1. Ko e hā ʻoku lava ai ke hoko ʻo mātuʻaki faingataʻa he ʻahó ni ʻa hono tauhi ʻo ha fāmilí?

 “KUO kamata liliu ʻa e anga ʻo e maama ko eni.” (1 Kolinito 7:31) Ko e ngaahi lea ko iá naʻe hiki ia ʻi he taʻu ʻe 1,900 tupu kuo maliu atú, pea ko e meʻa moʻoni ē ko ia ʻi he ʻahó ni! Kuo hoko ʻo liliu ʻa e ngaahi meʻá, tautefito ʻi he fekauʻaki mo e moʻui fakafāmilí. Ko e meʻa ko ia naʻe vakai ki ai ʻoku totonu pe tukufakaholo ʻi he ngaahi taʻu ʻe 40 pe 50 kuo maliu atú ʻoku ʻikai ke faʻa tali lelei ia he ʻahó ni. Koeʻuhi ko e meʻá ni, ko e lavameʻa ʻo hono tauhi ʻo ha fāmilí ʻe lava ke ne ʻomai ha ngaahi pole lahi fakaʻulia. Ka neongo ia, kapau te ke tokanga ki he faleʻi Fakatohitapú, ʻe lava ke ke fakaleleiʻi ʻa e ngaahi pole ko iá.

2. Ko e hā ʻa e ngaahi tuʻunga fakaʻekonōmika ʻe lava ke ne fakatupunga ha faingataʻa ʻi ha fāmili?

² ʻI he ʻahó ni ʻoku ʻikai ke kei fiemālie pē ʻa e kakai tokolahi ʻi ha moʻui faingofua, ʻo fakamuʻomuʻa ʻa e fāmilí. ʻI hono faʻu ʻe he māmani fakakomēsialé ʻa e ngaahi koloa lahi angé pea ngāueʻaki ʻene ngaahi pōtoʻi ʻi he tuʻuakí ʻi he feinga ke fakataueleʻi ʻa e kakaí, ʻoku fakamoleki ai ʻe he ngaahi tamai mo e ngaahi faʻē ʻe laui miliona ʻa e ngaahi houa lahi ʻi he ngāué koeʻuhi ke lava ʻo nau fakatau mai ʻa e ngaahi koloa ko ení. ʻOku fehangahangai ʻa e laui miliona kehe mo ha fāinga ʻi he ʻaho ki he ʻaho koeʻuhi pē ke ʻi ai ha meʻakai ʻi he tēpilé. Kuo pau ke nau fakamoleki ʻa e taimi lahi mamaʻo ange ʻi he ngāué ʻi he tuʻunga naʻe angaʻakí, mahalo ʻo maʻu ʻa e ngāue ʻe ua, koeʻuhi pē ke totongiʻaki ʻa e ngaahi meʻa ʻoku fiemaʻú. Neongo ia ʻe fiefia ʻa e niʻihi kehé ke maʻu ha ngāue, koeʻuhi he ko ha palopalema mafolalahia ʻa e taʻemaʻungāué. ʻIo, ʻoku ʻikai ke faingofua maʻu pē ʻa e moʻuí  ki he fāmili ʻi onopōní, ka ʻoku lava ʻa e ngaahi tefitoʻi moʻoni ʻi he Tohitapú ʻo tokoniʻi ʻa e ngaahi fāmilí ke nau fai ʻa e lelei tahá ʻo fakatatau ki honau ngaahi tuʻungá.

3. Ko e hā ʻa e tefitoʻi moʻoni naʻe fakamatalaʻi ʻe he ʻapositolo ko Paulá, pea ʻe lava fēfē ke tokoniʻi ʻe hono ngāueʻaki iá ha tokotaha ke lavameʻa ʻi hono tauhi ha fāmilí?

³ Naʻe aʻusia ʻe he ʻapositolo ko Paulá ʻa e ngaahi faingataʻa fakaʻekonōmika. ʻI hono fakaleleiʻi kinautolú, naʻá ne ako ai ha lēsoni mahuʻinga, ʻa ia ʻokú ne fakamatalaʻi ʻi heʻene tohi ki hono kaumeʻa ko Tīmoté. ʻOku tohi ʻe Paula: “Talaʻehai naʻa tau haʻu mo kitautolu ha meʻa ki mamani, koeʻuhi foki ʻe ʻikai te tau lava ke ʻalu mo kitautolu ha momoʻi meʻa: pea ʻi heʻetau maʻu ʻetau meʻakai mo e kofu, te tau feʻunga pe ʻi he meʻa ko ia.” (1 Timote 6:​7, 8) Ko e moʻoni, ʻoku fiemaʻu ʻe he fāmilí ʻa e meʻa lahi ange ia ʻi he meʻakaí pē mo e valá. ʻOkú ne toe fiemaʻu ha feituʻu ke nofo ai. ʻOku fiemaʻu ʻe he fānaú ha ako. Pea ʻoku ʻi ai ʻa e ngaahi tohi moʻua fakafaitoʻo mo e ngaahi fakamole kehe. Neongo ia, ʻoku kei ngāueʻaki pē ʻa e tefitoʻi moʻoni ʻo e ngaahi lea ʻa Paulá. Kapau ʻoku tau fiemālie ke fakatōliʻa ʻetau ngaahi fiemaʻú kae ʻikai ko hono fakahōhōʻiaʻi ʻa e ngaahi meʻa ʻoku tau loto ki aí, ʻe faingofua ange ai ʻa e moʻuí.

