LĒSONI 03
ʻE Lava Ke Ke Falala ki he Tohi Tapú?
ʻOku ʻomai ʻe he Tohi Tapú ʻa e ngaahi talaʻofa mo e ngaahi faleʻi lahi. ʻOku ngalingali pē ʻokú ke fifili fekauʻaki mo e meʻa ʻoku akoʻi aí, kae mahalo ʻokú ke toe veiveiua foki. ʻOku totonu ke ke falala ki he ngaahi talaʻofa mo e faleʻi ʻoku ʻomai ʻi ha tohi motuʻa pehē? ʻE lava moʻoni ke ke tui ki he meʻa ʻoku leaʻaki ʻe he Tohi Tapú fekauʻaki mo e fiefia ʻi he moʻuí he taimí ni pea mo e kahaʻú? ʻOku tui pehē ʻa e laui miliona. Tau sio angé pe te ke lava mo koe foki ʻo tui ki ai.
1. Ko e Tohi Tapú ko ha tohi ʻo e moʻoni pe talanoa faʻu?
ʻOku taukaveʻi ʻe he Tohi Tapú ko ha lēkooti ia ʻo e “ngaahi foʻi lea totonu ʻo e moʻoní.” (Tangata Malanga 12:10) ʻOku lave ai ki he ngaahi meʻa naʻe hoko moʻoni ʻo kau ai ʻa e kakai moʻoni. (Lau ʻa e Luke 1:3; 3:1, 2.) Ko e kau faihisitōlia mo e kau keli fakatotolo tokolahi kuo nau fakapapauʻi ʻa e tonu mātē ʻa e ngaahi ʻaho mahuʻinga, kakai, feituʻu mo e ngaahi meʻa naʻe hoko ʻoku fakamatalaʻi ʻi he Tohi Tapú.
2. Ko e hā ʻoku lava ai ke tau pehē ko e Tohi Tapú ʻoku ʻikai ke ʻolokuonga?
ʻI he ngaahi founga lahi, kuo fakamoʻoniʻi ko e Tohi Tapú ʻoku hiki ai ʻa e ngaahi meʻa naʻe ʻikai ʻiloʻi ia ʻi he taimi naʻe hiki aí. Ko e fakatātaá, ʻoku lave ai ki he ngaahi kaveinga fakasaienisi. Ko e lahi ʻo e ngaahi meʻa ʻoku leaʻaki ai fekauʻaki mo e ngaahi kaveinga ko iá naʻe fehuʻia lahi ia ʻi he taimi naʻe hiki ai iá. Kae kehe, kuo fakapapauʻi ʻe he saienisi ʻi onopōní ko e meʻa ʻoku leaʻaki ʻe he Tohi Tapú ʻoku tonu mātē. ʻOku “falalaʻanga maʻu pē ia, ʻi he taimí ni pea taʻengata.”—Saame 111:8.
3. Ko e hā ʻoku lava ai ke tau falala ki he meʻa ʻoku leaʻaki ʻe he Tohi Tapú fekauʻaki mo e kahaʻú?
ʻOku ʻi he Tohi Tapú ʻa e ngaahi kikite ʻoku tomuʻa tala ai “ʻa e ngaahi meʻa kuo teʻeki ke faí.” (ʻAisea 46:10) ʻOku tomuʻa tala tonu mātē ai ʻa e ngaahi meʻa fakahisitōlia lahi naʻe hoko ki muʻa fuoloa pea toki hokó. ʻOku toe fakamatalaʻi mātuʻaki fakaikiiki ai ʻa e ngaahi tuʻunga ʻo e māmaní ʻi he ʻahó ni. ʻI he lēsoni ko ení, te tau sivisiviʻi ai ʻa e ngaahi kikite ʻe niʻihi ʻi he Tohi Tapú. Ko ʻenau tonu mātē ʻoku fakaofo!
