KO E FĀMILÍ ʻa e fokotuʻutuʻu ʻiloa fakaetangata motuʻa tahá, ka ʻi he ʻaho ní ʻoku ʻi ha tuʻunga faingataʻa ia. Ko e mafola fakamanavahē ʻa hono ngāuekoviʻaki ʻa e faitoʻo kona tapú mo e ʻulungaanga taʻetaau ʻi he taʻu hongofulu tupú, ko e faingataʻa ʻi onopooni ʻi he vete malí mo e fakamālohi ʻi he fāmilí, ko e tupu fakaʻulia ʻa e tokolahi ʻo e ngaahi fāmili mātuʻa taʻemalí, pea mo e ngaahi palopalema mafatukituki kehé ʻokú ne ʻai ai ʻa e niʻihi ke nau fifili pe ʻe haofaki ʻa e moʻui fakafāmilí.

ʻOku kei malava ke tuʻumaʻu ha fāmili, ʻo ohi ai ha ʻātakai malu ki hono kau mēmipá? ʻIo, ʻo kapau ʻoku ʻiloʻi ʻe he ngaahi mēmipa ʻo e fāmilí ʻa e fakapulipuli moʻoni ʻo e fāmili fiefiá. ʻOku ʻikai ke fufū ʻa e fakapulipuli ko ení. Kuo ʻahiʻahiʻi pea fakamoʻoniʻi ia ʻi he ngaahi senituli lahi. Ko e hā ia? Ko e tohí ni, Ko e Fakapulipuli ʻo e Fāmili Fiefiá, ʻokú ne ʻomai ʻa e talí. ʻOkú ne toe ʻomai ʻa e ngaahi fakatātā ʻaonga ʻo e founga ʻe lava ai ʻo tokoni ʻa e “fakapulipuli” ko ení ke fakaleleiʻi ʻa e ngaahi tuʻunga faingataʻa ʻi he fāmilí. ʻOku ʻi ai ha taha ʻi he ʻahó ni ʻoku ʻikai te ne fiemaʻu ʻa e fakamatala peheé?