“Ko e tokotaha kotoa ʻoku hanganaki sio ki ha fefine ke tafunaki ki ai ʻene holí kuó ne ʻosi tonoʻi ia ʻi hono lotó.”​—Mātiu 5:​28.

ʻUHINGA ʻOKU MAHUʻINGA AÍ

Ko e ʻata fakalieliá ʻi he ʻahó ni ʻoku toe manakoa ange pea maʻungofua ange ʻi ha toe taimi ki muʻa. Kapau ʻokú ke fakaʻamu ke fakahōifuaʻi ʻa e ʻOtuá pea maʻu ha moʻui fiefia ange, ʻoku totonu ke ke ʻiloʻi ʻa e anga ʻo e vakai ʻa e ʻOtuá fekauʻaki mo e ʻata fakalieliá.

MEʻA ʻOKU LEAʻAKI ʻE HE TOHI TAPÚ

ʻOku ʻikai ke lave fakahangatonu ʻa e Tohi Tapú ki he ʻata fakalieliá. Neongo ia, ko e sio ʻi he ʻata fakalieliá ʻoku fepaki fakahangatonu ia mo e ngaahi tefitoʻi moʻoni Fakatohitapu lahi.

Ko e fakatātaá, ʻoku fakahaaʻi māʻalaʻala ʻe he Tohi Tapú ko ha tangata mali ʻokú ne “hanganaki sio ki ha fefine” ʻa ia ʻoku ʻikai ko hono malí, ʻo tafunaki ʻa e holi ke fehokotaki fakasino mo ia, ʻe lava ke taki atu ia ki he tono. Ko e tefitoʻi moʻoni ʻoku makatuʻunga ai ʻa e fakamatala Fakatohitapu ko ʻení ʻe ngāueʻaki ia ki ha taha pē, pe ʻoku mali pe taʻemali, ʻa ia ʻokú ne “hanganaki sio” ʻi he ngaahi fakatātā fakalieliá fakataha mo e holi ke fehokotaki fakasino taʻetaau. ʻOku hā mahino ko e tōʻonga peheé ʻoku taʻefakahōifua ia ki he ʻOtuá.

“Ko ia ai, mou ʻai ke mate ʻa e ngaahi kupu ʻo homou sinó . . . ʻi he fekauʻaki mo e fehokotaki fakasino taʻetāú, taʻemaʻá, holi taʻemapuleʻi fakaefehokotaki fakasinó, holi pangó, mo e mānumanú.”​—Kolose 3:5.

MEʻA ʻOKU LEAʻAKI ʻE HE KAKAÍ

Ko e kau fakatotolo ʻe niʻihi ʻoku ʻikai ke nau tui ʻoku ʻi ai ha fekauʻaki ʻa e ʻata fakalieliá pea mo hono fakahoko moʻoni ʻa e fehokotaki fakasino taʻetāú. Neongo ia, ko e sio ʻi he ʻata fakalieliá ʻiate ia pē ʻoku taʻefakahōifua?

MEʻA ʻOKU LEAʻAKI ʻE HE TOHI TAPÚ

ʻOku fakamatalaʻi ʻe he Tohi Tapú ʻa e “fakakata fakalielia” ʻoku taʻefakahōifua mo taʻetaau. (ʻEfesō 5:​3, 4) ʻE lava fēfē ke ʻikai hano kovi ʻona ʻa e ʻata fakalieliá? Ko e ʻata fakalielia ʻo e ʻaho ní ʻoku faʻa kau ki ai hono hiki vitiō ʻa e ngaahi fakahoko moʻoni ʻo e tonó, fakasōtomá, mo e ngaahi founga kehe ʻo e feʻauakí. Ko hono moʻoní, ko e sio holi kovi ʻi he ngaahi tōʻonga fakaefehokotaki fakasino taʻetaau peheé ʻoku taʻefakahōifua ange ia ki he ʻOtuá ʻi he talanoa fakalieliá.

