Ko Mary mo hono husepānití, ʻa John, a naʻá na nofo ʻi ha tapa ʻo e māmaní ʻa ia ʻe lava ke vahevahe ai ʻa e ongoongo leleí ki he kau ngāue muli tokolahi mei he ʻOtu Motu Filipainí. Lolotonga ʻa e mahaki fakaʻauha COVID-19, naʻe kamataʻi ola lelei ʻe Mary ha ngaahi ako Tohi Tapu ʻo ʻikai ʻi he feituʻu pē naʻá ne nofo aí kae toe pehē foki ki he ngaahi feituʻu kehe ʻi he māmaní. Naʻe anga-fēfē ʻene fai iá?

ʻE ʻeke ʻe Mary ki heʻene kau ako Tohi Tapú, “ʻOkú ke ʻilo ha toe taha ʻe saiʻia ke ako ʻa e Tohi Tapú?” Kapau te nau pehē ʻio, te ne kole ange ke fakafeʻiloaki ia kiate kinautolu. Ko hono ʻeke ʻa e fehuʻi faingofua ko ení kuo faʻa ola lelei. Ko e hā hono ʻuhingá? Koeʻuhi ko e kakai ʻoku nau houngaʻia ʻi he Folofola ʻa e ʻOtuá ʻoku nau faʻa loto ke vahevahe ʻa e meʻa ʻoku nau akó ki he ngaahi mēmipa ʻi honau fāmilí mo e ngaahi kaungāmeʻa ʻoku nau tokanga ki aí. Ko e hā ʻa e ola kuo maʻu ʻi hono ʻeke ʻa e fehuʻi ko ení?

Ko e ako Tohi Tapu ʻa Mary ko Jasmin naʻá ne fakafeʻiloaki ia ki ha kau ako Tohi Tapu foʻou ʻe toko fā. Ko e taha ʻo kinautolu, ko Kristine, naʻá ne fiefia lahi ʻi heʻene akó ʻo ne kole ai kia Mary ke na ako tuʻo ua he uike. ʻI he ʻeke ange ʻe Mary pe naʻá ne ʻiloʻi ha toe taha naʻá ne loto ke ako ʻa e Tohi Tapú, naʻe pehē ʻe Kristine, “ʻIo, te u fakafeʻiloaki atu hoku ngaahi kaumeʻá kiate koe.” ʻI ha ngaahi uike siʻi, naʻe fakafeʻiloaki ʻe Kristine ha toko fā ʻo hono ngaahi kaumeʻá kia Mary ʻa ia naʻa nau loto ke ako. Ki mui ai, naʻe toe fakafeʻiloaki ange ʻe Kristine hono ngaahi kaumeʻa kehe, ko e niʻihi ai naʻa nau toe fai ʻa e meʻa tatau.

Naʻe toe loto ʻa Kristine ke ako ʻe hono fāmili ʻi he ʻOtu Motu Filipainí ʻa e Tohi Tapú. Ko ia naʻá ne talanoa ki hono ʻofefiné, ʻa Andrea. ʻI he kamatá, naʻe fakakaukau ʻa Andrea, ‘Ko e Kau Fakamoʻoní ko ha kulupu lotu mavahe, ʻoku ʻikai ke nau tui kia Sīsū, pea ʻoku nau ngāueʻaki pē ʻa e Fuakava Motuʻá.’ Ka ʻi he hili pē ha foʻi ako ʻe taha, naʻe fakamāʻalaʻala ʻene ngaahi maʻuhalá. Lolotonga ʻene ngaahi akó, te ne fakaofoofo, “Kapau ko e lau ia ʻa e Tohi Tapú, tā kuo pau pē ʻoku moʻoni!”

