ʻOku ʻi Ai ha Tataki Alafalalaʻanga ki ha Kahaʻu Malu?
Hangē ko ia naʻe lāulea ki ai ʻi he kupu ki muʻá, kuo feinga ʻa e kakaí ke maʻu ha kahaʻu lelei ange ʻaki ʻa e tuku ʻenau falalá ki he ngaahi meʻa hangē ko e tufakangá, akó, koloá mo e hoko ko ha tokotaha leleí. Kae kehe, ko hono fai ʻa e ngaahi meʻa ko ení, ʻe hangē ia haʻo feinga ke ʻalu ki ha feituʻu foʻou ʻo ngāueʻaki ha mape ʻoku hala. ʻOku ʻuhinga iá ʻoku ʻikai ha tataki alafalalaʻanga ki he kahaʻú? ʻIkai!
TATAKI MEI HA MATAVAI MĀʻOLUNGA ANGE
ʻI hono fai ha fili, ʻoku tau faʻa kumi faleʻi ki ha tokotaha ʻoku taʻumotuʻa ange mo poto ange ʻiate kitautolu. ʻI ha founga meimei tatau, ʻe lava ke tau maʻu ha tataki lelei ki hotau kahaʻú mei ha Tokotaha ʻoku taʻumotuʻa ange mo poto ange ʻiate kitautolu. Ko e faleʻi mei he Tokotaha ko ení kuo aʻu mai kiate kitautolu fakafou ʻi ha tohi naʻe hiki ʻi he taʻu ʻe 3,500 nai kuo maliu atú. Ko e tohi ko ení ʻoku ui ko e Tohi Tapú.
Ko e hā ʻoku lava ai ke ke falala ki he Tohi Tapú? Koeʻuhí ko hono Faʻutohí ko e Tokotaha taʻumotuʻa taha mo poto taha ia ʻi he ʻunivēsí. ʻOku fakamatalaʻi ia ko “Talumeimuʻa” ʻa ia kuó ne ʻi ai “mei he taʻengata ki he taʻengata.” (Taniela 7:9; Saame 90:2) Ko ia ʻa e “Tokotaha-Fakatupu ʻo e langí, ʻa e ʻOtua moʻoní, ʻa e Tokotaha naʻá ne faʻu ʻa e māmaní.” (ʻAisea 45:18) ʻOkú ne tala mai ko hono huafa fakafoʻituituí, ko Sihova.—Saame 83:18.
Koeʻuhi ko e Tohi Tapú ko e haʻu mei he Tokotaha-Fakatupu ʻo e faʻahinga kotoa ʻo e tangatá, ʻoku ʻikai ke ne saiʻia ange ʻi ha anga fakafonua pe matakali ʻe taha. Ko ʻene akonakí ʻoku taʻefakangatangata pea ʻoku ʻaonga ki he kakai ʻi he fonua kotoa. ʻOku ala maʻu ʻi he ngaahi lea lahi ange pea kuo tufaki lahi ange ia ʻi ha toe tohi pē. * ʻOku ʻuhinga ení ko e kakai mei ha feituʻu pē ʻe lava ke nau mahinoʻingofua ia pea muimui ki ai. Ko e ngaahi moʻoniʻi meʻa ko ení ʻokú ne poupouʻi ʻa e lea tonu ʻa e Tohi Tapú:
“ʻOku ʻikai ke filifilimānako ʻa e ʻOtuá, ka ʻi he puleʻanga kotoa pē, ko e tangata ko ia ʻoku manavahē kiate ia mo fai ʻa e meʻa ʻoku totonú, ʻokú ne tali ia.”—NGĀUE 10:34, 35.
Hangē pē ko ha mātuʻa tokanga ʻokú ne ʻoange ʻa e faleʻi ki heʻene fānaú, ko Sihova ko e ʻOtuá ko ha Tamai ʻofa ʻokú ne ʻomai ha tokoni kiate kitautolu fakafou ʻi heʻene Folofolá, ʻa e Tohi Tapú. (2 Tīmote 3:16) ʻE lava ke ke falala ki heʻene Folofolá; he ko ē, ko ia naʻá ne ngaohi kitautolú pea ʻokú ne ʻafioʻi ʻa e ʻalunga moʻui ʻoku lelei taha kiate kitautolú.
Ko e hā ʻoku fiemaʻu ke ke fai ke fakapapauʻi te ke maʻu ha kahaʻu pehē? Vakai ki he kupu hono hokó.
^ pal. 6 Ki ha fakaikiiki fekauʻaki mo e liliu mo hono tufaki ʻo e Tohi Tapú, ʻalu ki he www.isa4310.com pea sio ʻi he AKONAKI MEI HE TOHI TAPÚ > HISITŌLIA & TOHI TAPU.
^ pal. 16 Ki ha fakaikiiki lahi ange, sio ki he vahe 9 ʻo e tohi The Bible—God’s Word or Man’s? naʻe pulusi ʻe he Kau Fakamoʻoni ʻa Sihová. ʻOku ala maʻu ia ʻi he ʻinitanetí ʻi he www.isa4310.com. Sio ʻi he LAIPELI > ʻŪ TOHI & POLOSIUA.
Te Ke Fie Vakai Foki ki Heni
KO E TAUA LE‘O
Ko e Moʻoni Fekauʻaki mo e Kahaʻú
Fakaivimālohiʻi hoʻo ʻamanaki ki he meʻa ʻoku leaʻaki ʻe he ʻOtuá fekauʻaki mo e kahaʻu ʻo e māmaní mo e kakai ʻe nofo ʻi aí.
KO E TAUA LE‘O
‘Oku ‘Aonga ‘a e Tataki ‘a e Tohi Tapú ‘i he ‘Ahó Ni?
‘I he fakamatala fakaeonopōní, ko e hā ke hanga ai ki ha tohi kuo mei ta‘u 2,000 hono motu‘á?
KO E TAUA LE‘O
Ko e Tohi Tapú mo Ho Kaha‘ú
‘Oku lava ke tokoni‘i kitautolu ‘e he Folofola ‘a e ‘Otuá ke tau fekuki mo e me‘a pē ‘oku ‘i mu‘a ‘iate kitautolú—‘a e ngaahi palopalema faka‘aho ‘oku tau fehangahangai mo ia ‘i he māmani ta‘epau ko ení. Ka ‘oku toe mahulu atu ‘a e Tohi Tapú. ‘Okú ne toe ‘omai ha vakai mā‘ala‘ala ki he kaha‘ú.