4, 5. ʻE lava fēfē ke tokoni ʻa e tomuʻa fakakaukaú mo e palaní ki hono tauhi ʻa e fāmilí?

⁴ Ko e toe tefitoʻi moʻoni ʻaonga ʻe taha ʻoku maʻu ia ʻi he taha ʻo e ngaahi talanoa fakatātā ʻa Sīsuú. Naʻá ne pehē: “Tau lau ʻoku ai hamou toko taha ʻoku ne loto ke langa ha fuʻu taua, ʻikai te ne nofo muʻa ʻo fatu hono totongi, pe ʻoku feʻunga ʻene paʻanga mo hono fai ke osi?” (Luke 14:28) ʻOku lea heni ʻa Sīsū ʻo fekauʻaki mo e tomuʻa fakakaukaú, ʻa e palani ki muʻá. Naʻa tau sio ʻi ha vahe ki muʻa ki he anga ʻo e tokoni ʻa e meʻá ni ʻi he taimi ʻoku fakakaukau ai ha ongo meʻa kei siʻi ke na malí. Pea ʻi he hili ʻa e malí, ʻoku toe ʻaonga ia ʻi hono tauhi ʻo ha fāmilí. Ko e tomuʻa fakakaukau ʻi he tafaʻaki ko ení ʻoku kau ki ai ʻa hono maʻu ha patiseti, ko ha palani ki muʻa ke ngāue fakapotopoto lahi ʻaki ʻa e ngaahi koloa ʻoku ala maʻú. ʻI he foungá ni ʻoku lava ai ke mapuleʻi ʻe ha fāmili ʻa e ngaahi fakamolé, ʻo vaheʻi ʻa e paʻanga ki he fakamole ki he ngaahi meʻa ʻoku fiemaʻú ʻi he ʻaho taki taha  pe uike taki taha, pea ʻikai ke moʻui ʻo fakalaka atu ia ʻi he ngaahi meʻa ʻoku maʻú.

⁵ ʻI he ngaahi fonua ʻe niʻihi, ko e patiseti peheé ʻe ʻuhinga nai ia ko e pau ke talitekeʻi ʻa e ongoʻi fie nō ʻi ha peseti tupu māʻolunga ki hano fakatau mai ʻo ha ngaahi meʻa ʻoku ʻikai ke fiemaʻu. ʻI he niʻihi kehé ia, ʻe ʻuhinga nai ia ke taʻotaʻofi mālohi ʻa hono ngāueʻaki ʻa e ngaahi kaati fakataú. (Palovepi 22:7) ʻE toe ʻuhinga nai ia ko hono talitekeʻi ʻa e holi mālohi ke fakatau maí​—ʻa hono fakatau fakafokifā mai ʻo ha meʻa ʻo ʻikai fua-tautau ʻa e ngaahi fiemaʻú mo e ngaahi nunuʻá. ʻIkai ko ia pē, ʻe ʻai ʻe ha patiseti ke hā mahino ko hono fakamoleki siokita ʻa e paʻangá ʻi he pele paʻangá, ifi tapaká, mo e inu tōtuʻá ʻoku maumauʻi ai ʻa e tuʻunga fakaʻekonōmika ʻo e fāmilí, pea pehē foki ki heʻene fepaki mo e ngaahi tefitoʻi moʻoni ʻi he Tohitapú.​—Palovepi 23:​20, 21, 29-35; Loma 6:19; Efeso 5:​1-4 (Efeso 5:3-5, PM).

