻikai ko ia? (Kolose 1:15; 1 Sione 4:8) Ko e ʻofa ʻa Sīsū ki heʻene Tamai fakahēvaní, ʻa Sihova, naʻe hiliō hono mahuʻingá. (Sione 14:31) Neongo ia, ʻi he tuʻunga ko ha faiakó, naʻe fakahāhaaʻi ʻe Sīsū ʻa e ʻofá ʻi he toe ongo founga kehe ʻe ua. Naʻá ne ʻofa ʻi he ngaahi moʻoni naʻá ne akoʻí, pea naʻá ne ʻofa ʻi he kakai naʻá ne akoʻí. Tau toe tokangataha ke ofi ange ki he ongo tafaʻaki ko ʻeni ʻo e sīpinga naʻá ne fokotuʻu mai maʻatautolú.

Ko ha ʻOfa Fuoloa ki he Ngaahi Moʻoni Fakaʻotuá

4. Naʻe anga-fēfē hono fokotuʻu ʻe Sīsū ha ʻofa ki he ngaahi akonaki ʻa Sihová?

⁴ Ko e anga ʻo e fakakaukau ʻa ha faiako ki heʻene tuʻunga-leá ʻoku ʻi ai ʻene kaunga lahi ki he tuʻunga lelei ʻo ʻene faiakó. ʻIlonga ha taʻemahuʻingaʻia ʻoku ngalingali ʻe hā mo mafola atu ia ki heʻene kau akó.  Naʻe ʻikai ke ongoʻi loto-noa ʻa Sīsū ki he ngaahi moʻoni mahuʻinga naʻá ne akoʻi fekauʻaki mo Sihova mo Hono Puleʻangá. Ko e ʻofa ʻa Sīsū ki he tuʻunga-leá ni naʻe mātuʻaki loloto. Naʻá ne ʻosi fokotuʻu ʻa e ʻofa ko iá ʻi he tuʻunga ko ha tokotaha akó. ʻI he kotoa ʻo e ngaahi kuonga lōloa ʻo ʻene moʻui ki muʻa ke hoko ko e tangatá, naʻe hoko ai ʻa e ʻAlo tofu-pē-taha-ne-fakatupú ko ha tokotaha ako loto-vēkeveke. ʻOku lēkooti mai ʻe he Aisea 50:​4, 5 ʻa e ngaahi lea feʻungamālie ko ʻení: “Ko Atonai Sihova kuo ne ʻomi kiate au ʻa e ʻelelo ʻo e tama ako, ke u ʻilo ʻa e ngaahi lea ke tokoniʻaki ʻa e ongosia: ʻoku ne fafangu au ʻi he pongipongi kotoa pe, ʻoku ne ueʻi hoku telinga ke fanongo hange ha tama ako. Ko Atonai Sihova kuo fakaava hoku telinga; pea ko au naʻe ʻikai te u talangataʻa, naʻe ʻikai te u foki ki tuʻa.”

5, 6. (a) Ko e hā ʻa e meʻa ʻoku ngalingali naʻe hokosia ʻe Sīsū ʻi hono papitaisó, pea ko e hā ʻene kaunga kiate iá? (e) Ko e hā ʻa e faikehekehe ʻoku tau maʻu ʻi he vahaʻa ʻo Sīsū mo Sētané ʻi hono ngāueʻaki ʻa e Folofola ʻa e ʻOtuá?

⁵ Lolotonga ʻene tupu hake ko ha tangata ʻi he māmaní, naʻe hokohoko atu ʻa Sīsū ke ʻofa ki he poto fakaʻotuá. (Luke 2:52) Pea ʻi he taimi ʻo ʻene papitaisó, naʻá ne hokosia ai ha meʻa laulōtaha. “Naʻe matangaki ʻa e langi,” ko e lau ia ʻa e Luke 3:21. ʻOku ngalingali, naʻe malava leva ai ʻa Sīsū ke ne manatuʻi ʻa ʻene ʻi ai ki muʻa ke hoko ko e tangatá. ʻI he hili iá naʻá ne fakamoleki ʻa e ʻaho ʻe 40 ʻi he ʻaukai ʻi he toafá. Kuo pau pē naʻá ne maʻu ʻa e fiefia lahi ʻi he fakalaulauloto ki he ngaahi taimi lahi ʻi hēvani ʻo e fakahinohino naʻá ne maʻu meia Sihová. Neongo ia, naʻe ʻikai fuoloa, kuo ʻahiʻahiʻi ʻa ʻene ʻofa ki he ngaahi moʻoni ʻa e ʻOtuá.

