Kuo hao mai ‘a e Tohi Tapú. Ko hono olá, ‘oku lava ke ke ma‘u mo lau hano tatau ‘i he ‘ahó ni. Pea ‘i ho‘o fili ha liliu Tohi Tapu lelei, ‘okú ke tuipau ‘okú ke lau ha tatau ‘oku alafalala‘anga ko ha tatau mei he mu‘aki hiki-tohí. * Ka ko e hā kuo tolonga mai ai ‘a e Tohi Tapú neongo ‘ene popo fakanatula, fakafepaki kakaha, mo e feinga ke liliu ‘a e pōpoaki ‘i aí, ‘o kau ai ‘a e ngaahi fakamatala fakaofo ‘o ‘ene hao maí? Ko e hā ‘oku makehe ai ‘a e tohi ko ení?

Ko e tokolahi ‘o e kau ako Tohi Tapú na‘a nau ma‘u ‘a e fakamulituku tatau mo e ‘apositolo ko Paulá, na‘á ne tohi: “Ko e potu Folofola kotoa pē kuo fakamānava‘i ia ‘e he ‘Otuá.” (2 Tīmote 3:16) Na‘a nau tui na‘e hao mai ‘a e Tohi Tapú koe‘uhí ‘oku makehe ‘a e Folofola ‘a e ‘Otuá pea koe‘uhí na‘e fakatolonga ia ‘e he ‘Otuá ‘o a‘u mai ki he ‘ahó ni. Ko Faizal, na‘e lave ki ai ‘i he kamata‘angá ‘o e kupu hokohoko ko ení, na‘á ne fakakaukau ke fakatotolo‘i ‘a e ngaahi taukave‘i ko ení ‘aki ‘ene ako ‘a e Tohi Tapú. Na‘á ne ‘ohovale ‘i he me‘a na‘á ne akó. Na‘e vave ‘ene ‘ilo ‘oku ‘ikai ke ‘i he Tohi Tapú ‘a e ngaahi akonaki lahi ‘oku mafolalahia ‘i he Pule‘anga-Ha‘a-Kalisitiané. ‘Ikai ko ia pē, na‘e maongo kiate ia ‘a e taumu‘a ‘a e ‘Otuá ki he māmani hangē ko ia ‘oku hā ‘i He‘ene Folofolá.

“‘Oku ou tuipau ‘i he taimí ni ko e Tohi Tapu ‘oku ou ma‘ú ko e me‘a‘ofa ia mei he ‘Otuá,” ko ‘ene leá ia. “Ko ia ai, kapau ‘oku lava ‘e he ‘Otuá ‘o ngaohi ‘a e ‘univēsí, ‘ikai ‘okú ne ma‘u ‘a e mālohi ke ne ‘omai ha tohi pea fakatolonga ia ma‘a kitautolu? Ke toe lea‘aki ha me‘a kehe mei ai ‘oku fakangatangata ai ‘a e mālohi ‘o e ‘Otuá​—pe ko hono fakangatangata ‘a e mālohi ‘o e Māfimafi-Aoniú! Pea ko hai au ke u fakangatangata ‘a e mālohi ‘o e ‘Otuá?”​—‘Aisea 40:8.