Kalogo ya Bo131 ya Gileade

‘Itumediseng Jehofa’

KA September 10, 2011 ba malapa a baithuti, ditsala tsa bone le ba bangwe ba ba neng ba tlile go ba ema nokeng, ba ne ba phuthega ba tlile kalogong ya setlhopha sa bo131 sa Sekolo sa Baebele sa Watchtower sa Gileade. Fa go simololwa, dibui mmogo le baithuti ba ne ba tshogile. Mme le fa go ntse jalo, fa thulaganyo e wela, botlhe ba ba 9 063 ba ba neng ba le teng ba ne ba wetse makgwafo e bile ba nyenya, ba itumeletse dipuo, dipontsho le dipotsolotso.

Stephen Lett, yo e leng leloko la Setlhopha se se Laolang sa Basupi ba ga Jehofa e bile e le modulasetulo wa thulaganyo eno, o ne a neela puo ya ntlha. O ne a tlotla ka ditemana tsa Baebele tse di tlhalosang Jehofa Modimo a na le mmele wa tshwantshetso a bo a tlotla thata ka ditemana tse di tlhalosang kafa Jehofa a dirisang matlho, ditsebe, diatla le mabogo a gagwe a tshwantshetso ka gone.

Sebui se ne sa simolola ka go tlotla ka 2 Ditiragalo 16:9, e e reng “matlho a [ga Jehofa] a ya kwa le kwa mo lefatsheng lotlhe gore a bontshe ba pelo ya bone e feletseng mo go ene nonofo ya gagwe.” Baithuti ba ne ba kgothalediwa gore ba ineele ka pelo yotlhe mo go Jehofa. Ba ne ba bolelelwa gore ba ka etsa Modimo ka go batla se se molemo mo bathong. Go tswa foo, Mokaulengwe Lett o ne a tlotla ka 1 Petere 3:12, e e reng ditsebe tsa ga Jehofa di ntlheng ya mekokotlelo ya basiami. O ne a rotloetsa baithuti gore ba nne ba rapela Jehofa, ba gakologelwa gore ruri o batla go utlwa dithapelo tsa bone.

Gape sebui se ne sa tlotla ka Isaia 41:13, e mo go yone Jehofa a solofetsang jaana: “Nna, Jehofa Modimo wa gago, ke tshwere seatla sa gago sa moja, Nna yo ke go rayang ke re, ‘O se ka wa boifa. Nna ke tla go thusa.’” Mokaulengwe Lett o ne a bua jaana go tswa pelong e bile a le botsalano: “Ela tlhoko mafoko ano a ga Jehofa a a amang pelo. O otlolola seatla sa gagwe gore a tshware seatla sa rona.” Go tswa foo o ne a bolelela baithuti gore ka metlha ba letle Jehofa gore a ba thuse mme le ka motlha ba se ka ba gana thuso ya gagwe. Gape o ne a re baithuti ba ka etsa Jehofa ka go otlolola diatla tsa bone gore ba thuse ba bangwe.

Kwa bofelong, Mokaulengwe Lett o ne a bala Isaia 40:11. O ne a kgothaletsa bareetsi gore ba bone ka leitlho la mogopolo kafa temana eo e tlhalosang ka gone tsela e Jehofa a leng lorato ka yone. Mokaulengwe Lett o ne a re: “Jehofa o re phutha ka mabogo a gagwe. O re tshola mo sehubeng sa gagwe.” Re tshwanetse go itshwara jang? Baithuti ba ne ba kgothalediwa gore ba nne ba le bonolo jaaka kwanyana gore Jehofa a batle go ba tshola mo sehubeng sa gagwe.

“Re na Le Letlotlo Leno mo Dijaneng Tsa Letsopa”

David Splane wa Setlhopha se se Laolang o ne a tlotla ka setlhogo seo se se theilweng mo Dikwalong. (2 Bakorintha 4:7) Letlotlo leno ke eng? A ke kitso kgotsa botlhale? Sebui se ne sa re: “Nnyaa. Letlotlo le moaposetoloi Paulo a neng a bua ka lone ke ‘bodiredi jono’ jwa ‘go dira gore boammaaruri bo bonatshege.’” (2 Bakorintha 4:1, 2, 5) Mokaulengwe Splane o ne a gopotsa baithuti gore dikgwedi tse tlhano tse ba neng ba di dirisitse ba ithuta di ne di ba baakanyetsa kabelo e e kgethegileng mo bodireding. Ba tshwanetse go tsaya kabelo eno e le ya botlhokwa thata.

