Kaungāongoʻí—Kī ki he Anga-ʻOfa mo e Manavaʻofa

“KEHE PĒ ke ke lava ʻo fakanonga ha mamahi ʻa ha taha, ʻoku ʻikai ai ko e laufānō ʻa e moʻuí,” ko e tohi ia ʻa Helen Keller. Naʻe mahinoʻi moʻoni ʻe Keller ʻa e mamahi fakaeongó. ʻI hono māhina 19, naʻe fakatupunga ia ʻe ha mahaki ke ne kui mo tuli ʻaupito. Ka ko ha faiako manavaʻofa naʻá ne akoʻi ʻa Helen ke lautohi mo tohi ʻi he founga fakakuí pea ki mui ai, ke lea.

Ko e faiako ʻa Keller, ko Ann Sullivan, naʻá ne ʻiloʻi lelei ʻaupito ʻa e ongoʻi feifeitamaki ʻo e fāinga mo ha taʻemalava fakaesino. Ko ia tonu naʻá ne meimei kui. Ka naʻe faʻu anga-kātaki ʻe Ann ha founga ke fetuʻutaki ai mo Helen ʻo fakafou “ʻi hono tohi” ʻa e ngaahi foʻi mataʻitohí ʻi he nima ʻo Helen. ʻI hono ueʻi ʻe he kaungāongoʻi ʻa ʻene faiakó, naʻe fakapapauʻi ai ʻe Helen ke fakatapui ʻa ʻene moʻuí tonu ki hono tokoniʻi ʻa e kuí mo e tulí. ʻI hono ikuʻi ʻa hono tuʻunga taʻemalavá tonu fakafou ʻi ha feinga lahi, naʻá ne ongoʻi moʻoni ai ʻa e faʻahinga naʻa nau ʻi he ngaahi tuʻunga peheé. Naʻá ne loto ke tokoniʻi kinautolu.

Ngalingali kuó ke fakatokangaʻi ʻi he māmani siokita ko ení, ʻoku faingofua ai ke ‘tāpuni ʻa e matapā ʻo e manavaʻofa anga-fakaalaala ʻa ha taha’ pea tukunoaʻi ʻa e ngaahi fiemaʻu ʻa e niʻihi kehé. (1 Sione 3:​17, NW) Kae kehe, ʻoku fekauʻi ʻa e kau Kalisitiané ke ʻofa ki honau kaungāʻapí pea ke hulu ʻa ʻenau feʻofaʻakí. (Mātiu 22:39; 1 Pita 4:8) Neongo ia, mahalo nai ʻokú ke lāuʻilo ki he foʻi moʻoni ko ení: Neongo ʻoku tau fakataumuʻa kakato ke feʻofaʻaki, ʻoku tau faʻa tukunoaʻi ʻa e ngaahi faingamālie ke fakafiemālieʻi ai ʻa e mamahi ʻa e niʻihi kehé. ʻOku hoko nai iá koeʻuhi ko e ʻikai te tau ʻiloʻi ʻa ʻenau ngaahi fiemaʻú. Ko e kaungāongoʻí ʻa e kī ʻe lava ke ne avangi ʻa e matapā ki heʻetau anga-ʻofá mo e manavaʻofá.

Ko e Hā ʻa e Kaungāongoʻi?

Ko e kaungāongoʻí ʻoku pehē ko e kaungā kau fakataha mo e mahinoʻi ʻa e tuʻunga, ongoʻi mo e fakaueʻiloto ʻa ha tokotaha kehe. Kuo toe fakamatalaʻi ia, ko e malava ke ʻai kita ʻi he tuʻunga ʻo e tokotaha kehé. Ko ia, ko e kaungāongoʻí ʻoku ʻuluaki fiemaʻu ai ke tau mahinoʻi ʻa e ngaahi tuʻunga ʻo e tokotaha kehé pea ko hono uá ke tau kaungāʻinasi ʻi he ongoʻi ʻoku langaʻi ʻe he ngaahi tuʻunga ko iá ʻiate iá. ʻIo, ko e kaungāongoʻí ʻoku kaunga ia ki heʻetau ongoʻi ʻi hotau lotó ʻa e mamahi ʻa ha tokotaha kehe.