6. Ko e hā ʻa e ngaahi moʻoni Fakatohitapu ʻoku tokoni ki he faʻahinga ko ia ʻoku nau moʻui masivá?

⁶ Neongo ia, fēfē ʻa e faʻahinga ko ia ʻoku fakamālohiʻi ke nau nofo masivá? Ko e meʻa ʻe taha, ʻe lava ke fakafiemālieʻi kinautolu ke nau ʻilo ko e palopalema ko eni ʻi māmani lahí ʻoku fakataimi pē ia. ʻI he māmani foʻou ʻoku tuʻunuku vave maí, ʻe toʻo atu ai ʻe Sihova ʻa e masivá fakataha mo e ngaahi kovi kehe kotoa ʻokú ne fakatupunga ʻa e mamahi lahi ki he faʻahinga ʻo e tangatá. (Sāme 72:​1, 12-16) Lolotonga iá, ko e kau Kalisitiane moʻoní, neongo ai pē kapau ʻoku nau masiva ʻaupito, ʻoku ʻikai te nau ongoʻi ʻoku nau faingatāmaki fakaʻaufuli, he ʻoku nau maʻu ʻa e tui ki he talaʻofa ʻa Sihová: “ʻE ʻikai siʻi te u mahuʻi meiate koe, kaeʻumaʻā haʻaku momoʻi liʻaki koe.” Ko ia, ʻoku malava ai ha tokotaha tui ke ne lea ʻi he tuipau: “Ko [Sihova] ko hoku tokoni; ʻe ʻikai te u manavahe.” (Hepelu 13:​5, 6) ʻI he ngaahi ʻaho faingataʻa ko ení, kuo poupouʻi ʻe Sihova ʻa ʻene kau lotú ʻi he ngaahi founga lahi ʻi he taimi ʻoku nau moʻuiʻaki ai ʻa ʻene ngaahi tefitoʻi moʻoní pea fakamuʻomuʻa ʻa hono Puleʻangá ʻi heʻenau moʻuí. (Mātiu 6:33) Ko e fuʻu tokolahi ʻo kinautolu ʻoku lava ke nau fakamoʻoniʻi ia, ʻo leaʻaki, ʻa e ngaahi lea ʻa e ʻapositolo ko Paulá: “Ne akoʻi au, ʻi heʻeku meʻa tāu taha mo hono kotoa, kau potopotoʻi ʻi he nofo makona mo e nofo fiekaia, mo  nofo mohumeʻa mo e nofo masiva. ʻOku ou mafeia ʻa e meʻa kotoa pe ʻiate ia ʻoku ne fakakaukaua au.”—Filipai 4:​12, 13.

7. Ko e hā ʻa e ngaahi lea ʻa Sīsū, kapau ʻe ngāueʻaki, ʻe tokoni ia ki he lavameʻa ʻo hono tauhi ʻa e fāmilí?

⁷ ʻI he ofi ke ngata ʻa ʻene ngāue fakafaifekau ʻi he māmaní, naʻe pehē ʻe Sīsū: “Te ke ʻofa ki ho kaungaʻapi ʻo hange ko hoʻo ʻofa kiate koe.” (Mātiu 22:39) Ko hono ngāueʻaki ʻa e faleʻi ko ení ʻi he fāmilí ʻoku tokoni lahi ia ki hono tauhi ʻo e fāmilí. He ko ē, ʻikai ko e faʻahinga ko ia ʻi hotau fāmilí ʻa hotau ngaahi kaungāʻapi ofi taha mo ʻofeina tahá​—ʻa e ngaahi husepānití mo e ngaahi uaifí, ngaahi mātuʻá mo e fānaú? ʻE lava fēfē ke fakahaaʻi ʻe he ngaahi mēmipa ʻi he fāmilí ʻa e feʻofaʻakí?

8. ʻE lava fēfē ke fakahāhaaʻi ʻa e ʻofá ʻi loto ʻi he fāmilí?

 ⁸ Ko e founga ʻe taha ko e tuku ki he mēmipa taki taha ʻo e fāmilí ke ne fai ʻa hono ngafa totonu ʻi he ngaahi ngāue ʻi he fāmilí. Ko ia ai, ʻoku fiemaʻu ke akoʻi ʻa e fānaú ke nau ʻave ʻo tuku ʻa e ngaahi meʻá ʻi he hili hono ngāueʻaki kinautolú, tatau ai pē pe ko e ngaahi meʻá ni ko e ngaahi vala pe ko e ʻū meʻa-vaʻinga. ʻE fiemaʻu nai ʻa e taimi mo e feinga, ke fakamaau ʻa e mohengá ʻi he pongipongi taki taha, ka ko ha tokoni lahi ia ʻi hono tauhi ʻo e fāmilí. Ko e moʻoni, ʻoku ʻikai ala kalofi, ha kiʻi taʻemaau fakataimi, ka ʻe lava ke ngāue fakataha kotoa ke tauhi ʻa e ʻapí ke maau lelei, pehē foki ki he fakamaʻa ʻi he hili ʻa e ngaahi houa kaí. Ko e fakapikopikó, fakafiemālieʻi-kitá, mo ha laumālie taʻefiefoaki, mo taʻefiefai ha meʻá ʻoku uesia kovi ai ʻa e tokotaha kotoa. (Palovepi 26:​14-16) ʻI he tafaʻaki ʻe tahá, ko ha laumālie vēkeveke mo loto-lelei ʻokú ne pouaki ke tupu ha moʻui fakafāmili fiefia. “ʻOku ʻofa ʻa e ʻOtua ki ha taha ʻoku vekeveke foaki.”—2 Kolinito 9:7.