Sebui se ne sa tlhalosa gore ‘dijana tsa letsopa’ di kaya mebele ya rona ya senama. O ne a tlhalosa kafa sejana sa letsopa se farologaneng ka gone le sejana sa gouta. Dijana tsa gouta di dirisiwa sewelo. Mme dijana tsa letsopa tsone di diretswe go berekisiwa. Fa re ka tsenya letlotlo mo sejaneng sa gouta, re ka nna ra tlhoma mogopolo mo sejaneng le mo letlotlong le le mo go sone ka go tshwana. Mokaulengwe Splane o ne a re: “Lona baithuti, ga lo batle go dira gore batho ba lebise  tlhokomelo mo go lona. E re ka lo le barongwa, lo batla go lebisa batho kwa go Jehofa. Lo dijana tsa letsopa tsa maemo a a kwa tlase.”

Fa sebui se tswelela ka tshwantshiso eno, se ne sa re mo metlheng ya ditiragalo tsa Baebele, dijana dingwe tsa letsopa di ne di sa she mme dingwe tsa tsone di ne di tshasiwa seedi sengwe se se thata gore di se ka tsa ketloga. Barongwa ba ka tshwana le tsone jang? Kwantle ga pelaelo, mo dikgweding tsa bone tsa ntlha ba le mo kabelong ya bone, barongwa ba tla lebana le mathata mangwe a a tla dirang gore ba nne thata jaaka dijana tsa letsopa tse di tshasitsweng seedi se se thata. Ba tla kgona go itshokela go tshwaiwa phoso e bile ba ka se kgopisege motlhofo jaaka pele. Mokaulengwe Splane o ne a re: “Lo tla lemoga gore lo ka itshoka go feta kafa lo neng lo ka akanya ka teng.” Letlotlo leno la bodiredi, Jehofa ga a le naya baengele mme o le neile dijana tsa letsopa. Sebui se ne sa konela ka go re: “Seo se bontsha gore Jehofa o a lo tshepa.”

“O Siane Le ba Ba Tsamayang ka Dinao . . . O ka Taboga Jang Lobelo le Dipitse?”

Samuel Herd wa Setlhopha se se Laolang o ne a botsa jaana: “O ka kgona go taboga sekgala se se kana kang mme o taboga ka lobelo lo lo kana kang?” Ke ka ntlha yang fa a ne a botsa baithuti potso eo? Sebui se ne sa bapisa se se diragaletseng baithuti le se se diragaletseng moporofeti Jeremia. Monna yono yo o ikanyegang o ne a tsaya gore dikgwetlho tse a neng a lebane le tsone di ne di le boima. Mme o ne a tla lebana le dikgwetlho tse di fetang tseo mo isagweng. Ka jalo, Jehofa o ne a mmotsa jaana: “E re ka o siane le ba ba tsamayang ka dinao, mme ba ne ba tle ba go lapise, jaanong o ka taboga jang lobelo le dipitse?”—Jeremia 12:5.

Mokaulengwe Herd o ne a amanya ntlha eno le baithuti jaana: “Lo ka nna lwa akanya gore lo ntse lo taboga le dipitse ka ntlha ya ditlhatlhobo tsotlhe tse lo di kwadileng. Mme tota lo ntse lo taboga le ba ba tsamayang ka dinao e seng le dipitse. Kwa dikabelong tsa lona lo tla bo lo taboga le dipitse kgotsa lo lebane le dikgwetlho tse dikgolo go feta tse lo ka akanyang ka tsone. Dilo di tla lo tsamaela jang? Thapiso ya Gileade e lo baakanyeditse go taboga le dipitse mme lo sa lape.” O ne a kgothaletsa baithuti gore ba tswelele ka thapiso ya bone ya semoya le gore ba nne le thulaganyo ya ka metlha ya go ithuta Baebele le go rapela.

Mokaulengwe Herd o ne a bolela gore mo isagweng bangwe ba barongwa bano ba tla kgobega marapo kgotsa ba tla ganediwa. Bangwe ba tla tshwenngwa ke bolwetse kgotsa ke maikutlo a go inyatsa. Mme o ne a tlhomamisetsa baithuti gore ba na le se se tla ba thusang go fenya maemo ape fela a a bosula a ba tla lebanang le one mme ba tswelele ka lobelo ba sa lape. Sebui se ne sa re: “E ka ne lo taboga le ba ba tsamayang ka dinao kgotsa le dipitse, tlhomamisegang gore seatla se se maatla sa Modimo se ka lo thusa gore lo fitlhe kwa bofelong jwa lobelo. Lo tla bo lo le barongwa ba ba atlegileng ba ba tlisetsang Jehofa tlotlo le pako.”