ʻOku lave ʻa e ngaahi Konga Tohitapú ʻi he ngaahi founga kehekehe ki he ʻulungaanga ko ia ʻoku tau lāulea ki ai hení. Naʻe akonakiʻi ʻe he ʻapositolo ko Pitá ʻa e kau Kalisitiané ke nau fakahā ʻa e ‘feongoʻiʻakí, feʻofaʻaki fakatokouá mo e manavaʻofá.’ (1 Pita 3:​8, NW) Ko e foʻi lea faka-Kalisi ʻoku liliu ko e “feongoʻiʻakí” ʻoku ʻuhinga tefito iá “ke kaungāmamahi mo e tokotaha kehé” pe “ke manavaʻofa.” Naʻe fakahaaʻi ʻe he ʻapositolo ko Paulá ʻa e fakakaukau tatau ʻi heʻene naʻinaʻi ki he kaungā Kalisitiané ke “fiefia mo kinautolu ʻoku fiefia; tangi mo kinautolu ʻoku tangi.” Naʻe tānaki atu ʻe Paula: “Ke fakatangata tatau hoʻomou fetokangaʻaki.” (Loma 12:​15, 16) Pea ʻikai ʻokú ke loto-tatau ʻe ʻikai meimei malava ke tau ʻofa ki hotau kaungāʻapí ʻo hangē ko ʻetau ʻofa kia kitautolú  ʻo kapau naʻe ʻikai te tau ʻai kitautolu ki hono tuʻungá?

Meimei ko e tokotaha kotoa pē ʻoku ʻi ai ha tuʻunga ʻo ʻene kaungāongoʻi fakanatulá. Ko hai ia kuo ʻikai ke ueʻi ʻi heʻene sio ki he ngaahi ʻata fakamamahi lahi ʻo e fānau fiekaiá pe kau kumi hūfanga puputuʻú? Ko hai ha faʻē ʻofa ʻe lava ke fakamatavalea mei he tangi halotu ʻa ʻene tamá? Ka ʻoku ʻikai ke ʻiloʻi ngofua ʻa e faʻahinga mamahi kotoa pē. He faingataʻa ē ke mahinoʻi ʻa e ngaahi ongoʻi ʻa ha taha ʻokú ne hokosia ʻa e loto-mafasiá, ko ha taʻemalava fakaesino ʻoku ʻikai ke ʻasi pe naʻa mo ha mahaki kai—kapau naʻe ʻikai ʻaupito te tau aʻusia tonu ha ngaahi palopalema pehē! Neongo ia, ʻoku fakahā ʻe he ngaahi Konga Tohitapú ʻe malava pea ʻoku totonu ke tau fakahā ʻa e feongoʻiʻakí ki he faʻahinga ʻoku ʻikai te tau aʻusia ʻa honau tuʻungá.

Ngaahi Faʻifaʻitakiʻanga Fakatohitapu ʻo e Kaungāongoʻí

Ko Sihova ʻa hotau faʻifaʻitakiʻanga lelei taha ʻi he kaungāongoʻí. Neongo ʻa ʻene haohaoá tonu, ʻoku ʻikai te ne ʻamanekina kitautolu ke tau haohaoa, “he ʻoku ne ʻilo ʻe ia hota anga; ʻoku ne manatu ai pe ko e efu pe kitaua.” (Sāme 103:14; Loma 5:12) ʻIkai ko ia pē, koeʻuhi ʻokú ne ʻiloʻi ʻa hotau ngaahi ngataʻangá, ‘ʻoku ʻikai te ne fakaʻatā kitautolu ke ʻahiʻahiʻi ʻo makehe atu ʻi hotau mafaí.’ (1 Kolinito 10:13) Fakafou ʻi heʻene kau sevānití mo hono laumālié, ʻokú ne tokoniʻi kitautolu ke tau maʻu ʻa e fakaleleiʻangá.—Selemaia 25:​4, 5; Ngāue 5:32.