9, 10. (a) Ko e hā ʻa e kavenga ʻoku faʻa hilifaki ki he fefine ʻo e ʻapí, pea ʻe lava fēfē ke fakamaʻamaʻa ʻa e meʻá ni? (e) Ko e hā ʻa e vakai mafamafatatau ʻoku fokotuʻu mai fekauʻaki mo e ngāue fakaʻapí?

⁹ Ko e fakaʻatuʻí mo e ʻofá ʻe tokoni ia ki hono taʻofi ha tuʻunga ʻa ia ko ha palopalema mafatukituki ia ʻi he ngaahi ʻapi ʻe niʻihi. Kuo hoko tukufakaholo ʻa e ngaahi faʻeé ko e poupou tefito ia ʻo e moʻui ʻi he ʻapí. Kuo nau tokangaʻi ʻa e fānaú, fakamaʻa ʻa e ʻapí, fai e fō ʻa e fāmilí, pea fakatau mai mo ngaohi ʻa e meʻakaí. ʻI he ngaahi fonua ʻe niʻihi, kuo toe tōʻongaʻaki ai ʻa e ngāue ʻa e kakai fefiné ʻi he ngaahi ngoueʻangá, fakatau atu ʻa e fua ʻo e ngoué ʻi he māketí, pe tokoni ʻi he ngaahi founga kehe ki he patiseti ʻa e fāmilí. Neongo ʻa e feituʻu naʻe ʻikai ke angaʻaki ai ʻa e meʻá ni ki muʻá, kuo ueʻi ʻe he fiemaʻú ʻa e laui miliona ʻo e kakai fefine malí ke nau kumi ngāue ki tuʻa mei he ʻapí. Ko ha uaifi mo ha faʻē ʻa ia ʻoku ngāue mālohi ʻi he ngaahi tafaʻaki kehekehe ko ení ʻoku tuha ia mo ha fakaongoongolelei. Hangē ko e “uaifi lavameʻa” naʻe fakamatalaʻi ʻi he Tohitapú, ʻoku faʻa ngāue ia. “Oku ikai ke kai eia ae ma ae fakabikobiko.” (Palovepi 31:​10, 27, PM) Neongo ia, ʻoku ʻikai ke ʻuhinga ʻa e meʻá ni ia, ko e fefiné pē tokotaha ʻoku lava ke ngāue ʻi he ʻapí. Hili ʻa e ngāue fakatouʻosi ʻa ha husepāniti mo ha uaifi ʻi he ʻahó  kotoa ʻi tuʻa mei he ʻapí, ʻe totonu ki he uaifí pē tokotaha ke ne fua ʻa e kavenga ʻo e ngāue fakaeʻapí lolotonga ia ʻoku mālōlō ʻa e husepānití ia mo e toenga ʻo e fāmilí? Ko e moʻoni ʻoku ʻikai. (Fakafehoanaki mo e 2 Kolinito 8:​13, 14.) Ko ia, ko e fakatātaá, kapau ʻoku ʻai ke teuteu ʻe ha faʻē ʻa e meʻakaí, te ne houngaʻia nai kapau ʻe tokoni ʻa e ngaahi mēmipa kehe ʻo e fāmilí ki hono teuteú ʻaki hono seti ʻo e tēpilé, fai ʻa e niʻihi ʻo e fakataú, pe fai holo ha kiʻi fakamaʻa ʻo e falé. ʻIo, ʻe malava ke fevahevaheʻaki kotoa ʻa e fatongiá.​—Fakafehoanaki mo e Kaletia 6:2.

¹⁰ ʻE pehē nai ʻe he niʻihi: “Ko e feituʻu ko ia ʻoku ou nofo aí ʻoku ʻikai ko e ngafa ia ʻo ha tangata ke ne fai ha ngaahi meʻa pehē.” ʻOku moʻoni nai ia, kae ʻikai nai ʻoku lelei ke fai ha fakakaukau ki he meʻá ni? ʻI he taimi naʻe kamataʻi ai ʻe Sihova ko e ʻOtuá ʻa e fāmilí, naʻe ʻikai te ne vaheʻi ha ngāue pau ke fai pē ia ʻe he kakai fefiné. ʻI he taimi ʻe taha, ʻi he ʻaʻahi ha kau talafekau makehe meia Sihova ki he tangata loto-tōnunga ko ʻĒpalahamé, naʻá ne kau fakafoʻituitui ai ʻi hono teuteu mo tokangaʻi ʻa e meʻakai ki he kau ʻaʻahí. (Senesi 18:​1-8) ʻOku faleʻi mai ʻa e Tohitapú: “ʻOku totonu ke pehe foki ʻa e ʻofa ʻa e ngaahi husepaniti ki siʻonau ngaahi uaifi, he ko siʻonau sino kinautolu.” (Efeso 5:28) Kapau, ko e husepānití ʻi he ngataʻanga ʻo e ʻahó, ʻoku helaʻia peá ne loto ke ne mālōlō, ʻikai ʻoku ngalingali ongoʻi pehē pē mo e uaifí, ʻo toe lahi ange nai ia? (1 Pita 3:7) ʻIkai ʻe feʻungamālie mo anga-ʻofa leva ki he husepānití ke ne tokoni ʻi he ʻapí?​—Filipai 2:​3, 4.