Dintlha Tse Dingwe Tsa Thulaganyo

“O se Ka wa Tsaya di le Dinnye.” John Ekrann, yo e leng leloko la Komiti ya Lekala la United States, o ne a tlotla ka kgang ya ga moporofeti Elisha le motlholagadi yo bomorwawe ba neng ba tlile go tsewa mo go ene ba bo ba rekisiwa go nna batlhanka. (2 Dikgosi 4:1-7) Motlholagadi yono o ne a na le nkgo e nnye fela e e tsholang leokwane. Elisha o ne a mo laela gore a phuthe dinkgo tse dingwe mo baagelaning ba gagwe a re: “O se ka wa tsaya di le dinnye.” Jehofa o ne a dirisa Elisha go dira kgakgamatso gore dinkgo tsotlhe tse motlholagadi a neng a di phuthile di tlale ka leokwane. Go tswa foo, motlholagadi o ne a rekisa leokwane leo mme a nna le madi a a lekaneng go duela dikoloto tsa gagwe le go tlamela lelapa la gagwe ka lobaka lo lo rileng.

Baithuti bano ba ba neng ba tlile go nna barongwa ba ne ba ka ithuta eng mo pegong eno? Fa motlholagadi yono a ne a phutha dinkgo tse dingwe, ga go lebege a ne a ka nnela go tlhopha. Sebui se ne sa re: “A ka tswa a ne a phutha nkgo nngwe le nngwe e e neng e ka tshola leokwane, e bile go ne go ka nna molemo fa di le ditona.” Go tswa foo Mokaulengwe Ekrann o ne a rotloetsa baithuti go amogela kabelo nngwe le nngwe, e ka ne e le kgolo kgotsa e le nnye. O ne a re: “Lo se ka lwa nnela go tlhopha.” Gape o ne a gopotsa  baithuti gore motlholagadi o ne a amogela masego a a tsamaisanang le gore o ne a latela ditaelo tsa ga Elisha go le kana kang. Baithuti ba ne ba ka ithuta eng mo go seno? Re tla amogela masego go ya ka gore re tlhoafetse e bile re na le tumelo go le kana kang. Sebui se ne sa re: “Lo se ka lwa itsemeletsa.”

“Ke Senkgwe mo go Rona.” William Samuelson, molebedi wa Lephata la Dikolo Tsa Puso ya Modimo, o ne a neela puo ya setlhogo seno se se tserweng mo go Dipalo 14:9. O ne a tlotla ka sekao se se molemo sa ga Joshua le Kalebe. Lefoko le le dirisitsweng fano e leng “senkgwe” le ne le bontsha gore banni ba kwa Kanana ba ne ba ka fenngwa motlhofo le gore tiragalo eno e ne e ka nonotsha Baiseraele. Baithuti ba ka ithuta eng fano? Sebui se ne sa re: “Mo nakong e e tlang fa lo ntse lo le mo bodireding, tsayang gore dikgwetlho tse lo lebanang le tsone di tla lo nonotsha.”

“A Tumelo ya Bone e e Jaaka Sekepe e Tla Itshetlela fa go Tsoga Matsubutsubu?” Mongwe wa batlhatlheledi e bong Sam Roberson, o ne a tlhalosa tlhagiso ya ga moaposetoloi Paulo ya gore bangwe ba ne ba “senyegelwa ke tumelo jaaka go thubega ga sekepe.” (1 Timotheo 1:19) O ne a rotloetsa baithuti go thusa ba bangwe gore ba nne le tumelo e e nonofileng mo go Jehofa Modimo. O ne a re: “Tiro ya lona e ka tshwantshiwa le ya mothudi.” Ka tsela efe? Mothudi o tshwaraganya keetane gore e kgone go tshwara sekepe gore se itshetlele sentle. Barongwa le bone ba thusa baithuti ba Baebele gore ba nne le dinonofo tsa semoya tse di tla ba thusang gore ba bolokwe.

Sebui se ne sa tshwantsha dikarolwana tsa keetane le dinonofo di le robedi tse di mo go 2 Petere 1:5-8. Mokaulengwe Roberson o ne a bolela gore fa barongwa ba thusa batho ba ba ithutang le bone Baebele go bona kafa Jehofa a bontshang dinonofo tseno ka gone, kamano ya baithuti bao le Jehofa e tla nonofa. Ba tla itshokela mathata ape a e keteng matsubutsubu a a ka lekang tumelo ya bone.

Maitemogelo le Dipotsolotso

Motlhatlheledi yo mongwe e bong Michael Burnett, o ne a kopa baithuti ba Gileade gore ba anele mangwe a maitemogelo a ba nnileng le one bosheng fa ba rera ba bo ba dire dipontsho ka one. Bareetsi ba ne ba itumelela go utlwa kafa baithuti ba neng ba kgonne go rera ka teng kwa mabenkeleng, kwa boemafofaneng, mo bodireding jwa ntlo le ntlo tota le go rerela mongwe yo o neng a leleditse nomoro e e phoso ya mogala.

