Vahe 3

Ko Hai ʻa e ʻOtua Moʻoní?

1. Ko e hā ʻoku loto-tatau ai ʻa e tokolahi ki he ngaahi lea kamata ʻo e Tohitapú?

 ʻI HOʻO vakai hake ki he langí ʻi ha pō tafitonga, ʻikai ʻokú ke fakatumutumu ʻi he sio ki he lahi fau ʻa e ngaahi fetuʻú? Ko e hā hoʻo fakamatala ʻo kau ki heʻenau ʻi aí? Pea fēfē ʻa e ngaahi meʻamoʻui ʻi he māmaní​—ʻa e ngaahi matalaʻiʻakau lanu fakaʻofoʻofá, fanga manupuná mo ʻenau ngaahi hiva fiefiá, fanga tofuaʻa mālohi ʻoku hopo holo ʻi he ʻōsení? ʻOku hokohoko atu ʻa e fakahokohokó ni. Ko e ngaahi meʻá ni kotoa naʻe ʻikai malava ke nau hokonoa mai pē. Tā neʻineʻi ke loto-tatau ʻa e tokolahi ki he ngaahi lea kamata ʻo e Tohitapú: “ʻI he kamataʻanga naʻe fakatupu ʻe he ʻOtua ʻa e ngaahi langi mo mamani”!​—Sēnesi 1:1.

2. Ko e hā ʻoku leaʻaki ʻe he Tohitapú ʻo fekauʻaki mo e ʻOtuá, pea ko e hā ʻokú ne fakalototoʻaʻi mai ke tau faí?

² ʻOku māvahevahe lahi ʻa e faʻahinga ʻo e tangatá ʻi he fehuʻi fekauʻaki mo e ʻOtuá. ʻOku fakakaukau ʻa e niʻihi ko e ʻOtuá ko ha mālohi ʻoku ʻikai kau ki ha taha. ʻOku lotu ʻa e laui miliona ki heʻenau fanga kui kuo maté, ʻi he tui ʻoku fuʻu mamaʻo ʻaupito ʻa e ʻOtuá ke aʻu ki ai. Ka ʻoku fakahaaʻi mai ʻe he Tohitapú ko e ʻOtua moʻoní ko ha tokotaha moʻoni ʻokú ne fakahaaʻi ʻa e mahuʻingaʻia loto-māfana kiate kitautolu tāutaha. Ko e ʻuhinga ia ʻoku fakalototoʻaʻi mai ai kitautolu ke “kumi ki he ʻOtua,” ʻi he pehē: “Talāʻehai ʻoku ne mamaʻo mei hatau toko taha.”​—Ngāue 17:27.

3. Ko e hā ʻoku ʻikai malava ai ke ngaohi ha ʻīmisi ʻo e ʻOtuá?

³ ʻOku fōtunga fēfē ʻa e ʻOtuá? Naʻe mata vīsone ha tokosiʻi ʻo ʻene kau sevānití ki heʻene ʻi ai lāngilangiʻiá. ʻI he ngaahi meʻá ni naʻá ne fakatātaaʻi mai ai ia ʻokú ne ʻafio ʻi ha taloni, pea ʻoku haʻu meiate ia ha maama ngingila fakaofo. Kae kehe, ko e faʻahinga naʻa nau sio ʻi he ngaahi vīsoné ni naʻe ʻikai ʻaupito te nau fakamatalaʻi ha fōtunga pau. (Tāniela 7:​9, 10; Fakahā 4:​2, 3) ʻOku  peheé koeʻuhi “ko e ʻOtua ko e laumālie”; ʻoku ʻikai te ne maʻu ha sino fakakakano. (Sione 4:24) Ko hono moʻoní, ʻoku ʻikai malava ke ngaohi ha ʻīmisi totonu fakakakano ʻo hotau Tokotaha-Fakatupú, he “ko e meʻa ki he ʻOtua, kuo teʻeki ke mamata ki ai ʻe ha taha ʻi ha taimi.” (Sione 1:18; ʻEkisoto 33:20) Ka, ʻoku akoʻi mai kiate kitautolu ʻe he Tohitapú ha meʻa lahi ʻo fekauʻaki mo e ʻOtuá.

