Naʻe pehē ʻe Sīsū: “ʻE tuʻu ʻa e fonua ki he fonua, mo e puleʻanga ki he puleʻanga. ʻE ʻi ai ʻa e ngaahi mofuike lalahi, pea ʻi he feituʻu ki he feituʻu ʻe ʻi ai ʻa e ngaahi nounou fakameʻatokoni mo e ngaahi mahaki fakaʻauha.” (Luke 21:10, 11) Hangē ko e ngaahi laine ʻi he fakaʻilonga nimá, ko hono fakatahaʻi kotoa ʻa e ngaahi meʻa ko ení ʻoku hoko ia ko ha fakaʻilonga māʻalaʻala. Pea hangē pē ko hono ʻiloʻi ha tokotaha ʻaki hono fakaʻilonga nimá, ko e hoko ʻa e ngaahi meʻa ko ení ʻi he taimi tataú ʻoku fakaʻilongaʻi ai “ʻoku ofi ʻa e Puleʻanga ʻo e ʻOtuá.” Kuo hoko fakataha ʻa e ngaahi meʻa ko ení pea hoko ʻi he māmaní kotoa? Fakakaukau ki he fakamoʻoní.

1. TAU

ʻI he 1914, naʻe hoko ai ha tau ʻa ia naʻe teʻeki ke hoko ʻi he kotoa ʻo e hisitōlia ʻo e tangatá! ʻOku faʻa ui ʻe he kau faihisitōliá ʻa e taʻu 1914 ko e liliuʻanga ʻo e hisitōliá koeʻuhi ko e fuofua taimi ia ke hoko ai ha tau fakamāmanilahi. ʻI he tau ko iá naʻe fuofua ngāueʻaki ai ʻa e tangikē tau, laku pomu, mīsinikani, kasa kona mo e ngaahi meʻatau fakatupu mate kehe ʻi he māmaní. Naʻe hoko atu ai ʻa e tau hono ua ʻa māmaní, ʻa ia naʻe fuofua ngāueʻaki ai ʻa e meʻatau fakaeʻātomí. Talu mei he 1914 mo e hoko ʻa e ngaahi tau ʻi he ngaahi feituʻu kehekehe, pea kuo tāmateʻi ai ʻa e kakai ʻe laui miliona.

2. MOFUIKE

ʻI he taʻu kotoa ʻoku hoko ai ʻa e mofuike ʻe 100 nai ʻoku lahi feʻunga ke ne fakatupunga ha “maumau lahi,” ko e lau ia ʻa e Britannica Academic. Pea ʻoku līpooti ʻe he Savea Fakasioloki ʻa ʻAmelika ʻo pehē “fakatatau ki he ngaahi lēkooti kuo tuku tauhi (talu mei he 1900), ʻoku mau ʻamanekina ha mofuike lalahi nai ʻe 16 ʻi ha faʻahinga taʻu pē.” Neongo ʻoku fakakaukau nai ʻa e niʻihi ko e hā ngali fakautuutu ʻa e mofuiké koeʻuhi ko e lelei ange ʻa e ngaahi meʻangāue ʻoku nau talá, ko hono moʻoní, ko e ngaahi mofuike lalahi takatakai ʻi he māmaní ʻokú ne fakatupunga ʻa e faingataʻaʻia mo e mate ʻi ha tuʻunga lahi fakaʻulia.

 3. NOUNOU FAKAMEʻATOKONI

Ko e nounou fakameʻatokoní ʻoku hoko ia ʻi māmani lahi koeʻuhi ko e taú, taʻefaitotonú, tōlalo fakaʻekonōmiká, ʻikai ke levaʻi lelei ʻa e fua ʻo e ngoué pe ko e ʻikai ke mateuteu ki he fakatamaki fakanatulá. ʻOku pehē ʻi he “Līpooti ki he 2018” ʻa e Polokalama Fakameʻatokoni ʻa Māmaní: “ʻI māmani lahi, ko e kakai ʻe toko 821 miliona ʻoku nau fiekaia—pea mate fiekaia ʻa e toko 124 miliona.” Kuo mate ʻa e fānau ʻe toko 3.1 miliona nai ʻi he taʻu taki taha ko e fakatupunga ʻe he fasimanavá. ʻI he 2011, ko e tupuʻanga eni ʻo e pēseti ʻe 45 nai ʻo e mate ʻa e fanaú ʻi māmani lahí.

