A tota Jehofa o amega ka rona kgotsa a o itlhokomolosa mathata a batho ba lebaneng le one mo lefatsheng? Karabo ya Baebele ya potso eo e a re gomotsa. Ruri Modimo o amega ka batho e bile o batla gore re itumelele botshelo. Letsatsi le letsatsi o dira gore batho—tota le e leng batho ba ba sa lebogeng—ba itumelele bomolemo jwa gagwe jo bogolo. Ela tlhoko mafoko a ga moaposetoloi Paulo.—Bala Ditiro 14:16, 17.

Fa Paulo a ne a bua le batho ba kwa motseng wa Lisetera ba ba neng ba sa obamele Modimo o ne a re: “Mo dikokomaneng tse di fetileng [Modimo] o ne a letla ditšhaba tsotlhe go tswelela mo ditseleng tsa tsone, le mororo, tota, a ne a se ka a itlogela a se na bosupi ka gore a ne a dira molemo, a lo naya dipula go tswa legodimong le dipaka tsa maungo, a tlatsa dipelo tsa lona ka botlalo ka dijo le boitumelo jo bogolo.” Mafoko ao a ne a kaya eng mo bathong ba ba neng ba reeditse Paulo?

Go ne go le motlhofo gore batho ba Lisetera ba tlhaloganye mafoko a ga Paulo. Ba ne ba nna mo lefelong la temo e bile ba nna mo kgaolong e e nang le mmu o o nonneng le e e nang le metsi a mantsi. Mme jaaka Paulo a ne a ba gakolola, Modimo ke Motswedi wa pula le dipaka tsa maungo. Ka jalo, nako le nako fa ba roba dijalo tse dintsi le fa ba itumelela dijo tse di monate, ba ne ba solegelwa molemo ke dilo tse Modimo a neng a ba direla tsone.

Mafoko a Paulo a neng a a bolelela batho ba kwa Lisetera a re ruta dithuto di le mmalwa tsa botlhokwa ka ga Jehofa Modimo.

Jehofa o re naya kgololesego ya go itlhophela. Ela tlhoko gore Jehofa o ne a letla batho ba Ditšhaba tsotlhe ‘go tswelela mo ditseleng tsa bone.’ Buka nngwe e e neng e dirisiwa ke baranodi ba Baebele ya re polelwana eno e ka raya “go dira se ba se ratang” kgotsa “go dira se ba akanyang gore se siame.” Jehofa ga a pateletse ope go mo obamela. O re neile kgololesego ya go itlhophela—go itlhophela gore re batla go tshela jang.—Duteronome 30:19.

Jehofa o batla gore re mo itse. Paulo o ne a re ga a “itlogela a se na bosupi.” Buka e e umakilweng e bontsha gore polelwana eno e ka ranolwa e le, “o bontshitse batho gore ke Modimo yo o ntseng jang.” Popo ya Modimo e na le bosupi jo bo bonalang jwa ‘dinonofo tsa gagwe tse di sa bonaleng,’ tse di akaretsang bomolemo, botlhale, maatla le lorato lwa gagwe. (Baroma 1:20) Jehofa o senotse go le gontsi thata ka ga gagwe mo Baebeleng. (2 Timotheo 3:16, 17) A seo ga se bontshe gore o batla gore re mo itse?

Jehofa o batla gore re itumele. Paulo o ne a re: “O tlatsa dipelo tsa [rona] ka botlalo ka dijo le boitumelo jo bogolo.” Tota le e leng moleofi yo o sa itseng Jehofa a ka ja dijo go itumedisa pelo ya gagwe le go nna le boitumelo. Le fa go ntse jalo, Modimo o batla gore re nne le boitumelo jwa mmatota le jo bo nnelang ruri. Seo se ka kgonega fa fela re ithuta boammaaruri ka ga gagwe le go bo dirisa mo botshelong jwa rona.—Pesalema 144:15; Mathaio 5:3.

Bomolemo jwa ga Jehofa bo re solegela molemo rotlhe letsatsi le letsatsi. Ke eng o sa ithute mo go oketsegileng malebana le kafa o ka bontshang ka teng gore o leboga Modimo yo o tlatsang pelo ya gago “ka botlalo ka dijo le boitumelo jo bogolo”?