1. Ko hai ‘oku totonu ke ne tala mai ‘a e founga totonu ke lotu ai ki he ‘Otuá?

‘OKU taukave‘i ‘e he ngaahi lotu lahi ‘oku nau ako‘i ‘a e mo‘oni fekau‘aki mo e ‘Otuá. Ka ‘oku ‘ikai mo‘oni ia, koe‘uhí ‘oku ako‘i ‘e he ngaahi lotú ‘a e me‘a kehe ‘aupito fekau‘aki mo e ‘Otuá pe ko hai ia mo e founga ke tau lotu ai kiate iá. ‘E lava fēfē ke tau ‘ilo‘i ‘a e founga totonu ke lotu ai ki he ‘Otuá? Ko Sihova pē ‘a e tokotaha ‘oku lava ke ne tala mai ‘a e founga ke tau lotu ai kiate iá.

2. ‘E lava fēfē ke ke ako ‘a e founga totonu ke lotu ai ki he ‘Otuá?

² Kuo ‘omai ‘e Sihova ‘a e Tohi Tapú ke tau lava ai ‘o ako ‘a e founga totonu ke lotu ai kiate iá. Ko ia, ako ‘a e Tohi Tapú, pea ‘e tokoni‘i koe ‘e Sihova ke ke ma‘u ‘aonga mei he‘ene akonakí koe‘uhí ‘okú ne tokanga lahi mai kiate koe.​—‘Aisea 48:17.

3. Ko e hā ‘oku fiema‘u ‘e he ‘Otuá ke tau faí?

³ ‘Oku pehē ‘e he ni‘ihi ‘oku tali ‘e he ‘Otuá ‘a e lotu kotoa pē, ka ‘oku ‘ikai ko e me‘a ia na‘e ako‘i mai ‘e Sīsuú. Na‘á ne pehē: “‘Oku ‘ikai ko ia kotoa pē ‘oku pehē mai, ‘‘Eiki, ‘Eiki,’ te ne hū ki he Pule‘anga ‘o hēvaní, ka ko ia pē ‘okú ne fai ‘a e finangalo ‘o ‘eku Tamai.” Ko ia ‘oku fiema‘u ke tau ako pe ko e hā ‘a e finangalo ‘o e ‘Otuá pea fai leva ia. Ko ha me‘a mafatukituki eni he na‘e fakahoa ‘e Sīsū  ‘a e kakai ‘oku ‘ikai te nau talangofua ki he ‘Otuá ki he kau faihia, ko e “kau maumau-lao.”​—Mātiu 7:21-23.

4. Ko e hā na‘e lea‘aki ‘e Sīsū ‘o fekau‘aki mo hono fai ‘a e finangalo ‘o e ‘Otuá?

⁴ Na‘e fakatokanga mai ‘a Sīsū ko e taimi ‘oku tau loto ai ke fai ‘a e finangalo ‘o e ‘Otuá, te tau fehangahangai mo e ngaahi pole. Na‘á ne pehē: “Hū ‘i he matapā fāsi‘í, koe‘uhí ‘oku fālahi ‘a e matapā mo ‘atā ‘a e hala ‘oku taki atu ki he ‘auhá, pea ‘oku hū atu ai ‘a e tokolahi; ka ‘oku fāsi‘i ‘a e matapā pea ‘efi‘efi ‘a e hala ‘oku taki atu ki he mo‘uí, pea ko e tokosi‘i pē ‘oku nau ‘ilo‘i iá.” (Mātiu 7:13, 14) Ko e hala ‘efi‘efí, pe ko e founga totonu ‘o e lotu ki he ‘Otuá, ‘oku taki atu ia ki he mo‘ui ta‘engatá. Ko e hala ‘oku ‘ataá, pe ko e founga hala ‘o e lotu ki he ‘Otuá, ‘oku taki atu ia ki he mate. Ka ‘oku ‘ikai fiema‘u ‘e Sihova ke mate ha taha. ‘Okú ne ‘omai ki he tokotaha kotoa ‘a e faingamālie ke ako ‘o fekau‘aki mo ia.​—2 Pita 3:9.

5. ‘E lava fēfē ke ke ‘ilo‘i ‘a e fa‘ahinga ‘oku lotu ki he ‘Otuá ‘i he founga totonú?

