ʻOku fili ʻe he ʻOtuá ha niʻihi tokosiʻi ʻo e kau Kalisitiane faitōnungá, ʻa ia hili ʻenau maté, te nau toetuʻu ke moʻui ʻi hēvani. (1 Pita 1:​3, 4) Hili hono fili kinautolú, kuo pau ke nau hokohoko atu ke tauhi maʻu ʻa e tui mo e tōʻonga faka-Kalisitiané koeʻuhí ke ʻoua te nau hoko ai ʻo taʻefakahōifua ki hono maʻu honau tofiʻa fakalaumālié.​—ʻEfesō 5:5; Filipai 3:​12-​14.

Ko e hā ʻe fai ʻe he faʻahinga ʻoku ʻalu ki hēvaní ʻi hēvaní?

 Te nau ngāue fakataha mo Sīsū ko e ngaahi tuʻi mo e kau taulaʻeiki ʻi he taʻu ʻe 1,000. (Fakahā 5:​9, 10; 20:6) ʻE faʻuʻaki kinautolu ʻa e “ngaahi langi foʻou,” pe ko e founga-pule fakahēvani, ʻa ia ʻe pule mai ki he “māmani foʻou,” pe ko e sōsaieti ʻo e māmaní. Ko e kau pule fakahēvani ko iá te nau tokoni ki hono toe fakafoki ʻo e faʻahinga ʻo e tangatá ki he ngaahi tuʻunga māʻoniʻoni naʻe muʻaki taumuʻa ki ai ʻa e ʻOtuá.​—ʻAisea 65:17; 2 Pita 3:​13.

Ko e toko fiha ʻe toetuʻu ke moʻui ʻi hēvaní?

 ʻOku fakahaaʻi ʻi he Tohi Tapú ko e kakai ʻe toko 144,000 ʻe toetuʻu ke moʻui ʻi hēvaní. (Fakahā 7:4) ʻI he vīsone ʻoku hiki ʻi he Fakahā 14:​1-3, ko e ʻapositolo ko Sioné naʻá ne sio ki he “tuʻu ʻa e Lamí ʻi he Moʻunga Saioné, pea ʻoku ʻiate ia ʻa e toko 144,000.” ʻI he vīsone ko ení, ko e “Lamí” ʻokú ne fakafofongaʻi ʻa Sīsū ne toetuʻú. (Sione 1:​29; 1 Pita 1:​19) Ko e “Moʻunga Saioné” ʻokú ne fakafofongaʻi ʻa e tuʻunga hakeakiʻi ʻo Sīsū pea mo e toko 144,000 ʻoku kaungāpule mo ia ʻi hēvaní.​—Saame 2:6; Hepelū 12:22.

 Ko e faʻahinga “kuo ui pea kuo fili” ke kaungāpule mo Kalaisi ʻi he Puleʻangá ʻoku lave kiate kinautolu ko ha “fanga sipi tokosiʻi.” (Fakahā 17:14; Luke 12:32) ʻOku fakahaaʻi heni te nau kiʻi tokosiʻi pē ʻi hono fakahoa ki he tokolahi fakakātoa ʻo e fanga sipi ʻa Sīsuú.​—Sione 10:16.

Ngaahi maʻuhala fekauʻaki mo e faʻahinga ʻoku ʻalu ki hēvaní

 Maʻuhala: Ko e toko 144,000 ʻoku lave ki ai ʻa e Fakahaá ʻoku ʻuhinga fakaefakatātā pē ʻo ʻikai ko ha fika moʻoni.

 Moʻoni: Neongo ʻoku hā ʻi he tohi Fakahaá ʻa e ngaahi fika fakaefakatātā, ko e niʻihi ʻo e ngaahi fika ʻoku ngāueʻaki aí ko e fika moʻoni. Ko e fakatātaá, ʻoku lave ai ki he “hingoa ʻe 12 ʻo e kau ʻapositolo ʻe toko 12 ʻa e Lamí.” (Fakahā 21:14) Fakakaukau ki he fakamoʻoni ʻoku tau fakamulituku ai ko e fika 144,000 ko e fika moʻoni foki mo ia.

 ʻOku hiki ʻi he Fakahā 7:4 “ko e tokolahi ʻo e faʻahinga ko ia naʻe silaʻí [pe fakapapauʻi ke moʻui ʻi hēvaní], ko e toko 144,000.” ʻI he potutohi ʻo e veesi ko ení, ʻoku toe lave ai ki ha kulupu hono ua: “Ko ha fuʻu kakai lahi, ʻa ia naʻe ʻikai lava ʻe ha tangata ke ne lau.” Ko e faʻahinga ʻoku kau ʻi he “fuʻu kakai lahi” ʻoku nau maʻu foki ʻa e fakamoʻui mei he ʻOtuá. (Fakahā 7:​9, 10) Kapau ʻoku ʻikai ko ha fika moʻoni ʻa e 144,000, kae ʻuhinga pē ki he faʻahinga kotoa ʻe fakahaofí, ʻoku ʻikai leva ke ʻuhinga lelei ke lave ki ha toe kulupu ʻo e kakaí ʻa ia ʻoku ʻikai lava ʻe ha tangata ke ne lau. a

 Tānaki atu ki aí, ko e toko 144,000 ʻoku fakamatalaʻi ia “naʻe fakatau mei he lotolotonga ʻo e faʻahinga ʻo e tangatá ko e ngaahi ʻuluaki fua.” (Fakahā 14:4) Ko e kupuʻi lea “ʻuluaki fua” ʻoku ʻuhinga ia ki ha faʻahinga tokosiʻi ʻoku fili mai mei ha kulupu tokolahi ange. ʻOku feʻungamālie ai ke fakamatalaʻi ʻaki ʻa e faʻahinga te nau kaungāpule mai mei hēvani mo Kalaisi ki he faʻahinga ʻoku ʻikai lava ʻo lau honau tokolahí ʻi he māmaní.​—Fakahā 5:​10.