⁶ ʻI he taimi naʻe ongosia mo fiekaia ai ʻa Sīsuú, naʻe feinga ʻa Sētane ke ne fakataueleʻi ia. Ko ha kehekehe lahi ē ʻoku tau maʻu ʻi he vahaʻa ʻo e ongo ʻalo ko ʻeni ʻo e ʻOtuá! ʻOku fakatou lave ki ai mei he Ngaahi Konga Tohitapu Faka-Hepeluú​—ka ʻi ha fakakaukau kehekehe fakaʻaufuli. Naʻe mioʻi ʻe Sētane ʻa e Folofola ʻa e ʻOtuá, ʻo ngāueʻaki taʻefakaʻapaʻapa ia ke fakahoko ʻene ngaahi taumuʻa siokita pē ʻaʻaná. Ko e moʻoni, ko e paetaku pē naʻe maʻu ʻe he tokotaha angatuʻu ko iá ki he ngaahi moʻoni fakaʻotuá. ʻI he tafaʻaki ʻe tahá, naʻe lave ʻa Sīsū ki he ngaahi Konga Tohitapú ʻi he ʻofa maeʻeeʻa, ʻo ngāueleleiʻaki ʻa e Folofola ʻa e ʻOtuá ʻi heʻene tali taki taha. Naʻe ʻi ai ʻa Sīsū ia ʻo fuoloa ʻaupito ki muʻa ʻi hono fuofua hiki ʻa e ngaahi lea fakamānavaʻi ko iá, neongo ia, naʻá ne fakaʻapaʻapaʻi ʻa e ngaahi lea ko iá. Ko e ngaahi moʻoni mātuʻaki mahuʻinga kinautolu mei heʻene Tamai fakahēvaní! Naʻá ne tala kia Sētane ko e ngaahi lea ko ia meia Sihová naʻe mātuʻaki mahuʻinga ange ia ʻi he meʻakaí. (Mātiu 4:​1-11) ʻIo, naʻe ʻofa ʻa Sīsū ʻi he kotoa ʻo e ngaahi moʻoni naʻe akoʻi kiate ia ʻe Sihová. Naʻe anga-fēfē leva ʻene fakahāhā ʻa e ʻofa ko iá ʻi he tuʻunga ko ha faiakó?

ʻOfa ki he Ngaahi Moʻoni Naʻá Ne Akoʻí

7. Ko e hā naʻe fakaʻehiʻehi ai ʻa Sīsū mei hono fakahoko atu haʻane ngaahi akonaki pē ʻaʻaná?

⁷ Ko e ʻofa ʻa Sīsū ki he ngaahi moʻoni naʻá ne akoʻí naʻe hā mahino maʻu pē ia. Hili ko iá, naʻá ne mei malavangofua pē ʻe ia ke ne fakatupu ʻene ngaahi fakakaukau pē ʻaʻana. Naʻá ne maʻu ha ʻilo mo ha poto lahi fau. (Kolose 2:3) Ka neongo ia, naʻá ne toutou fakamanatu ki heʻene kau fanongó ko e meʻa kotoa pē naʻá ne akoʻí naʻe tupu ia, ʻo ʻikai meiate ia tonu, ka mei heʻene Tamai fakahēvaní. (Sione 7:16; 8:28; 12:49; 14:10) Naʻá ne ʻofa lahi ʻaupito ʻi he ngaahi moʻoni fakaʻotuá ʻa ia ʻe ʻikai hā ai te ne fakafetongi ia ʻaki haʻane fakakaukau pē ʻaʻana.

8. ʻI he kamata ʻo ʻene ngāue fakafaifekaú, naʻe anga-fēfē hono fokotuʻu ʻe Sīsū ha sīpinga ʻo e falala ki he Folofola ʻa e ʻOtuá?