⁵ Na‘e pehē ‘e Sīsū ‘e lava ke tau ‘ilo‘i ‘a e fa‘ahinga ‘oku lotu ki he ‘Otuá ‘i he founga totonú. ‘Oku tau ‘ilo‘i eni ‘i hono sivisivi‘i ‘a e me‘a ‘oku nau tui ki aí mo e me‘a ‘oku nau faí. Na‘á ne pehē: “‘I honau ngaahi fuá te mou ‘ilo‘i ai kinautolu.” Pea na‘á ne toe pehē: “Ko e ‘akau lelei kotoa pē ‘oku fua  lelei.” (Mātiu 7:16, 17) ‘Oku ‘ikai ‘uhinga eni iá ‘oku haohaoa ‘a e fa‘ahinga ‘oku lotu ki he ‘Otuá. Ka ‘oku feinga ma‘u pē ‘a e kau sevāniti ‘a e ‘Otuá ke fai ‘a e me‘a ‘oku totonú. Te tau sio leva ki he me‘a te ne tokoni‘i kitautolu ke ‘ilo‘i ‘a e fa‘ahinga ‘oku nau lotu ki he ‘Otuá ‘i he founga totonú.

6, 7. Ko e hā ‘oku makatu‘unga ai ‘a e lotu mo‘oní ‘i he Tohi Tapú? Ko e hā ‘oku ako‘i mai ‘e he fa‘ifa‘itaki‘anga ‘a Sīsuú?

⁶ ‘Oku totonu ke makatu‘unga ‘etau lotú ‘i he Tohi Tapú. ‘Oku pehē ‘e he Tohi Tapú: “Ko e potu Folofola kotoa pē kuo fakamānava‘i ia ‘e he ‘Otuá pea ‘oku ‘aonga ki he akonaki, ki he valoki, ki he fakatonutonu, ki he akonekina ‘i he mā‘oni‘oni, koe‘uhi ke hoko ai ‘a e tangata ‘a e ‘Otuá ‘o ma‘u ‘a e malava kakato, kuo teu‘i kakato ki he ngāue lelei kotoa pē.” (2 Tīmote 3:16, 17) Na‘e tohi ‘a e ‘apositolo ko Paulá ki he kau Kalisitiané: “‘I he taimi na‘a mou ma‘u ai ‘a e folofola ‘a e ‘Otuá, ‘a ia na‘a mou fanongo ai meiate kimautolú, na‘a mou tali ia ‘o ‘ikai ko ha lea ‘a ha tangata, kae hangē tofu pē ko ia ko hono tu‘unga mo‘oní, ko e folofola ia ‘a e ‘Otuá.” (1 Tesalonaika 2:13) Ko e lotu mo‘oní ‘oku makatu‘unga pē ia ‘i he Folofola ‘a e ‘Otuá, ‘a e Tohi Tapú. ‘Oku ‘ikai makatu‘unga ia ‘i ha fakakaukau fakaetangata, talatukufakaholo, pe ko ha toe me‘a kehe.

⁷ Ko e me‘a kotoa pē na‘e ako‘i ‘e Sīsuú na‘e makatu‘unga ‘i he Folofola ‘a e ‘Otuá. (Lau ‘a e Sione 17:17.) Na‘á ne fa‘a to‘o lea mei he Folofolá. (Mātiu 4:4, 7, 10) Ko e kau sevāniti mo‘oni ‘a e ‘Otuá ‘oku nau muimui ‘i he fa‘ifa‘itaki‘anga ‘a Sīsuú pea  ‘oku makatu‘unga ‘a e me‘a kotoa ‘oku nau ako‘í ‘i he Tohi Tapú.

8. Ko e hā na‘e ako‘i mai ‘e Sīsū fekau‘aki mo e lotu kia Sihová?

⁸ ‘Oku totonu ke tau lotu pē kia Sihova. ‘Oku pehē ‘e he Saame 83:18, “Ko koe, ‘a ia ko ho huafá ko Sihova, ko koe pē toko taha ‘a e Fungani Mā‘olunga ‘i he māmaní kotoa.” Na‘e fiema‘u ‘e Sīsū ke ‘ilo‘i ‘e he kakaí ‘a e ‘Otua mo‘oní, pea na‘á ne ako‘i ki he kakaí ‘a e huafa ‘o e ‘Otuá. (Lau ‘a e Sione 17:6.) Na‘e pehē ‘e Sīsū: “Ko Sihova ko ho ‘Otuá kuo pau ke ke lotu ki aí, pea ko ia toko taha pē kuo pau ke ke fai ki ai ‘a e ngāue toputapú.” (Mātiu 4:10) Ko ia, ‘i he‘etau hoko ko e kau sevāniti ‘a e ‘Otuá, ‘oku tau muimui ‘i he fa‘ifa‘itaki‘anga ‘a Sīsuú. ‘Oku tau lotu pē kia Sihova, ‘oku tau ngāue‘aki hono huafá, pea ‘oku tau ako‘i ki he ni‘ihi kehé ‘a e huafa ‘o e ‘Otuá mo e me‘a te ne fai ma‘atautolú.