ʻOKU ʻI AI HA HUAFA ʻO E ʻOTUA MOʻONÍ

4. Ko e hā ʻa e ngaahi hingoa fakalakanga mohu ʻuhinga ʻe niʻihi ʻoku ngāueʻaki ʻi he Tohitapú ki he ʻOtuá?

⁴ ʻI he Tohitapú, ʻoku fakamatalaʻi ai ʻa e ʻOtua moʻoní ʻaki ʻa e ngaahi kupuʻi lea ko e “Otua Mafimafi,” “Fugani Maoluga,” “Tubuaga,” “Faiako Māʻongoʻonga,” “ʻEiki Hau,” mo e “Tuʻi Itaniti.” (Sēnesi 17:​1, PM; Sāme 50:​14, PM; Koheleti 12:​1, PM; ʻAisea 30:​20, NW; Ngāue 4:​24, NW; 1 Tīmote 1:17) ʻOku malava ke tokoniʻi kitautolu ʻe he fakalaulauloto ki he ngaahi hingoa fakalakangá ni ke tupulaki ʻetau ʻiloʻi ʻa e ʻOtuá.

5. Ko hai ʻa e huafa ʻo e ʻOtuá, pea ʻoku tuʻo fiha ʻa ʻene hā ʻi he Ngaahi Konga Tohitapu Faka-Hepeluú?

⁵ Kae kehe, ʻoku ʻi ai ha huafa laulōtaha ʻo e ʻOtuá ʻa ia ʻoku hā meimei tuʻo 7,000 ʻi he Ngaahi Konga Tohitapu Faka-Hepeluú pē​—ʻo tuʻo lahi ange ia ʻi he hā ʻa hono ngaahi hingoa fakalakangá. Ki muʻa ʻi he meimei taʻu ʻe 1,900 kuo maliu atú, naʻe taʻofi fakaetalatupuʻa ai ʻe he kau Siú ʻa hono leaʻaki ʻa e huafa fakaʻotuá. Naʻe tohi ʻa e lea Fakatohitapu Hepeluú ʻo ʻikai kau ai ha ngaahi vauele. Ko ia ai, ʻoku ʻikai ha founga ke ʻilo pau ai pē naʻe anga-fēfē ʻa hono puʻaki ʻe Mōsese, Tēvita, pe ko e niʻihi kehe ʻi he kuonga muʻá ʻa e ngaahi foʻi konisinānite ʻe fā (יהוה) ʻoku faʻu ʻaki ʻa e huafa fakaʻotuá. ʻOku fokotuʻu mai ʻe he kau ako mataotao ʻe niʻihi ʻo pehē ko e huafa ʻo e ʻOtuá naʻe puʻaki nai ko e “Yahweh,” ka ʻoku ʻikai te nau fakapapauʻi. Kuo laui taʻu ʻa hono ngāueʻaki ʻa hono puʻaki faka-Tonga ko e “Sihova,” pea ʻoku tali lahi he ʻahó ni ʻa hono puʻaki tatau ʻi he ngaahi lea lahi.​—Sio ki he ʻEkisoto 6:3 mo e ʻAisea 26:4.

ʻUHINGA ʻOKU TOTONU KE KE NGĀUEʻAKI AI ʻA E HUAFA ʻO E ʻOTUÁ

6. Ko e hā ʻoku leaʻaki ʻe he Sāme 83:18 ʻo fekauʻaki mo Sihová, pea ko e hā ʻoku totonu ai ke tau ngāueʻaki ʻa hono huafá?

⁶ Ko e huafa laulōtaha ʻo e ʻOtuá, ko Sihova, ʻokú ne fakafaikehekeheʻi ai ia mei he ngaahi ʻotua kehe kotoa pē. Ko e ʻuhinga  ia ʻoku hā tuʻo lahi ai ʻa e huafa ko iá ʻi he Tohitapú, tautefito ʻi hono konga tohi faka-Hepeluú. ʻOku ʻikai ke ngāueʻaki ʻe he kau liliu lea tokolahi ʻa e huafa fakaʻotuá, ka ʻoku fakahā mahino ʻe he Sāme 83:​18 (PM): “Ko koe, ko ho huafa oou ko Jihova, koe Fugani Maoluga i mamani kotoabe.” Ko ia ai ʻoku feʻungamālie kiate kitautolu ke tau ngāueʻaki ʻa e huafa fakafoʻituitui ʻo e ʻOtuá ʻi he taimi ʻoku tau lea ai kiate iá.