11. Ko e hā ʻa e founga naʻe fokotuʻu ai ʻe Sīsū ha faʻifaʻitakiʻanga lelei ki he mēmipa taki taha ʻo e fāmilí?

¹¹ Ko Sīsū ʻa e faʻifaʻitakiʻanga lelei taha ʻo e tokotaha ʻa ia naʻá ne fakahōifuaʻi ʻa e ʻOtuá mo ʻomai ʻa e fiefia ki hono kaungāfeohí. Neongo naʻe ʻikai ʻaupito te ne mali, ko ha faʻifaʻitakiʻanga lelei ʻa Sīsū ki he ngaahi husepānití, pea pehē foki ki he ngaahi uaifí mo e fānaú. Naʻá ne lea ʻo fekauʻaki mo ia tonu: “Ko e Fanautama ʻa Tangata naʻe ʻikai te ne haʻu ke maʻu sevaniti, ka ke sevaniti pe ʻe ia,” ʻa ia, ko e tauhi ʻo e niʻihi kehé. (Mātiu 20:28) He fiefia lahi ē ko e ngaahi fāmili ko ia ʻoku fakatupulekina ai ʻe he ngaahi mēmipa kotoa pē ha fakakaukau peheé!

12. Ko e hā ʻoku fiemaʻu ʻe Sihova mei he faʻahinga ko ia ʻoku nau tauhi kiate iá?

¹² Ko ha toe tefitoʻi moʻoni faka-Tohitapu ʻe taha ʻoku lava ke tokoni ʻi hono tokangaʻi ʻo ha fāmilí ʻoku maʻu ia ʻi he 2 Kolinito 7:​1 (PM; 6:​19). ʻOku tau lau ai: “Tau fakamaa akitautolu mei he uli kotoabe oe kakano moe laumalie.” Ko e faʻahinga ko ia ʻoku nau talangofua ki he ngaahi lea fakamānavaʻi ko ení ʻoku tali lelei kinautolu ʻe Sihova, ʻa ia ʻokú ne fiemaʻu ʻa e “lotu ʻoku maʻa mo taʻe hano ʻuli.” (Semisi 1:27) Pea ʻoku maʻu ʻe honau fāmilí ʻa e ngaahi ʻaonga ʻoku felāveʻi mo iá.

13. Ko e hā ʻoku mahuʻinga ai ʻa e maʻá ʻi hono tauhi ʻa e fāmilí?

¹³ Ko e fakatātaá, ʻoku fakapapauʻi mai ʻe he Tohitapú kiate kitautolu ʻe hoko mai ʻa e ʻaho ʻa ia ʻe ʻikai ke toe ʻi ai ai ha mahamahaki mo ha puke. ʻI he taimi ko iá, ʻe “ikai ha nofo ai te ne pehe, ʻOku ou mahaki.” (Aisea 33:24; Fakahā 21:​4, 5) Kae kehe, kuo pau ki he fāmili kotoa pē ke fekuki mo e puké ʻi he taimi ki he taimi, kae ʻoua ke toki aʻu ki he taimi ko iá. Naʻa mo Paula mo Tīmote naʻá na puke. (Kaletia  4:13; 1 Timote 5:23) Kae kehe, ʻoku pehē ʻe he kau mataotao fakafaitoʻó ʻoku ala taʻofi ʻa e konga lahi ʻo e puké. ʻOku hao ʻa e ngaahi fāmili fakapotopotó mei he ngaahi mahaki ala taʻofi ʻe niʻihi kapau ʻoku nau fakaʻehiʻehi mei he taʻemaʻa fakakakanó mo fakalaumālié. Tau fakakaukau angé ki he founga ke fai ai iá.​—Fakafehoanaki mo Palovepi 22:3.

14. ʻI he founga fē ʻe lava ai ke maluʻi ʻe he maʻa fakaeʻulungāngá ha fāmili mei he puké?

