“Naʻe ʻi Fē ʻa e ʻOtuá Ia?”
“KO E FEHUʻI ʻOKU ʻEKE MAʻU PEÉ: NAʻE ʻI FĒ ʻA E ʻOTUÁ IA?”—Tuʻi Tapu Penitiketo XVI, lolotonga ʻene ʻaʻahi ki he kemi fakamamahi ki muʻa ʻi Auschwitz, Pōlani.
ʻI HE HOKO ʻA E NGAAHI FAKATAMAKÍ, KUÓ KE FIFILI, ‘NAʻE ʻI FĒ ʻA E ʻOTUÁ IA?’ PE ʻI HOʻO MOʻUÍ TONU, KUO ʻAI KOE ʻE HA MEʻA FAKAMAMAHI ʻOKU HOKO KE KE FEHUʻI PE ʻOKU TOKANGA MAI ʻA E ʻOTUÁ FEKAUʻAKI MO KOE FAKAFOʻITUITUI?
ʻOkú ke ongoʻi nai hangē ko Sheila, ʻokú ne nofo ʻi ʻAmelika. ʻI heʻene tupu hake ʻi ha fāmili lotu, ʻokú ne pehē: “Talu mei heʻeku kei siʻi, mo hono tohoakiʻi au ki he ʻOtuá koeʻuhi ko hotau Tokotaha-Ngaohí ia. Ka naʻe ʻikai ʻaupito te u ongoʻi ofi kiate ia. Naʻá ku fakakaukau ʻokú ne sio mai kiate au, ka mei ha feituʻu mamaʻo. Naʻe ʻikai te u ongoʻi naʻe fehiʻa ʻa e ʻOtuá ʻiate au, ka naʻe ʻikai te u tui naʻá ne tokanga mai kiate au.” Ko e hā naʻe veiveiua ai ʻa Sheila? ʻOkú ne fakamatalaʻi: “Naʻe fehangahangai hoku fāmilí mo ha fakatamaki hokohoko, pea naʻe hā ngali naʻe ʻikai teitei tokoni mai ʻa e ʻOtuá ia.”
Hangē ko Sheila, ʻokú ke tuipau nai ʻoku ʻi ai ʻa e ʻOtua Māfimafi-Aoniu. Ka ʻokú ke fifili pe ʻokú ne tokanga moʻoni mai fekauʻaki mo koe. Ko e tangata māʻoniʻoni ko Siopé, ʻa ia naʻá ne tui ki he mālohi mo e poto ʻo e Tokotaha-Fakatupú, naʻá ne maʻu ha veiveiua meimei tatau. (Siope 2:3; 9:4) ʻI he hili hono hokosia taufetongi ʻe Siope ha ngaahi fakatamakí—ʻo ʻikai ha nonga ʻe hā maí—naʻá ne ʻeke ki he ʻOtuá: “Ko e hā ʻokú ke fufū ai ho fofongá pea lau au ko ho filí?”—Siope 13:24.
Ko e hā ʻoku leaʻaki ʻe he Tohi Tapú? ʻE tukuakiʻi ʻa e ʻOtuá ʻi he hoko ʻa e fakatamakí? ʻOku ʻi ai ha fakamoʻoni ʻoku tokanga mai ʻa e ʻOtuá ki he kakaí fakalūkufua pea ʻi he fakatāutahá? ʻI he tuʻunga fakafoʻituituí, ʻe lava ʻe ha taha ke ne ʻiloʻi pe ʻoku ʻafioʻi, mo mahinoʻi, mo kaungāongoʻi mai ʻa e ʻOtuá kiate kitautolu pe tokoni mai ʻi hotau ngaahi palopalemá?
ʻI he ngaahi kupu hono hokó, te tau lāulea ai ki he meʻa ʻoku akoʻi mai ʻe he fakatupú ʻo fekauʻaki mo e tokanga mai ʻa e ʻOtuá. (Loma 1:20) Pea te tau sivisiviʻi leva ʻa e meʻa ʻoku fakahaaʻi mai ʻe he Tohi Tapú fekauʻaki mo e tokanga mai ʻa e ʻOtuá. Ko e lahi ange hoʻo “hoko ʻo ʻiloʻi iá” fakafou ʻi heʻene fakatupú mo ʻene Folofolá, ko e lahi ange ia hoʻo fakapapauʻi “ʻokú ne tokanga mai kiate kimoutolu.”—1 Sione 2:3; 1 Pita 5:7.
Te Ke Fie Vakai Foki ki Heni
KO E TAUA LE‘O
ʻOku ʻAfioʻi Mai Koe ʻe he ʻOtuá?
Ko e hā ha fakamoʻoni ʻoku mahuʻingaʻia moʻoni mai ʻa e ʻOtuá ʻi hoʻo leleí?