⁸ ʻI he taimi naʻe kamata ai ʻe Sīsū ʻene ngāue fakafaifekau fakahāhaá, naʻá ne fokotuʻu vave ha sīpinga. Fakakaukau atu ki he founga naʻá ne ʻuluaki fanongonongo ai ki he kakai ʻa e ʻOtuá ko ia ʻa e Mīsaia naʻe talaʻofaʻaki maí. Naʻá ne hā pē ki he ʻao ʻo e fuʻu kakaí, ʻo talaki ʻa ia tonu ko e Kalaisí, peá ne fakahoko leva ha ngaahi mana fakaholomamata ke fakamoʻoniʻi ʻaki ʻene fakamatalá? ʻIkai. Naʻá ne ʻalu ki ha sinakoke, ʻa ia naʻe tōʻongaʻaki ai ʻe he kakai ʻa e ʻOtuá ʻa e lautohi mei he ngaahi Konga Tohitapú. ʻI aí naʻá ne lau leʻo-lahi ai ʻa e kikite ʻo e Aisea 61:​1, 2 pea fakamatalaʻi ko e ngaahi moʻoni fakaekikite ko ʻení naʻe kaungatonu ia kiate ia. (Luke 4:​16-22, NW) Naʻe tokoni ʻa ʻene ngaahi mana lahí ki hono fakapapauʻi naʻá ne maʻu ʻa e poupou ʻa Sihová. Neongo ia, naʻá ne falala maʻu pē ki he Folofola ʻa e ʻOtuá ʻi heʻene faiakó.

9. ʻI heʻene ngaahi feangainga mo e kau Fālesí, naʻe anga-fēfē hono fakahaaʻi ʻe Sīsū ʻa ʻene ʻofa mateaki ki he Folofola ʻa e ʻOtuá?

⁹ ʻI he taimi naʻe poleʻi ai ʻa Sīsū ʻe he kau fakafepaki fakalotú, naʻe ʻikai te ne feinga ke ne feʻauhi mo kinautolu, neongo naʻe mei malavangofua pē ke ne ikuʻi kinautolu ʻi ha feʻauhi pehē. Kae kehe, naʻá ne tuku ki he Folofola ʻa e ʻOtuá ke ne fakahalaʻi kinautolu. Hangē ko ʻení, manatuʻi ʻa e taimi naʻe tukuakiʻi ai ʻe he kau Fālesí ʻa e kau muimui ʻo Sīsuú ʻo pehē naʻa nau maumauʻi ʻa e lao Sāpaté ʻaki hono toli ha ngaahi fua ʻo e uité ʻi ha ngoueʻanga pea kai ia he  lolotonga ʻenau fonongá. Naʻe tali ʻe Sīsū: “Naʻe ʻikai te mou lau ʻa e meʻa naʻe fai ʻe Tevita ʻi heʻene hālofia mo kinautolu naʻe ʻiate ia?” (Mātiu 12:​1-5) Ko hono moʻoní, naʻe lau nai ʻe he kau tangata māʻoniʻoni-fakaekita ko iá ʻa e fakamatala fakamānavaʻi ko iá ʻi he 1 Samiuela 21:​1-6. Kapau ko ia, naʻe ʻikai te nau malava ke lāuʻilo ki ha lēsoni mahuʻinga naʻe ʻi ai. Kae kehe, naʻe fai ʻe Sīsū ia ʻa e meʻa lahi ange ʻi hono lau pē ʻa e fakamatalá. Naʻá ne fakakaukau ki he meʻa ko iá pea tali ʻa e ngaahi tefitoʻi moʻoni naʻe malava ke ne ako mei aí. Naʻá ne ʻofa ki he ngaahi tefitoʻi moʻoni naʻe akoʻi ange ʻe Sihova fakafou ʻi he kupu ko iá. Ko ia, naʻá ne ngāueʻaki ʻa e fakamatala ko iá, pea pehē ki ha fakatātā mei he Lao ʻa Mōsesé, ke fakahaaʻi ʻa e laumālie mafamafatatau ʻo e Laó. ʻI he tuʻunga meimei tatau, naʻe hanga ʻe he ʻofa mateaki ʻa Sīsuú ʻo ueʻi ia ke ne taukapoʻi ʻa e Folofola ʻa e ʻOtuá mei he ngaahi feinga ʻa e kau taki lotú ke mioʻi ia ki heʻenau ngaahi taumuʻa pē ʻa kinautolú pe fufū ia ʻi he ngaahi talatukufakaholo puputuʻu fakaetangatá.

