Ko e fakatātaá, na‘e taonakita ha foha ‘o ha tokoua ‘e taha. Na‘e loto-mamahi lahi ‘a e tamaí. Na‘á ne fifili pe na‘e ‘osi ‘ilo‘i ‘e Sihova ia ‘a e me‘a ‘e hoko ‘i he kaha‘ú pea fakapapau‘i te ne malava mo hono uaifí ke kātekina ‘a e faingata‘a ko ení. ‘I he fokotu‘utu‘u lolotonga ko ení, ko e tokolahi ‘o kitautolu te tau fehangahangai mo e ngaahi faingata‘a. Ko ia ‘oku totonu ke tau tui ‘oku pule‘i ‘e Sihova ‘a e me‘a kotoa pē ‘oku hoko ‘i he‘etau mo‘uí?

‘I he‘etau sivisivi‘i ‘a e 1 Kolinitō 10:13, te tau ‘ilo‘i ai ‘oku ‘ikai ke poupou‘i ‘e he Tohi Tapú ‘a e fakakaukau ‘o pehē ‘oku tomu‘a ‘ilo‘i ‘e Sihova ‘a e me‘a ‘e lava ke tau kātekiná, peá ne fakapapau‘i leva ‘a e ‘ahi‘ahi te tau fehangahangai mo iá. Ko e hā ‘oku lava ke tau lea‘aki ai ení? Tau sivisivi‘i ‘a e ‘uhinga ‘e fā.

‘Uluakí, na‘e ‘oange ‘e Sihova ki he fa‘ahinga ‘o e tangatá ‘a e tau‘atāina ke filí, ko e tau‘atāina ke fai ‘a e ngaahi fili. ‘Okú ne loto ke tau fai pē ‘e kitautolu ‘etau filí. (Teu. 30:19, 20; Sios. 24:15) Kapau te tau fai ai ‘a e ngaahi fili ‘oku fakahōifua kia Sihová, ‘e lava ke tau falala kiate ia ke ne tataki kitautolu. (Pal. 16:9) Ka ‘i he taimi te tau fai ai ha ngaahi fili kovi, kuo pau ke tau utu ‘a e ngaahi nunu‘a ko iá ‘i he‘etau mo‘uí. (Kal. 6:7) Ko ia kapau na‘e fili ‘e Sihova ‘a e ngaahi ‘ahi‘ahi na‘a tau fehangahangai mo iá, ‘oku tau tau‘atāina mo‘oni ai ‘i hono fai ‘etau ngaahi filí?

Uá, ‘oku ‘ikai ke malu‘i kitautolu ‘e Sihova mei he ngaahi me‘a ‘oku “hokonoa.” (Koh. 9:11) ‘E hokosia nai ‘e ha taha ha fakatamaki koe‘uhí pē ko ‘ene ‘i he feitu‘u hala ‘i he taimi hala. Na‘e lea ‘a Sīsū ‘o fekau‘aki mo ha fakatamaki ‘a ia na‘e mate ai ‘a e kakai ‘e toko 18 ‘i he taimi na‘e holo ai ha taua ‘iate kinautolu. Na‘á ne fakahaa‘i mahino na‘e ‘ikai ko e ‘Otuá na‘á ne fakatupunga ‘enau maté. (Luke 13:1-5) ‘Oku ‘ikai ‘uhinga lelei ke tau fakakaukau ko e ki mu‘a ke hoko ha fakatamakí, ‘oku ‘osi fakapapau‘i ‘e he ‘Otuá ia ‘a e tokotaha ‘e mo‘uí pe maté.

Tolú, ko kitautolu taki taha kuo pau ke tau tauhi ma‘u ‘etau anga-tonú kia Sihova. Na‘e pehē ‘e Sētane ‘oku tauhi pē ‘a e kau sevāniti ‘a Sihová kiate Ia koe‘uhí ko e me‘a ‘okú Ne ‘oange kia kinautolú. Na‘e taukave‘i ‘e Sētane ‘e ‘ikai ke tau hanganaki mateaki  kia Sihova kapau te tau hokosia ha ngaahi ‘ahi‘ahi. (Siope 1:9-11; 2:4; Fkh. 12:10) Kapau na‘e malu‘i kitautolu ‘e Sihova mei ha ngaahi ‘ahi‘ahi pau, ‘e hā ngali na‘e mo‘oni ‘a Sētane.

