VAHE 8

ʻE Lava Fēfē Ke U Maʻu ha Ngaahi Kaumeʻa Lelei?

“Kapau ʻoku ou ʻita, ʻoku ou fiemaʻu ha taha ke u huaʻi ki ai ʻeku ongoʻí. Kapau ʻoku ou loto-mamahi, ʻoku ou loto ke tala mai ʻe ha taha ʻe sai ange ʻa e ngaahi meʻá. Kapau ʻoku ou fiefia, ʻoku ou loto ke vahevahe ia mo ha taha. Kiate aú, ʻoku tau fiemaʻu ʻa e ngaahi kaumeʻa.”​—Brittany.

KUO pehē ko e fānau īkí ʻoku nau fiemaʻu hanau kaungāvaʻinga, pea ko e kau talavoú ʻoku nau fiemaʻu ʻa e ngaahi kaumeʻa. Ko e hā ʻa e kehekehé?

Ko ha kaungāvaʻinga ko ha taha pē ʻokú mo takanga holo.

Ko ha kaumeʻa ko ha taha ia ʻokú ne fakamahuʻingaʻi foki ʻa e ngaahi meʻa ʻokú ke mahuʻingaʻia aí.

ʻIkai ko ia pē, ʻoku pehē ʻe he Tohi Tapú “ko ha kaumeʻa moʻoni ʻokú ne ʻofa ʻi he taimi kotoa pē pea ko ha tokoua ia ʻoku fanauʻi mai ki he taimi faingataʻá.” (Palōveepi 17:17) ʻOku fakamatalaʻi nai ai ha faʻahinga kaumeʻa loloto ange ʻi he kaumeʻa naʻá ke faʻa vaʻinga mo ia ʻi hoʻo kei siʻí!

Moʻoniʻi Meʻa: ʻI hoʻo ʻalu ke fuʻu lahí, ʻokú ke fiemaʻu ʻa e ngaahi kaumeʻa ʻoku nau

1. Maʻu ʻa e ngaahi ʻulungaanga fakamānako

2. Moʻuiʻaki ʻa e ngaahi tuʻunga ʻoku taau ke fakahīkihikiʻi

3. Tākiekina lelei koe

Fehuʻi: ʻE lava fēfē ke ke maʻu ʻa e ngaahi kaumeʻa hangē ko iá? Tau sivisiviʻi taha taha angé ʻa e ngaahi moʻoniʻi meʻa ko ia fekauʻaki mo e kaungāmeʻá.

Moʻoniʻi Meʻa #1​—Ngaahi ʻUlungaanga Fakamānako

Meʻa ʻoku totonu ke ke ʻiló. ʻOku ʻikai ke hoko ʻa e taha kotoa ko ha kaumeʻa moʻoni. ʻOku aʻu ʻo pehē ʻe he Tohi Tapú “ʻoku ʻi ai ha ngaahi kaungāmeʻa ʻoku nau mateuteu ke fefaikoviʻaki.” (Palōveepi 18:24) ʻE hā ngali fuʻu tōtuʻa nai ia. Kae fakakaukau angé: Kuo ʻi ai hao “kaumeʻa” naʻá ne ngāueʻaki pē koe? Kae fēfē ha taha naʻá ne lauʻi koe pe fakamafola ʻa e ngaahi talanoa loi fekauʻaki mo koe? Ko e ngaahi hokosia peheé ʻe lava ke ne toʻo hoʻo falalá. * Manatuʻi maʻu pē ʻi heʻene haʻu ko ia ki he kaumeʻá, ʻoku ʻikai ko e meʻa mahuʻingá ʻa hono maʻu ʻa e ngaahi kaumeʻa tokolahí!

Meʻa ʻe lava ke ke faí. Fili ko e ngaahi kaumeʻa ʻa e faʻahinga ʻoku nau maʻu ʻa e ngaahi ʻulungaanga ʻoku taau ke faʻifaʻitaki ki ai.

“Ko e tokotaha kotoa ʻoku nau maʻu ʻa e vakai pau ki hoku kaumeʻa ko Fiona. ʻOku ou loto ke talanoaʻi lelei foki mo au. ʻOku ou loto ke maʻu ʻa e ongoongo tatau mo ia. Kiate au, ʻoku fakamānako ia.”​—Yvette, 17.