7. Ko e hā ʻoku akoʻi mai kiate kitautolu ʻo kau ki he ʻOtuá ʻe he ʻuhinga ʻo e huafa Sihová?

⁷ Ko e huafa Sihová ko ha faʻahinga ia ʻo ha foʻi veape faka-Hepelū ʻoku ʻuhinga “ke hoko.” Ko ia, ʻoku ʻuhinga ʻa e huafa ʻo e ʻOtuá “ʻOkú Ne ʻAi ke Hoko.” ʻOku fakapapauʻi mai ai ʻe Sihova ko e ʻOtuá ʻa ia tonu ko e Tokotaha Faʻu-Taumuʻa Lahi. ʻOkú ne ʻai maʻu pē ʻa ʻene ngaahi taumuʻá ke hoko ʻo moʻoni. Ko e ʻOtua moʻoní pē ʻoku totonu ʻa ʻene maʻu ʻa e huafa ko ʻení, he ʻoku ʻikai ʻaupito malava ʻe he faʻahinga ʻo e tangatá ke fakapapauʻi pe ʻe lavameʻa ʻa ʻenau ngaahi palaní. (Sēmisi 4:​13, 14) Ko Sihova tokotaha pē ʻoku malava ke ne pehē: “ʻE pehe pe mo ʻeku lea ʻoku ʻalu atu mei hoku ngutu: . . . [Te ne] fakaaʻu ʻa e meʻa ne u fekau atu ai ia.”​—ʻAisea 55:11.

8. Ko e hā ʻa e taumuʻa ko ia naʻe fanongonongo ʻe Sihova ʻo fakafou ʻia Mōsesé?

⁸ Ko e kau pēteliake Hepelū ko ia ko ʻĒpalahame, ʻAisake, mo Sēkope naʻa nau taki taha “lotu ʻi he huafa ʻo Sihova,” ka naʻe ʻikai te nau ʻilo ʻa e ʻuhinga kakato ʻo e huafa fakaʻotuá. (Sēnesi 21:33; 26:25; 32:9; ʻEkisoto 6:3) ʻI hono fakahā ki mui ʻe Sihova ʻa ʻene taumuʻa ke fakahaofi ʻa honau ngaahi hakó, ʻa ia ko e kau ʻIsilelí, mei he nofo pōpula ʻi ʻIsipité pea ʻoange kiate kinautolu ha “fonua ʻoku mahutafea ʻi he huʻakau mo e honi,” naʻe hā ngali taʻemalava nai ia. (ʻEkisoto 3:17) Ka neongo ia, naʻe fakamamafaʻi ʻe he ʻOtuá ʻa e ʻuhinga taʻengata ʻo hono huafá ʻaki ʻene tala ki heʻene palōfita ko Mōsesé: “Ko eni hoʻo lea ʻe fai ki haʻa Isileli, Kuo fekau au kiate kimoutolu ʻe Sihova, ko e ʻOtua ʻo hoʻomou ngaahi kui, ko e ʻOtua ʻo Epalahame, ko e ʻOtua ʻo Aisake, pea ko e ʻOtua ʻo Sekope: ko hoku hingoa ia ʻo taʻengata, pea ko hoku fakamanatu ia ki he toʻutangata mo e toʻutangata.”​—ʻEkisoto 3:15.

9. Naʻe anga-fēfē ʻa e vakai ʻa Felo kia Sihová?

⁹ Naʻe kole ʻa Mōsese kia Felo, ko e tuʻi ʻo ʻIsipité, ke fakaʻatā  ʻa e kau ʻIsilelí ke nau ō ke lotu kia Sihova ʻi he toafá. Ka ko Felo, ʻa ia naʻe fai ʻa e vakai kiate ia ko ha ʻotua pea naʻá ne lotu ki he ngaahi ʻotua ʻIsipite kehe, naʻá ne tali mai: “Ko hai ʻa Sihova ke u tokanga ai ki heʻene lea, ʻo tuku atu ʻa Isileli? ʻOku ʻikai te u ʻilo ʻa Sihova, pea ʻe ʻikai foki te u tuku atu ʻa Isileli.”​—ʻEkisoto 5:1, 2.

10. ʻI ʻIsipite ʻo e kuonga muʻá, ko e hā ʻa e meʻa naʻe fai ʻe Sihova ke fakahoko ai ʻa ʻene taumuʻa fekauʻaki mo e kau ʻIsilelí?