ʻOku ongoʻi tonu ʻe Sihova ʻa e mamahi ʻoku tofanga ai ʻa hono kakaí. Naʻá ne folofola ki he kau Siu naʻa nau foki mei Pāpiloné: “Ko ia ʻoku ne ala kiate kimoutolu ʻoku ne ala ki he tamaʻimata ʻo ʻene ʻAfio.” (Sakalaia 2:8) ʻI heʻene ʻilo lahi ki he kaungāongoʻi ʻa e ʻOtuá, naʻe pehē ʻe he tangata hiki Tohitapu ko Tēvitá kiate ia: “Ke ke ʻai hoku loʻimata ki hoʻo hina na—ʻikai ʻoku tuʻu ʻi hoʻo tohi na?” (Sāme 56:8) He fakafiemālie ē ke ʻiloʻi ʻoku manatuʻi ʻe Sihova—ʻo hangē ne hiki kinautolu ʻi ha tohi —ʻa e ngaahi loʻimata kuo tō ʻo ʻene kau sevāniti faitōnungá ʻi heʻenau fāinga ke tauhi maʻu ʻa ʻenau anga-tonú!

ʻI he hangē ko ʻene Tamai fakahēvaní, ʻoku ongongofua ʻa Sīsū Kalaisi ki he ngaahi ongoʻi ʻa e niʻihi kehé. ʻI heʻene fakamoʻui ha tangata naʻe tuli, naʻá ne ʻave ia, ngalingali ke ʻoua ʻe hoko ʻa ʻene toe ake fakaemaná ʻo fakamaaʻi lahi pe fakahahakaʻi ia. (Maake 7:​32-35) ʻI ha taimi ʻe taha, naʻe mamata ai ʻa Sīsū ki ha uitou ʻoku teuaki ke tanu ʻa hono foha pē tahá. Naʻe maongo leva kiate ia ʻa e mamahi naʻá ne tofanga aí, ʻo ne fakaofiofi atu ki he fononga putú, pea fakamoʻui ʻa e talavoú.—Luke 7:​11-16.

ʻI he hili ʻa e toetuʻu ʻa Sīsuú, ʻi heʻene hā kia Saula ʻi he hala ki Tāmasikusí, naʻá ne ʻai ke ʻilo ʻe Saula ʻa e anga ʻo hono uesia ia ʻe heʻene fakatangaʻi kakaha ʻa e kau ākongá. “Ko au ko Sisu, a ia ʻoku ke fakatangaʻi,” ko ʻene fakahaá ange ia. (Ngāue 9:​3-6 [Ngāue 9:​3-5, PM]) Naʻe ongoʻi tonu ʻe Sīsū ʻa e mamahi naʻe fuesia ʻe heʻene kau ākongá, ʻo hangē ha faʻē ʻokú ne ongoʻi ʻa e mamahi ʻa haʻane tama ʻoku puke. ʻI he tuʻunga tatau, ʻi he hoko ko hotau Taulaʻeiki Lahi fakahēvaní, ʻoku ‘ongoʻi [ʻe Sīsū] ʻa hotau ngaahi vaivaiʻangá,’ pe fakatatau ki he liliu ʻa Rotherdam, ʻokú ne maʻu ʻa e “feongoʻiʻaki mo hotau vaivaiʻangá.”—Hepelu 4:​15, NW.