ʻAhiʻahiʻi eni.

1. Lau ʻa e Kalētia 5:​22, 23.

2. ʻEke hifo, ‘ʻOku tapua mei hoku ngaahi kaumeʻá ʻa e ngaahi ʻulungaanga ʻoku kau ʻi he “fua ʻo e laumālié”?’

3. Hiki ʻi lalo ʻa e hingoa ho ngaahi kaumeʻa ofi tahá. ʻI he tafaʻaki ʻo e hingoa taki taha, tohi ʻa e ʻulungaanga ʻoku feʻungamālie taha mo e tokotahá.

Hingoa

․․․․․

ʻUlungaanga

․․․․․

Kiʻi tokoni: Kapau ko e ngaahi ʻulungaanga kovi pē ʻokú ke fakakaukau ki aí, mahalo kuo taimi ke ke fakasio ha ngaahi kaumeʻa lelei ange!

Moʻoniʻi Meʻa #2​—Ngaahi Tuʻunga ʻOku Taau ke Fakahīkihikiʻi

Meʻa ʻoku totonu ke ke ʻiló. Ko hoʻo fiemaʻu vavale haʻo ngaahi kaumeʻá, ʻoku ngalingali te ke fili ai ʻa e ngaahi kaumeʻa hala. ʻOku pehē ʻe he Tohi Tapú: “Ko e tokotaha ʻokú ne feohi mo e valé ʻe hoko ai ʻa e kovi kiate ia.” (Palōveepi 13:20) Ko e foʻi lea “valé” ʻoku ʻikai ʻuhinga ia ki he kakai ʻoku kovi ʻenau akó pe ʻoku ʻikai ke nau ʻatamaiʻiá. ʻI hono kehé, ʻoku fakamatala ia ki he faʻahinga ʻoku ʻikai ke nau maʻu ʻa e fakakaukau lelei ka ʻoku nau muimui ki ha ʻalunga fakaeʻulungaanga taʻefakapotopoto. Ko e faʻahinga kaumeʻa ia ʻoku totonu ke ke fakaʻehiʻehi mei aí!

Meʻa ʻe lava ke ke faí. ʻI he ʻikai ke kaumeʻa pē mo ha faʻahinga taha pē, filifili lelei. (Saame 26:4) ʻOku ʻikai ʻuhinga eni iá ʻoku totonu ke ke tomuʻa fehiʻa. ʻI he potutohi ko ení, ko e hoko ʻo filifili leleí ʻoku ʻuhingá ʻokú ke maʻu ʻa e ʻiloʻilo feʻunga ke “sio ki he faikehekehe ʻi he vahaʻa ʻo e tokotaha ʻoku māʻoniʻoní mo e tokotaha ʻoku anga-fulikivanú, ʻi he vahaʻa ʻo e tokotaha ʻoku tauhi ki he ʻOtuá mo e tokotaha ʻoku ʻikai tauhi kiate iá.”​—Malakai 3:​18.

“ʻOku ou fakamālō naʻe tokoniʻi au ʻe heʻeku ongo mātuʻá ke maʻu ha ngaahi kaumeʻa​—ko e faʻahinga ʻi hoku toʻú ʻoku nau fakalakalaka fakalaumālie.”​—Christopher, 13.

Tali ʻa e ongo fehuʻi hokó:

ʻI heʻeku feohi mo hoku ngaahi kaumeʻá, ʻoku ou tailiili naʻa nau feinga ke tenge au ke fai ha meʻa ʻoku ou ʻiloʻi ʻoku hala?

□ ʻIo

□ ʻIkai

ʻOku ou fakatoupīkoi ke fakafeʻiloaki hoku ngaahi kaumeʻá ki heʻeku ongo mātuʻá, ʻo ilifia naʻa ʻikai ke tali ʻe heʻeku ongo mātuʻá kinautolu?

□ ʻIo

□ ʻIkai

Kiʻi tokoni: Kapau naʻá ke tali ʻio ki he ongo fehuʻi ʻi ʻolungá, kumi ki he ngaahi kaumeʻa ʻoku māʻolunga ange honau tuʻunga fakaeʻulungāngá​—ki he faʻahinga ʻoku nau fokotuʻu ha faʻifaʻitakiʻanga lelei ʻi he moʻui faka-Kalisitiané.

