1. Nofo Malí

ʻOku kehekehe ʻa e vakai ʻa e kakaí fekauʻaki mo e nofo malí mo e meʻa ke fai ke maʻu ha nofo mali fiefia.

ʻUHINGA: Ko e nofo malí ko ha fokotuʻutuʻu ia naʻe kamataʻi ʻe he ʻOtuá, ko ia ai, ʻokú ne ʻiloʻi ʻa e meʻa ʻoku fiemaʻu ki ha ongo meʻa ke na hoko ʻo fiefia. (Maʻake 10:​6-9) ʻOku maʻu ʻa e fiefiá ʻi he taimi ʻoku tokangataha ai ʻa e ngaahi hoa malí, ʻo ʻikai ki he meʻa ʻoku maʻu ʻe he tokotaha taki taha, ka ki he meʻa ʻoku lava ke ʻoatu ʻe he tokotaha ʻe tahá ke fakaivimālohiʻi ʻaki ʻena nofo malí. Ko ha husepāniti ʻoku ʻofa ʻi hono uaifí te ne fakahāhā ia ʻi he founga ʻokú ne fakafeangai mo tokangaʻi ai hono uaifí. Pea ko ha uaifi ʻokú ne fakaʻapaʻapaʻi hono husepānití te ne fakahāhā ia ʻi he founga ʻo ʻene leá mo e ngāué.

ʻOKU ʻAONGA ʻA E TATAKI FAKATOHITAPÚ: Ko Quang mo Thi, mei Vietinemi, naʻá na ongoʻi heʻikai ʻaupito ke toe fiefia ʻena nofo malí. Naʻe faʻa anga-kovi ʻa Quang. ʻOkú ne pehē: “Naʻe ʻikai ke u tokanga ki he ngaahi ongoʻi ʻa Thi peá u faʻa fakamaaʻi ia.” Naʻe loto ʻa Thi ke na vete. Naʻá ne pehē: “Naʻá ku ongoʻi heʻikai lava ke u toe falala pe fakaʻapaʻapaʻi hoku husepānití.”

Faai atu pē, naʻe ako ʻe Quang mo Thi ʻa e meʻa ʻoku akoʻi ʻe he Tohi Tapú pea mo e founga ke ngāueʻaki ai ʻa e ʻEfesō 5:33 ʻi heʻena nofo malí. “Naʻe tokoniʻi au ʻe he veesi ko ení ke u sio ki he fiemaʻu ke hoko ʻo anga-leleí,” ko e lea ia ʻa Quang, “pea ke ʻai ʻa Thi ke ne ongoʻi ʻoku ʻofaʻi mo tokangaʻi ia fakamatelie, fakaesino mo fakaeongo. ʻI heʻeku fakahāhā iá, naʻá ne toe ʻofaʻi mo fakaʻapaʻapaʻi au.” Pea ʻoku pehē ʻe Thi, “Ko e lahi ange ʻeku ngāueʻaki ʻa e ʻEfesō 5:33 pea fakahāhā ʻa e fakaʻapaʻapa ki hoku husepānití, ko e lahi ange ia ʻene ʻai ke u ongoʻi ʻoku ʻofaʻi mo maluʻi au pea naʻá ku maʻu ʻa e nonga.”

 2. Founga ke Fakafeangai ki he Niʻihi Kehé

ʻOku faʻa ngaohikoviʻi ʻe he kakaí ʻa e niʻihi kehé koeʻuhí ko honau matakalí, fonuá, fōtunga hā maí, lotú pe ko e tangata pe fefine kinautolu.

ʻUHINGA: ʻOku ʻikai ke tali ʻe he Tohi Tapú ʻa e lau-lanú mo e tāufehiʻa ki he kau fakasōtomá pe ki he kakai mei he ngaahi fonua kehé. ʻI hono kehé, ʻokú ne fakaʻaiʻai kitautolu ke tau anga-fakaʻapaʻapa ki he kakai kotoa, tatau ai pē pe ko e hā honau matakalí, fonuá pe tuʻunga fakasōsialé. (Ngāue 10:34) Neongo kapau ʻoku ʻikai ke tau loto-tatau mo e meʻa ʻoku tui ki ai ʻa e niʻihi kehé pe ko ʻenau tōʻongá, ʻoku tau kei fakafeangai pē kiate kinautolu ʻi he anga-lelei mo e anga-fakaʻapaʻapa.—Mātiu 7:12.

ʻOKU ʻAONGA ʻA E TATAKI FAKATOHITAPÚ: Naʻe akoʻi ʻa Daniel ke ne vakai ki he kakai mei ʻĒsiá ko ha fakamanamana ki hono fonuá. Naʻá ne fehiʻa ʻi ha taha pē mei ha puipuituʻa faka-ʻĒsia pea te ne faʻa laukovi kiate kinautolu ʻi he feituʻu kakaí. “Naʻá ku fakatonuhiaʻi ʻeku tōʻongá ʻo pehē ko e ‘mamahiʻi-fonua,’” ko e lea ia ʻa Daniel. “Naʻe ʻikai haʻaku teitei fakakaukau naʻe hala ‘a e anga ʻeku vakaí pe ko ʻeku tōʻongá.”