KELI LOLOTO ANGE
Sivisiviʻi ʻa e anga ʻo e feongoongoi ʻa e saienisi ʻi onopōní mo e Tohi Tapú, pea vakai ki he niʻihi ʻo e ngaahi kikite fakatoʻoaloto ʻi he Tohi Tapú.
4. ʻOku feongoongoi ʻa e saienisí mo e Tohi Tapú
ʻI he kuonga muʻá, ko e tokolahi taha ʻo e kakaí naʻa nau tui ʻoku hili ʻa e foʻi māmaní ʻi ha meʻa. Huluʻi ʻa e VITIOÓ.
Fakatokangaʻi ʻa e meʻa naʻe hiki ʻi he tohi Siopé ʻi he taʻu ʻe 3,500 nai kuo maliu atú. Lau ʻa e Siope 26:7, pea lāulea leva ki he fehuʻi ko ení:
-
Ko e hā ʻoku fakaʻohovale ai ʻa e fakalea ko e māmaní ʻoku tautau “ki he halaʻataá”?
Ko e vilo ʻa e vaí ʻi he māmaní naʻe toki mahinoʻi lelei pē ia ʻi he 1800 tupú. Neongo ia, fakatokangaʻi ʻa e meʻa naʻe leaʻaki ʻe he Tohi Tapú ʻi he taʻu ʻe laui afe kuo maliu atú. Lau ʻa e Siope 36:27, 28, pea lāulea leva ki he ongo fehuʻi ko ení:
-
Ko e hā ʻoku fakaofo ai ʻa e fakamatala faingofua ko eni ki he vilo ʻa e vaí?
-
ʻOku fakaivimālohiʻi ʻe he konga Tohi Tapu ko eni naʻá ke toki laú ʻa hoʻo falala ki he Tohi Tapú?
5. Naʻe tomuʻa tala ʻe he Tohi Tapú ʻa e ngaahi meʻa mahuʻinga ʻe hoko
Lau ʻa e ʻAisea 44:27–45:2, pea lāulea leva ki he fehuʻi ko ení:
-
Ko e hā ʻa e ngaahi fakaikiiki naʻe tomuʻa tala ʻe he Tohi Tapú ʻi he taʻu ʻe 200 ki muʻa ke tō ʻa Pāpiloné?
ʻOku fakamoʻoniʻi ʻe he hisitōliá ko Tuʻi Kōlesi ʻo Pēsiá mo ʻene kau taú naʻa nau ikunaʻi ʻa e kolo ko Pāpiloné ʻi he 539 K.M. a Naʻa nau afeʻi ʻa e vaitafe naʻá ne maluʻi ʻa e koló. Hili ʻenau hū ki he koló ʻi he ngaahi matapā naʻe tuku fakaavá, naʻa nau puke ʻa e koló ʻo ʻikai fai ha tau. ʻI he ʻahó ni, laka hake ʻi he taʻu ʻe 2,500 mei ai, ʻoku kei ʻi he fokotuʻunga maumau pē ʻa Pāpilone. Fakatokangaʻi ʻa e meʻa naʻe tomuʻa tala ʻe he Tohi Tapú.
Lau ʻa e ʻAisea 13:19, 20, pea lāulea leva ki he fehuʻi ko ení:
-
ʻOku anga-fēfē hono fakapapauʻi ʻe he meʻa naʻe hoko ki Pāpiloné ʻa hono fakahoko ʻo e kikite ko ení?
Fokotuʻunga maumau ʻo Pāpilone ʻi ʻIulaki ʻi onopōní
6. Naʻe tomuʻa tala ʻe he Tohi Tapú ʻa e ngaahi meʻa ʻoku tau sio ki ai ʻi he ʻaho ní
ʻOku lave ʻa e Tohi Tapú ki hotau taimí ko e “ngaahi ʻaho fakaʻosí.” (2 Tīmote 3:1) Fakatokangaʻi ʻa e meʻa naʻe tomuʻa tala ʻe he Tohi Tapú fekauʻaki mo e vahaʻa taimi ko ení.
