Go Laletsa Batho ka Boikaelelo Bongwe

“GO DIRWA eng mono?” Potso eno e bodiwa ke batho ba le bantsi ba ba fetang gaufi le dikago tse dikgolo tsa Basupi ba ga Jehofa kwa Mogale City (Krugersdorp), gaufi le Johannesburg mo Afrika Borwa. Ka jalo, ka October 12 le 13, 2007, Basupi ba ga Jehofa ba ne ba laletsa batho go tla go bona dikago tsa lekala. Batho ba ne ba lalediwa ka ntlha ya mabaka a le mabedi—go fedisa magatwe a maaka a batho ba neng ba a bua le go ba bontsha se ofisi ya lekala e se dirang go tshegetsa tiro e Jesu Keresete a laetseng gore e dirwe.—Mathaio 28:19, 20.

Ba ba direlang kwa ofising ya lekala ba ne ba baya matshwao a a bonalang sentle kwa hekeng go laletsa batho, ba bo ba isetsa baagelani ba bone ditaletso tse di kgethegileng. Batho ba ba nang le dikgwebo ba ba dirisanang le ofisi ya lekala le ba malapa a bone ba ne ba laleditswe. Batho ba ne ba arabela jang? Baeng ba ba fetang 500 ba e seng Basupi ba ne ba bontshiwa dikago tseno.

Ba ne ba kgatlhwa thata ke motšhine wa MAN Roland Lithoman o o gatisang dimakasine di le 90 000 ka ura. Gape ba ne ba kgatlhwa ke motšhine o o kopanyang dibuka le lefelo le legolo la go paka le go romela dikgatiso tse di fetang ditone di le 14 letsatsi le letsatsi. Basupi ba ba dirang mo mafapheng a a farologaneng ba ne ba baya ditshwantsho tse di kgatlhang mo dikagong tseno, go akaretsa le se se sobokanyang hisitori ya go gatisa dibuka go tloga fa go ne go dirisiwa motšhine wa Gutenberg go fitlha mo nakong eno e go dirisiwang motšhine wa bosheng wa litho-offset. Setshwantsho se sengwe se ne se bontsha kafa lekala le tlhokomelang tikologo ka gone. Ka sekai, go na le motšhine o o fisang digase tse di kotsi le monko wa dienke tse di dirisiwang mo metšhineng e e gatisang mme go na le tanka e e gopang lerole le le tswang mo pampiring e e dirisiwang mo metšhineng.

Lokwalodikgang longwe lo ne lwa gatisa setlhogo se se neng sa bega gore baithaopi ba le 700 ba ba nnang mo lefelong leno “ke badiredi ba ba ineetseng mo go Jehofa.” Gape lo ne lwa bua ka “bophepa jwa maemo a a kwa godimo le kafa dilo di dirwang ka nako ka gone” kwa bogatisetsong. Monna yo o neng a ganetsa Basupi ba ga Jehofa o ne a tla go bona dikago tseno. Morago ga moo o ne a kwala lekwalo le le reng: “Ke a lo akgola. Ga se gantsi motho a ka bonang dilo di dirwa ka manontlhotlho a magolo jalo.”

Baeng ba le bantsi ba ne ba itumelela go tsamaisiwa mo dikagong mme ba ne ba gakgamadiwa ke go bona gore lekala le na le dikgatiso tse di theilweng mo Baebeleng ka dipuo di le 151 mme dinaga di le 18 tsa borwa le bogare jwa Afrika le tsone di gatisediwa dibuka ke lekala leno. Dikago tsa makala a Basupi ba ga Jehofa mo lefatsheng lotlhe di ka etelwa ka nako ya tiro. Ke eng fa o sa ikgolaganye le ofisi ya lekala e e mo lefelong la lona go itse dinako tse o ka etang ka tsone?

[Setshwantsho mo go tsebe 14]

Baeng ba ba gorogang mo dikagong tsa lekala

[Setshwantsho mo go tsebe 14]

Taletso

 [Ditshwantsho mo go tsebe 15]

Dikago tsa lekala la Afrika Borwa kwa Mogale City, Afrika Borwa

[Ditshwantsho mo go tsebe 15]

Motšhine o o gatisang wa MAN Roland Lithoman web-offset

[Ditshwantsho mo go tsebe 15]

Motšhine o o kopanyang dibuka

[Ditshwantsho mo go tsebe 15]

Lefelo la go paka le go romela dikgatiso