Moʻoniʻi Meʻa #3​—Tākiekina Lelei

Meʻa ʻoku totonu ke ke ʻiló. ʻOku pehē ʻe he Tohi Tapú: “Ko e ngaahi feohi koví ʻokú ne maumauʻi ʻa e ngaahi anga ʻoku leleí.” (1 Kolinitō 15:33) Ko ha toʻutupu ko Lauren ʻokú ne pehē: “Naʻe tali au ʻe hoku kaungāakó kapau pē naʻá ku fai ʻa e meʻa tofu pē naʻa nau tala mai ke u faí. Naʻá ku tuēnoa, ko ia naʻá ku fili ke tōʻonga tatau mo kinautolu koeʻuhí pē ke u feohi mo kinautolu.” Naʻe ʻiloʻi ʻe Lauren ʻi he taimi ʻokú ke muimui ai ki he ngaahi tuʻunga ʻa e niʻihi kehé, ʻokú ke hangē ai ko ha pate ʻi he papa veimaú, ʻo puleʻi pē hoʻo ʻunu holó ʻo fakatatau ki he meʻa ʻoku nau loto ki aí. ʻOkú ke tuha mo ha meʻa ʻoku lelei ange ai!

Meʻa ʻe lava ke ke faí. Tuʻusi ʻa e pīkinga mo e faʻahinga ʻoku nau tuʻukāivi ke ke liliu ʻo fakatatau ki heʻenau founga moʻuí. Kapau te ke fou ʻi he sitepu ko ení, ʻe tokosiʻi nai ho ngaahi kaumeʻá; ka te ke ongoʻi sai ange fekauʻaki mo koe tonu, pea te ke fakaava ai ʻa e matapā ki ha ngaahi kaungāmeʻa lelei ange​—ko e faʻahinga te nau tākiekina koe ʻi ha founga lelei.​—Loma 12:2.

“Ko hoku kaumeʻa ofi ko Clint ʻokú ne fakakaukau fakapotopoto mo kaungāongoʻi, pea ko hono olá, kuó ne hoko ko e fakalototoʻa lahi taha kiate aú.”​—Jason, 21.

ʻEke hifo kiate koe ʻa e ongo fehuʻi hokó:

ʻOku ou liliu ʻeku founga ʻai valá, leá pe tōʻonga kovi koeʻuhí pē ke fakahōhōʻiaʻi hoku ngaahi kaumeʻá?

□ ʻIo

□ ʻIkai

ʻOku ou ʻalu ki ha ngaahi feituʻu ʻoku fehuʻia fakaeʻulungaanga ʻa ia naʻe ʻikai ke u mei ʻalu ki ai ka koeʻuhí ko hoku ngaahi kaumeʻá?

□ ʻIo

□ ʻIkai

Kiʻi tokoni: Kapau naʻá ke tali ʻio ki he ongo fehuʻi ko iá, kumi faleʻi mei hoʻo ongo mātuʻá pe ko ha tokotaha lahi matuʻotuʻa. Kapau ko e taha koe ʻo e kau Fakamoʻoni ʻa Sihová, ʻe lava foki ke ke fakaofiofi ki ha mātuʻa Kalisitiane pea fakahā kiate ia ʻokú ke fiemaʻu tokoni ʻi hono fili ha ngaahi kaumeʻa te nau tākiekina lelei ange koe.

[Fakamatala ʻi lalo]

KONGA TOHI TAPU TEFITO

“ʻOku ʻi ai ha kaumeʻa ʻoku pipiki ofi ange ia ʻi ha tokoua.”​—Palōveepi 18:24.

FOKOTUʻU

Moʻui ʻo fehoanaki mo e ngaahi tuʻunga totonú, pea ko e niʻihi ʻoku nau feinga ke fai ʻa e meʻa tatau ʻoku ngalingali ʻe tohoakiʻi atu kiate koe. Te nau hoko ko e ngaahi kaumeʻa lelei tahá!

NAʻÁ KE ʻILOʻI . . . ?

ʻOku taʻefilifilimānako ʻa e ʻOtuá, ka ʻokú ne mātuʻaki filifili lelei ʻi he haʻu ko ia ki he tokotaha te ne tali ke hoko ko ha ‘fakaafe ʻi hono tēnití.’​—Saame 15:​1-5.

PALANI ʻO E MEʻA KE FAÍ!

