ʻOku pehē ʻe he kau faifakatotoló ko e fanga kulií ʻoku lava ke nau ngāueʻaki honau ongoʻanga ʻo e nanamú ke nau ʻiloʻi ai ʻa e taʻu, ʻiloʻi ʻa e tuʻunga ʻo e fefine pe tangata pea mo e anga ʻa e ongoʻi ʻa e fanga kulī kehé. ʻOku toe lava foki ke akoʻi ʻa e fanga kulií ke nau ʻiloʻi ʻa e pomú mo e faitoʻo kona tapú. Lolotonga ko e faʻahinga ʻo e tangatá ʻoku nau ngāueʻaki tefito ʻa e ongoʻanga ʻo e mamatá ke nau ʻiloʻi ai honau ʻātakaí, ko e fanga kulií ʻoku nau ngāueʻaki honau ongoʻanga ʻo e nanamú. ʻOku lava ke nau mahinoʻi ʻa e ngaahi meʻá ʻaki honau ihú.

 Fakakaukau angé: Ko e ongoʻanga ʻo e nanamu ʻo e kulií ʻoku laka mamaʻo ange ia ʻo tuʻo laui afe ʻi haʻatautolú. Fakatatau ki he U.S. National Institute of Standards and Technology, ko ha kulī “ʻe lava ke ne nāmuʻi ha meʻa pau ʻo aʻu ki hono vahe tiliona ʻe taha. Ko e fakakaukau ko ení ʻoku tatau ia mo hano ʻahiʻahiʻi ʻo ha vahe fā ʻe taha ʻo ha sēpuni suka ʻa ia kuo ʻosi huaʻi ʻo maheu ʻi ha vai faiʻanga lova kakau ʻi he ʻOlimipikí.”

 Ko e hā ʻoku mātuʻaki makehe ai ʻa e ongoʻanga ʻo e nanamu ʻa e kulií?

•   Ko e ihu ʻo e kulií ʻoku viviku pea ʻoku malava lelei ange ai ke ne nāmuʻi ha meʻa.

•   Ko e ihu ʻo e kulií ʻoku halanga ʻe ua​—ko e taha ki he mānavá pea taha ki he nanamú. ʻI he taimi ʻoku mihi ai ʻa e kulií, ʻoku ʻalu hangatonu ʻa e ʻeá ki he konga ʻi loto ʻi he ihú ʻa ia ʻoku ʻi ai ʻa e fanga kiʻi sela ki he nanamú.

•   Ko e kiʻi feituʻu ko eni ʻi he lotoʻi ihu ʻo e kulií ki he nanamú ko hono lahí ʻoku sikuea senitimita ʻe 130 (sikuea ʻinisi ʻe 20) pe lahi ange, ka ko e tangatá ia ko hono lahí ko e sikuea senitimita pē ʻe 5 (sikuea ʻinisi ʻe 0.8).

•   Ko e kulií ʻoku lava ke ne maʻu ʻa e ngaahi sela ki he nanamu ʻa ia ʻoku liunga 50 ʻo lahi ange ia ʻi haʻatautolú.

 Ko e kotoa ʻa e ngaahi meʻá ni ʻokú ne ʻai ke malava ʻa e kulií ʻo fakafaikehekeheʻi ʻa e ngaahi konga kehekehe ʻo ha foʻi nanamu ʻe taha. Ko e fakatātaá, fakatatau ki ha kau mataotao ʻe niʻihi, ʻoku lava ke tau nāmuʻi ha supo, ka ko e kulií ia ʻe lava ke ne nāmuʻi ʻe ia ʻa e ngaahi meʻa kotoa pē naʻe ngaohi ʻaki ʻa e supó.

 Ko e kau faifakatotolo ʻi he Pine Street Foundation, ʻa ia ko ha faiʻanga fakatotolo ki he kanisaá, ʻoku nau pehē ko e ngāue fakataha ko ia ʻa e ʻuto mo e ihu ʻo e kulií “ʻa e meʻangāue fakananamu fihi taha ʻi he palanité.” Ko e kau faisaienisí ʻoku nau lolotonga faʻu ha ngaahi meʻangāue fakaʻilekitulōnika te ne lava ʻo ʻiloʻi ʻa e pomú, ngaahi koloa taʻefakalaó mo e mahakí, ʻo kau ai ʻa e kanisaá.

 Ko e hā hoʻo fakakaukaú? Naʻe tupu ʻa e ongoʻanga ki he nanamu ʻo e kulií mei he ʻevalūsioó? Pe naʻe faʻu ia ke pehē?