Naʻe fanongonongo ʻe Sīsū ha pōpoaki ʻo e melino. Neongo ia, ʻi he taimi ʻe taha, naʻá ne tala ange ki heʻene kau ʻapositoló: “ʻOua ʻe fakakaukau naʻá ku haʻu ke ʻomi ha melino ki he māmaní; naʻá ku haʻú ke ʻomi, ʻo ʻikai ko ha melino, ka ko ha heletā. He naʻá ku haʻu ke fakatupunga ha māvahevahe, ʻi ha tangata mo ʻene tamaí, pea mo ha taʻahine mo ʻene faʻeé, pea mo ha ʻofefine-ʻi-he-fono mo ʻene faʻē-ʻi-he-fonó.” (Māt. 10:34, 35) Ko e hā naʻe ʻuhinga ki ai ʻa Sīsuú?

Naʻe ʻikai loto ʻa Sīsū ke fakamavahevaheʻi ʻa e ngaahi mēmipa ʻo e fāmilí, ka naʻá ne ʻiloʻi ko ʻene ngaahi akonakí te ne fakatupunga ha māvahevahe ʻi he ngaahi fāmili ʻe niʻihi. Ko ia ai, ko e faʻahinga ʻoku loto ke hoko ko e kau ākonga ʻa Kalaisi pea papitaisó ʻe fiemaʻu ke nau lāuʻilo ki he nunuʻa ʻo ʻenau filí. Kapau te nau fehangahangai mo ha fakafepaki mei ha hoa taʻetui pe ko e niʻihi kehe ʻi he fāmilí, ʻe hoko ko ha pole ʻa e nofoʻaki faitōnunga ki he ngaahi akonaki ʻa Kalaisí.

ʻOku fakalototoʻaʻi ʻe he Tohi Tapú ʻa e kau Kalisitiané ke nau “nofo melino mo e tangata kotoa pē.” (Loma 12:18) Ka ko e ngaahi akonaki ʻa Sīsuú ʻe lava ke hoko “ko ha heletā” ʻi he ngaahi fāmili ʻe niʻihi. ʻOku hoko eni ʻi he taimi ʻoku tali ai ʻe ha mēmipa ʻo ha fāmili ʻa e ngaahi akonaki ʻa Sīsuú lolotonga iá ʻoku talitekeʻi pe fakafepakiʻi ia ʻe he niʻihi kehé. ʻI ha tuʻunga pehē, ko e kāinga ʻo e tokotaha ʻokú ne ako ʻa e moʻoní pe ko e faʻahinga ʻi hono falé​—te nau hoko ko hono “ngaahi fili.”​—Māt. 10:36.

Ko e kau ākonga ʻa Kalaisi ʻoku nau nofo ʻi ha ʻapi māvahevahe fakalotu ʻoku nau fehangahangai ʻi he taimi ʻe niʻihi mo e ngaahi tuʻunga ʻoku ʻahiʻahiʻi ai ʻenau ʻofa kia Sihova mo Sīsuú. Ko e fakatātaá, ʻe fakaʻaiʻai nai kinautolu ʻe he ngaahi kāinga taʻetuí ke kātoangaʻi ha ʻaho mālōlō fakalotu. ʻI hono ʻahiʻahiʻi kinautolú, ko hai te nau fakahōhōʻiaʻí? Naʻe pehē ʻe Sīsū: “ʻIlonga ʻa ia ʻoku lahi hake ʻene ʻofa ki heʻene tamaí pe ko ʻene faʻeé ʻiate aú ʻoku ʻikai taau ia mo au.” (Māt. 10:37) Ko e moʻoni, naʻe ʻikai ke pehē ʻe Sīsū ia ʻe lau ʻoku taau ʻene kau ākongá mo ia kapau ʻe siʻisiʻi ange ʻenau ʻofa ʻi heʻenau mātuʻá. ʻI hono kehé, naʻá ne fakamamafaʻi ʻa hono tauhi ʻa e ngaahi meʻá ke ʻi honau tuʻunga totonú. Kapau ʻoku fakafepakiʻi ʻe he ngaahi mēmipa taʻetui ʻo e fāmilí ʻetau feinga ke lotu kia Sihová, ʻoku hokohoko atu pē ʻetau ʻofa ʻiate kinautolú, ka ʻoku tau ʻiloʻi ko ʻetau ʻofa ki he ʻOtuá ʻoku muʻomuʻá.

ʻOku ʻikai ha veiveiua, ko e fakafepaki mei he fāmilí ʻe lava ke mātuʻaki fakamamahi. Neongo ia, ʻoku manatuʻi ʻe he kau ākonga ʻa Sīsuú ʻene leá: “ʻIlonga ʻa ia ʻoku ʻikai te ne tali ʻa ʻene ʻakau fakamamahí pea muimui ʻiate aú ʻoku ʻikai taau ia mo au.” (Māt. 10:38) ʻI hono fakalea ʻe tahá, ʻoku vakai ʻa e kau Kalisitiané ki he fakafepaki mei he fāmilí ko e konga ia ʻo e faingataʻa ʻoku loto-lelei ʻa e kau ākonga ʻa Kalaisí ke tali. ʻI he taimi tatau, ʻoku nau ʻamanaki ko ʻenau tōʻonga leleí te ne ueʻi ʻa e ngaahi mēmipa taʻetui honau fāmilí ke liliu ʻenau fakakaukaú pea sivisiviʻi ʻa e pōpoaki ʻa e Tohi Tapú.​—1 Pita 3:1, 2.