Go tswa foo, Michael Hansen wa Lelapa la Bethele la kwa United States, o ne a botsolotsa bakaulengwe ba bararo ba ba nang le dingwaga tse dintsi e le barongwa—Stephen McDowell kwa Panama, Mark Noumair kwa Kenya le William Yasovsky kwa Paraguay. Se ba neng ba se bua se ne se tsamaisana le setlhogo sa puo eno se se reng: “Go Itumelela go Dira Thato ya ga Jehofa.” (Pesalema 40:8) Ka sekai, Mark Noumair o ne a umaka dilo tse di rileng tse di neng tsa itumedisa ene le mosadi wa gagwe fa ba ne ba direla kwa kabelong ya bone. Botsala jo banyalani bano ba neng ba nna le jone le Basupi ba mo lefelong leo bo ne jwa ba itumedisa thata. Dilo tse dingwe tse di neng tsa ba itumedisa e ne e le go bona bakaulengwe ba latela ditaelo, go bona ba dira diphetogo tse dikgolo mo matshelong a bone le go bona kafa Jehofa a neng a segofatsa maiteko a bone ka teng. O ne a tlhomamisetsa baithuti gore ba ne ba tla itumelela dilo tse dintsi thata mo isagweng.

Fa mongwe wa setlhopha sa bo131 a sena go bala lekwalo le le neng le tlhalosa bontle kafa baithuti ba lebogang ka teng, Mokaulengwe Lett o ne a konela thulaganyo ka go kgothaletsa baalogi go dira dilo ka botlhale. O ne a re fa ba dira jalo ba tla “itumedisa Jehofa.” Ruri barongwa bano ba tla itumedisa Jehofa fa ba ntse ba mo direla ka boikanyegi mo dikabelong tsa bone.—Isaia 65:19.

 [Tšhate/Mmapa mo go tsebe 31]

DIPALOPALO MALEBANA LE SETLHOPHA

10 dinaga tse ba tswang kwa go tsone

34,7 palogare ya dingwaga tsa bone

19,0 palogare ya dingwaga tsa bone ba kolobeditswe

13,5 palogare ya dingwaga tsa bone ba le mo bodireding jwa nako e e tletseng

[Mmapa]

(Go bona mokwalo o o feletseng, leba kgatiso)

Barongwa ba abetswe go ya kwa dinageng tse di bontshitsweng fa tlase fano

DINAGA TSE BARONGWA BA ABETSWENG GO YA KWA GO TSONE

BENIN

BRAZIL

BULGARIA

BURUNDI

CAMEROON

CANADA

CENTRAL AFRICAN REPUBLIC

JEREMANE

GHANA

HONG KONG

INDONESIA

KENYA

LIBERIA

LITHUANIA

MALAYSIA

MOZAMBIQUE

NEPAL

PANAMA

PARAGUAY

SIERRA LEONE

SLOVAKIA

AFRIKA BORWA

UNITED STATES OF AMERICA

VENEZUELA

[Setshwantsho mo go tsebe 30]

Baithuti ba Gileade ba dira pontsho ya mangwe a maitemogelo a ba nnileng le one fa ba rera

[Setshwantsho mo go tsebe 31]

Setlhopha sa Bo131 sa Dialogane Tsa Sekolo sa Baebele sa Watchtower sa Gileade

Mo lenaaneng le le fa tlase, mela e balwa go tloga kwa pele go ya kwa morago, mme maina a tlhomagantswe go tloga ka fa molemeng go ya ka fa mojeng wa mola mongwe le mongwe.

(1) Lesch, C.; Lesch, N.; Shakarjian, P.; Shakarjian, T.; Budden, R.; Budden, K.; Nash, T.; Nash, L.

(2) Tremblay, E.; Tremblay, C.; Garvey, D.; Garvey, G.; Gaunt, R.; Gaunt, P.; Lau, J.; Lau, J.

(3) Davis, S.; Davis, S.; Sargeant, J.; Sargeant, J.; Fonseca, C.; Fonseca, S.; Thenard, E.; Thenard, A.

(4) Petratyotin, A.; Petratyotin, R.; Reyes, N.; Reyes, N.; Eisiminger, B.; Eisiminger, S.; Hacker, J.; Hacker, C.

(5) Hartman, E.; Hartman, T.; Goolia, W.; Goolia, K.; Thomas, J.; Thomas, E.; Okazaki, N.; Okazaki, M.

(6) Mills, C.; Mills, A.; Benning, L.; Benning, T.; Sobiecki, S.; Sobiecki, T.; Gagnon, L.; Gagnon, E.

(7) Hansen, B.; Hansen, M.; Fahie, A.; Fahie, M.; Dalgaard, J.; Dalgaard, J.; Andersson, M.; Andersson, R.