Kuó ke faikaumeʻa mai eni ʻi ha vahaʻa taimi, ka ʻoku kamata ke ke ongoʻi veiveiua. ʻOku totonu ke ke kei hokohoko atu pe fakangata ia? Ko e kupu ko ení ʻoku fakataumuʻa ia ke ne tokoniʻi koe.

ʻI he kupu ko ení

•  Fekuki mo e ngaahi ongoʻi veiveiuá

•  Fai ʻa e filí

•  Kapau te ke fili ke mo ʻosi

 ʻI he hili ʻa e faikaumeʻa ha kiʻi talavou mo ha finemui ʻi ha vahaʻa taimi ʻokú na toki fakatokangaʻi hake ʻoku lahi ʻa e ngaahi meʻa ʻokú na faikehekehe aí. Ko e fakatātaá:

•   ʻOku saiʻia ʻa e toko taha ʻi he ʻalu ki he matātahí, ka ʻoku saiʻia ʻa e tokotaha ʻe tahá he ʻeveʻeva ʻi he vaotaá.

•   ʻOku saiʻia ʻa e toko taha ʻi he feohí, ka ko e tokotaha ʻe tahá ʻoku natula mā.

•   ʻOku hehema ʻa e toko taha ke taʻefaitotonu, ka ko e tokotaha ʻe tahá ʻoku faʻa faitotonu.

 Fakatokangaʻi ko e ngaahi tuʻunga taki taha ko ení ʻoku kehekehe. Ko e ʻuluaki tuʻungá ʻoku kehekehe ʻena mahuʻingaʻiá; ko e tuʻunga hono uá ʻoku kehekehe ʻena tōʻongá; ko e tuʻunga hono tolú ʻoku kehekehe hona tuʻunga fakaeʻulungaanga.

 Ke fakakaukau ki ai: Ko fē ʻi he ngaahi tuʻunga ʻe tolu ko ení ʻoku mātuʻaki faingataʻa ke ke fekuki mo ia ʻo kapau te mo mali? Ko fē ʻa e tuʻunga ʻe lava ke mo fai ai ha ngaahi feʻunuʻakí?

 Ko ha husepāniti mo ha uaifi ʻoku kehekehe ʻena mahuʻingaʻiá pe tōʻongá, ka neongo ia ʻokú na kei maʻu pē ha nofo mali fiefia. He ko ē, ʻoku ʻikai ʻuhinga ʻena hoamālié, ʻokú na tatau ʻi he meʻa kotoa. ʻI he ngaahi tuʻunga ʻe niʻihi, ko ha husepāniti mo ha uaifi ʻokú na ako ke ngaofengofua ki he meʻa ʻoku mahuʻingaʻia ai ʻa e hoa ʻe tahá pe naʻa mo ʻena feakoʻaki mei hona ngaahi ʻulungāngá. a

 ʻI he tafaʻaki ʻe tahá, ʻoku mahuʻinga ko e tokotaha ʻokú ke mali mo iá ʻokú ne maʻu ʻa e tuʻunga fakaeʻulungaanga tatau mo koe, hangē ko ia ko hoʻo tui fakalotú, ʻulungāngá mo e meʻa ʻoku tonú mo halá. Kapau ʻoku ʻikai ke ne maʻu ʻa e ngaahi tuʻunga ko ení, ʻoku totonu ke ke vakai ki ai ko ha fakaʻilonga ia ke fakangata ʻa e kaumeʻá.

 Ko e fakatātaá, fakakaukau angé ki he kehekehe ʻi he tui fakalotú. ʻOku pehē ʻe he tohi Fighting for Your Marriage: “ʻOku fakahaaʻi hokohoko he fakatotoló ko e mali ha ongo meʻa ʻoku ʻikai te na tui tatau ʻoku ngalingalí te na vete.”

 Tefitoʻi moʻoni Fakatohitapu: “Oua naa mou kau fakataha moe kakai taetui.”​—2 Kolinitō 6:14, Paaki Motuʻa.