9, 10. ‘Oku anga-fēfē ‘etau fakahāhā ‘a e fe‘ofa‘akí?

⁹ ‘Oku fiema‘u ke tau ‘ofa mo‘oni ki he kakaí. Na‘e ako‘i ‘e Sīsū ‘ene kau ākongá ke nau fe‘ofa‘aki. (Lau ‘a e Sione 13:35.) ‘Oku ‘ikai mahu‘inga ia pe ko ‘etau ha‘ú mei fē, ko e hā hotau anga-fakafonuá, pe ‘oku tau koloa‘ia pe masiva. Ko ‘etau fe‘ofa‘akí ‘oku totonu ke ne fakafā‘ūtaha‘i kitautolu ko e fanga tokoua mo e fanga tuofāfine. (Kolose 3:14) Ko ia ‘oku ‘ikai ke tau kau he taú ‘o tāmate‘i ‘a e kakaí. ‘Oku pehē ‘e he Tohi Tapú: “Ko e fānau ‘a e ‘Otuá pea mo e fānau ‘a e Tēvoló ‘oku hā mahino ia ‘i he mo‘oni‘i me‘a ko ‘ení: ‘Ilonga ha taha ‘oku  ‘ikai te ne tō‘onga‘aki ‘a e mā‘oni‘oní ‘oku ‘ikai ko ‘ene tupu mai ‘a‘ana mei he ‘Otuá, kae‘uma‘ā ‘a e tokotaha ‘oku ‘ikai te ne ‘ofa ki hono tokouá.” Pea ‘oku toe pehē ai: “‘Oku totonu ke tau fe‘ofa‘akí; ‘o ‘ikai hangē ko Keiní, ‘a ia na‘e tupu mei he tokotaha fulikivanú peá ne tāmate‘i hono tokouá.”​—1 Sione 3:10-12; 4:20, 21.

¹⁰ ‘Oku tau ngāue‘aki hotau taimí, iví, mo e me‘a fakamatelié ke fetokoni‘aki ai mo fefakalototo‘a‘aki. (Hepelū 10:24, 25) ‘Oku tau “fai ha ngāue ‘oku leleí ki he tokotaha kotoa.”​—Kalētia 6:10.

11. Ko e hā ‘oku tau tali ai ko Sīsū ‘a e hala ki he ‘Otuá?

¹¹ ‘Oku fiema‘u ke tau talangofua kia Sīsū he ko ia ‘a e hala ki he ‘Otuá. ‘Oku pehē ‘e he Tohi Tapú: “‘Oku ‘ikai ha fakamo‘ui ‘i ha toe taha kehe, he ‘oku ‘ikai mo ha toe hingoa ‘i he lalo langí kuo tuku mai ki he ha‘oha‘onga ‘o e tangatá ‘a ia kuo pau ke tau ma‘u ai ‘a e mo‘uí.” (Ngāue 4:12) ‘I he Vahe 5 ‘o e tohí ni, na‘a tau ako ai na‘e fekau‘i mai ‘e Sihova ‘a Sīsū ke ne foaki ‘ene mo‘uí ko ha huhu‘i ma‘á e fa‘ahinga talangofua ‘o e tangatá. (Mātiu 20:28) Kuo fili ‘e Sihova ‘a Sīsū ke ne pule ko e Tu‘i ki he māmaní. Ko e ‘uhinga ia ‘oku tala mai ai ‘e he Tohi Tapú kuo pau ke tau talangofua kia Sīsū kapau ‘oku tau fie mo‘ui ta‘engata.​—Lau ‘a e Sione 3:36.