¹⁴ Ko e tuʻunga maʻa ʻo e laumālié ʻoku kau ki ai ʻa e maʻa fakaeʻulungāngá. Hangē ko ia ʻoku ʻiloá, ʻoku pouaki ʻe he Tohitapú ʻa e ngaahi tuʻunga fakaeʻulungaanga māʻolunga pea ʻokú ne fakahalaiaʻi ha faʻahinga founga pē ʻo e fekoekoeʻi fakaefehokotaki fakasino ʻi tuʻa ʻi he nofo malí. “ʻOku ʻikai ha feʻauaki, . . . pe ha tono ʻunoho, pe ha moʻui fakapelepele, pe ha fai faka-Sotoma . . . te ne maʻu tofiʻa ʻi he Puleʻanga ʻo e ʻOtua.” (1 Kolinito 6:​9, 10) Ko hono tauhi ʻo e ngaahi tuʻunga tonu ko ení ʻoku mahuʻinga ʻaupito ia ki he kau Kalisitiane ʻoku nau moʻui ʻi he māmani fakaʻau ki he kovi ange ʻo e ʻaho ní. ʻI hono fai iá ʻoku fakafiefiaʻi ai ʻa e ʻOtuá pea ʻoku toe tokoni ia ke maluʻi ai ʻa e fāmilí mei he ngaahi mahaki ʻoku fetuku holo ʻe he fehokotaki fakasinó hangē ko e ʻeitisí, saifilisí, konoliá, mo e kalamitiá.​—Palovepi 7:​10-23.

15. ʻOmai ha fakatātā ʻo e lava ke fakatupunga ha puke naʻe ʻikai ke fiemaʻu ʻi he ʻikai ke maʻa fakaesinó.

¹⁵ Ko hono ‘fakamaa kita mei he uli kotoabe oe kakanó’ ʻoku tokoni ia ke maluʻi ʻa e fāmilí mei he ngaahi puke kehé. Ko e ngaahi mahaki lahi ʻoku fakatupunga ia ʻi he ʻikai ha tuʻunga maʻa fakaesinó. Ko ha fakatātā tefito ko e tōʻongaʻaki ʻa e ifí. ʻOku ʻikai ngata pē ʻi hono fakaʻuliʻi ʻe he ifí ʻa e ngaahi maʻamaʻá, ko e valá, pea mo e ʻeá tonu ka ʻokú ne toe ʻai foki ke puke ʻa e kakaí. ʻOku mate ʻa e kakai ʻe laui miliona ʻi he taʻu taki taha koeʻuhi ko ʻenau ifi tapaká. Fakakaukau atu ki ai; ʻi he taʻu taki taha ne mei ʻikai ke hoko ʻo puke ai ʻa e kakai ʻe laui miliona pea mate mutukia kapau naʻa nau fakaʻehiʻehi mei he ‘uliʻi ko ia oe kakanó’!

16, 17. (a) Ko e hā ʻa e lao naʻe foaki ʻe Sihova ke maluʻiʻaki ʻa e kau ʻIsilelí mei he ngaahi mahaki ʻe niʻihi? (e) ʻE lava fēfē ke ngāueʻaki ʻa e tefitoʻi moʻoni ʻoku tuʻu mei mui ʻi he Teutalonome 23:​12, 13 ʻi he ngaahi fāmilí kotoa?

¹⁶ Fakakaukau atu ki ha toe fakatātā ʻe taha. ʻI he taʻu  nai ʻe 3,500 kuo maliu atú, naʻe ʻoange ai ʻe he ʻOtuá ki he puleʻanga ʻo ʻIsilelí ʻa ʻene Laó koeʻuhi ke fokotuʻutuʻu maau ʻenau lotú, pea ʻi ha tuʻunga, ʻenau moʻuí ʻi he ʻaho kotoa pē. Naʻe tokoni ʻa e Lao ko iá ke maluʻi ʻa e puleʻangá mei he mahakí ʻaki hono fokotuʻu ʻo ha ngaahi tuʻutuʻuni tefito ʻo e haisiní. Ko ha lao pehē ʻe taha naʻe fekauʻaki ia mo hono tukuange atu ʻa e tuʻumamaʻo ʻa e tangatá, ʻa ia naʻe pau ke tanu fakalelei ia ʻo mamaʻo mei he ʻapitangá koeʻuhi ke hoko ai ʻo ʻikai ʻuliʻi ʻa e feituʻu naʻe nofo ai ʻa e kakaí. (Teutalonome 23:​12, 13) Ko e lao motuʻa ko iá ʻoku kei hoko pē ia ko e faleʻi lelei. Naʻa mo e ʻahó ni ʻoku hoko ʻo puke pea mate ʻa e kakaí koeʻuhi ko e ʻikai te nau muimui ki aí. a

