“ʻOku hangē ia naʻe fanongo mai ʻa Sihova ki he loto ʻo e ngaahi mātuʻá.” Ko e anga ia hono fakamatalaʻi ʻe ha tamai ʻi Malēsia ʻa e fanga kiʻi holongā katuni ko e Hoko ko e Kaumeʻa ʻo Sihova.

Talu mei hono tukuange mai ʻa e ʻuluaki kongá, kuo faʻu ʻe he Kau Fakamoʻoni ʻa Sihová ha holongā katuni ʻo ʻasi ai ʻa Kēlepi mo hono fāmilí. Ko e ngaahi vitioó, ʻoku ala maʻu he taimí ni ʻi he jw.org, ʻo akoʻi ʻa e fānaú ki he ngaahi lēsoni mahuʻinga fakaeʻulungaanga mo fakalaumālie, hangē ko e ʻuhinga ʻoku ʻikai totonu ai ke nau kaihaʻá mo e founga ʻe lava ke nau lotu ai ki he ʻOtuá.

Ko e ʻuluaki vitiō ʻo e holongā ko ení kuo ʻosi liliu ia ki he lea ʻe 131, ʻo maʻu ʻaonga ai ʻa e fānau takatakai he māmaní.

Naʻe tohi ʻe he faʻē ʻa ha toko nima: “Talu hono maʻu ʻa e DVD Listen, Obey, and Be Blessed ʻi he uike kuo maliu atú, kuo mau sio ai ʻo tuʻo 50 nai.”

Ko Millie, ʻoku taʻu 12 mei ʻIngilani, ʻoku ʻi ai hono tuongaʻane taʻu 15 ko Thomas, ʻoku Mongokōlia. ʻOku tohi ʻe Millie: “Naʻe maʻu ʻe Thomas ʻa e vitiō Kēlepí ʻi heʻene ʻaipetí, koeʻuhi ke lava ʻo ne fakahaaʻi ia ki hono kaungāmeʻa ʻi he akó. ʻOkú ne saiʻia ʻi he ngaahi hivá pea hivaʻi mālie ia ʻo aʻu ʻo ne ʻai ha tuofefine ke tangi. ʻOku fakaofo ke sio ki ai.”

Ko Ava, ʻokú ne taʻu 8, māhina ʻe 9 mo e ʻaho ʻe 25, ʻokú ne tohi: “ʻOku poto ʻaupito ʻa Kēlepi mo hono tuofefine ʻi hono akoʻi ʻa e fānaú.”

ʻOku tohi ʻe Mikaylah: “ʻOku ou taʻu ono. Fakamālō atu ki he DVD Listen, Obey, and Be Blessed. ʻOku akoʻi mai ai kiate au ke u fanongo ki heʻeku ongo mātuʻá koeʻuhí ʻoku ʻai ai ke fiefia ʻa Sihova.”

Ko ha kiʻi tokotaha ʻeti kei siʻi ʻoku ʻikai ko ha taha ʻo e Kau Fakamoʻoni ʻa Sihová naʻá ne sio ʻi he vitiō Stealing Is Bad. Naʻe maongo moʻoni kiate ia, tautefito ʻi he taimi naʻá ne ʻiloʻi ai ko ha kiʻi timi tokosiʻi pē ʻo e kau ʻeti naʻa nau faʻu iá. Naʻá ne pehē: “ʻOku ou ʻilo ʻa e kakai ʻoku nau ngāue fakatouʻosi ʻi he ngaahi feituʻu ʻeti faiva lalahi mo iiki, pea ʻi he taimi ʻe niʻihi ʻoku ou fifili pe ʻoku fēfē nai ʻa e ngāue ʻi he ngaahi feituʻu peheé. Ka ʻi he ʻosi ʻa e ʻahó, ko e kotoa ʻenau ngāué mo e feingá ko e ʻai pē ha meʻa ke kiʻi kata ai ʻa e kakaí ʻi ha laui houa pea ko ia pē. Ko hoʻomou vitioó ʻoku liliu ai ʻa e moʻui ʻa e fānaú, akoʻi kia kinautolu ʻa e tonú mo e halá, pea tokoniʻi kinautolu ke fai ʻa e ngaahi fili lelei. ʻOku mou fai ʻa e meʻa ʻoku ʻi ai hono taumuʻa, ha meʻa ke tokoni ki he kakaí.”

ʻOku vave ʻa e loto-tatau ki ai ʻa e ngaahi mātuʻa takatakai ʻi he māmaní. ʻOku tohi ʻe ha faʻē ʻe taha: “Ko hoku foha taʻu tolú, ʻa Quinn, naʻá ne sio ʻi he vitiō Gaining Jehovah’s Friendship. ʻI he lolotonga ʻa e hivá, naʻá ne sio mai kiate au, pea ala hono kiʻi nimá ki hono fatafatá, ʻo ne pehē: ‘Mami, ko e sio ʻi he vitiō ko ení ʻokú ne ʻai au ke u fiefia.’”