¹⁰ Naʻe fai hokohoko leva ʻe Sihova ha meʻa ke fakahoko ʻa ʻene taumuʻá, ʻo fai ia ke fehoanaki mo e ʻuhinga ʻo hono huafá. Naʻá ne ʻomai ʻa e ngaahi mala ʻe hongofulu ki he kau ʻIsipite ʻo e kuonga muʻá. Ko e mala fakamuimuí ko hono tāmateʻi ʻa e ʻuluaki tama kotoa pē ʻa e kau ʻIsipité, ʻo kau ai ʻa e foha ʻo e tokotaha loto-pōlepole ko Feló. Naʻe loto leva ʻa e kau ʻIsipité ke tukuange ʻa e kau ʻIsilelí ke nau ō. Kae kehe, naʻe maongo ki he kau ʻIsipite ʻe niʻihi ʻa e mālohi ʻo Sihová ʻo nau kau ai mo e kau ʻIsilelí ʻi he mavahe mei ʻIsipité.​—ʻEkisoto 12:​35-38.

11. Ko e hā ʻa e mana naʻe fakahoko ʻe Sihova ʻi he Tahi Kulokulá, pea ko e hā ʻa e meʻa naʻe pau ki hono ngaahi filí ke nau ʻilo ki aí?

¹¹ Naʻe fokotuʻutuʻu ʻa e tokotaha loto-fefeka ko Feló mo ʻene kau taú, fakataha mo e ngaahi saliote tau ʻe laui teau, ke toe puke mai ʻa ʻene kau pōpulá. ʻI he ofi atu ʻa e kau ʻIsipité, naʻe vaheʻi fakaemana ʻe he ʻOtuá ʻa e Tahi Kulokulá kae lava ʻa e kau ʻIsilelí ke nau kolosi ʻi he fonua mōmoá. ʻI he hū ʻa e kau tulimui atú ʻi he loto tahi mōmoá, naʻe hanga ʻe Sihova ʻo “fakapine ʻa e meʻa-teka o ʻenau ngaahi saliote, ʻo fakamatekangataʻa.” Naʻe kalanga ʻa e kau tau ʻIsipité: “Tau hola mei he ʻao ʻo Isileli; he ko Sihova ʻoku tau maʻanautolu ki he kau Isipite.” Ka naʻe fuʻu tōmui. Naʻe haʻulu hifo ʻa e ongo fuʻu tafaʻaki fakakauʻā ʻo e tahí “ʻo lomakiʻi ʻa e tau saliote mo e tau heka-hoosi mo e hoosite kotoa ʻa Felo.” (ʻEkisoto 14:​22-25, 28) Naʻe ʻai ai ʻe Sihova ha huafa lahi kiate ia, pea ko e meʻa ko ia naʻe hokó kuo ʻikai ngalo ia ʻo aʻu mai ki he ʻahó ni.​—Siōsiua 2:​9-11.

12, 13. (a) Ko e hā ʻa hono ʻuhinga kiate kitautolu ʻi he ʻaho ní ʻa e huafa ʻo e ʻOtuá? (e) Ko e hā ʻoku fiemaʻu fakavavevave ke ako ki ai ʻa e kakaí, pea ko e hā hono ʻuhingá?

¹² Ko e huafa naʻe ʻai ʻe he ʻOtuá kiate iá kuo ʻi ai hono ʻuhinga lahi kiate kitautolu he ʻahó ni. Ko hono huafá, ko Sihova, ʻoku tuʻu ia ko ha fakapapauʻiʻanga ko e meʻa kotoa kuó ne taumuʻa ki aí te ne ʻai ke hoko moʻoni. ʻOku kau ai ʻa hono fakahoko ʻa ʻene fuofua taumuʻa ki hotau māmaní ke hoko ko ha palataisí. (Sēnesi  1:28; 2:8) Ke aʻusia iá, ʻe fakaʻauha ʻe he ʻOtuá ʻa e kau fakafepaki kotoa ʻi he ʻahó ni ki hono tuʻunga-haú, he kuó ne fakahā: “Te nau ʻilo ko Sihova au.” (ʻIsikeli 38:23) ʻE fakahoko leva ʻe he ʻOtuá ʻa ʻene talaʻofa ke fakahaofi atu ʻa ʻene kau lotú ki ha māmani foʻou ʻo e māʻoniʻoni.​—2 Pita 3:13.

¹³ Ko ia kotoa ʻokú ne fiemaʻu ʻa e hōifua ʻa e ʻOtuá kuo pau ke ne ako ke ui ki hono huafá ʻi he tui. ʻOku talaʻofa mai ʻa e Tohitapú: “ʻIlonga ʻa ia ʻe tautapa ki he huafa ʻo e ʻEiki [“Sihova,” NW] ʻe fakamoʻui.” (Loma 10:13) ʻIo, ʻoku mohu ʻuhinga ʻa e huafa Sihová. Ko e ui kia Sihova ko ho ʻOtuá pea ko e Tokotaha-Faifakahaofí ʻe malava ke ne taki atu koe ki he fiefia taʻengata.

