Ko e fetuʻutaki loto-moʻoní ʻoku hoko ia ʻi he taimi ʻokú ke fevahevaheʻaki ai mo hoʻo fānaú ʻa hoʻomou ngaahi fakakaukaú mo e ngaahi ongoʻí.

ʻE lava ke hoko ʻa e fetuʻutaki mo e kau taʻu hongofulu tupú ko ha pole moʻoni. ʻI he kei siʻi hoʻo fānaú te nau tala atu ʻa e meʻa kotoa. Ka ʻi he taimí ni ʻi heʻenau taʻu hongofulu tupú ʻoku ʻikai ke nau toe loko tala atu ha meʻa, pea ʻoku ʻikai ke ke ʻiloʻi ai ʻenau fakakaukaú mo e ongoʻí. ʻOku hangē ia ʻokú ke tuʻu mai koe mei he kauvai ʻe taha ʻo ha vaitafe. Ko e taimi eni ʻoku fiemaʻu lahi taha ai ʻa e fetuʻutaki mo e fānaú!

Fengaʻunuʻaki ki he taimi-tēpile hoʻo kiʻi tamá. Fai ia neongo kapau ko e fetalanoaʻakí ʻe toki fai ʻi he tuʻapoó.

“Te ke fie pehē ange nai, ‘Ko hoʻo toki leá mai ia? Naʻá ta ʻi heni pē he ʻahó kakato!’ Ka ko e hā ke tau lāunga ai kapau ʻoku loto ʻetau fānaú ke talanoa mai kiate kitautolu? ʻIkai ko e fakaʻamu ia ʻa e mātuʻa kotoa?”​—Lisa.

“ʻOku ou saiʻia ke mohe ʻi he taimi tuʻapoó, ka ko e taimi lelei taha ia naʻá ku maʻu ke talanoa ai mo e fānaú.”​—Herbert.

TEFITOʻI MOʻONI FAKATOHITAPU: “Tuku ki he tokotaha taki taha ke ne hanganaki kumi, ʻo ʻikai ki he lelei pē ʻaʻaná, ka ki he lelei ʻa e tokotaha kehé.”​—1 Kolinitō 10:24.

Tokangataha. ʻOku pehē ʻe ha tamai ʻe taha: “ʻI he taimi ʻe niʻihi ʻoku lahi ʻa e ngaahi meʻa ʻoku ou fakakaukau ki ai ʻi he taimi ʻoku lea mai ai ʻeku fānaú. Pea ʻoku lava pē ke nau ʻiloʻi eni!”

Kapau ʻokú ke mahinoʻi ia, tāmateʻi ʻa e TV pea tuku ki he tafaʻakí ʻa e meʻangāue fakaʻilekitulōniká kotoa. Tokangataha ki he meʻa ʻoku leaʻaki ʻe hoʻo kiʻi tamá pea tokanga kakato ki he meʻa ʻokú ne hohaʻa ki aí, tatau ai pē pe ʻoku ʻikai ke fuʻu mahuʻinga.

“ʻOku fiemaʻu ke tau fakapapauʻi ki heʻetau fānaú ko ʻenau ngaahi ongoʻí ʻoku mahuʻinga kiate kitautolu. He ka ʻikai, te nau fufū pē ʻenau ngaahi hohaʻá pe ʻalu ki ha feituʻu kehe ki ha tokoni.”​—Maranda.

“ʻOua ʻe ʻita, neongo kapau ko e fakakaukau hoʻo kiʻi tamá ʻoku ʻikai ke fuʻu tonu.”​—Anthony.

TEFITOʻI MOʻONI FAKATOHITAPU: “Tokanga ki he anga hoʻomou fanongó.”​—Luke 8:18.

Kumi ki ha ngaahi faingamālie. ʻOku faʻa fiemālie ange ʻa e fānaú ke fetalanoaʻaki mo e mātuʻá ʻi he taimi ʻoku nau fai ai ha ngāue ʻi heʻenau tangutu fehāngaaki ʻo lāulea ki ha meʻa.

“ʻOkú ma ngāueʻaki ʻa e faingamālie ʻo e heka ʻi he meʻalelé. Koeʻuhi ko e tangutu ʻi he tafaʻakí kae ʻikai ke fehāngaakí ʻoku taki atu ia ki ha fetalanoaʻaki lelei.”​—Nicole.

Ko e taimi kaí ko ha toe faingamālie ia ki ha fetalanoaʻaki lelei.

“Ko e taimi kai efiafí ko kimautolu taki taha ʻoku mau ʻohake ai ʻa e meʻa ʻikai lelei mo e meʻa lelei taha naʻe hoko ʻi he ʻaho ko iá. ʻOku fakafāʻūtahaʻi heni kimautolu pea ʻai ke mau ʻiloʻi heʻikai ke mau fehangahangai toko taha pē mo e palopalemá.”​—Robin.

TEFITOʻI MOʻONI FAKATOHITAPU: “Vave ki he fanongo [pea] fakatuotuai ki he lea.”​—Sēmisi 1:19.