A Bogosi Jwa Modimo bo mo Pelong?

Mopapa Benedict XVI o bua jaana mo bukeng ya gagwe ya Jesus of Nazareth: “Go tla ga Bogosi jwa Modimo ke fa motho a reetsa ka pelo yotlhe a bo a dumela.” Batho ba bangwe ba tsaya Bogosi jwa Modimo e le sone seo—phetogo e e nnang teng mo mothong fa a amogela Jesu Keresete a bo a nna le tumelo. A Bogosi jwa Modimo ke phetogo fela e motho a e dirang mo botshelong, ke gore, bogosi ‘jo bo mo pelong’?

JESU ene o ne a tsaya Bogosi e le selo se se botlhokwa thata. Mopapa Benedict o dumela gore Bogosi e ne e le “selo sa konokono se Jesu a neng a bua ka sone fa a ne a rera.” Mo nakong e khutshwane ya bodiredi jwa gagwe, gantsi Jesu o ne a tsamaya mo nageng yotlhe a “rera dikgang tse di molemo tsa bogosi.” (Mathaio 4:23) Ka dithuto tsa gagwe le ka dikgakgamatso tse a neng a di dira, Jesu o ne a bontsha sentle gore Bogosi ga se kgang fela ya go amogela Modimo le go mo ikobela. Bo akaretsa bobusi, katlholo le masego a a nnelang ruri.

Bobusi le Katlholo

Nako nngwe mo malatsing a bofelo a bodiredi jwa ga Jesu, mmaagwe barutwa ba ba atamalaneng thata le Jesu e bong Jakobe le Johane, o ne a tla kwa go Jesu mme a re: “Ntsha taelo gore bomorwaake ba babedi bano ba nne, yo mongwe kafa seatleng sa gago sa moja mme yo mongwe kafa go sa molema, mo bogosing jwa gago.” (Mathaio 20:21) Kwantle ga pelaelo, o ne a sa bue ka sengwe se se mo pelong ya bomorwawe. O ne a tlhaloganya gore mo Bogosing go ne go tla nna le bangwe ba ba tla busang le Jesu mme o ne a batla gore bomorwawe e nne bangwe ba bone. Tota e bile, Jesu o ne a solofetsa baaposetoloi ba gagwe ba ba ikanyegang ba ba 11 gore ba ne ba tla nna mo Bogosing jwa gagwe le go ‘nna mo ditulong tsa bogosi’ ba bo ba “atlhola” le ene. (Luke 22:30) Ka jalo, balatedi ba ga Jesu, ba ne ba tsaya Bogosi jwa gagwe e le bobusi jwa mmatota kgotsa puso.

Go tweng ka batho ba bangwe ba motlha wa ga Jesu? A ba ne ba tlhaloganya Bogosi e le phetogo e motho a e dirang mo botshelong kgotsa ba ne ba lebeletse sengwe se se fetang seo? Pelenyana ga Tlolaganyo ya 33 C.E. fa Jesu a ne a tsena kwa Jerusalema a pagame eselana, boidiidi bo ne jwa mo amogela mme bangwe ba goa ba re: “Boloka Morwa Dafide, re a rapela!” (Mathaio 21:9) Ke ka ntlha yang fa ba ne ba goa jalo? Ba ka tswa ba ne ba lemogile gore Jesu e ne e le Mesia yo o solofeditsweng le gore Modimo o ne a tla mo naya Bogosi jo bo nnelang ruri, “setulo sa bogosi sa ga Dafide rraagwe.” Ba ne ba lebeletse pele poloko, kagiso le tshiamiso tse di neng di tla tlisiwa ke Bogosi joo.—Luke 1:32; Sekarea 9:9.

Masego a a Nnelang Ruri

Tota le batho ba go neng go lebega ba sa kgatlhegele bodiredi jwa ga Jesu go le kalo ba ne ba itse nngwe ya dithuto tsa gagwe. Fa Jesu a ne a bolawa, sekebekwa se se neng se bapotswe go bapa le ene se ne sa mo kopa jaana: “Jesu, o nkgakologelwe fa o tsena mo bogosing jwa gago.” Jesu o ne a mo raya a reng? O ne a tlhomamisetsa monna yono yo o swang ka go re: “O tla nna le nna mo Paradaiseng.”—Luke 23:42, 43.

Go bonala sekebekwa seo se ne se dumela gore fa Jesu a sena go tsosiwa mo baswing, o ne a tla newa Bogosi kgotsa o ne a tla tsena mo go jone. Jesu o tla bo a se na taolo fela ya go tsosa monna yono le go mmopa sesha—mmogo le batho ba bangwe ba le dimilione—mme gape o tla bo a na  le keletso ya go dira jalo. E re ka Jesu a tla newa maatla a go nna Mmusi mo lefelong la moya, o tla leretse batho mo lefatsheng lotlhe masego a a nnelang ruri a Bogosi.—Johane 5:28, 29.