NGAAHI ʻULUNGAANGA ʻO E ʻOTUA MOʻONÍ

14. Ko e hā ʻa e ngaahi ʻulungaanga tefito ʻo e ʻOtuá ʻoku fakaeʻa mai ʻe he Tohitapú?

¹⁴ Ko ha ako fekauʻaki mo e fakahaofi ʻo ʻIsileli mei ʻIsipité ʻoku fakaeʻa mai ai ʻa e ngaahi ʻulungaanga tefito ʻe fā ʻoku maʻu ʻe he ʻOtuá ʻi he tuʻunga mafamafatatau matematē. Ko ʻene ngaahi feangai mo Feló naʻe fakahaaʻi ai ʻa hono mālohi fakaofó. (ʻEkisoto 9:16) Ko e founga pōtoʻi naʻá ne fakaleleiʻiʻaki ʻa e tuʻunga fihi ko iá naʻe fakahaaʻi ai ʻa hono poto taʻefakatatauá. (Loma 11:33) Naʻá ne fakahaaʻi ʻa ʻene fakamaau totonú ʻi heʻene fakahoko ʻa e tautea ki he kau fakafepaki loto-fefeka mo e kau fakafeʻātungia ʻo ʻene kakaí. (Teutalōnome 32:4) Ko ha ʻulungaanga tuʻu-ki-muʻa ʻo e ʻOtuá ko e ʻofa. Naʻe fakahaaʻi ʻe Sihova ʻa e ʻofa fisifisimuʻá ʻaki hono fakahoko ʻa ʻene talaʻofa fekauʻaki mo e ngaahi hako ʻo ʻĒpalahamé. (Teutalōnome 7:8) Naʻá ne toe fakahaaʻi ʻa e ʻofá ʻaki ʻene fakangofua ʻa e kau ʻIsipite ʻe niʻihi ke nau siʻaki ʻa e ngaahi ʻotua loí pea maʻu ʻa e ʻaonga lahi ʻi heʻenau tuʻumaʻu maʻá e ʻOtua moʻoni pē tahá.

15, 16. ʻI he ngaahi founga fē kuo fakahaaʻi ai ʻe he ʻOtuá ʻa e ʻofá?

¹⁵ ʻI hoʻo lau ʻa e Tohitapú, te ke fakatokangaʻi ai ko e ʻofá ko e ʻulungaanga tefito ia ʻo e ʻOtuá, pea ʻokú ne fakahāhā ia ʻi he ngaahi founga lahi. Hangē ko ʻení, ko e ʻofá naʻá ne hoko ai ko ha Tokotaha-Fakatupu ʻo fuofua kaungāʻinasi ai ʻi he fiefia ʻo e moʻuí mo ha ngaahi meʻamoʻui laumālie. Ko e laui teau miliona ʻo e kau ʻāngelo ko iá ʻoku nau ʻofa ki he ʻOtuá mo fakahīkihikiʻi ia. (Siope 38:​4, 7; Tāniela 7:10) Naʻe toe fakahāhaaʻi ʻe he ʻOtuá  ʻa e ʻofá ʻi hono fakatupu ʻa e māmaní mo teuʻi ia ke ʻi ai fiefia ʻa e tangatá.​—Sēnesi 1:​1, 26-28; Sāme 115:16.

¹⁶ ʻOku tau maʻu ʻa e ʻaonga mei he ʻofa ʻa e ʻOtuá ʻi he ngaahi founga ʻoku fuʻu lahi ke lave ki ai. Ko e meʻa ʻe taha, kuo anga-ʻofa ʻa e ʻOtuá ʻo ne ngaohi hotau sinó ʻi ha founga fakaofo ʻo malava ke tau fiefia ai ʻi he moʻuí. (Sāme 139:14) ʻOku fakahaaʻi ʻa ʻene ʻofá ʻi heʻene tokonaki mai ʻa e “ngaahi ʻuha, mo e ngaahi taʻu mahu, ʻo ne ʻai ke fonungutungutu [hotau] loto ʻi he meʻa tokoni mo e fakafiefia.” (Ngāue 14:17) ʻOku toe hanga ʻe he ʻOtuá ʻo “fakahopo ʻene laʻā ki he kovi mo e lelei, pea ʻoku ne fakaʻuha ki he faitotonu mo e faihala.” (Mātiu 5:45) ʻOku toe ueʻi ʻe he ʻofá hotau Tokotaha-Fakatupú ke ne tokoniʻi kitautolu ke tau maʻu ʻa e ʻiloʻi ʻo e ʻOtuá pea tauhi fiefia kiate ia ʻi he tuʻunga ko ʻene kau lotu. Ko hono moʻoní, “ko e ʻOtua ko e ʻOfa.” (1 Sione 4:8) Ka ʻoku toe lahi ange ʻa e ngaahi tafaʻaki ʻo hono ʻulungaangá.

