Jesu O ne A Leba Dipolotiki Jang?

BAKWADI ba Diefangele ba tlhalosa ditiragalo di le mmalwa tse di neng tsa dira gore Jesu a lebane le maemo mangwe a a amanang le dipolotiki ka nako ya bodiredi jwa gagwe. Ka sekai, ka bonako fela fa Jesu a sena go kolobediwa a na le dingwaga di ka nna 30, Diabolo o ne a mo solofetsa go mo dira mmusi wa lefatshe. Moragonyana mo bodireding jwa gagwe, boidiidi jwa batho bo ne jwa batla go mo dira kgosi. Gape morago ga foo, batho ba ne ba leka go mo pateletsa go nna molweladiphetogo wa dipolotiki. Jesu o ne a dira eng? Mma re sekaseke ditiragalo tseno.

Mmusi wa lefatshe. Diefangele di bolela gore Diabolo o ne a solofetsa go naya Jesu bolaodi jwa “magosi otlhe a lefatshe.” A ko o akanye ka dilo tse di molemo tse Jesu a ka bong a di diretse batho ba ba bogang fa a ka bo a amogetse maemo a go nna mmusi wa lefatshe! Tota ga go motho ope yo o amegang ka tsela e batho ba busiwang ka yone e bile a ikeetleleditse go rarabolola mathata a bone, yo o neng a ka gana tshono ya go nna mmusi wa lefatshe. Le fa go ntse jalo, Jesu o ne a e gana.—Mathaio 4:8-11.

Kgosi. Bontsi jwa batho ba motlha wa ga Jesu ba ne ba senka mmusi yo o neng a ka rarabolola mathata a bone a itsholelo le a dipolotiki. E re ka batho bao ba ne ba kgatlhiwa ke dilo tse Jesu a neng a kgona go di dira, ba ne ba batla gore Jesu a nne le seabe mo dipolotiking. Jesu o ne a dira eng? Mokwadi wa Efangele e bong Johane a re: “Jesu, ka a itse gore ba ne ba tloga ba tla go mo tshwara go mo dira kgosi, a tswa gape a ya kwa thabeng a le esi fela.” (Johane 6:10-15) Go bonala sentle gore Jesu o ne a sa batle go inaakanya le dipolotiki.

Molweladiphetogo wa dipolotiki. Ela tlhoko se se neng sa direga malatsi pele ga Jesu a bolawa. Barutwa ba Bafarasai ba ba neng ba sa batle go busiwa ke Mmusomogolo wa Roma ba ne ba ikopanya le Baherote, maloko a mokgatlho wa dipolotiki a a neng a rata go busiwa ke Roma, ba bo ba ya go bua le Jesu. Ba ne ba batla go mo pateletsa gore a tseye letlhakore mo dipolotiking. Mme ba ne ba dira jalo ka go mmotsa gore a Bajuda ba tshwanetse go duela lekgetho mo pusong ya Roma.

 Mareko o ne a kwala karabo ya ga Jesu: “‘Ke ka ntlha yang fa lo nteka? Ntlisetsang denario gore ke e bone.’ Ba e tlisa. Mme a ba raya a re: ‘Setshwantsho seno le mokwalo ke tsa ga mang?’ Ba mo raya ba re: ‘Ke tsa ga Kaesara.’ Ka jalo Jesu a re: ‘Duelang Kaesara dilo tsa ga Kaesara, mme Modimo dilo tsa Modimo.’” (Mareko 12:13-17) Fa buka ya Church and State—The Story of Two Kingdoms e akgela ka lebaka la go bo Jesu a ne a araba jalo, ya re: “O ne a gana go nna mogolodi wa tsa dipolotiki a bo a bontsha sentle gore Modimo o tshwanetse go newa dilo tsa gagwe mme Kaesare a newe dilo tsa gagwe.”

Seo ga se kaye gore Keresete o ne a sa amege ka mathata a batho a a jaaka khumanego, bonweenwee le tshiamololo. Tota e bile, Baebele e bontsha gore o ne a amegile thata ka boemo jo bo tlhomolang pelo jwa batho ba mo motlheng wa gagwe. (Mareko 6:33, 34) Le fa go ntse jalo, Jesu ga a ka a simolola letsholo la go tlosa tshiamololo e e dirwang mo lefatsheng le fa bangwe ba ile ba leka go dira gore a nne le seabe mo dikganetsanong tsa motlha oo.

Jaaka dikai tseno di bontsha, go bonala sentle gore Jesu o ne a gana go nna le seabe mo dipolotiking. Mme go tweng ka Bakeresete gompieno? Ke eng se ba tshwanetseng go se dira?