LĒSONI 10
Na‘e Talangofua Ma‘u Pē ‘a Sīsū
‘Oku faingofua ma‘u pē ke talangofua ki ho‘o ongo mātu‘á?— ‘Oku faingata‘a ‘i he taimi ‘e ni‘ihi. Na‘á ke ‘ilo‘i na‘e talangofua ‘a Sīsū kia Sihova mo ‘ene ongo mātu‘á?— ‘E lava ke tokoni‘i koe ‘e he‘ene fa‘ifa‘itaki‘angá ke talangofua ki ho‘o ongo mātu‘á neongo ‘oku ‘ikai ko ha me‘a faingofua. Tau ako lahi angé fekau‘aki mo e me‘á ni.
Ki mu‘a ke ha‘u ‘a Sīsū ki māmaní, na‘á ne nofo mo ‘ene Tamaí, ‘a Sihova, ‘i hēvani. Ka ko Sīsū foki na‘e ‘i ai ‘ene ongo mātu‘a ‘i heni ‘i māmani. Ko hona hingoá ko Siosifa mo Mele. ‘Okú ke ‘ilo‘i na‘e anga-fēfē ‘ena hoko ko ‘ene ongo mātu‘á?—
Na‘e ‘omai ‘e Sihova ‘a e mo‘ui ‘a Sīsuú mei hēvani ‘o tuku ia ‘i he manava ‘o Melé kae lava ke ‘alo‘i mo mo‘ui ‘i he māmaní. Ko ha mana eni! Na‘e tupu ‘a Sīsū ‘i he manava ‘o Melé ‘o hangē pē ko e tupu ‘a e fanga ki‘i pēpeé ‘i he manava ‘enau fa‘eé. Hili ‘a e māhina ‘e hiva mei ai, na‘e ‘alo‘i ‘a Sīsū. Ko e founga eni na‘e hoko ai ‘a Mele mo hono husepānití ‘a Siosifa ko e ongo mātu‘a ‘a Sīsū ‘i heni ‘i he māmani.
‘I he taimi na‘e ta‘u 12 ai ‘a Sīsuú, na‘á ne fai ‘a e me‘a na‘e fakahaa‘i atu ai ‘a e lahi ‘ene ‘ofa ki he‘ene tamai ko Sihová. Na‘e hoko eni ‘i he taimi na‘e fononga mama‘o ai ‘a Sīsū mo hono fāmilí ki Selusalema ki he Pāsová. ‘I he‘enau foki ki ‘apí, na‘e fiu kumi ‘e Siosifa mo Mele ‘a Sīsū. ‘Okú ke ‘ilo‘i ‘a e feitu‘u na‘e ‘i aí?—
Ko e hā e ‘uhinga na‘e ‘i he temipalé ai ‘a Sīsuú?
Na‘e foki fakavave ‘a Siosifa mo Mele ki Selusalema ‘o kumi holo ‘a Sīsū. Na‘á na hoha‘a ‘aupito koe‘uhí na‘e ‘ikai ke na ma‘u ia. Ka ‘i he ‘osi ‘a e ‘aho ‘e tolu mei ai na‘á na ma‘u ia ‘i he Temipalé! ‘Okú ke ‘ilo‘i ‘a e ‘uhinga na‘e ‘i he temipalé ai ‘a Sīsuú?— Koe‘uhí ko e feitu‘u ia ‘e lava ke ako ai fekau‘aki mo ‘ene Tamaí ‘a Sihova. Na‘á ne ‘ofa kia Sihova mo loto ke ako ki he founga ke fakafiefia‘i ai iá. Na‘a mo e taimi na‘á ne tupu hake ai ‘o fu‘u tangatá, na‘e talangofua ma‘u pē ‘a Sīsū kia Sihova. Na‘e talangofua ‘a Sīsū na‘a mo e taimi na‘e faingata‘a ai kiate iá pea iku ki ha‘ane faingata‘a‘ia. Na‘e toe talangofua ‘a Sīsū kia Siosifa mo Mele?— ‘Io, ‘oku pehē ‘e he Tohi Tapú na‘á ne talangofua.
Ko e hā ‘e lava ke ke ako mei he fa‘ifa‘itaki‘anga ‘a Sīsuú?— ‘Oku fiema‘u ke ke talangofua ki ho‘o ongo mātu‘á na‘a mo e taimi ‘oku faingata‘a aí. ‘E lava ke ke fai ia?—
