ʻOku ʻi Fē Ho Maluʻangá?

ʻI ha kiʻi kolo ʻAfilika Hihifo, ʻoku taʻataʻalo fakamāvae ai ha kiʻi talavou ko Siosiua ki hono fāmilí mo e ngaahi kaumeʻá. a ʻOkú ne hiki leva ki he kolo lahí ʻi he kumi ki ha maluʻanga fakapaʻanga. Kae kehe, ʻikai fuoloa mei heʻene aʻu atu ki aí, ʻoku hōloa ʻa ʻene ʻamanakí ʻi heʻene ʻiloʻi ʻoku ʻikai faingofua ke hoko ʻo koloaʻia ʻi he kolo lahí.

ʻI HE fāinga ke feʻunuʻaki ʻa ʻene moʻuí ki he moʻui fakakolo lahí, ʻoku hoko ai ʻo siva ʻa e ʻamanaki ʻa Siosiuá. ʻOku mamaʻo ʻaupito ʻa e kolo lahí mei he meʻa naʻá ne fakaʻuta atu ki aí. Lolotonga iá, ʻoku fakaʻamu lahi ʻa Siosiua ʻi hono lotó ke foki ki hono fāmilí mo e ngaahi kaumeʻá ʻi he kiʻi kolo māʻulalo ko ia naʻá ne mavahe mai mei aí. Ka ʻokú ne manavahē ʻi hano manukiʻi ia ʻe ha niʻihi ʻi he koló. ‘Te nau ui au ko ha tokotaha taʻelavameʻa,’ ko ʻene hohaʻá ia, ‘koeʻuhi ko e ʻikai te u lavameʻa ʻi he kolo lahí.’

Ko e meʻa ʻoku toe fakamafasia lahi ange kiate iá ko e mamahi ʻe ongoʻi nai ʻe heʻene ongo mātuʻá. ʻOkú na fakafalala ange kiate ia ki ha tokoni fakapaʻanga. Lolotonga ʻa e feinga ke fekuki mo e mafasia fakaeongo ko ení, ʻoku ngāue ʻa Siosiua ʻi he ngaahi houa lahi ʻi ha ngāue ʻoku siʻi ai hono tokaʻi iá pea maʻu ha kiʻi meʻa siʻi pē ʻo e meʻa naʻá ne fakaʻānaua ki aí. ʻOkú ne ongosia mei he fuʻu lahi ʻa e ngāué. Pea ko e toenga ʻo e taimi ki he ngaahi ngāue faka-Kalisitiané, ʻa ia ʻokú ne fakamahuʻingaʻi lahí, ʻoku hōloa ia ʻi he faai mai ʻa e uike taki taha. ʻI he mamaʻo ʻaupito mei he māfana ʻa hono fāmilí mo e ngaahi kaumeʻa motuʻá, ʻokú ne ongoʻi loto-mamahi mo tuēnoa. ʻOkú ne ʻiloʻi kuo ʻikai ke ʻoange kiate ia ʻe he kolo lahí ʻa e maluʻanga naʻá ne holi lahi ki aí.

Neongo ʻoku kehekehe ʻa e ngaahi hingoá mo e ngaahi feituʻú, ko e meʻa fakamamahi ʻoku hoko kia Siosiuá ʻoku hoko ia pea toutou hoko. ʻOku ʻikai pehē ia naʻe siokita ʻa Siosiua ʻi heʻene holi ke hikí—ko ʻene kumi pē ha maluʻanga. Naʻá ne ongoʻi loto-moʻoni ko hono ngaahi faingamālie ʻi he kolo lahí naʻe lelei ange ia ʻi he tuʻunga ʻi hono kiʻi koló. Ko e moʻoni, ʻi he taimi ʻe niʻihi ʻoku fakaleleiʻi nai ai ʻe ha tokotaha ʻa hono tuʻunga fakamatelié, ka ʻoku ʻikai ke ʻuhinga ia ai ko ha maluʻanga moʻoni ia. Naʻe ʻikai ke hoko moʻoni ia kia Siosiua, pea ʻe tatau pē ki he tokolahi taha ʻo e faʻahinga kehe ʻoku nau ʻahiʻahiʻi ʻa e meʻa tatau. ʻOku ʻai ʻe he meʻá ni ke tau ʻeke, ‘Ko e hā ʻa e maluʻanga?’

Ko e maluʻangá ʻoku kehekehe ʻa hono mahinoʻí ʻe he kakai kehekehe. ʻOku pehē ʻe he tikisinale ʻe taha ko e maluʻangá ko e “tauʻatāina mei he fakatuʻutāmakí” pe “tauʻatāina mei he manavaheé pe ko e loto-moʻuá.” ʻOku ʻiloʻi ʻe he kakai tokolahi tahá ko e “tauʻatāina [kakato] mei he fakatuʻutāmakí” ʻoku ʻikai ke maʻu ia he ʻahó ni. ʻOku nau fiemālie kehe pē ʻoku nau ongoʻi malu, neongo ʻa e ngaahi tuʻunga fakamanamana ʻokú ne takatakaiʻi nai kinautolú.

Fēfē koe? Ko fē ʻokú ke hanga ki ai ki ha maluʻangá? ʻOku maʻu ia ʻi he kolo lahí kae ʻikai ʻi he kolo siʻí, hangē ko e fakakaukau ʻa Siosiuá? Pe ʻoku ʻi he paʻangá, ʻo tatau ai pē pe ko fē pe ko e hā ʻa e founga te ke maʻu nai ai iá? ʻOku maʻu nai ia ʻi he kumi ki ha tuʻunga māʻolungá? Tatau ai pē pe ko fē ʻokú ke tui ʻe ʻi ai nai ho maluʻangá, ko e hā hono lōloa ʻo e maluʻanga ko iá kiate koe fakatouʻosi mo ho fāmilí?

Tau vakai ki he founga ʻe tolu ʻa ia ʻoku kumi ai ʻa e faʻahinga tokolahi ki he maluʻangá—ko e feituʻu fakasiokālafí; paʻangá; lakangá pe tuʻungá. Pea te tau toki sivisiviʻi leva ʻa e feituʻu ʻoku ʻi ai ʻa e maluʻanga tuʻuloa moʻoní.

[Fakamatala ʻi lalo]