Faá, ‘oku ‘ikai ke fili ‘e Sihova ke ne ‘ilo‘i ‘a e me‘a kotoa pē ‘e tomu‘a hoko kiate kitautolú. Ko e mo‘oni, ‘oku lava ke ‘ilo‘i ‘e Sihova ‘a e me‘a ‘e hoko ‘i he kaha‘ú kapau te ne loto ki ai. (‘Ai. 46:10) Ka ‘oku fakahaa‘i mai ‘i he Tohi Tapú ‘oku ‘ikai ke fili ‘e Sihova ia ke ne tomu‘a ‘ilo‘i ‘a e me‘a kotoa pē. (Sēn. 18:20, 21; 22:12) ‘Oku ‘ofa mo mā‘oni‘oni ‘a Sihova, ‘i he‘ene peheé ‘oku ‘ikai ai ke ne kaunoa ‘i he tau‘atāina ‘oku tau ma‘u ki he‘etau ngaahi fili ‘oku faí.—Teu. 32:4; 2 Kol. 3:17.

Ko e hā leva na‘e ‘uhinga ki ai ‘a Paula ‘i he‘ene pehē ko Sihová “‘e ‘ikai te ne tuku ke ‘ahi‘ahi‘i kimoutolu ‘o fakalaka atu ia ‘i he me‘a ‘oku malava ke mou kātekiná”? ‘I hení, na‘e fakamatala‘i ‘e Paula ‘a e me‘a ‘e fai ‘e Sihova lolotonga ‘a e ngaahi ‘ahi‘ahí, kae ‘ikai ko e ki mu‘a ‘i he ngaahi ‘ahi‘ahí. * (Sio ki he fakamatala ‘i lalo.) Kapau te tau falala kia Sihova, te ne tokoni‘i kitautolu ‘i ha fa‘ahinga ‘ahi‘ahi pē ‘i he‘etau mo‘uí. (Saame 55:22) Te tau sivisivi‘i ‘i he taimí ni ‘a e ‘uhinga ‘e ua na‘e lava ke lea pehē ai ‘a Paulá.

Ko e ‘uhinga ‘uluakí he ko e ngaahi ‘ahi‘ahi ‘oku tau hokosiá “‘oku anga-maheni ki ai ‘a e tangatá.” Koe‘uhí ko ‘etau mo‘ui ‘i he fokotu‘utu‘u ‘a Sētané, te tau hokosia kotoa ha ngaahi tu‘unga faingata‘a, ‘o a‘u nai ki ha ngaahi fakatamaki. Ka ‘o kapau te tau falala kia Sihova, ‘e lava ke tau kātekina ‘a e ngaahi ‘ahi‘ahi ko ení pea hanganaki mateaki. (1 Pita 5:8, 9) ‘I he ngaahi veesi ki mu‘a ‘o e 1 Kolinitō vahe 10, na‘e tohi ai ‘a Paula ‘o fekau‘aki mo e ngaahi ‘ahi‘ahi ‘e ni‘ihi na‘e fehangahangai mo e kau ‘Isilelí ‘i he toafá. (1 Kol. 10:6-11) Ko e fa‘ahinga na‘e falala kia Sihová na‘e lava ke nau kātekina ‘a e ngaahi ‘ahi‘ahi ko iá. Ka na‘e talangata‘a ‘a e kau ‘Isileli ‘e ni‘ihi kia Sihova. Na‘e ‘ikai ke nau hanganaki mateaki ai pē koe‘uhí he na‘e ‘ikai ke nau falala kiate ia.