 ¹⁷ ʻI he fehoanaki mo e tefitoʻi moʻoni ʻoku tuʻu mei mui ʻi he lao ʻa ʻIsilelí, ko e falekaukau mo e feituʻu ʻo e falemālōlō ʻa e fāmilí​—tatau ai pē pe ʻoku ʻi fale pe ʻi tuʻa mei he falé—ʻoku totonu ke tauhi ke maʻa mo ʻatā mei he siemú. Kapau ko e feituʻu ʻo e falemālōloó ʻoku ʻikai tauhi ke maʻa pea ʻufiʻufi, ʻe fakatahataha ki ai ʻa e fanga langó pea nau fakamafola holo ʻa e ngaahi siemú ki he ngaahi feituʻu kehe ʻi he ʻapí​—pea hoko atu ai ki he meʻakai ʻoku tau kaí! ʻIkai ko ia pē, ko e fānaú mo e kakai lalahí ʻoku totonu ke fanofano honau nimá hili ʻenau ʻalu ki he feituʻu ko iá. He ka ʻikai, te nau ʻomai ʻa e ngaahi siemu ʻi honau kilí. Fakatatau ki ha lau ʻa ha toketā Falanisē, ko e fanofanó “ʻoku kei hoko ia ko e taha ʻo e ngaahi fakapapauʻiʻanga lelei taha ki hono taʻofi ʻo e mahaki pipihi ʻe niʻihi ʻi he meʻakaí, halanga mānavá, pe kilí.”

18, 19. Ko e hā ʻa e ngaahi fokotuʻu ʻoku ʻomai ki hono tauhi maʻu ha fale ke maʻa naʻa mo e ʻi ha feituʻu kaungāʻapi masiva?

¹⁸ Ko e moʻoni, ko e maʻá ko ha pole ia ʻi ha feituʻu kaungāʻapi masiva. Ko ha tokotaha ʻoku maheni mo e ngaahi feituʻu peheé naʻá ne fakamatala: “Ko e ʻea vela fakafeʻātungiá ʻokú ne ʻai ʻa e ngāue fakamaʻá ke liunga ua ʻene faingataʻá. ʻOku ʻufiʻufi ʻe he ngaahi afā efú ʻa e fanga kiʻi mafahifahi kotoa pē ʻo ha fale ʻaki ʻa e fanga kiʻi efuefu melomelo momo-iiki. . . . Ko e tupu vave ʻa e tokolahí ʻi he ngaahi koló, pea pehē ʻi he ngaahi feituʻu kolo ʻuta ʻe niʻihi, ʻokú ne toe fakatupu ʻa e ngaahi fakatuʻutāmaki ki he moʻuí. Ko e ngaahi fakatafenga vai ʻoku avá, ngaahi fokotuʻunga veve ʻoku movete holó, ngaahi falemālōlō fakakolo ʻoku ʻulí, fanga kumā ʻoku nau fetuku holo ʻa e mahakí, fanga mongomongá, mo e fanga langó kuo nau hoko ko e ngaahi meʻa anga-maheni ia ʻoku fai ki ai ʻa e sió.”

¹⁹ Ko hono tauhi ʻo e tuʻunga maʻá ʻi he malumalu ʻo e ngaahi tuʻunga ko ení ʻoku faingataʻa. Neongo ia, ʻoku tuha ia mo e feinga. Ko e koá mo e vaí mo ha toe kiʻi ngāue lahi ange ʻoku maʻamaʻa ange ia ʻi he faitoʻó mo e ngaahi moʻua fakafalemahakí. Kapau ʻokú ke nofo ʻi ha ʻātakai pehē, ʻi he tuʻunga lahi taha ʻe ala lavá, tauhi ho falé mo e loto-ʻapí  tonu ke maʻa mo ʻatā mei he tuʻumamaʻo ʻa e fanga manú. Kapau ko e kiʻi hala ki ho falé ʻoku pau ke pelepela ia lolotonga ʻa e ngaahi vahaʻa taimi ʻuhoʻuhá, ʻe lava ke ke tanu ia ʻaki ha fanga kiʻi patapata pe makamaka ke tokoni ke ʻoua ʻe pelepela ʻa e falé? Kapau ʻoku ngāueʻaki ʻa e suú pe senitoló, ʻe lava ke vete ʻa e ngaahi meʻá ni ki muʻa ke hū ʻa e tokotaha ʻokú ne tuí ki he falé? Pehē foki, kuo pau ke ke tauhi hoʻo maʻuʻanga vaí ke ʻatā ia mei hano ʻuliʻi. ʻOku fakafuofua ʻoku ʻikai siʻi hifo ʻi he mate ʻe ua miliona ʻi he taʻu ko e tupu mei he ngaahi mahaki ʻoku felāveʻi mo e vai ʻulí pea mo e siʻi e tauhi ʻo e tuʻunga maʻá.