Ke maʻu ʻa e ngaahi kaumeʻa leleí, te u ․․․․․

Ko e niʻihi ʻoku nau taʻumotuʻa ange ʻiate au ʻa ia ʻoku ou saiʻia ke maheni lelei ange mo kinautolú ʻoku kau ki ai ʻa ․․․․․

Ko e meʻa te u saiʻia ke ʻeke ki heʻeku (ongo) mātuʻá fekauʻaki mo e kaveinga ko ení ko e ․․․․․

KO E HĀ HOʻO FAKAKAUKAÚ?

● Ko e hā ʻa e ngaahi ʻulungaanga te ke fakamahuʻingaʻi lahi taha ʻi ha kaumeʻa, pea ko e hā hono ʻuhingá?

● Ko e hā ʻa e ngaahi ʻulungaanga te ke fiemaʻu ke ngāue ki ai ke hoko ko ha kaumeʻa lelei ange?

[Fakamatala]

ʻI he taimi naʻe fakalototoʻaʻi ai au ʻe heʻeku ongo mātuʻá ke fakaʻehiʻehi mei ha ngaahi kaungāmeʻa pau, naʻá ku pehē loto pē ko e faʻahinga pē eni naʻá ku loto ke feohi mo iá. Neongo ia, ko e faleʻi ʻeku ongo mātuʻá naʻe lelei, pea ʻi he taimi pē naʻá ku tuku ai ki tafaʻaki ʻeku saiʻiá, naʻá ku ʻiloʻi ai naʻe tokolahi ʻa e ngaahi kaumeʻa lelei ange.’’​—Cole

[Puha]

ʻAhiʻahiʻi ʻa e Ngaahi Fokotuʻu ko Ení

Talanoa ki hoʻo ongo mātuʻá fekauʻaki mo e kaumeʻá. ʻEke ange kiate kinaua pe ko e faʻahinga kaumeʻa fēfē naʻá na maʻu ʻi he taimi naʻá na taʻu tatau ai mo koé. ʻOkú na fakaʻiseʻisa fekauʻaki mo ʻena fili ʻo e kaungāmeʻá? Kapau ko ia, ko e hā hono ʻuhingá? ʻEke ange kiate kinaua ʻa e founga ʻe lava ke ke fakaʻehiʻehi ai mei he niʻihi ʻo e ngaahi palopalema naʻá na fehangahangai mo iá.

Fakafeʻiloaki ho ngaahi kaumeʻá ki hoʻo ongo mātuʻá. Kapau ʻokú ke fakatoupīkoi ke fai ia, ʻeke hifo kiate koe, ‘Ko e hā ʻoku ʻikai ke u fie fai ai iá?’ ʻOku ʻi ai ha meʻa fekauʻaki mo ho ngaahi kaumeʻá ʻokú ke ʻiloʻi heʻikai tali ʻe hoʻo ongo mātuʻá? Kapau ko ia, ʻe fiemaʻu nai ke ke filifili lelei ange ʻi he haʻu ko ia ki hono fili ho ngaahi kaumeʻá.

Hoko ko ha tokotaha fanongo lelei. Fakahāhā ʻa e mahuʻingaʻia ʻi he lelei mo e meʻa ʻoku tokanga ki ai ho ngaahi kaumeʻá.​—Filipai 2:4.

Hoko ʻo fakamolemole. ʻOua ʻe ʻamanekina ʻa e haohaoá. “Ko e kotoa ʻo kitautolú ʻoku tau tūkia ʻo tā-tuʻo-lahi.”​—Sēmisi 3:2.

Fakaʻatā ho kaumeʻá ke ne maʻu ha taimi maʻana. ʻOku ʻikai fiemaʻu ia ke te pipiki pē kiate ia ʻi he taimi kotoa. Ko e ngaahi kaumeʻa moʻoní te nau ʻi ai ʻi he taimi ʻokú ke fiemaʻu ai kinautolú.​—Tangata Malanga 4:​9, 10.

[Fakatātā]

ʻI he taimi ʻokú ke muimui ai ki he ngaahi tuʻunga ʻa e niʻihi kehé, ʻokú ke hangē ai ko ha pate ʻi he papa veimaú, ʻo puleʻi pē hoʻo ʻunu holó ʻo fakatatau ki he meʻa ʻoku nau loto ki aí