FOUNGA KE FAKANGATA AI ʻA E TUPULAKI ʻA E TĀUFEHIʻÁ
2 | ʻOua ʻe Faisāuni
Akonaki ʻa e Tohi Tapú:
“ʻOua ʻe fetongi ʻa e koví ʻaki ʻa e kovi ki ha taha. . . . ʻO ka ala lava, ʻo fakatatau ki he lahi taha ʻo hoʻomou malavá, mou nofo melino mo e tangata kotoa pē. ʻOua te mou faisāuni maʻamoutolu, . . . he kuo tohi: ‘“Ko e sāuní ʻoku ʻaʻaku ia; te u fai ʻe au ʻa e totongi fakafokí,” ko e folofola ia ʻa Sihová.’”—LOMA 12:17-19.
Ko Hono ʻUhingá:
Neongo ʻoku fakanatula ke ongoʻi ʻita ʻi he taimi ʻoku faihala mai ai ha taha, ʻoku ʻikai ke tali ʻe he ʻOtuá ke tau faisāuni. ʻI hono kehé, ʻokú ne ekinaki mai ke tau tatali kiate ia koeʻuhí ʻoku vavé ni ke ne fakatonutonu ʻa e faihala kotoa pē.—Saame 37:7, 10.
Meʻa ʻe Lava Ke Ke Faí:
ʻI he taimi ʻoku faisāuni ai ʻa e tangata taʻehaohaoá, ʻoku ʻai ai ke toe tupulaki ʻa e tāufehiʻá. Ko ia ai, kapau kuo fakaʻitaʻi koe ʻe ha taha pe fai atu ha kovi kiate koe, ʻoua ʻe faisāuni. Feinga ke tali ʻi he melino pea mapuleʻi-kita. ʻI he ngaahi tuʻunga ʻe niʻihi, ko e lelei tahá ke tukunoaʻi ʻa e meʻa naʻe hokó. (Palōveepi 19:11) Ka ʻi he tuʻunga ʻe niʻihi, ʻoku hā mahino ʻe lelei ange nai ke ke fai ha ngāue ki he meʻa naʻe hokó. Ko e fakatātaá, ʻi he ngaahi tuʻunga ʻoku maʻukovia ai koe ʻi ha faihia, te ke fili nai ke līpooti ʻa e faihiá ki he kau polisí pe ki ha kau maʻu mafai kehe.
Ko e faisāuní ʻoku fakatuʻutāmaki pē kia kita
Fēfē kapau ʻoku hā ngali ʻoku ʻikai ke ʻi ai ha founga melino ke fakaleleiʻi ai ʻa e palopalemá? Pe fēfē kapau kuó ke fai ʻa e meʻa kotoa ʻokú ke malavá ke fakaleleiʻi ia ʻi ha founga melino? ʻOua ʻe faisāuni. ʻOku ngalingali ʻe ʻai ai ke toe kovi ange ʻa e tuʻungá. ʻI hono kehé, fakangata ʻa e tupulaki ʻa e tāufehiʻá. ʻE lava ke ke ako ke falala ki he founga hono fakaleleiʻi ʻe he ʻOtuá ʻa e palopalemá. “Falala kiate ia, pea te ne fai ha meʻa maʻau.”—Saame 37:3-5.
Te Ke Fie Vakai Foki ki Heni
LILIU ʻE HE TOHI TAPÚ ʻA E MOʻUÍ
Naʻá Ku Loto ke Tauʻi ʻa e Fakamaau Taʻetotonú
Naʻe kau ʻa Rafika ki ha kiʻi kulupu ke tauʻi ʻa e fakamaau taʻetotonú. Ka naʻá ne ʻiloʻi ʻi he Tohi Tapú ʻa e talaʻofa ʻo e melino mo e fakamaau totonú fakafou pē ʻi he Puleʻanga ʻo e ʻOtuá.
LILIU ʻE HE TOHI TAPÚ ʻA E MOʻUÍ
Ko Fē ʻa e Taimi ʻE Ikunaʻi Ai ʻe he ʻOfa Mateakí ʻa e Tāufehiʻá?
Ko e ikuʻi ʻo e tomuʻa fehiʻá ʻe lava ke faingataʻa. Sio ki he anga hono ikuʻi lavameʻa eni ʻe ha Siu mo ha ʻAlepea.