12. Ko e hā ‘oku ‘ikai ke tau kau ai ‘i ha me‘a fakapolitikalé?

¹² ‘Oku ‘ikai totonu ke tau kau ‘i ha me‘a fakapolitikale. Na‘e ‘ikai ke kau ‘a Sīsū ‘i ha me‘a fakapolitikale. ‘I hono fakamāu‘i iá, na‘á ne tala ange  ki he pule Loma ko Pailató: “Ko hoku Pule‘angá ‘oku ‘ikai ko ha konga ia ‘o e māmani ko ení.” (Lau ‘a e Sione 18:36.) ‘I he hangē ko Sīsuú, ‘oku tau mateaki ki he Pule‘anga fakahēvani ‘o e ‘Otuá, pea ko e ‘uhinga eni, tatau ai pē pe ko fē ‘oku tau nofo aí, ‘oku ‘ikai ke tau kau ‘i ha me‘a fakapolitikale. Kae kehe, ‘oku fekau‘i mai ‘e he Tohi Tapú ke tau talangofua ki he “ngaahi mafai mā‘olungá,” ‘a e ngaahi founga-pulé. (Loma 13:1) ‘Oku tau talangofua ki he lao ‘a e fonua ‘oku tau nofo aí. Ko e mo‘oni, ‘i he taimi ‘oku fepaki ai ha lao mo e ngaahi lao ‘a e ‘Otuá, ‘oku tau fa‘ifa‘itaki ki he kau ‘apositoló, ‘a ia na‘a nau pehē: “Kuo pau ke mau talangofua ki he ‘Otuá ko e pulé ia kae ‘ikai ki he tangatá.”​—Ngāue 5:29; Ma‘ake 12:17.

13. Ko e hā ‘oku tau malanga‘i fekau‘aki mo e Pule‘anga ‘o e ‘Otuá?

¹³ ‘Oku tau tui ko e Pule‘anga ‘o e ‘Otuá ‘a e fakalelei‘anga pē taha ki he palopalema ‘a e māmaní. Na‘e pehē ‘e Sīsū ko e “ongoongo lelei ko ‘eni ‘o e Pule‘angá” ‘e malanga‘i ia ‘i māmani kotoa. (Lau ‘a e Mātiu 24:14.) ‘Oku ‘ikai ha founga-pule fakaetangata ‘e lava ke ne fai ‘a e me‘a ‘e fai ‘e he Pule‘anga ‘o e ‘Otuá ma‘atautolú. (Saame 146:3) Na‘e ako‘i mai ‘e Sīsū ke tau lotu ‘o kole ‘a e Pule‘anga ‘o e ‘Otuá ‘i he‘ene pehē: “Ke hoko mai ho Pule‘angá. Ke fai ho finangaló, ‘o hangē ko ia ‘i hēvaní, ke pehē foki ‘i māmani.” (Mātiu 6:10) ‘Oku tala mai ‘e he Tohi Tapú ‘e faka‘auha ‘e he Pule‘anga ‘o e ‘Otuá ‘a e founga-pule fakaetangata kotoa pē  pea ‘e “tu‘u toko taha pē ia ‘o ta‘engata.”​—Taniela 2:44.

14. Ko hai ‘okú ke tui ‘oku lotu ki he ‘Otuá ‘i he founga totonú?

¹⁴ Hili hono ako ‘a e ngaahi poini ko ení, ‘eke hifo kiate koe: ‘Ko hai ‘oku makatu‘unga ‘ene akonakí ‘i he Tohi Tapú? Ko hai ‘oku talanoa ki he ni‘ihi kehé fekau‘aki mo e huafa ‘o e ‘Otuá? Ko hai ‘oku nau fakahāhā ‘a e fe‘ofa‘aki mo‘oní pea tui na‘e fekau‘i mai ‘e he ‘Otuá ‘a Sīsū ke ne fakahaofi kitautolú? Ko hai ‘oku ‘ikai ke kau ‘i he ngaahi me‘a fakapolitikalé? Ko hai ‘oku nau malanga‘i ko e Pule‘anga pē ‘o e ‘Otuá ‘e lava ke ne fakalelei‘i ‘etau ngaahi palopalemá?’ Ko e Kau Fakamo‘oni ‘a Sihová pē.​—‘Aisea 43:10-12.

15. Ko e hā kuo pau ke tau faí kapau ‘oku tau loto ke tali ‘e he ‘Otuá ‘etau lotú?

¹⁵ ‘Oku ‘ikai fe‘unga ke tui pē ‘oku ‘i ai ‘a e ‘Otua. Na‘a mo e fanga tēmenioó ‘oku nau tui ‘oku ‘i ai ‘a e ‘Otua, ka ‘oku ‘ikai te nau talangofua kiate ia. (Sēmisi 2:19) Kapau ‘oku tau loto ke tali ‘e he ‘Otuá ‘etau lotú, kuo pau ke ‘oua te tau tui pē ‘okú ne ‘i ai ka tau fai foki ‘a e me‘a ‘okú ne folofola‘akí.

16. Ko e hā ‘oku totonu ai ke tau si‘aki ‘a e lotu loí?

¹⁶ Ke tali ‘e he ‘Otuá ‘etau lotú, kuo pau ke tau si‘aki ‘a e lotu loí. Na‘e tohi ‘e he palōfita ko ‘Aiseá: “Hū ki tu‘a mei hono lotolotongá, ‘ai kimoutolu ke mou ma‘a.” (‘Aisea 52:11; 2 Kolinitō 6:17) Ko e ‘uhinga ia ‘oku fiema‘u ai ke tau si‘aki ha me‘a pē ‘oku kaunga ki he lotu loí.