4. MAHAKI MO E MAHAKI FAKAʻAUHA

ʻOku pehē ʻe ha tohi ʻa e Kautaha Moʻui ʻa Māmaní: “Ko e senituli hono 21 kuo fakaʻilongaʻi ʻaki ia ʻa e ngaahi mahaki fakaʻauha lalahi. Ko e ngaahi mahaki ʻi he kuohilí—ko e kōlela, plague mo e mofi engeenga—kuo nau toe ʻasi mai, pea kuo ʻasi mo e ngaahi mahaki foʻou—ko e SARS, fulū, MERS, ʻĒpola mo e Sika.” Ko e mahaki faka‘auha COVID-19 ko e fakamuimui tahá ia. Neongo ʻa e ʻilo lahi ʻa e kau faisaienisí mo e kau toketaá ki he puké, kuo ʻikai malava ke nau ʻiloʻi ha faitoʻo ki he kotoa ʻo e ngaahi mahamahakí.

5. NGĀUE FAKAMALANGA ʻI MĀMANI LAHI

Naʻe toe lave ʻa Sīsū ki he konga ʻo e fakaʻilongá ʻi heʻene tomuʻa tala: “Ko e ongoongo lelei ko ʻeni ʻo e Puleʻangá ʻe malangaʻi ia ʻi he kotoa ʻo e māmani kuo nofoʻí ko ha fakamoʻoni ki he ngaahi puleʻanga kotoa pē, pea ʻe toki hoko mai ʻa e ngataʻangá.” (Mātiu 24:14) Lolotonga ʻa e fekuki ʻa e māmaní mo e ngaahi palopalema fakalilifu, ko e kakai ʻe toko valu miliona tupu mei he ngaahi puleʻangá kotoa ʻoku nau talaki ʻa e ongoongo lelei ʻo e Puleʻanga ʻo e ʻOtuá ʻi he fonua ʻe 240 ʻo ngāueʻaki ʻa e lea ʻe 1,000 tupu. Kuo teʻeki ke hoko ha meʻa pehē ʻi he hisitōlia ʻo e tangatá.

Ko e ngaahi meʻa ʻoku faʻuʻaki ʻa e fakaʻilonga naʻe ʻomai ʻe Sīsuú ʻoku hoko ʻi he ʻahó ni. Ko e hā ʻoku totonu ke tau mahuʻingaʻia ai ʻi he moʻoniʻi meʻa ko iá? Koeʻuhi naʻe pehē ʻe Sīsū: “ʻI hoʻomou sio ʻoku hoko ʻa e ngaahi meʻá ni, mou ʻiloʻi leva ʻoku ofi ʻa e Puleʻanga ʻo e ʻOtuá.”—Luke 21:31.

Ko e fakaʻilonga naʻe ʻomai ʻe Sīsuú, fakataha mo e fakahokohoko taimi ʻi he Tohi Tapú, ʻoku tokoniʻi ai kitautolu ke tau mahinoʻi naʻe fokotuʻu ʻe he ʻOtuá hono Puleʻangá ʻi hēvani ʻi he taʻu 1914. a ʻI he taimi ko iá, naʻá ne fakanofo hono ʻAló, ʻa Sīsū Kalaisi, ko e Tuʻi. (Saame 2:2, 4, 6-9) ʻOku vavé ni ke pule mai ʻa e Puleʻanga ʻo e ʻOtuá ki he māmaní, pea te ne toʻo kotoa atu ʻa e ngaahi founga-pule kehé pea ʻai ʻa e māmaní ko ha palataisi ke moʻui taʻengata ai ʻa e faʻahinga ʻo e tangatá.

ʻOku vavé ni ke fakahoko ʻa e ngaahi lea ʻi he sīpinga lotu naʻe akoʻi mai ʻe Sīsuú: “Ke hoko mai ho Puleʻangá. Ke fai ho finangaló, ʻo hangē ko ia ʻi hēvaní, ke pehē foki ʻi māmani.” (Mātiu 6:10) Ko e hā kuo fakahoko ʻe he Puleʻangá talu mei heʻene kamata pule ʻi he 1914? Pea ko e hā ʻoku tau fakatuʻotuʻa atu ki aí ʻi he taimi ʻe pule fakaʻaufuli mai ai ʻa e Puleʻangá ki he faʻahinga ʻo e tangatá?