Naʻe ako ʻa e ʻapositolo ko Paulá ke ne ongongofua ki he faingataʻaʻia mo e ngaahi ongoʻi ʻa e niʻihi kehé. “ʻAnefe ha vaivai ha taha, ʻo ʻikai te u vaivai ai? ʻAnefe ha humu ha taha, ʻo ʻikai te u  vevela?” ko ʻene ʻeké ia. (2 Kolinito 11:29) ʻI hono tukuange fakaemana ʻe ha ʻāngelo ʻa Paula mo Sailosi mei hona ngaahi haʻí ʻi ha pilīsone ʻi Filipai, ko e ʻuluaki fakakaukau ʻa Paulá ke fakahā ki he selá kuo ʻikai ke hola ha taha. Naʻá ne ongoʻi ʻi he kaungāongoʻi ʻe taonakita nai ʻa e selá. Naʻe ʻiloʻi ʻe Paula fakatatau ki he tōʻonga faka-Lomá, ʻe tautea kakaha ha sela kapau ʻe hola ha pōpula—tautefito kapau naʻe fekauʻi ia ke leʻohi malu ia. (Ngāue 16:​24-28) Ko e tōʻonga fakaefakahaofi moʻui anga-ʻofa ko eni ʻa Paulá naʻe maongo ia ki he selá, pea ko ia mo hono falé naʻa nau fou ʻi ha ngaahi sitepu ke hoko ko ha kau Kalisitiane.—Ngāue 16:​30-34.

Founga ke Fakatupulekina Ai ʻa e Kaungāongoʻí

ʻOku toutou fakalototoʻaʻi kitautolu ʻe he ngaahi Konga Tohitapú ke tau faʻifaʻitaki ki heʻetau Tamai fakahēvaní pea mo hono ʻAló, ʻa Sīsū Kalaisi, ko ia ai, ko e kaungāongoʻí ko ha ʻulungaanga ia ʻoku fiemaʻu ke tau fakatupulekina. ʻE lava-fēfē ke tau fai eni? ʻOku ʻi ai ʻa e founga tefito ʻe tolu ʻe lava ke tau fakamāsilaʻi ai ʻa ʻetau ongongofua ki he ngaahi fiemaʻu mo e ngaahi ongoʻi ʻa e niʻihi kehé: ʻi he fanongo, ʻi he fakatokanga meʻa pea ʻi he fakakaukauloto atu ki ai.

Fanongo. ʻI he fanongo tokangá, ʻoku tau ʻilo ai ʻa e ngaahi palopalema ʻoku fehangahangai mo e niʻihi kehé. Pea ko e lelei ange ʻa ʻetau fanongó, ʻoku ngali lahi ange ai te nau tatala mai honau lotó pea fakahā ʻa ʻenau ongoʻí. “ʻE lava ke u talanoa ki ha mātuʻa kapau ʻoku ou ongoʻi loto-falala te ne fanongo mai kia au,” ko e fakamatala ia ʻa Miriam. “ʻOku ou loto ke ʻiloʻi ʻokú ne mahinoʻi moʻoni ʻa ʻeku palopalemá. Ko ʻeku falala kiate iá ʻoku tupulekina ia ʻi heʻene ʻeke huhū mai ʻa e ngaahi fehuʻi ʻoku hā mei ai naʻá ne fanongo tokanga ki he meʻa naʻá ku fakahā ange ki aí.”

Fakatokanga meʻa. ʻE ʻikai ke tala hangatonu mai ʻe he tokotaha kotoa pē kia kitautolu ʻa e anga ʻo ʻenau ongoʻí pe ko e meʻa ʻoku nau fuesiá. Kae kehe, ko ha tokotaha ʻiloʻilo te ne fakatokangaʻi ʻa e taimi ʻoku hā ngali loto-mafasia ai ha kaungā Kalisitiane, taimi ʻoku hoko ai ha taʻu hongofulu tupu ʻo fakalolongo, pe taimi ʻoku mole ai mei ha faifekau faivelenga ʻa ʻene loto-māfaná. Ko e malava ko eni ke ongoʻi ha palopalema ʻi heʻene kamatá pē ʻoku mātuʻaki mahuʻinga ia ki he ngaahi mātuʻá. “ʻI ha founga, ʻoku ʻiloʻi ai ʻe heʻeku faʻeé ʻa e anga ʻo ʻeku ongoʻí ki muʻa ia ke u talanoa ki aí,” ko e lau ia ʻa Marie, “ko ia ʻoku faingofua leva kia au ke u fakahā totonu ange ʻa ʻeku palopalemá.”