Naʻe faai atu pē ʻo ako ʻa Daniel fekauʻaki mo e meʻa ʻoku akoʻi ʻe he Tohi Tapú. “Naʻe pau ke u liliu fakaʻaufuli ʻeku fakakaukaú,” ko e lea ia ʻa Daniel. “Naʻe pau ke u sio ki he kakaí ʻo hangē ko e vakai ʻa e ʻOtuá—ʻa ia ʻoku tau tatau kotoa pē neongo pe ko fē ʻa e feituʻu ʻoku tau haʻu mei aí.” ʻOku fakamatalaʻi ʻe Daniel ʻa e anga ʻene ongoʻi he taimí ni ʻi heʻene fetaulaki mo e kakaí. ʻOkú ne pehē: “ʻOku ʻikai ke u faʻa fakakaukau fekauʻaki mo e feituʻu ʻoku nau haʻu mei aí. ʻI he taimí ni ʻoku ou ʻofa ki he faʻahinga kakai kotoa pē pea ʻoku ou maʻu ʻa e ngaahi kaungāmeʻa ofi mei he māmaní takatakai.”

 3. Paʻangá

Ko e tokolahi ʻoku nau tuli ki he tuʻumālié koeʻuhi ke nau fiefia pea maʻu ha kahaʻu lelei ange.

ʻUHINGA: ʻOku tau fiemaʻu ʻa e paʻangá, ka heʻikai lava ke ne fakapapauʻi mai ʻetau fiefiá pe ko hotau kahaʻú. (Palōveepi 18:11; 23:​4, 5) ʻI hono kehé, ko e fiefia moʻoní mo e kahaʻu malú ʻoku makatuʻunga ia ʻi hono ngāueʻaki ʻa e poto mei he ʻOtuá ʻa ia ʻoku ʻi he Tohi Tapú.—1 Tīmote 6:​17-19.

ʻOKU ʻAONGA ʻA E TATAKI FAKATOHITAPÚ: Ko Cardo, ko ha tangata ʻi ʻInitonēsia, naʻá ne tokangataha ki he feinga ke tuʻumālié. “Naʻá ku maʻu ʻa e meʻa ʻoku fakaʻānaua ki ai ʻa e kakai tokolahi,” ko ʻene leá ia. “Naʻe lava ke u fefolauʻaki, pea fakatau ʻa e ngaahi koloa totongi mamafa, ʻū meʻalele mo e ngaahi fale masani.” Ko e tuʻumālie ko iá naʻe ʻikai ke tolonga. “Naʻe kākaaʻi au, pea ko e paʻanga naʻá ku ngāue mālohi ki ai ʻi he ngaahi taʻu kotoa ko iá naʻe mole ia ʻi ha foʻi kemo pē,” ko e lea ia ʻa Cardo. “Naʻá ku fakamoleki ʻeku moʻuí ʻi he tuli ki he tuʻumālié, ka ʻi he ʻosi angé, ko e meʻa pē naʻá ku maʻú ko e ongoʻi ʻoku honge ifo ʻa e moʻuí, ongoʻi taʻefeʻunga mo loto-mamahi.”

Naʻe kamata ke ngāueʻaki ʻe Cardo ʻa e faleʻi ʻa e Tohi Tapú fekauʻaki mo e paʻangá. ʻOku ʻikai ke ne toe fakahangataha hono iví kotoa ki he tānaki koloá ka ʻokú ne fili ke moʻui faingofua. “Ko e koloa moʻoni mo tuʻuloá ko hono maʻu ha vahaʻangatae lelei mo e ʻOtuá,” ko ʻene leá ia. “ʻOku lava ke u mohe fiemālie ʻi he pō kotoa, pea ʻoku ou fiefia moʻoni.”

 4. Fehokotaki Fakasinó

ʻOku maʻu ʻe he kakaí ʻa e ngaahi fakakaukau kehekehe ki he meʻa ʻoku ala tali ʻi he fekauʻaki mo e fehokotaki fakasinó.

ʻUHINGA: ʻOku fakangatangata ʻe he Tohi Tapú ʻa e founga ʻoku totonu ke tau fakahāhā ai ʻetau holi fakaefehokotaki fakasinó. Ko e kupuʻi lea “fehokotaki fakasino taʻetāú” ʻoku kau ai ʻa e tonó, feʻauakí, fehokotaki fakasino ʻi he vahaʻa ʻo e faʻahinga taʻemali tāutahá, fakasōtomá, pea mo e mohe mo e manú. (1 Kolinitō 6:​9, 10) Ko e fehokotaki fakasinó ko ha meʻaʻofa ia mei he ʻOtuá ʻa ia naʻá ne fakataumuʻa pē ia ki ha tangata mo ha fefine ʻokú na mali.—Palōveepi 5:​18, 19.

ʻOKU ʻAONGA ʻA E TATAKI FAKATOHITAPÚ: Ko ha fefine ʻi ʻAositelēlia ko Kylie ʻokú ne pehē: “ʻI hoku tuʻunga ko ha tokotaha taʻemali, naʻá ku fakakaukau kapau te u fehokotaki fakasino, te u ongoʻi fiemālie mo ʻofaʻi. Ka naʻe ʻikai ko e meʻa ia naʻe hokó. Naʻá ku ongoʻi taʻefiemālie mo loto-mamahi lahi ʻaupito.”

Ki mui aí, naʻe ako pea ngāueʻaki ʻe Kylie ʻa e meʻa ʻoku akoʻi ʻe he Tohi Tapú fekauʻaki mo e fehokotaki fakasinó. “ʻOku lava ke u sio ko e ngaahi tuʻunga ʻa e ʻOtuá ʻoku ʻi aí ke maluʻi kitautolu mei he langá mo e mamahí,” ko ʻene leá ia. “ʻI he taimí ni ʻoku ou ongoʻi fiemālie mo ʻofaʻi koeʻuhí ko hono fai ʻa e ngaahi meʻá ʻi he founga ʻoku loto ki ai ʻa Sihová. Ko hono ngāueʻaki ʻa e tataki Fakatohitapú kuó ne fakahaofi au mei he loto-mamahi lahí!”