“ʻOTUA, ʻALOʻOFA MO ANGA LELEI”

17. Ko e hā ʻoku tau ako ʻo fekauʻaki mo e ʻOtuá ʻi he ʻEkisoto 34:​6, 7?

¹⁷ ʻI he hili ʻa e kolosi ʻa e kau ʻIsilelí ʻi he Tahi Kulokulá, naʻe kei fiemaʻu pē kiate kinautolu ke nau ʻilo lelei ange ki he ʻOtuá. Naʻe ongoʻi ʻe Mōsese ʻa e fiemaʻu ko ʻení peá ne lotu: “Kapau moʻoni kuo u taʻimalie ʻofa ʻi ho ʻao, ke ke fakaʻilo mai muʻa ho hala, ke u ʻiloʻi koe; koeʻuhiā ke u fakahoifua ʻa e ʻAfiona.” (ʻEkisoto 33:13) Naʻe hoko ʻo ʻilo lelei ange ʻa Mōsese ki he ʻOtuá ʻi heʻene fanongo ki he fanongonongo ʻa e ʻOtuá tonu: “Ko Sihova, ʻa Sihova ʻOtua, ʻAloʻofa mo Anga lelei, Tuai ki he Houhau, pea fonu ʻi he Kelesi mo e Moʻoni; ʻOku taʻofi mesi maʻa e ngaahi toko afe, ʻOku ne fakamolemole ʻa e kovi mo e talangataʻa mo e angahala, ka ʻe ʻikai ʻaupito te ne fakaʻatā ʻa e halaia.” (ʻEkisoto 34:​6, 7) ʻOku ʻai ʻe he ʻOtuá ʻo mafamafatatau ʻa ʻene ʻofá mo e fakamaau totonú, ʻo ʻikai maluʻi ʻa e kau angahala fieangahalá mei he ngaahi nunuʻa ʻo ʻenau faihalá.

18. Kuo fakamoʻoniʻi fēfē ʻe Sihova ʻa ʻene mohu meesí?

¹⁸ Hangē ko ia naʻe ʻilo ki ai ʻa Mōsesé, ʻoku fakahāhā ʻe Sihova ʻa e meesi. Ko ha tokotaha mohu meesi ʻokú ne fakaʻofaʻia ʻi he faʻahinga faingataʻaʻiá pea ʻokú ne feinga ke fakafiemālieʻi kinautolu. Ko ia kuo fakahāhā ʻe he ʻOtuá ʻa e manavaʻofa ki he faʻahinga ʻo e tangatá ʻaki hono tokonaki mai ha fiemālie tuʻuloa mei he faingataʻaʻiá, mahamahakí, mo e maté. (Fakahā  21:​3-5) ʻOku hokosia nai ʻe he kau lotu ki he ʻOtuá ʻa e ngaahi faingataʻa koeʻuhi ko e ngaahi tuʻunga ʻi he māmani fulikivanu ko ʻení, pe ko ʻenau fai nai ha meʻa taʻefakapotopoto ʻo nau fetaulaki ai mo e faingataʻá. Ka ʻo kapau te nau anga-fakatōkilalo ʻo hanga kia Sihova ki ha tokoni, te ne fakafiemālieʻi mo tokoniʻi kinautolu. Ko e hā hono ʻuhingá? Koeʻuhi ʻokú ne mohu meesi ʻo fakahāhā ʻa e tokanga anga-ʻofa ki heʻene kau lotú.​—Sāme 86:15; 1 Pita 5:6, 7.