Ngāueʻaki ʻa hoʻo fakakaukaulotó. Ko e founga mālohi taha ke langaʻi ai ʻa e kaungāongoʻí ko hono ʻeke tonu hifo kia koe: ‘Kapau naʻá ku ʻi he tuʻunga ko ení, ʻe fēfē nai ʻa ʻeku ongoʻí? ʻE fēfē nai ʻa ʻeku talí? Ko e hā nai te u fiemaʻú?’ Ko e kau fakafiemālie loi ʻe toko tolu ʻo Siopé naʻe ʻikai malava ke nau ʻai kinautolu ʻi hono tuʻungá. Ko ia, naʻa nau tukuakiʻi ia ki ha ngaahi angahala fakamahalo ne nau mahaloʻi naʻá ne fai.

Ko e faʻahinga ʻo e tangata taʻehaohaoá ʻoku faʻa faingofua ange ke nau fakamāuʻi ha ngaahi fehālaaki ʻi heʻenau mahinoʻi ʻa e ngaahi ongoʻí. Kae kehe, kapau te tau feinga mālohi ke sioloto atu ki he mamahi ʻa ha taha ʻoku faingataʻaʻia, ʻe tokoni ia kia kitautolu ke tau hoko ʻo kaungāmamahi kae ʻikai ko hono tukuakiʻi. “ʻOku ou ʻoatu ʻa e faleʻi lelei lahi ange ʻi heʻeku fanongo tokanga pea feinga ke mahinoʻi kakato ʻa e tuʻungá ki muʻa ia peá u fai ha ngaahi fokotuʻú,” ko e lau ia ʻa Juan, ko ha mātuʻa taukei.

Ko e ngaahi tohi kuo tufaki ʻe he Kau Fakamoʻoni ʻa Sihová kuó ne tokoniʻi ʻa e tokolahi ʻi he meʻá ni. Ko e ongo makasini Taua Leʻo mo e ʻĀ Hake! kuo fakamatalaʻi ai ʻa e ngaahi palopalema faingataʻa ʻo hangē ko e loto-mafasiá mo e ngaohikovia ʻo e fānaú. Ko e fakamatala taimi totonu ko ení ʻoku tokoniʻi ai ʻa e kau lautohí ke nau ongongofua ange ki he ngaahi ongoʻi ʻa e faʻahinga ʻoku faingataʻaʻia ʻi he ngaahi tuʻunga peheé. Tānaki atu ki ai, ko e tohi Questions  Young People Ask​—Answers That Work kuó ne tokoniʻi ʻa e ngaahi mātuʻa tokolahi ke nau mahinoʻi ʻa e ngaahi palopalema ʻa ʻenau fānaú.

Tokoni ʻa e Kaungāongoʻí ʻi he Ngaahi Ngāue Faka-Kalisitiané

Ko e tokosiʻi pē ʻo kitautolu ʻe lava ke tau tukunoaʻi ʻa e tuʻunga tamaki ʻo ha kiʻi tama fiekaia kapau ʻoku tau ala maʻu ha meʻakai ke vahevahe mo ia. Kapau ʻoku tau maʻu ʻa e kaungāongoʻí, te tau toe ʻiloʻi ai ʻa e tuʻunga fakalaumālie ʻo ha taha. ʻOku lau ʻa e Tohitapú ʻo kau kia Sīsū: “ʻI heʻene sio ki he ngāhi fuʻu kakai, naʻe langa hono fatu ʻi he ʻofa kiate kinautolu: he naʻa nau nofo ongosia mo tukuhāusia, ʻo hange ko ha fanga sipi taʻe hanau tauhi.” (Mātiu 9:36) Ko e laui miliona he ʻahó ni ʻoku nau ʻi he tuʻunga fakalaumālie tatau, pea ʻoku nau fiemaʻu ha tokoni.