10. Naʻe anga-fēfē hono fakahoko ʻe Sīsū ʻa e ongo kikite fekauʻaki mo e tuʻunga ʻo ʻene faiakó?

¹⁰ Naʻe ʻikai ʻaupito ke hanga ʻe he ʻofa ʻa Sīsū ki he moʻoni naʻá ne akoʻí ʻo fakaʻatā ia ke ne faiako ʻaki pē ha tuʻunga maʻuloto, ʻi ha founga naʻe taʻeoli pe fai fakafounga. Naʻe fakahaaʻi ʻe he ngaahi kikite fakamānavaʻí ʻo pehē ko e Mīsaiá te ne leaʻaki ʻa e ‘ofa i hono lougutú,’ ʻo ngāueʻaki ʻa e “gaahi lea lelei.” (Sāme 45:​2, PM; Senesi 49:​21, PM) Naʻe fakahoko ʻe Sīsū ʻa e ongo kikite ko iá ʻaki hono tauhi ʻene pōpoakí ke fakamānako mo longomoʻui, ʻo ngāueʻaki ʻa e “ngaahi lea mālie” ʻi heʻene faiakoʻaki ʻa e ngaahi moʻoni naʻá ne ʻofa aí. (Luke 4:22) ʻOku ʻikai ha veiveiua ʻi hono hanga ʻe heʻene loto-māfaná ʻo ʻai ke longomoʻui ʻa e ngaahi anga ʻo ʻene sió pea naʻe malama mei hono fofongá ha mahuʻingaʻia longomoʻui ʻi heʻene tuʻunga-leá. Ko ha fiefia lahi ē kuo pau naʻe hoko ʻi he fanongo kiate iá, pea ko ha sīpinga lelei ē kiate kitautolu ke tau muimui ai ʻi he taimi ʻoku tau talanoa ai ki he niʻihi kehé ʻo fekauʻaki mo e meʻa kuo tau akó!

11. Ko e hā naʻe ʻikai ʻaupito fakatupunga ai ʻe he ngaahi malava ʻa Sīsū ko ha faiakó ʻa ia tonu ke ne hoko ʻo loto-pōlepolé?

¹¹ Naʻe hanga ʻe he mahino lahi fau ʻa Sīsū fekauʻaki mo e ngaahi moʻoni fakaʻotuá mo ʻene ngaahi lea fakamānakó ʻo takiakiʻi ia ke ne hoko ʻo loto-pōlepole? ʻOku faʻa hoko ia ʻi he fekauʻaki mo e kau faiako fakaetangatá. Kae manatuʻi, naʻe poto ʻa Sīsū ia ʻi ha founga fakaʻotua. ʻOku ʻikai fakaʻatā ʻi he poto peheé ʻa e loto-mahikihikí, he “ko e potó ʻoku ʻi he faʻahinga anga-fakanānaá ia.” (Palovepi 11:​2, NW) Naʻe toe ʻi ai ʻa e meʻa kehe naʻá ne taʻofi ʻa Sīsū mei he hoko ʻo loto-pōlepole pe loto-mahikihikí.

Naʻe ʻOfa ʻa Sīsū ʻi he Kakai Naʻá Ne Akoʻí

12. Naʻe anga-fēfē hono fakahāhaaʻi ʻe Sīsū naʻe ʻikai te ne loto ke ongoʻi manavahē ange ʻa hono kau muimuí kiate ia?

¹² Ko e ʻofa loloto ʻa Sīsū ki he kakaí naʻe hā maʻu pē ia ʻi heʻene faiakó. Naʻe ʻikai ʻaupito ke fakamanavaheeʻi ʻe heʻene faiakó ʻa e kakaí, ʻo kehe ia mei he faiako ʻa e faʻahinga loto-pōlepole ʻo e tangatá. (Koheleti 8:9) ʻI he hili ʻa e sio tonu ʻi he taha ʻo e ngaahi mana ʻa Sīsuú, naʻe lōmekina ai ʻa Pita ʻe he moʻutāfuʻuá, peá ne hinga atu ki he tui ʻo Sīsuú. Ka naʻe ʻikai loto ʻa Sīsū ke hoko hono kau muimuí ʻo manavahē taʻetotonu ange kiate ia. Naʻá ne lea ʻi he anga-lelei, “ʻOua ʻe manavahē” peá ne tala ange leva kia Pita ʻa e ngāue fakafiefia ʻo e ngaohi-ākongá ʻa ia ʻe kau ki ai ʻa Pitá. (Luke 5:​8-10) Naʻe fiemaʻu ʻe Sīsū ke hoko ʻo ueʻi ʻene kau ākongá ʻe he ʻofa pē ʻanautolu ki he ngaahi moʻoni mātuʻaki mahuʻinga fekauʻaki mo e ʻOtuá, kae ʻikai ʻe he manavahē ki heʻenau faiakó.