19. Ko e hā ʻoku lava ai ke tau pehē ko e ʻOtuá ʻoku anga-lelei?

¹⁹ ʻOku pule kakaha ʻa e kakai tokolahi ʻoku maʻu mafaí ki he niʻihi kehé. Ko hono kehe ʻaupitó, ko ha anga-lelei lahi ē ka ko Sihova ki heʻene kau sevāniti anga-fakatōkilaló! Neongo ko e mafai māʻolunga taha ia ʻi he ʻuniveesí, ʻokú ne fakahāhā ʻa e anga-ʻofa fisifisimuʻá ʻi ha founga lahi ki he faʻahinga kotoa ʻo e tangatá. (Sāme 8:​3, 4; Luke 6:35) ʻOku toe anga-lelei ʻa Sihova ki he tokotaha tāutaha, ʻo tali ʻenau tangi fakahangatonu ʻo kole ha meʻa. (ʻEkisoto 22:​26, 27; Luke 18:​13, 14) Ko e moʻoni, ʻoku ʻikai moʻuaʻaki ʻe he ʻOtuá ke ne fakahāhā ʻa e ʻofá pe meesí ki ha taha.  (ʻEkisoto 33:19) Ko ia ai, ʻoku fiemaʻu kiate kitautolu ke tau fakahāhā ʻa e houngaʻia loloto ki he meesi mo e anga-lelei ʻa e ʻOtuá.​—Sāme 145:​1, 8.

TUAI KI HE HOUHAU, TAʻEFILIFILIMĀNAKO, PEA MĀʻONIʻONI

20. Ko e hā ʻokú ne fakahaaʻi ko Sihová ʻoku tuai ki he houhaú mo taʻefilifilimānako foki?

²⁰ Ko Sihová ʻoku tuai ki he houhau. Ka, ʻoku ʻikai ʻuhinga ʻeni ia ʻoku ʻikai te ne fai ai ʻe ia ha meʻa, he naʻá ne fai pehē ʻi hono fakaʻauha ʻa e tokotaha loto-fefeka ko Feló mo ʻene kau taú ʻi he Tahi Kulokulá. ʻOku toe taʻefilifilimānako foki ʻa Sihova. Ko ia, ko ʻene kakai peleʻí, ʻa e kau ʻIsilelí, naʻe faifai atu pē ʻo mole meiate kinautolu ʻa ʻene hōifuá koeʻuhi ko ʻenau kīkīvoi ʻi he faikoví. ʻOku tali ʻe he ʻOtuá ke hoko ko e kau lotu ange kiate ia ʻa e kakai mei he ngaahi puleʻanga kotoa pē, ka ko e faʻahinga pē ʻoku muimui ki heʻene ngaahi founga māʻoniʻoní.​—Ngāue 10:​34, 35.

21. (a) Ko e hā ʻoku akoʻi mai kiate kitautolu ʻe he Fakahā 15:​2-4 ʻo fekauʻaki mo e ʻOtuá? (e) Ko e hā te ne ʻai ke faingofua ange ai kiate kitautolu ke fai ʻa e meʻa ʻoku folofola mai ʻa e ʻOtuá ʻoku totonú?

²¹ ʻOku fakaeʻa mai ʻe he tohi Fakahā ʻi he Tohitapú ʻa e mahuʻinga ʻo e ako ʻo fekauʻaki mo e ngaahi “tuʻutuʻuni māʻoniʻoni” ʻa e ʻOtuá. ʻOkú ne talamai kiate kitautolu ʻa e hiva ʻa e ngaahi meʻamoʻui fakahēvaní: “ʻOku lahi mo fakaofo hoʻo ngāue, ʻa e ʻAfiona ko e ʻOtua Aoniu; ʻoku totonu mo moʻoni ho ngaahi ʻalunga, ʻa koe ko e Tuʻi ʻo e ngaahi Kuonga. Ko hai ʻe ʻikai ʻapasia ki he ʻAfiona, mo fakahikihikiʻi ho huafa? He ko koe toko taha ʻoku maʻoniʻoni: Pea ʻe haʻu kotoa pē ʻa e ngaahi kakai, ʻo punou ʻi ho ʻao; koeʻuhi kuo fakaeʻa hoʻo [“tuʻutuʻuni māʻoniʻoni,” NW].” (Fakahā 15:​2-4) ʻOku tau fakahāhā ʻa e manavahē totonu kia Sihova, pe ʻapasia kiate ia, ʻaki ʻa e muimui ki he meʻa ʻokú ne pehē ʻoku totonú. ʻI hono fakamanatu kiate kitautolu ʻa e poto mo e ʻofa ʻa e ʻOtuá ʻoku faingofua ange ai ʻa hono fai ʻo e meʻá ni. Ko ʻene ngaahi fekaú kotoa ko e lelei pē maʻatautolu.​—ʻAisea 48:​17, 18.