Hangē ko e ʻaho ʻo Sīsuú, ʻe fiemaʻu nai ke tau ikuʻi ʻa e tomuʻa loto-fehiʻá pe tōʻonga tukufakaholo kuo faiaka ʻia kitautolú kae aʻu ai ki he loto ʻo e kakai ʻe niʻihi. Ko e faifekau kaungāongoʻí ʻokú ne feinga ke ʻilo ha makatuʻunga ki ha felotoi pe talanoa ʻo kau ki he ngaahi tuʻunga-lea ʻoku ʻi he ʻatamai ʻo e kakaí koeʻuhi ke ʻai ʻa ʻene pōpoakí ke fakamānako ange. (Ngāue 17:​22, 23; 1 Kolinito 9:​20-23) Ko e ngaahi tōʻonga anga-ʻofa ʻoku ueʻi ʻe he kaungāongoʻí ʻe lava foki ke ne ʻai ʻa ʻetau kau fanongó ke nau tali lelei ange ʻa e pōpoaki ʻo e Puleʻangá, ʻo hangē ko ʻene hoko ʻi he tuʻunga ʻo e tokotaha sela Filipaí.

ʻOku mahuʻinga ʻaupito ʻa e kaungāongoʻí ʻi hono tokoniʻi kitautolu ke tau tukunoaʻi ʻa e ngaahi tōnounou ʻa e niʻihi kehe ʻi he lotoʻi fakatahaʻangá. Kapau ʻoku tau feinga ke mahinoʻi ʻa e ongoʻi ʻa ha tokoua kuó ne fakalotomamahiʻi kitautolu, ʻe ʻikai ha veiveiua ʻe hoko ʻo faingofua ange ke tau fakamolemoleʻi ia. Mahalo nai ne tau mei fakafeangai ʻi he founga tatau kapau naʻa tau ʻi he tuʻunga tatau pea kapau naʻa tau ʻi hono ʻātakaí. Ko e kaungāongoʻi ʻa Sihová ʻokú ne ueʻi ia ke ne ‘manatu ko e efu pe kitaua,’ ko ia ʻikai ʻoku totonu ke ueʻi kitautolu ʻe heʻetau kaungāongoʻí ke tau fakakaukau atu ki he tuʻunga taʻehaohaoa ʻa e niʻihi kehé pea ke ‘fakamolemoleʻi maʻataʻatā kinautolu’?—Sāme 103:14; Kolose 3:​13, NW.

Kapau ʻe fiemaʻu ke tau fai ha akonaki, te tau fai nai ia ʻi ha founga anga-ʻofa lahi ange ʻo kapau te tau mahinoʻi ʻa e ngaahi ongoʻi mo e ngaahi tuʻunga ʻoku ongongofua ai ʻa e tokotaha kuo faihalá. Ko e mātuʻa Kalisitiane kaungāongoʻí ʻokú ne fakamanatu kiate ia: ‘Naʻá ku mei fai foki ʻa e fehālaaki ko ení. Naʻe mei malava ke u ʻi hono tuʻungá.’ Ko ia naʻe faleʻi mai ai ʻe Paula: “Mou faitoʻo ki ha taha pehe ʻo angafakaalaala; pea ke vakai kiate koe naʻa ʻiloange ʻe ʻahiʻahiʻi mo koe foki.”—Kaletia 6:1.