13, 14. ʻI he ongo founga fē naʻe fakahāhā ai ʻe Sīsū ʻa e kaungāongoʻi ki he kakaí?

¹³ Ko e ʻofa ʻa Sīsū ki he kakai naʻá ne akoʻí naʻe toe hā mahino ia ʻi he kaungāongoʻi naʻá ne ongoʻi kiate kinautolú. “ʻI heʻene sio ki he ngāhi fuʻu kakai, naʻe langa hono fatu ʻi he ʻofa kiate kinautolu: he naʻa  nau nofo ongosia mo tukuhāusia, ʻo hange ko ha fanga sipi taʻe hanau tauhi.” (Mātiu 9:36) Naʻá ne ongoʻi kinautolu ʻi honau tuʻunga fakaʻofá pea naʻe ueʻi ai ia ke ne tokoniʻi kinautolu.

¹⁴ Fakatokangaʻi ʻa e kaungāongoʻi ʻa Sīsū ʻi ha toe taimi ʻe taha. ʻI he taimi naʻe fakaofiofi atu ai kiate ia ʻi he fuʻu kakaí ha fefine naʻe ʻau pea ala ki he pao ʻo hono kofú, naʻe fakamoʻui fakaemana ai ia. Naʻe ongoʻi ʻe Sīsū ne mavahe ha mālohi meiate ia, ka naʻe ʻikai te ne sio ki he tokotaha ne fakamoʻuí. Naʻá ne vilitaki ke ʻiloʻi ʻa e fefiné. Ko e hā hono ʻuhingá? ʻIkai ki hano fakaangaʻi ia ʻi hono maumauʻi ʻa e Laó pe ngaahi tuʻutuʻuni ʻa e kau sikalaipé mo e kau Fālesí, ʻo hangē ko ia naʻe manavahē nai ki ai ʻa e fefiné. Ka, naʻá ne pehē kiate ia: “Ngaʻata, kuo fakamoʻui koe ʻe hoʻo tui; ʻalu ʻo fiemālie pē ā, pea ke moʻui mei ho mamahiʻanga.” (Maake 5:​25-34) Fakatokangaʻi ʻa e kaungāongoʻí ʻi he ngaahi lea ko iá. Naʻe ʻikai te ne pehē pē, “Hoko ʻo moʻui.” Ka, naʻá ne pehē: “Pea ke moʻui mei ho mamahiʻanga.” ʻOku ngāueʻaki heni ʻe Maʻake ha foʻi lea ʻoku lava ke ʻuhinga fakaelea ko e “haha,” ko ha faʻahinga uipi naʻe faʻa ngāueʻaki ko e fakamamahi. Ko ia, naʻe ʻiloʻi ʻe Sīsū ko e mahaki ʻo e fefiné naʻá ne fakatupunga ia ke ne faingataʻaʻia, mahalo ʻi he langa mamahi lahi fakaesino mo fakaeongo. Naʻá ne maʻu ʻa e kaungāongoʻi kiate ia.

15, 16. Ko e hā ʻa e ngaahi meʻa naʻe hoko ʻi he ngāue fakafaifekau ʻa Sīsuú ʻoku hā ai naʻá ne sio ki he lelei ʻi he kakaí?