17, 18. Ko e hā ‘a “Pāpilone ko e Lahi,” pea ko e hā ‘oku fiema‘u fakavavevave ai ke si‘aki iá?

 ¹⁷ Ko e hā ‘a e lotu loi? Ko ha lotu pē ‘okú ne ako‘i ke tau lotu ki he ‘Otuá ‘i ha founga ‘oku fepaki mo ‘ene Folofolá. ‘Oku ui ‘e he Tohi Tapú ‘a e lotu loi kotoa pē ko “Pāpilone ko e Lahi.” (Fakahā 17:5) Ko e hā hono ‘uhingá? Hili ‘a e Lōmaki ‘i he ‘aho ‘o Noá, na‘e kamata ai ‘a e ngaahi akonaki fakalotu loi lahi ‘i he kolo ko Pāpiloné. Ko e ngaahi akonaki loi ko iá na‘e mafola atu ia ki he māmaní kotoa. Ko e fakatātaá, ko e kakai na‘e nofo ‘i Pāpiloné na‘a nau lotu ki he ngaahi kulupu ‘o e ‘otua ‘e toko tolu. ‘I he ‘ahó ni foki, ‘oku ako‘i ‘e he ngaahi lotu lahi ko e ‘Otuá ko ha Tolu-Taha‘i-‘Otua, ka ‘oku ako‘i mahino ‘e he Tohi Tapú ‘oku taha pē ‘a e ‘Otua mo‘oní, ko Sihova, pea ko hono ‘Aló ko Sīsū. (Sione 17:3) Na‘e tui foki ‘a e kakai ‘i Pāpiloné ‘oku hokohoko atu ‘a e mo‘ui ha konga ‘o ha taha ‘i he hili ‘a e mate ‘a e sinó pea ‘e lava ke faingata‘a‘ia ‘a e konga ko iá ‘i heli. ‘Oku ‘ikai ke mo‘oni ia.​—Sio ki he Fakamatala ‘i he Ngata‘angá 14, 17, mo e 18.

¹⁸ Na‘e tomu‘a tala ‘e he ‘Otuá kuo vavé ni ke faka‘auha ‘a e lotu loi kotoa pē. (Fakahā 18:8) ‘Okú ke mahino‘i ‘a e ‘uhinga ‘oku fiema‘u fakavavevave ai ke mavahe mei he lotu loí? ‘Oku fiema‘u mai ‘e Sihova ko e ‘Otuá ke ke fai ia ki mu‘a ke fu‘u tōmui.​—Fakahā 18:4.

19. ‘I ho‘o fili ke tauhi kia Sihová, ‘e anga-fēfē ‘ene tokanga‘i koé?

¹⁹ ‘I ho‘o fili ke mavahe mei he lotu loí pea tauhi kia Sihová, he‘ikai nai ke mahino‘i ‘e he ni‘ihi ho ngaahi kaume‘á pe fāmilí ho‘o filí pea a‘u nai ‘o nau  ‘ai ke faingata‘a ‘a e mo‘uí kiate koe. Ka he‘ikai li‘aki koe ‘e Sihova. Te ke hoko ko ha konga ‘o ha fāmili ‘i māmani lahi ‘o e kakai ‘e laui miliona ‘oku nau fe‘ofa‘aki mo‘oni, pea ma‘u ‘a e ‘amanaki ko e mo‘ui ta‘engata ‘i he māmani fo‘ou ‘a e ‘Otuá. (Ma‘ake 10:28-30) ‘E fili nai ‘amui ‘a e ni‘ihi ‘o e ngaahi kaume‘a mo e fāmili ‘oku nau fakafepaki‘i ho‘o fili ke tauhi kia Sihová ke ako ‘a e Tohi Tapú.

20. Ko e hā ‘oku mahu‘inga ai ke lotu ki he ‘Otuá ‘i he founga totonú?

²⁰ Kuo vavé ni ke faka‘auha ‘e he ‘Otuá ‘a e fulikivanú kotoa pea ‘e pule mai hono Pule‘angá ki he māmaní. (2 Pita 3:9, 13) Ko ha taimi fisifisimu‘a ia! ‘E lotu ‘a e tokotaha kotoa kia Sihova ‘i he founga ‘okú ne fiema‘u maí. Ko ia ‘oku mahu‘inga ke ke fai leva ha me‘a pea lotu ki he ‘Otuá ‘i he founga totonú.