ʻE toe lava ke ueʻi kitautolu ʻe he kaungāongoʻí ke tau fai ha tokoni ʻaonga kapau ʻoku ʻi hotau mafaí ke fai pehē, neongo nai ʻe toumoua ha kaungā Kalisitiane ke kole ki ha tokoni. ʻOku tohi ʻe he ʻapositolo ko Sioné: “ʻIlonga ʻa ia ʻoku ne maʻu ʻa e meʻa ʻo mamani, mo ne sio ki hono tokoua ʻoku ne masiva, ka ne taʻofi hono fatu meiate ia, pea ʻoku nofo fēfē ʻi he toko taha ko ia ʻa e ʻofa ki he ʻOtua? . . . ʻOua naʻa tau ʻofa ʻaki ha lea pe, ʻumaʻā ʻaki hotau ʻelelo pe; ka tau fai ʻi ngaue mo fai ʻi moʻoni ʻetau ʻofa.”—1 Sione 3:​17, 18.

Koeʻuhi ke tau ʻofa ‘ʻi he ngaue mo moʻoni,’ ʻoku tomuʻa fiemaʻu ke tau vakai ki he ngaahi fiemaʻu pau ʻa hotau tokouá. ʻOku tau vakaiʻi lelei ʻa e ngaahi fiemaʻu ʻa e niʻihi kehé fakataha mo ha taumuʻa ke tokoniʻi kinautolu? Ko e kaungāongoʻí ia.

Fakatupulekina ʻa e Feongoʻiʻakí

ʻE ʻikai nai fakanatula ke tau mātuʻaki kaungāongoʻi, ka neongo ia ʻe malava ke tau fakatupulekina ʻa e feongoʻiʻaki ko ení. Kapau te tau fanongo tokanga ange, fakatokanga meʻa lahi ange, pea mo māʻunga sioloto atu ko kitautolu ē ʻi he tuʻunga ʻo e tokotaha kehé, ʻe fakautuutu ai ʻetau kaungāongoʻí. Ko hono olá, te tau ongoʻi ai ʻoku ueʻi kitautolu ke fakahā ʻa e ʻofa, anga-ʻofa mo e manavaʻofa lahi ange ki heʻetau fānaú, ki he kau Kalisitiane kehé pea ki hotau ngaahi kaungāʻapí.

ʻOua ʻaupito ʻe fakaʻatā ʻa e siokitá ke ne tāmateʻi ʻa hoʻo kaungāongoʻí. “ʻOua naʻa taki taha tokanga ki heʻene meʻa aʻana pe,” ko e tohi ia ʻa Paulá, “ka ki he meʻa ʻa e kakai kehe foki.” (Filipai 2:4) Ko hotau kahaʻu taʻengatá, ʻoku fakatuʻunga ia ʻi he kaungāongoʻi ʻa Sihova pea mo ʻene Taulaʻeiki Lahi ko Sīsū Kalaisí. Ko ia, ʻoku tau maʻu ai ʻa e fatongia totonu ke fakatupulekina ʻa e ʻulungaanga ko ení. Ko ʻetau kaungāongoʻí te ne fakaivia kitautolu ke tau hoko ko e kau faifekau lelei ange mo e ngaahi mātuʻa lelei ange. Kae hiliō he meʻa kotoa, ʻe tokoniʻi kitautolu ʻe he kaungāongoʻí ke tau ʻilo ʻoku “lahi ange ʻa e fiefia ʻi he foaki atú ʻi he maʻu maí.”—Ngāue 20:​35, NW.

[Fakatātā ʻi he peesi 25]

Ko e kaungāongoʻí ʻoku kau ai ʻa hono vakaiʻi lelei ʻa e ngaahi fiemaʻu ʻa e niʻihi kehé fakataha mo ha taumuʻa ke tokoniʻi kinautolu

[Fakatātā ʻi he peesi 26]

Te tau ako ke fakahā ʻa e kaungāongoʻi ʻa ia ʻoku ongoʻi fakanatula ʻe ha faʻē ʻofa ki heʻene tamá?