Ko e ‘uhinga hono uá “ko e ‘Otuá ‘oku faitōnunga.” ‘Oku ‘uhinga eni ki he hā? ‘I he‘etau sio ki he anga hono tokanga‘i ‘e Sihova ‘ene kau sevānití ‘i he tuku‘au mai ‘a e hisitōliá, ‘oku tau ‘ilo‘i ai ‘okú ne tokoni‘i mateaki ‘a e fa‘ahinga ‘oku ‘‘ofa kiate ia, mo tauhi ‘ene ngaahi tu‘utu‘uní.’ (Teu. 7:9) ‘Oku tau ‘ilo‘i ai ‘oku fakahoko ma‘u pē ‘e Sihova ‘ene ngaahi tala‘ofá. (Sios. 23:14) ‘E lava ke tau fakapapau‘i ai (1) ‘E ‘ikai ke faka‘atā ‘e Sihova ha ‘ahi‘ahi ‘o fu‘u faingata‘a ke tau ta‘emalava ‘o kātekina ia, pea (2) te ne “‘ai foki mo ha hao‘anga” ma‘atautolu.

‘Oku anga-fēfē hono hanga ‘e Sihova ‘o “‘ai foki mo ha hao‘anga” ma‘á e fa‘ahinga ‘oku falala kiate iá? Ko e mo‘oni, ‘e lava ke ne to‘o atu ‘a e ‘ahi‘ahí. Kae manatu‘i, na‘e pehē ‘e Paula ‘e hanga ‘e Sihova ‘o “‘ai foki mo ha hao‘anga koe‘uhi ke mou malava ai ke kātaki‘i ia.” Ko ia ai, ‘oku fa‘a hanga ‘e Sihova ‘o ‘ai ha hao‘anga ma‘atautolu ‘aki hono fakaivimālohi‘i kitautolu ke tau kei lava ‘o mateaki ai pē. Tau lāulea ki ha ni‘ihi ‘o e ngaahi founga ‘okú ne fai ai ení.

• ‘Oku hanga ‘e Sihova ‘o “fakafiemālie‘i kitautolu ‘i he kotoa ‘o ‘etau mamahí.” (2 Kol. 1:3, 4) ‘Oku lava ke ne fakanonga hotau ‘atamaí, lotó mo e ngaahi ongo‘í fakafou ‘i he Tohi Tapú, ko hono laumālie mā‘oni‘oní mo e tamaio‘eiki anga-tonú.—Māt. 24:45; Sione 14:16, fakamatala ‘i lalo; Loma 15:4.

• ‘Oku lava ke ngāue‘aki ‘e Sihova hono laumālie mā‘oni‘oní ke tataki kitautolu. (Sione 14:26) ‘Oku lava ‘e he laumālie mā‘oni‘oní ke ne tokoni‘i kitautolu ke tau manatu‘i ‘a e ngaahi fakamatala Fakatohitapú mo e ngaahi tefito‘i mo‘oní, koe‘uhi ke tau lava ‘o fai ha ngaahi fili ‘oku fakapotopotó.

• ‘Oku lava ‘e Sihova ke ne ngāue‘aki ‘ene kau ‘āngeló ke tokoni‘i kitautolu.—Hep. 1:14.

• ‘Oku lava ‘e Sihova ke ne ngāue‘aki hotau fanga tokouá mo e fanga tuofāfiné ke tokoni‘i kitautolu. Te nau lava ‘o fakaivimālohi‘i kitautolu ‘i he me‘a ‘oku nau lea‘akí mo e me‘a ‘oku nau faí.—Kol. 4:11.

Ko ia, ko e hā kuo tau ako mei he ngaahi lea ‘a Paula ‘i he 1 Kolinitō 10:13? ‘Oku ‘ikai ke fili ‘e Sihova ‘a e ngaahi ‘ahi‘ahi te tau fehangahangai mo iá. Ka ‘oku lava ke tau fakapapau‘i kapau te tau falala kia Sihova, ‘e lava ke tau kātekina ha fa‘ahinga ‘ahi‘ahi pē. ‘Oku tau ‘ilo‘i ‘e hanga ‘e Sihova ‘o ‘ai ma‘u pē ha hao‘anga ma‘atautolu koe‘uhí ke tau kei lava ‘o mateaki ai pē kiate ia.