‘Ofa ki Hotau Kaungā-Fa‘ahinga ‘o e Tangatá
‘I he tu‘unga ko e hako ‘o e ‘uluaki tangatá, ‘a ‘Ātama, ‘oku tau hoko ko ha fāmili ‘e taha. Neongo ‘oku ‘amanekina mei he ngaahi mēmipa ‘o e fāmilí ke nau fe‘ofa‘aki mo fefaka‘apa‘apa‘aki, ‘i he ‘ahó ni ‘oku faingata‘a ke ma‘u ‘a e ‘ofa ko iá. ‘Oku ‘ikai ko e finangalo ia ‘a hotau ‘Otua ‘ofá.
ME‘A ‘OKU LEA‘AKI ‘E HE FOLOFOLÁ FEKAU‘AKI MO E ‘OFÁ
“Kuo pau ke ke ‘ofa ki he tokotaha kehé ‘o hangē pē ko ho‘o ‘ofa kiate koé.”—LIVITIKO 19:18.
“Hokohoko atu ho‘omou ‘ofa ki homou ngaahi filí.”—MĀTIU 5:44.
‘UHINGA ‘O E ‘OFA KI HE KAUNGĀ-FA‘AHINGA ‘O E TANGATÁ
Fakatokanga‘i ‘a e anga hono fakamatala‘i ‘e he ‘Otuá ‘a e ‘ofá ‘i he‘ene Folofolá ‘i he 1 Kolinitō 13:4-7:
“Ko e ‘ofá ‘oku kātaki mo anga-lelei.”
Fakakaukau angé: ‘Oku anga-fēfē ho‘o ongo‘í ‘i he kātaki mo anga-lelei atu ‘a e ni‘ihi kehé pea ‘ikai ke nau ‘ita ‘i ho‘o fai ha fehālaaki?
“Ko e ‘ofá ‘oku ‘ikai te ne meheka.”
Fakakaukau angé: ‘Oku anga-fēfē ho‘o ongo‘í ‘i he hu‘uhu‘u tōtu‘a mo loto-kovi atu ‘a e ni‘ihi kehé?
Ko e ‘ofá “‘oku ‘ikai te ne kumi ki he‘ene lelei pē ‘a‘ana.”
Fakakaukau angé: ‘Oku anga-fēfē ho‘o ongo‘í ‘i he loto-lelei ‘a e ni‘ihi kehé ke faka‘apa‘apa‘i ho‘o fakakaukaú pea ‘ikai vilitaki ke tu‘u pē ha‘anautolú fakakaukau?
Ko e ‘ofá “‘oku ‘ikai te ne hanganaki fakalau ‘a e koví.”
Fakakaukau angé: Ko e ‘Otuá ‘okú ne loto-lelei ke fakamolemole‘i ‘a e kakai faiangahala fakatomalá. “‘E ‘ikai te ne fakasio hala ma‘u ai pē, pe nofo‘aki houhau ai pē.” (Saame 103:9) ‘Oku tau hounga‘ia ‘i hono fakamolemole‘i kitautolu ‘e ha taha na‘a tau fakalotomamahi‘i. Ko ia ‘oku totonu ke tau mateuteu ke fakamolemole‘i ‘a e ni‘ihi kehé ‘i he‘enau fakalotomamahi‘i kitautolú.—Saame 86:5.
Ko e ‘ofá “‘oku ‘ikai te ne fiefia ‘i he ta‘emā‘oni‘oní.”
Fakakaukau angé: ‘I he hoko mai ha faingata‘a kiate kitautolu, ‘oku ‘ikai ke tau sai‘ia ke fiefia ‘a e ni‘ihi kehé ‘i he‘etau faingata‘a‘iá. Ko ia ‘oku ‘ikai ke tau fiefia ‘i he faingata‘a‘ia ‘a e ni‘ihi kehé, neongo kapau na‘a nau ngaohikovi‘i kitautolu.
Ke ma‘u ‘a e tāpuaki ‘a e ‘Otuá, kuo pau ke tau ‘ofa ki he ni‘ihi kehé ‘o hangē ko e ngaahi founga ko ení ‘o tatau ai pē pe ko hai kinautolu. Ko e founga ‘aonga ‘e taha ‘e lava ke tau fai ai eni ko e tokoni ki he fa‘ahinga ‘oku masivá.