Lau ʻa e Mātiu 24:6, 7, pea lāulea leva ki he fehuʻi ko ení:
-
Ko e hā ʻa e ngaahi tuʻunga mahuʻinga naʻe leaʻaki ʻe he Tohi Tapú ʻe hoko lolotonga ʻa e ngaahi ʻaho fakaʻosí?
Lau ʻa e 2 Tīmote 3:1-5, pea lāulea leva ki he ongo fehuʻi ko ení:
-
Ko e hā ʻa e ngaahi tōʻonga anga-maheni ʻa e kakaí naʻe fakamatalaʻi ʻe he Tohi Tapú ʻe hoko lolotonga ʻa e ngaahi ʻaho fakaʻosí?
-
Ko fē ʻi he ngaahi tōʻonga ko ení kuó ke fakatokangaʻí?
ʻOKU PEHĒ ʻE HE NIʻIHI: “Ko e Tohi Tapú ko ha tohi ʻo e ngaahi fananga mo e talatupuʻa.”
-
ʻI hoʻo fakakaukaú, ko e hā ʻa e fakamoʻoni lahi taha ko e Tohi Tapú ʻoku alafalalaʻanga?
FAKANOUNOU
Ko e hisitōliá, saienisí mo e kikité ʻoku nau fakahaaʻi kotoa mai ʻe lava ke ke falala ki he Tohi Tapú.
Fakamanatu
-
Ko e Tohi Tapú ko ha tohi ʻo e moʻoni pe talanoa faʻu?
-
Ko e hā ʻa e ngaahi tafaʻaki ʻe niʻihi ʻoku feongoongoi ai ʻa e saienisí mo e Tohi Tapú?
-
ʻOkú ke fakakaukau ʻoku tomuʻa tala ʻe he Tohi Tapú ʻa e kahaʻú? Ko e hā hono ʻuhingá pe ko e hā ʻoku ʻikai pehē aí?
AKO LAHI ANGE
ʻOku ʻi ai ha ngaahi fehālaaki fakasaienisi ʻi he Tohi Tapú?
“ʻOku Feongoongoi ʻa e Saienisí mo e Tohi Tapú?” (Kupu ʻi he uepisaití)
Ko e hā ʻa e ngaahi moʻoniʻi meʻa fekauʻaki mo e “ngaahi ʻaho fakaʻosí”?
“6 Kikite Fakatohitapu ʻOkú Ke Sio ʻi Hono Fakahokó” (Ko e Taua Leʻo, Siulai 1, 2011)
Ako ki he founga naʻe hoko moʻoni ai ʻa e ngaahi kikite Fakatohitapu fekauʻaki mo e ʻEmipaea Kalisí.
Sio ki he anga hono liliu ʻe he ngaahi kikite ʻi he Tohi Tapú ʻa e vakai ʻa ha tangata ʻe taha ki he Tohi Tapú.
“Kiate Aú, Naʻe ʻIkai ʻI Ai ha ʻOtua” (Ko e Taua Leʻo Fika 5 2017)
a ʻOku ʻuhinga ʻa e K.M. ko e “Ki Muʻa ʻi he Taimi ʻo Sīsuú,” pea ko e T.S. ki he “Taimi ʻo Sīsuú.”
Te Ke Fie Vakai Foki ki Heni
NGAAHI FEHUʻI ʻOKU TOUTOU ʻEKE
Ko e Hā ʻa e Polokalama Ako Tohi Tapu ʻOku Fai ʻe he Kau Fakamoʻoni ʻa Sihová?
ʻI he polokalama ako fetalanoaʻaki taʻetotongi ʻa e Kau Fakamoʻoni ʻa Sihová, ʻe lava ke ke ngāueʻaki ai ha faʻahinga liliu Tohi Tapu pē. Ongoʻi tauʻatāina ke fakaafeʻi ʻa e kotoa ho fāmilí pe kaumeʻá ke kau fakataha mo koe.