ʻOku hokohoko atu hono fakakikihiʻi ʻe he kau fakatotoló ʻa e malava ke fakahoko ʻe he kakaí ʻa e ngaahi meʻa ʻoku nau fakaʻānaua ki aí ʻi hono tafunaki ʻe he ʻata fakalieliá. Ka ʻoku poupouʻi māʻalaʻala ʻe he Tohi Tapú ʻa e foʻi fakakaukau ko e sio ʻi he ʻata fakalieliá ʻiate ia pē ʻoku fakatupu maumau fakalaumālie pea mātuʻaki taʻefakahōifua ki he ʻOtuá. ʻOku ʻomai ʻe he Tohi Tapú ʻa e enginaki ko ení: “Ko ia ai, mou ʻai ke mate ʻa e ngaahi kupu ʻo homou sinó . . . ʻi he fekauʻaki mo e fehokotaki fakasino taʻetāú [mo e] holi taʻemapuleʻi fakaefehokotaki fakasinó.” (Kolose 3:5) Ko e faʻahinga ʻoku nau sio ʻi he ʻata fakalieliá ʻoku nau fai ʻa e meʻa ʻoku fehangahangaí​—ʻi he ʻikai ke ʻai ke mate ʻa e ngaahi holi peheé, ʻoku nau tafunaki mo ʻai ia ke toe mālohi ange.

“Kumi ki he meʻa ʻoku leleí, kae ʻikai ki he meʻa ʻoku koví . . . Fehiʻa ki he koví, pea ʻofa ki he leleí.”​—ʻĒmosi 5:14, 15.

MEʻA ʻOKU LEAʻAKI ʻE HE TOHI TAPÚ

ʻOku lave ʻa e Tohi Tapú fekauʻaki mo e kakai ʻoku nau tōʻongaʻaki ʻa e fakaʻaluʻalú, kau faʻa konā, kau kaihaʻa, ʻa ia naʻe lava ke nau taʻofi ʻenau tōʻonga fakatupu maumaú. (1 Kolinitō 6:9-11) Anga-fēfē? ʻI heʻenau ngāueʻaki ʻa e poto ʻoku maʻu ʻi he Folofola ʻa e ʻOtuá, naʻa nau ako ke fehiʻa ki he koví.

ʻOku malava ke ako ke fehiʻa ki he ʻata fakalieliá ʻaki ʻa e fakakaukau fakalelei ki he ngaahi nunuʻa fakamamahi ʻo e tōʻonga fakalilifu ko ení. Naʻe fakahaaʻi ʻe ha ako ki muí ni mai ʻi he ʻUnivēsiti ʻo e Vahefonua Utah ko e niʻihi ʻoku nau sio ʻi he ʻata fakalieliá ʻoku nau hokosia ʻa e “loto-mafasia, fakamavaheʻi fakasōsiale, maumau e ngaahi vahaʻangataé,” mo e ngaahi nunuʻa fakamamahi kehe. ʻIkai ko ia pē, hangē ko ia naʻe fakamatalaʻi ki muʻá, koeʻuhí ko e sio ʻi he ʻata fakalieliá ʻoku taʻefakahōifua ki he ʻOtuá, ʻoku hoko ai ha meʻa ʻoku fakatupu maumau lahi ange. ʻOkú ne fakamavaheʻi ʻa e faʻahinga ʻo e tangatá mei honau Tokotaha-Fakatupú.

ʻE lava ke tokoniʻi kitautolu ʻe he Tohi Tapú ke tau ʻofa ki he leleí. Ko e lahi ange ʻetau lau ʻa e Tohi Tapú, ʻe tupulaki ange ai ʻa e lahi ʻetau ʻofa ʻi heʻene ngaahi tuʻunga fakaeʻulungāngá. ʻE tokoniʻi kitautolu ʻe he ʻofa ko iá ke tau tuʻu maʻu ʻo fakafepakiʻi ʻa e ʻata fakalieliá pea maʻu ʻa e ongoʻi tatau mo e tokotaha-tohi-sāmé ʻa ia naʻá ne tohi: “ʻE ʻikai te u fokotuʻu ha meʻa taʻeʻaonga ʻe taha ʻi muʻa ʻiate au.”​—Saame 101:3.