¹⁵ Naʻe toe fakahāhaaʻi ʻe Sīsū ʻa e ʻofa ki he kakaí ʻi he fakasio ki he lelei ʻiate kinautolú. Fakakaukau atu ki he meʻa naʻe hoko ʻi he taimi naʻá ne fetaulaki ai mo Nātanielá, ʻa ia naʻe hoko ki mui ko ha ʻapositoló. “Pea sio ʻe Sīsū kia Nataniela ʻoku haʻu kiate ia, pea ne lea ai ʻo pehē, Vakai, ko ena ha Isileli moʻoni: ʻoku ʻikai ha kākā ʻiate ia!” ʻI ha tuʻunga fakaemana, naʻe sio nai ai ʻa Sīsū ki he loto ʻo Nātanielá, ʻo ne ako ai ha meʻa lahi fekauʻaki mo ia. Ko e moʻoni, naʻe ʻikai ʻaupito ke haohaoa ʻa Nātaniela ia. Naʻe ʻi ai ʻene ngaahi fehālaaki, ʻo hangē pē ko e kotoa ʻo kitautolú. Ko hono moʻoní, ʻi he taimi naʻá ne fanongo ai fekauʻaki mo Sīsuú, naʻá ne fai ha lea ʻi he tuʻunga taʻefakakaukauʻi: “ʻO ala tupu koa ha lelei mei Nasaleti?” (Sione 1:​45-51) Kae kehe, ʻi he kotoa ʻo e ngaahi meʻa naʻe mei malava ke ne leaʻaki fekauʻaki mo Nātanielá, naʻe fili ʻe Sīsū ia ʻa e meʻa naʻe leleí ke tokangataha ki ai, ko e faitotonu ʻa e tangatá ni.

¹⁶ ʻI he tuʻunga meimei tatau, ʻi he taimi naʻe fakaofiofi ai ha ʻōfisa fakakautau​—mahalo ko ha Senitaile, ko ha Loma—ʻo kole kia Sīsū ke ne fakamoʻui ha tamaioʻeiki naʻe puke, naʻe ʻiloʻi ʻe Sīsū naʻe ʻi ai ʻa e ngaahi hala ʻa e sōtiá. Ko ha ʻōfisa fakakautau ʻo e ngaahi ʻaho ko iá ngalingali pē ne ʻi ai haʻane founga-moʻui ki muʻa ne fonu ʻi he ngaahi tōʻonga ʻo e fakamālohí, lingi totó, mo e lotu loí. Neongo ia, naʻe tokangataha ʻa Sīsū ia ki he meʻa naʻe leleí​—ko e tui tuʻu-ki-muʻa ʻa e tangatá. (Mātiu 8:​5-13) Ki mui aí, ʻi he lea ʻa Sīsū ki he tokotaha faihala ko ia naʻe tautau ʻi he ʻakau fakamamahi naʻe hoko atu kiate iá, naʻe ʻikai ke valokiʻi ʻe Sīsū ia ʻa e tangatá ni koeʻuhi ko ʻene faihia ʻi he kuohilí, ka naʻá ne fakalotolahiʻi ia ʻaki ha ʻamanaki ki he kahaʻú. (Luke 23:43) Naʻe ʻiloʻi lelei ʻe Sīsū ko hano fai ha fakakaukau kovi, ʻo vakai fakaanga ki he niʻihi kehé ʻe hoko pē ko e fakalotosiʻi kiate kinautolu. ʻOku ʻikai ha veiveiua ko ʻene ngaahi feinga ke kumi ki ha lelei ʻi he niʻihi kehé naʻe fakalotolahiʻi ai ʻa e tokolahi ke nau toe fakalakalaka ange.

Loto-Lelei ke Tauhi ʻa e Kakaí

17, 18. ʻI hono tali ʻa e vāhenga-ngāue ke haʻu ki māmaní, naʻe anga-fēfē hono fakahāhā ʻe Sīsū ha loto-lelei ke tauhi ʻa e niʻihi kehé?

¹⁷ Ko e toe fakamoʻoni mālohi ʻe taha ʻo e ʻofa ʻa Sīsū ki he kakai naʻá ne akoʻí ko ʻene loto-lelei ke tauhi kinautolú. ʻI heʻene moʻui ki muʻa ke hoko ko e tangatá, naʻe ʻofa maʻu pē ʻa e ʻAlo ʻo e ʻOtuá ki he faʻahinga ʻo e tangatá. (Palovepi 8:​30, 31) ʻI he tuʻunga ko “Folofola” ʻa Sihova, pe tangata-leá, naʻá ne fiefia nai ʻi he ngaahi feangainga lahi mo e faʻahinga ʻo e tangatá. (Sione 1:1) Kae kehe, ʻi he ʻuhinga ke akoʻi ʻa e faʻahinga ʻo e tangatá ʻo toe fakahangatonu  angé, “naʻa ne fakamasivesivaʻi ʻe ia ia, heʻene toʻo ʻa e anga ʻo e tamaioʻeiki,” ʻo ne tukuange ai hono tuʻunga māʻolunga ʻi hēvaní. (Filipai 2:7; 2 Kolinito 8:9) Lolotonga ʻene ʻi māmaní, naʻe ʻikai ke ʻamanekina ʻe Sīsū ia ke fai ha ngāue fakasevāniti kiate ia mo hano tauhi ia. ʻI hono kehé, naʻá ne pehē: “Ko e Fanautama ʻa Tangata naʻe ʻikai te ne haʻu ke maʻu sevaniti, ka ke sevaniti pe ʻe ia, pea ke tuku ʻene moʻui ke huhuʻiʻaki ha tokolahi, heʻene fetongi kinautolu.” (Mātiu 20:28) Naʻe fakahoko kakato ʻe Sīsū ʻa e ngaahi lea ko iá.

