A o batla go itse boammaaruri ka Modimo—gore ke mang, o rata eng, ga a rate eng le gore thato ya gagwe ke eng? Mo Lefokong la gagwe e leng Baebele, Jehofa Modimo o senola boammaaruri jotlhe ka ga gagwe. Mme ga se mongwe le mongwe fela yo o ka balang Baebele a bo a tlhaloganya boammaaruri joo ka botlalo. Ka ntlha yang? Ka gonne go tlhaloganya boammaaruri ka dilo tsa semoya ke tshiamelo; ga e bonwe ke mongwe le mongwe. Mma re sekaseke se Jesu a neng a se bolela malebana le kgang eno.—Bala Mathaio 11:25.

Temana eo e simolola ka mafoko ano: “Ka nako eo Jesu o ne a bua jaana fa a araba.” Ka jalo, gongwe se Jesu a neng a se bua e ne e le go tsibogela se se sa tswang go direga. O ne a sa tswa go kgalemela batho ba ba neng ba sa batle go reetsa, ba ba nnang kwa metseng e meraro ya Galalea kwa a ileng a dira dikgakgamatso gone. (Mathaio 11:20-24) O ka nna wa ipotsa gore ‘Go ne ga tla jang gore go nne le batho ba ba neng ba bone dikgakgamatso tsa ga Jesu mme ba bo ba sa amogele boammaaruri jo a neng a bo ruta?’ Go bo batho bao ba ne ba sa batle go reetsa go ne go amana le go bo dipelo tsa bone di le logwadi.—Mathaio 13:10-15.

Jesu o ne a itse gore e le gore re tlhaloganye boammaaruri jo bo mo Baebeleng, re tlhoka dilo tse pedi tseno: Thuso ya Modimo le dipelo tse di siameng. Jesu o ne a re: “Ke go baka phatlalatsa, Rara, Morena wa legodimo le lefatshe, ka gonne o fitlhetse ba ba botlhale le ba ba bonokopela dilo tseno mme o di senoletse masea.” A o lemoga gore ke ka ntlha yang fa go tlhaloganya boammaaruri jo bo mo Baebeleng go ka tsewa e le tshiamelo? Jehofa, “Morena wa legodimo le lefatshe,” o na le tshwanelo ya go fitlha kgotsa go senola boammaaruri ka gonne ke molaodimogolo. Le fa go ntse jalo, Modimo o naya mongwe le mongwe tshono ya go tlhaloganya boammaaruri. Ke mo mabakeng afe a senolang boammaaruri jwa Baebele mo bathong ba bangwe mme a sa bo senolele ba bangwe?

Jehofa o rata batho ba ba ikokobeditseng e seng ba ba mabela. (Jakobe 4:6) O fitlha boammaaruri mo “bathong ba ba botlhale le ba ba nang le temogo”—batho ba ba nang le botlhale jwa lefatshe le ba ba rutegileng ba ka ntlha ya boikgogomoso jwa bone le ka ntlha ya go itshepa ba akanyang gore ga ba tlhoke thuso. (1 Bakorintha 1:19-21) Mme o senolela “masea” boammaaruri—batho ba ba tlang kwa go ene ba le peloephepa, ba le boikokobetso jaaka bana. (Mathaio 18:1-4; 1 Bakorintha 1:26-28) Morwa Modimo e bong Jesu, o ne a itse batho ba mofuta oo. Baeteledipele ba bodumedi ba bantsi ba ba ikgogomosang, ba ba rutegileng ba ne ba sa tlhaloganye molaetsa wa ga Jesu mme o ne o tlhaloganngwa ke batshwaraditlhapi ba maemo a a kwa tlase. (Mathaio 4:18-22; 23:1-5; Ditiro 4:13) Mme gape, batho bangwe ba ba humileng e bile ba rutegile ba ba neng ba bontsha boikokobetso jwa mmatota ba ne ba nna balatedi ba ga Jesu.—Luke 19:1, 2, 8; Ditiro 22:1-3.

Re boela kwa potsong e e boditsweng kwa tshimologong ya setlhogo seno: A o batla go itse boammaaruri ka Modimo? Fa e le gore go ntse jalo, o ka gomodiwa ke go itse gore Modimo ga a rate batho ba ba itsayang ba le botlhale ka tsela ya lefatshe. Go na le moo, o rata batho ba ba ka lebelelwang kwa tlase ke batho ba ba nang le botlhale jwa lefatshe. Fa o ithuta Lefoko la Modimo ka boikokobetso, o ka nna mongwe wa batho ba Jehofa a ba nayang mpho e e botlhokwa—go tlhaloganya boammaaruri ka ga gagwe. Go tlhaloganya boammaaruri joo go tla dira gore botshelo jwa gago bo nne le bokao gone jaanong e bile go ka dira gore o bone “botshelo jwa mmatota”—botshelo jo bo sa feleng mo lefatsheng le lesha la Modimo le le solofeditsweng la tshiamo le le tla tlogang le tla. *—1 Timotheo 6:12, 19; 2 Petere 3:13.