Faai atu pē, naʻe fakafeʻiloaki ʻe Andrea ʻa Mary ki hano ongo kaumeʻa pea mo ha kaungāngāue ʻa ia naʻa nau kamata ako. Pehē foki, naʻe ʻikai ke ʻiloʻi ʻe Mary, naʻe fakafanongo atu pē ki heʻena akó ʻa e mehikitanga ʻo Andrea, ʻa Angela ʻa ia ʻoku kui. ʻI he ʻaho leva ʻe taha, naʻe kole ʻe Angela kia Andrea ke ne fakafeʻiloaki ia kia Mary pea kole ke ne ako Tohi Tapu. Naʻe saiʻia ʻa Angela ʻi he meʻa naʻá ne akó. ʻI loto ʻi ha māhina ʻe taha, naʻá ne maʻuloto ʻa e ngaahi konga Tohi Tapu lahi pea loto ke ako tuʻo fā he uike! Pea ʻi he tokoni ʻa  Andrea, naʻe kamata ke maʻu maʻu pē ʻe Angela ʻa e fakatahá fakafou ʻi he tā vitioó.

ʻI he ʻiloʻi ʻe Mary ko e husepāniti ʻo Kristine, ʻa Joshua, naʻá ne ʻi ai lolotonga ʻa e ngaahi ako ʻa Kristine, naʻe ʻeke ange ʻe Mary pe te ne saiʻia ke kau ʻi he akó. Naʻe pehē ange ʻe Joshua, “Te u fanongo pē, kae ʻoua ʻe ʻeke mai ha ngaahi fehuʻi kiate au; kapau te ke ʻeke mai, te u mavahe au.” ʻI he ʻuluaki miniti pē ʻe nima ʻo e akó, naʻe lahi ange ʻa e ngaahi fehuʻi naʻá ne ʻeké ʻia Kristine pea naʻá ne loto ke hokohoko atu ʻa e ngaahi fetalanoaʻaki ʻi he Tohi Tapú.

Ko e fehuʻi faingofua ʻa Mary naʻe taki atu ki he ngaahi ako Tohi Tapu lahi. Naʻá ne fokotuʻutuʻu ki ha niʻihi ʻo ʻene kau akó ke tokoniʻi ʻe he ngaahi kaungā-Fakamoʻoní. ʻI he fakakātoá, naʻe kamataʻi ʻe Mary ʻa e ngaahi ako Tohi Tapu ʻe 28 ʻi he fonua kehekehe ʻe fā.

Ko Jasmin, ʻa e fuofua tokotaha ako naʻe lave ki ai ʻi he hokosia ko ení, naʻá ne papitaiso ʻi ʻEpeleli 2021. Naʻe papitaiso ʻa Kristine ʻi Mē 2022 pea kuó ne foki ki he ʻOtu Motu Filipainí ke fakataha mo hono fāmilí. Ko e toko ua kehe naʻe fakafeʻiloaki ʻe Kristine kia Mary naʻá na papitaiso foki. Naʻe papitaiso ʻa Angela ʻi ha ngaahi māhina siʻi ki mui ai pea ʻokú ne tāimuʻa tuʻumaʻu he taimí ni. Ko e husepāniti ʻo Kristine, ʻa Joshua, pea mo hona ʻofefiné, ʻa Andrea, pea pehē ki he kau ako kehe ʻoku nau fai ha fakalakalaka lelei.

ʻI he ʻuluaki senitulí, naʻe mafola vave ʻa e ongoongo leleí ʻi he ngaahi mēmipa ʻo e fāmilí mo e ngaahi kaumeʻá. (Sione 1:​41, 42a; Ngā. 10:​24, 27, 48; 16:​25-33) Fēfē ke ke ʻeke ki hoʻo kau ako Tohi Tapú mo e faʻahinga mahuʻingaʻia kehé, “ʻOkú ke ʻilo ha toe taha ʻe saiʻia ke ako ʻa e Tohi Tapú?” Ko hai ʻokú ne ʻilo ʻa e lahi ʻo e ngaahi ako ʻe lava ke kamataʻi ʻi hono ʻeke ʻe ha taha pē ʻa e foʻi fehuʻi faingofua ko ení?