¹⁸ Naʻe ngāue fakasevāniti anga-fakatōkilalo ʻa Sīsū ki he ngaahi fiemaʻu ʻa e faʻahinga naʻá ne akoʻí, ʻo ʻikai toumoua ʻene ngāue maʻanautolú. Naʻá ne fononga lalo ki he Fonua ʻo e Talaʻofá, luelue ʻi he ngaahi kilomita ʻe laui teau ʻi he ngaahi fononga fakamalangá ʻi he feinga ke aʻu ki he kakai tokolahi taha ʻe malavá. ʻI he ʻikai ke hangē ko e kau Fālesi mo e kau sikalaipe loto-pōlepolé, naʻá ne anga-fakatōkilalo mo fotungofua maʻu pē. Ko e faʻahinga kotoa pē ʻo e kakaí​—haʻa māʻolunga, kau sōtia, kau loea, kakai fefine, fānau, ko e masivá, ko e mahamahakí, naʻa mo e kakai ʻoku ʻikai talitali lelei ʻi he sōsaietí—naʻa nau fakaofiofi loto-vēkeveke taʻemanavahē kiate ia. Neongo ʻene haohaoá, naʻe hoko ʻa Sīsū ko ha tangata, ʻo moʻulaloa ai ki he ongosiá mo e fiekaiá. Kae kehe, naʻa mo e taimi naʻá ne helaʻia ai pe fiemaʻu ha mālōlō pe ko ha kiʻi taimi lōngonoa ke lotu aí, naʻá ne ʻai ʻa e ngaahi fiemaʻu ʻa e niʻihi kehé ʻo muʻomuʻa ia ʻi haʻaná.​—Maake 1:​35-39.

19. Naʻe anga-fēfē hono fokotuʻu ʻe Sīsū ha faʻifaʻitakiʻanga ʻo e feangaingaʻaki ʻi he anga-fakatōkilalo, anga-kātaki, mo e anga-lelei ki heʻene kau ākongá?

¹⁹ Naʻe loto-lelei pehē pē ʻa Sīsū ke tauhi ʻene kau ākonga ʻaʻaná. Naʻá ne fai ia ʻaki hono akoʻi kinautolu ʻi he anga-lelei mo e anga-kātaki. ʻI he taimi naʻa nau faituai ai ke mahinoʻi ha ngaahi lēsoni mahuʻingá, naʻe ʻikai te ne foʻi, hoko ʻo ʻita, pe ngāhiʻi kinautolu. Naʻá ne hokohoko atu ʻi he kumi ke maʻu ha ngaahi founga foʻou ke fakaaʻu ʻaki ʻene ʻuhingá. Ko e fakatātaá, fakakaukau ange pē ki he faʻa kē ʻa e kau ākongá pe ko hai ʻa e lahi taha ʻiate kinautolú. Naʻe aʻu mai pē ki he pō ki muʻa ʻi hono tāmateʻí ʻa e toutou kumi ʻa Sīsū ʻo maʻu ʻa e ngaahi founga foʻou ke akoʻi ai kinautolu ke nau feangaingaʻaki ʻi he anga-fakatōkilalo. ʻI he meʻa ko ʻeni fekauʻaki mo e anga-fakatōkilaló, hangē ko ia ʻi he ngaahi meʻa kehé kotoa, naʻe malava totonu ai ʻe Sīsū ke ne pehē: “Kuo u tuku hamou faʻifaʻitakiʻanga.”​—Sione 13:​5-15; Mātiu 20:25; Maake 9:​34-37.

20. Ko e hā ʻa e founga faiako naʻá ne fakafaikehekeheʻi ai ʻa Sīsū mei he kau Fālesí, pea ko e hā naʻe ola lelei ai ʻa e founga ko iá?

