ʻI he kupu ki muʻá, naʻa tau lāulea ai ki he fakaʻilonga naʻe ʻomai ʻe Sīsū. ʻOku ʻomai ʻi he fakaʻilonga ko iá ha fakamoʻoni hā mahino ko e Puleʻanga ʻo e ʻOtuá kuo fokotuʻu ʻi hēvani pea ko hono Tuʻí ʻa Sīsū Kalaisi.

ʻOku pehē ʻe he Tohi Tapú ʻi he kamata pule ʻa Sīsū ʻi he Puleʻangá, te ne kapusi ʻa Sētane mo ʻene fanga tēmenioó mei hēvani. ʻI he taimí ni, ʻoku ngata pē ʻenau fāliungá ʻi he māmaní, ʻa ia ko e ʻuhinga ia ʻe taha kuo toe kovi ange ʻa e ngaahi meʻá talu mei he 1914.—Fakahā 12:7, 9.

Neongo ʻa e fakaʻaʻau ke kovi ange ʻa e ngaahi tuʻunga ʻo e māmaní, ko Sīsū, ko e Tuʻi ʻo e Puleʻanga ʻo e ʻOtuá, kuó ne fai ha meʻa ke tokoniʻi ʻa e kakai takatakai ʻi he māmaní. ʻOku tau fakamālō ki he ngāue fakaeako Tohi Tapu ʻi māmani lahi naʻe tomuʻa tala ʻe Sīsuú, ko e tokolahi ʻoku nau ako mo ngāueʻaki ai ʻa e moʻoni mei he Tohi Tapú ʻi heʻenau moʻui fakaʻahó. (ʻAisea 2:2-4) Ko e laui miliona kuo nau ako ke maʻu ha vakai mafamafatatau ki he ngāué, fakaleleiʻi ʻenau moʻui fakafāmilí, pea fiefia ʻi he ngaahi meʻa fakamatelié kae ʻikai hoko ʻo pōpula ki ai. ʻOku ako ʻa e kakai ko ení ke nau maʻu ʻaonga he taimí ni pea nau hoko ko e faʻahinga kakai ʻoku finangalo ʻa e ʻOtuá ke ʻi he malumalu hono Puleʻangá.

Neongo kuo pule ʻa Sīsū ʻi hēvani, ko e ngaahi puleʻanga fakaetangatá ʻoku nau kei pule pē ʻi he māmaní. Kae kehe, naʻe tala ange ʻe he ʻOtuá kia Sīsū: “ʻAlu atu ʻo pule ʻi he lotolotonga ʻo ho ngaahi filí.” (Saame 110:2) ʻOku vavé ni ke fakaʻauha ʻosi ʻe Sīsū ʻa e kotoa hono kau fakafepakí pea ʻoange ʻa e fakafiemālie ki he faʻahinga ʻoku nau loto-lelei ke talangofua ki he ʻOtuá.

Lolotonga ʻa e taimi ko iá, ko e Puleʻanga ʻo e ʻOtuá te ne

• Fakaʻauha ʻa e lotu loí. Ko e ngaahi lotu kuo nau akoʻi ʻa e ngaahi loi fekauʻaki mo e ʻOtuá pea ʻai ke faingataʻa ʻa e moʻui ʻa e kakaí ʻe toʻo atu. ʻOku fakatātaaʻi ʻi he Tohi Tapú ʻa e lotu loí ki ha fefine feʻauaki. Ko hono fakaʻauha iá ʻe hoko ʻo fakaʻohovale ki he tokolahi.—Fakahā 17:15, 16.

• Fakaʻauha ʻa e founga-pule fakaetangatá. Ko e Puleʻanga ʻo e ʻOtuá te ne fakaʻauha ʻa e founga-pule fakaetangata kotoa.—Fakahā 19:15, 17, 18.

• Toʻo atu ʻa e kakai fulikivanú. Kae fēfē ʻa e faʻahinga ʻoku nau hokohoko atu ke fai ʻa e meʻa ʻoku koví pea ʻikai fie talangofua ki he ʻOtuá? “Ko e meʻa ki he kau fulikivanú, ʻe tuʻusi atu kinautolu mei he māmaní.”—Palōveepi 2:22.

• Toʻo ʻosi atu ʻa Sētane mo ʻene fanga tēmenioó. Ko Sētane mo ʻene fanga tēmenioó heʻikai lava ke nau “toe takihalaʻi ʻa e ngaahi puleʻangá.”—Fakahā 20:3, 10.

Ko e hā hono ʻuhinga ʻo e ngaahi meʻá ni ki he faʻahinga ʻoku nau tali ʻa e Puleʻanga ʻo e ʻOtuá?

ʻI he pule ʻa Sīsū ko e Tuʻi ʻi hēvaní, te ne fakahoko ʻa e meʻa lahi ange ia ʻi ha meʻa ʻe faifai ange pea fai ʻe ha pule fakaetangata. ʻE tokoni kiate ia ʻa hono kaungāpule ʻe toko 144,000, ʻa ia ko e fili mei he faʻahinga ʻo e tangatá. (Fakahā 5:9, 10; 14:1, 3) Te ne fakapapauʻi ʻe fakahoko ʻa e finangalo ʻo e ʻOtuá ʻi heni ʻi he māmaní. Ko e hā ʻe fai ʻe he Puleʻanga ʻo e ʻOtuá maʻá e kakai ʻi he māmaní?

• Toʻo ʻosi atu ʻa e mahamahakí mo e maté. “ʻE ʻikai ha taha ʻoku nofo ai te ne pehē: ‘ʻOku ou puke’” pea “ʻe ʻikai ke toe ʻi ai ha mate.”—ʻAisea 33:24; Fakahā 21:4.

• Papau ʻa e melino mo e malu moʻoní. “Ko e nonga ʻa ho ngaahi fohá ʻe lahi fau” pea “te nau tangutu taki taha ʻi hono lalo kālepi pea ʻi hono lalo fiki, pea ʻe ʻikai ha taha te ne ʻai kinautolu ke nau ilifia.”—ʻAisea 54:13; Maika 4:4.

• ʻOmai ha ngāue mohu ʻuhinga. “Ko e ngāue ʻa honau nimá ʻe fiefia kakato ai ʻa e faʻahinga kuó u filí. ʻE ʻikai taʻeʻaonga ʻa ʻenau fakaongosiá.”—ʻAisea 65:22, 23.

• Fakaleleiʻi ʻa e palopalema ʻi he ʻātakaí. “ʻE fiefia ʻa e toafá mo e fonua pakukaá, pea ʻe mavava ʻa e toafa tokaleleí pea matala ʻo hangē ko e lilé.”—ʻAisea 35:1.

• Akoʻi ʻa e kakaí ki he meʻa ʻoku fiemaʻu ke nau fai ke maʻu ai ʻa e moʻui taʻengatá. “Ko ʻeni ia ʻe maʻu ai ʻa e moʻui taʻengatá, ko ʻenau hoko ʻo ʻiloʻi koe, ko e ʻOtua moʻoni pē taha, pea mo e tokotaha ko ia naʻá ke fekau maí, ʻa Sīsū Kalaisi.”—Sione 17:3.

Ko e finangalo ʻo e ʻOtuá ke ke maʻu ʻa e ngaahi tāpuaki ko iá. (ʻAisea 48:18) Ko e kupu hono hokó ʻe fakamatalaʻi ai ʻa e meʻa ʻe lava ke ke fai he taimí ni ke ke maʻu ai ʻa e kahaʻu fakaofo ko ení.