20. Kapau ʻoku fiemaʻu ke maʻa ʻa e falé, ko hai kuo pau ke fevahevaheʻaki ʻa e fatongia ko iá?

²⁰ ʻOku fakatuʻunga ha ʻapi maʻa ʻi he tokotaha kotoa pē​—faʻē, tamai, fānau, mo e kau ʻaʻahí. Ko ha faʻē ʻe taha ʻa ha fānau ʻe toko valu ʻi Keniā naʻá ne pehē: “Kuo ako ʻa e tokotaha kotoa ke fai ʻa ʻenau tafaʻakí.” Ko ha ʻapi maʻa, mo maau ʻoku tapua lelei atu ai ʻa e fāmilí kotoa. ʻOku pehē ʻe ha palōveepi faka-Sipeini: “ʻOku ʻikai ha vākovi ia ʻi he vahaʻa ʻo e masivá mo e maʻá.” Tatau ai pē pe ʻoku nofo ha taha ʻi ha fuʻu ʻapi lahi, ʻi ha ʻapaatimeni, ʻi ha kiʻi ʻapi feʻunga, pe ko ha kiʻi fakahekeheke, ko e maʻá ʻa e kī ki ha fāmili moʻuilelei angé.

21. ʻI he fehoanakimālie mo e Palovepi 31:​28, ko e hā ʻe tokoni ki hono ʻomai ʻa e fiefiá ki ha fāmili?

²¹ ʻI he lāulea ki he uaifi lavameʻá, ʻoku pehē ʻe he tohi ʻa Palovepí: “ʻOku tuʻu hake ʻene fanau, ʻo nau tala monū ki ai: ko hono husepaniti foki, ʻo ne fakamalo kiate ia.” (Palovepi 31:28) Ko fē ʻa e taimi fakamuimui naʻá ke fakaongoongoleleiʻi ai ha mēmipa ʻo ho fāmilí? Ko e moʻoni, ʻoku tau hangē ha ngaahi ʻakau ʻi he taimi failaú ʻa ia ʻoku teu ke matala ʻi heʻenau maʻu ʻa e māfaná mo e hauhaú. ʻI hotau tuʻungá, ʻoku tau fiemaʻu ʻa e māfana ʻo e fakaongoongoleleiʻí. ʻOku tokoni ia ki ha uaifi ke ne ʻiloʻi ʻoku houngaʻia ʻa hono husepānití ʻiate ia ʻi heʻene ngāue mālohí mo ʻene tokanga ʻofá pea ʻoku ʻikai te ne tukunoaʻi pē  ia. (Palovepi 15:23; 25:11) Pea ʻoku lelei ʻa e taimi ʻoku fakaongoongoleleiʻi ai ʻe ha uaifi ʻa hono husepānití ʻi heʻene ngāue ʻi tuʻa mo loto ʻi he ʻapí. Ko e fānaú foki ʻoku nau lonogomoʻui ʻi he taimi ʻoku fakahīkihikiʻi ai kinautolu ʻe he ngaahi mātuʻá ʻi heʻenau ngaahi ngāue ʻi ʻapí, ʻi he ʻapiakó, pe ʻi he fakatahaʻanga Kalisitiané. Pea ko ha meʻa lahi ē ʻoku fakahoko ʻe ha kiʻi fakahoungaʻí! Ko e hā ʻa e totongi ki he pehē: “Māloó”? ʻOku siʻisiʻi ʻaupito, ka ko e tupu ʻoku maʻu ʻi he tuʻunga fakaeʻulungaanga ʻi he fāmilí ʻe lava ke hoko ʻo lahi ia.

22. Ko e hā ʻoku fiemaʻu ki ha fāmili ke hoko ai ʻo “tuʻumaʻú,” pea ʻe lava fēfē ke aʻusia ʻa e meʻá ni?

²² ʻI he ngaahi ʻuhinga lahi, ko hono tauhi ha fāmilí ʻoku ʻikai ke faingofua ia. Neongo ia, ʻoku lava ke fai ia ʻo lavameʻa. ʻOku pehē ʻe ha palōveepi ʻi he Tohitapú: “ʻE langa hake ha fāmili ʻaki ʻa e potó, pea ʻe fakamoʻoniʻi ʻene tuʻumaʻú ʻe he ʻiloʻiló.” (Palovepi 24:3, NW) Ko e potó mo e ʻiloʻiló ʻe lava ke maʻu ia kapau ʻe feinga mālohi ʻa e tokotaha kotoa pē ʻi he fāmilí ke ako ke ʻilo ʻa e finangalo ʻo e ʻOtuá pea ke ngāueʻaki ia ʻi heʻenau moʻuí. ʻOku tuha moʻoni ha fāmili fiefia mo e feinga!