²⁰ Fakatokangaʻi naʻe ʻikai tala pē ʻe Sīsū ki heʻene kau ākongá ʻa e meʻa ko ia ko e faʻifaʻitakiʻangá; naʻá ne ‘tuku mai ʻa e faʻifaʻitakiʻangá.’ Naʻá ne akoʻi kinautolu ʻaki ʻa e faʻifaʻitakiʻanga. Naʻe ʻikai te ne lea fakamafutofuta kiate kinautolu ʻo hangē ne fakakaukau ia kiate ia ʻokú ne ʻi ha tuʻunga māʻolunga ange ke ne fakahoko ʻa e ngaahi meʻa naʻá ne tala kiate kinautolu ke faí. Ko e founga ia ʻa e kau Fālesí. “ʻOku nau lea kae ʻikai fai ki ai,” ko e lea ia ʻa Sīsū ʻo fekauʻaki mo kinautolú. (Mātiu 23:3) Naʻe fakahāhā anga-fakatōkilalo ʻe Sīsū ki heʻene kau akó ʻa e meʻa tofu pē ko ia naʻe ʻuhinga ki ai ʻene ngaahi akonakí ʻi he moʻuiʻaki kinautolu, ʻi hono fakahoko kinautolu. Ko ia, ʻi he taimi naʻá ne naʻinaʻi ai ki hono kau muimuí ke nau moʻui ʻi he moʻui faingofua ʻoku ʻatā mei he tuli ki he meʻa fakamatelié, naʻe ʻikai pau ke nau mateʻi pe ko e hā naʻá ne ʻuhinga ki aí. Naʻe malava ke nau sio ki he moʻoni ʻo ʻene ngaahi leá: “Ko e fanga fokisi ʻoku ai hanau tafu, mo e fanga manupuna ʻo e ʻatā hanau pununga; ka ko e Fanautama ʻa Tangata ʻoku ʻikai siʻa potu ke ʻolunga ki ai hono ʻulu.” (Mātiu 8:20) Naʻe tauhi ʻe Sīsū ʻene kau ākongá ʻaki hono tuku anga-fakatōkilalo ʻa e faʻifaʻitakiʻanga kiate kinautolu.

21. Ko e hā ʻe lāulea ki ai ʻi he kupu hoko maí?

²¹ ʻOku ʻikai toe fehuʻia, ko Sīsū ʻa e Faiako lahi taha kuo ʻaʻeva ʻi he māmaní! Ko ʻene ʻofa ʻi he meʻa naʻá ne akoʻí mo ʻene ʻofa ki he kakai naʻá ne akoʻí naʻe hā mahino ia ki he faʻahinga loto-totonu kotoa pē naʻa nau sio mo fanongo kiate iá. ʻOku hā mahino pehē pē ki he faʻahinga ʻo kitautolu he ʻahó ni ʻoku tau ako ʻa e faʻifaʻitakiʻanga naʻá ne tuku maí. ʻE malava fēfē leva ke tau muimui ʻi he faʻifaʻitakiʻanga haohaoa ʻa Kalaisí? Ko e kupu hoko maí ʻe lāulea ai ki he fehuʻi ko iá.

ʻE Anga-Fēfē Haʻo Tali?

• Ko e hā ʻa e makatuʻunga ʻo e faiako leleí, hangē ko ia naʻe fakahāhaaʻi ʻe hai?

• ʻI he ngaahi founga fē naʻe fakahāhā ai ʻe Sīsū ʻa e ʻofa ki he ngaahi moʻoni naʻá ne akoʻí?

• Naʻe anga-fēfē hono fakahāhā ʻe Sīsū ʻa e ʻofa ki he kakai naʻá ne akoʻí?

• Ko e hā ʻa e ngaahi fakatātā ʻokú ne fakahāhaaʻi ʻa e loto-lelei anga-fakatōkilalo ʻa Sīsū ke tauhi ʻa e faʻahinga naʻá ne akoʻí?

[Fehuʻi ki he Ako]

[Fakatātā ʻi he peesi 12]

Naʻe anga-fēfē hono fakahāhā ʻe Sīsū naʻá ne ʻofa ʻi he ngaahi tefitoʻi moʻoni naʻe maʻu ʻi he Folofola ʻa e ʻOtuá?