Bogosi mo Gare ga Bone

A Jesu ga a ka a re: “Bogosi jwa Modimo bo mo gare ga lona”? Ee, mafoko ao a ga Jesu a mo go Luke 17:21. Tota e bile, dithanolo dingwe tsa Baebele tsa re, “bogosi jwa Modimo bo mo teng ga lona.” (Ka sekai, bona Baebele e e Boitshepo.) Jesu o ne a kaya eng fa a rialo?

Ditemana tse di dikologileng temana eno di bontsha gore Jesu o ne a bua le setlhopha se se letlhoo sa bodumedi jwa Sejuda se se bidiwang Bafarasai. Go ne go na le dilo tse ba neng ba di lebeletse malebana le Mesia le Bogosi jwa gagwe. Ba ne ba dumela gore Mesia o ne a tla tla a le “mo marung a magodimo” e le Kgosi e e galalelang, a tlile go golola Bajuda mo Baromeng le go tsosolosa bogosi jwa Iseraele. (Daniele 7:13, 14) Le fa go ntse jalo, Jesu o ne a ba bontsha tsela e e phoso e ba neng ba leba dilo ka yone ka go ba raya a re: “Bogosi jwa Modimo ga bo tle bo lemotshega pepenene.” Go tswa foo o ne a re: “Bonang! bogosi jwa Modimo bo mo gare ga lona.”—Luke 17:20, 21.

Dilo tse Jesu a neng a di ruta le dikgakgamatso tsa gagwe di ne di bontsha sentle gore ke Kgosi e e solofeditsweng ya Bogosi joo, mme Bafarasai ba ba neng ba se na maitlhomo a a siameng le tumelo ya mmatota ba ne ba mo ganetsa le go feta. Ba ne ba sa dumele gore Jesu ke Mesia. Ka jalo, o ne a ba bolelela boammaaruri jono: Bogosi, jo bo emelwang ke Kgosi ya jone e e tlhomilweng, bo ne bo le ‘mo gare ga bone.’ Ga a ka a re ba bo batle mo teng ga bone. * Jesu le barutwa ba gagwe ba ne ba eme fa pele ga bone. O ne a re: “Bogosi jwa Modimo bo na le lona fano.”—Luke 17:21, Contemporary English Version.

Bogosi jo o Tshwanetseng go bo Tsaya bo le Botlhokwa

Le fa Bogosi jwa Modimo bo se mo teng ga dipelo tsa batho ba ba sa itekanelang, re tshwanetse go bo tsaya bo le botlhokwa. Dilo tse Jesu a neng a di ruta le dikgakgamatso tsa gagwe di ne di bontsha gore o iketleeleditse go dira gore bareetsi ba gagwe ba nne le tumelo mo tsamaisong e e siameng e e neng e tla dira gore go nne le kagiso ya boammaaruri le polokesego. O ne a batla gore ba nne le tumelo e e neng e tla tokafatsa matshelo a bone. Tota e bile, o ne a ba ruta go rapela jaana: “Rraarona yo o kwa magodimong, a leina la gago le itshepisiwe. A bogosi jwa gago bo tle. A thato ya gago e diragale le mo lefatsheng, jaaka kwa legodimong.” (Mathaio 6:9, 10) Batho ba le bantsi ba ba neng ba reeditse Jesu, ba ne ba amiwa ke mafoko a gagwe mme ba nna le tumelo e e neng ya ba tlhotlheletsa go mo latela gore ba bone masego a Bogosi jwa Modimo.

A o ka rata go nna le tumelo e e ntseng jalo? O tshwanetse go dira eng gore o nne le yone? Gopola mafoko ano a a simololang a Thero e e itsegeng ya ga Jesu ya kwa Thabeng: “Go itumela ba ba tshwenyegang ka se ba se tlhokang semoyeng, e re ka bogosi jwa magodimo e le jwa bone.” (Mathaio 5:3) Ke ka ntlha yang fa o sa dumele go ithuta Baebele le Basupi ba ga Jehofa ba ba go neileng makasine ono? Fa o dira jalo, o tla nna le tsholofelo, e seng fela ya gore o tla fetoga, mme le tsholofelo ya gore go tla nna le puso e e siameng—Bogosi jo bo tla tlisetsang batho botlhe kagiso le polokesego.

[Ntlha e e kwa tlase]

[Mafoko a a mo go tsebe 11]

A Bogosi jwa Modimo bo ne bo le mo dipelong tsa baganetsi ba ga Jesu ba ba tlhogoethata ba ba neng ba batla go mmolaya?