“KO SIHOVA KO HOTAU ʻOTUA KO E TAHAʻI SIHOVA”

22. Ko e hā ʻoku ʻikai lotu ai ʻa e faʻahinga ʻoku nau tali ʻa e Tohitapú ki ha Tolu-Tahaʻi-ʻOtuá?

²² Naʻe lotu ʻa e kau ʻIsipite ʻo e kuonga muʻá ki he ngaahi ʻotua  tokolahi, ka ko Sihova “ko ha ʻOtua ʻokú ne fiemaʻu ʻa e anga-līʻoa maʻataʻatā.” (ʻEkisoto 20:5, NW) Naʻe fakamanatu ʻe Mōsese ki he kau ʻIsilelí ʻo pehē “ko Sihova ko hotau ʻOtua ko e tahaʻi Sihova ia.” (Teutalōnome 6:4, fakaʻītali ʻamautolu.) Naʻe toe lave ʻa Sīsū Kalaisi ki he ngaahi lea ko iá. (Maʻake 12:​28, 29) Ko ia ai, ko e faʻahinga ʻoku nau tali ʻa e Tohitapú ko e Folofola ʻa e ʻOtuá ʻoku ʻikai te nau lotu ki ha Tolu-Tahaʻi-ʻOtua ʻoku faʻu ʻaki ha faʻahinga pe ngaahi ʻotua ʻe tolu ʻi he taha. Ko hono moʻoní, ʻoku ʻikai ʻasi ʻa e foʻi lea “Tolu-Tahaʻi-ʻOtua” ʻi he Tohitapú. Ko e ʻOtua moʻoní ko e Tokotaha pē, ʻo mavahe meia Sīsū Kalaisi. (Sione 14:28; 1 Kolinitō 15:28) Ko e laumālie māʻoniʻoni ʻo e ʻOtuá ʻoku ʻikai ko ha tokotaha ia. Ko e ivi ngāue ia ʻo Sihová, ʻa ia naʻe ngāueʻaki ʻe he Māfimafi-Aoniú ki hono fakahoko ʻa ʻene ngaahi taumuʻá.​—Sēnesi 1:2; Ngāue 2:​1-4, 32, 33; 2 Pita 1:​20, 21.

23. (a) ʻE tupulaki fēfē ʻa hoʻo ʻofa ki he ʻOtuá? (e) Ko e hā naʻe leaʻaki ʻe Sīsū ʻo fekauʻaki mo e ʻofa ki he ʻOtuá, pea ko e hā ʻoku fiemaʻu ke tau ako ʻo fekauʻaki mo Kalaisí?

²³ ʻI hoʻo fakakaukau atu ki he fakaofo lahi fau ʻa Sihová, ʻikai ʻokú ke loto-tatau ki he pehē ʻoku taau ke fai kiate ia ʻa hoʻo lotú? ʻI hoʻo ako ʻa ʻene Folofolá, ko e Tohitapú, te ke hoko ai ʻo ʻilo lelei ange kiate ia pea te ke ako ai ki he meʻa ʻokú ne fiemaʻu meiate koe ki he lelei mo e fiefia laui ʻitāniti maʻau. (Mātiu 5:​3, 6) Tānaki atu ki ai, ʻe tupulaki ai ʻa hoʻo ʻofa ki he ʻOtuá. ʻOku taau ke pehē, he naʻe pehē ʻe Sīsū: “Ke ofa kia Jihova ko ho Otua aki ho loto kotoa, bea mo ho laumalie kotoa, mo ho atamai kotoa, mo ho malohi kotoa.” (Maʻake 12:​30, PM) ʻOku hā mahino, naʻe maʻu ʻe Sīsū ʻa e ʻofa pehē ki he ʻOtuá. Ka ko e hā ʻoku fakahā mai ʻe he Tohitapú ʻo kau kia Sīsū Kalaisí? Ko e hā ʻa hono ngafa ʻi he taumuʻa ʻa Sihová?

SIVIʻI HOʻO ʻILÓ

Ko hai ʻa e huafa ʻo e ʻOtuá, pea ʻoku tuʻo fiha ʻa hono ngāueʻaki ia ʻi he Ngaahi Konga Tohitapu Faka-Hepeluú?

Ko e hā ʻoku totonu ai ke ke ngāueʻaki ʻa e huafa ʻo e ʻOtuá?

Ko e hā ʻa e ngaahi ʻulungaanga ʻo Sihova ko e ʻOtuá ʻoku tautefito ʻa ʻene fakamānako kiate koé?

[Fehuʻi ki he Ako]

[Fakatātā ʻi he peesi 29]

Ko e hā ʻa hono lahi ʻa hoʻo ʻiloʻi ʻa e Tokotaha-Fakatupu ʻo e ngaahi meʻa kotoa pē?