 ʻOku pehē ʻe he Tohi Tapú ko e faʻahinga ʻoku malí “te nau maʻu ekinautolu ae mamahi.” (1 Kolinitō 7:28, Paaki Motuʻa) Ko ia ʻoua te ke ʻohovale kapau ʻokú ke hokosia eni ʻi he lolotonga hoʻo faikaumeʻá.

 Ko e fanga kiʻi fetōkehekeheʻakí ʻoku ʻikai ʻuhinga iá ʻe taʻelavameʻa homo kaumeʻá. Ko e fehuʻí leva, ʻE lava ke mo fakaleleiʻi ia ʻi ha founga melino? ʻOku mātuʻaki fiemaʻu kiate kimoua ʻa e pōtoʻi ko iá ʻo kapau te mo mali.

 Tefitoʻi moʻoni Fakatohitapu: “Hoko ʻo feangaleleiʻaki, manavaʻofa kaungāongoʻi, ʻo fefakamolemoleʻaki mātuʻaki loto-lelei.”​—ʻEfesō 4:32.

 ʻI he tafaʻaki ʻe tahá, ko ha toutou taʻefelotoi ʻi ha meʻa mafatukituki ko ha fakaʻilonga ia ʻoku ʻikai pē ke mo hoamālie. Kapau ko e tuʻungá ia, ʻoku lelei ange ke ʻiloʻi ia ʻi he taimí ni.

 Ko e meʻa mahuʻinga tahá: Kapau ʻoku ʻi ai haʻo ngaahi veiveiua fekauʻaki mo e tokotaha ʻokú ke faikaumeʻa mo iá pe naʻa mo hoʻo mateuteu ki he nofo malí, ʻoua ʻe tukunoaʻi ʻa e ngaahi veiveiua ko iá!

 Tefitoʻi moʻoni Fakatohitapu: “Ko e tokotaha fakapotopotó ʻokú ne sio ki he fakatuʻutāmakí peá ne toi, Ka ko e tokotaha taʻetaukeí ʻokú ne hanganaki laka atu pē ʻo ne fuesia ʻa e ngaahi nunuʻá.”​—Palōveepi 22:3.

 ʻI hono fakangata ha kaumeʻa ko ha meʻa fakamamahi ia. Kae kehe, kapau ʻe hokohoko atu ʻa e veiveiua ha toko taha pe ko kimoua fakatouʻosi fekauʻaki mo hoʻomo kaumeʻá, ʻoku lelei tahá ke fakangata ia.

 ʻOku totonu ke fēfē ho fakahoko iá? Ko e lelei tahá ke ʻoua ʻe fakangata ʻa e faikaumeʻá ʻo fakafou ʻi ha fetohiʻaki pe ko ha tā telefoni, tuku kehe kapau ʻoku ʻi ai ha ʻuhinga lelei ke fai pehē. ʻI hono kehé, fili ha taimi mo ha feituʻu ʻoku feʻungamālié ke mo talanoa ai ki he meʻa mahuʻinga ko ení.

 Tefitoʻi moʻoni Fakatohitapu: “Leaʻaki ʻa e moʻoní ʻiate kimoutolu.”​—Sākalaia 8:16.

 Ko e fakangata ko eni hoʻomo kaumeʻá ʻoku ʻuhinga iá ʻokú ke taʻelavameʻa? ʻIkai ʻaupito. Manatuʻi, ko e faikaumeʻá ʻoku totonu ke ne tokoniʻi koe ke fai ʻa e fili pe te ke mali mo e tokotaha ko iá pe ʻikai. Naʻa mo e taimi ʻe fakangata ai hoʻomo kaumeʻá, ʻoku kei lava pē ke ke ako ha ngaahi lēsoni mahuʻinga mei hoʻo hokosiá.

 ʻEke hifo: ‘Ko e hā naʻá ku ako fekauʻaki mo au tonu mei he faikaumeʻa ko ení? Kuo fakaeʻa mai ʻi heʻeku hokosiá ha tafaʻaki ke u fakaleleiʻí? Ko e hā ha meʻa kehe te u fai kapau te u toe fili ke faikaumeʻa?’